Emafesa nega-se a emitir facturas que xa pagamos, quere que paguemos tamén polo concepto: Cobro Fraccionado Taxa Depuración (Atrasos) - Modelo para contestar a Emafesa e Instancia coa Queixa ao Concello

O 20 de agosto de 2018, o entón Alcalde, Jorge Suárez, asinaba as liquidacións polo concepto de "Depuración de Augas Residuais", polo período comprendido entre o 1 de xaneiro de 2015 e o 31 de marzo de 2017. (BOP Nº172 do 10.09.2018). Creando-se un concepto de "Atrasos" polo citado período, subdividindo-se este en varios períodos diferentes, polo que se elaborou un calendario de cobro en 8 recibos, que comezaría unha vez celebradas as Eleccións Locais de Maio de 2019:

💧 Dous períodos semestrais, en dous recibos únicos, sen outros conceptos diferentes ao de "Depuración de Augas Residuais (Atrasos)". Recibos que a Plataforma chamou a "Non Pagar", dentro dunha campaña de mobilización veciñal contra o cobro por un servizo que non se prestou. Ademais de discriminatorio con respecto a outra parte da veciñanza de Ferrol (Conca d'A Malata e o Rural) que, como é lóxico, aínda ao día de hoxe non pagan, pois non reciben o servizo, e coa veciñanza de Narón que non comezaron a pagar ate despois de marzo de 2017 que foi cando comezaron a recibir o servizo. A esa parte maioritaria da veciñanza de Ferrol se lles está cobrando a maiores por 31 meses, sobre uns 7,21 millóns de euros, por un servizo que non se prestou.

💧 E os outros seis períodos restantes de dous meses cada un, están incluíndo-os, dentro do recibo ordinario, co concepto "Cobro Fraccionado Taxa Depuración (Atrasos)", xunto aos outros conceptos e facturas que xestiona o seu cobro Emafesa, mais que non lle son propios (Augas de Galicia, Urbaser e Sogama).

Desta vez, para eses seis recibos que na actualidade aínda se seguen pasando, a Plataforma acordou de non facer un chamamento a "non pagar", dado que o non pagar, creaba unha situación que de non ser secundada por un número significativo de persoas, non sería efectiva e sería maior o prexuízo que o beneficio, para poder xestionar este conflito. E despois que requiriría unha serie de pasos e un seguimento administrativamente complicado.

Aínda así, algunhas persoas pediron á Plataforma que elaborara un método para continuar a non pagar eses supostos "atrasos", por un servizo que non se prestou. A Plataforma elaborou ese método que é un proceso en varios pasos que require un seguimento e realizar o proceso en seis ocasións, cada dous meses. Como mencionamos con antelación, neste momento quedan aínda dous recibos, pois o Concello concedeu unha carencia de catro meses, por mor da crise polo Covid-19, polo que aínda quedan por pasar en dous recibos o citado "Cobro Fraccionado ...".

Algunhas veciñas e veciños acordaron pagar eses seis recibos, mais descontando as cantidades polo concepto de "Cobro Fraccionado Taxa Depuración (Atrasos)" e logo pediron ao Concello e a Emafesa a emisión dun novo recibo, coas facturas correspondentes ao pago do tratamento dos residuos sólidos urbanos que corresponde a Sogama; da factura recollida e transporte de residuos (RSU) que corresponde a Urbaser; da factura da taxa do Canon da Auga que corresponde a Augas de Galicia; e polo conxunto de conceptos da factura da auga bimensual ordinaria, por todos os conceptos excepto o de xa mencionado "Cobro Fraccionado ..." que corresponde a Emafesa; e esta, en vez de emitir un novo recibo con esas facturas, responde que é legal que poña o do "Cobro Fraccionado...". Emafesa claro que pode redactar o recibo como queira, e segundo din, hai instrucións do goberno municipal que llo permiten, mais nós tamén temos o dereito a pagar aquilo que pensamos que nos corresponde, nen un céntimo máis. E a recibir a factura do que pagamos. O que se lle pide a Emafesa é que emita factura do que se pagou, todo menos o dos supostos atrasos, por considerar que non se prestou ese servizo ate pasado o 3 de abril de 2017 e que é discriminatorio -no caso de que tivera que ser así- cargar os custes da reparación, probas e mantemento, só sobre unha parte da veciñanza de Ferrol, deixando libre de pago, como xa mencionamos, a outra parte que polo de agora non están pagando nada ate que se poña en funcionamento o sistema de interceptación d'A Malata (como é lóxico) e o do saneamento da zona rural (polo de agora no mundo do esquecemento);  e á veciñanza de Narón que non se lles comezou a cobrar ate despois do citado 3 de abril de 2017 (como tamén é lóxico). Quen realmente se tiñan que facer cargo deses custes eran os concellos de Ferrol e Narón, Augas de Galicia e a Confederación Hidrográfica del Miño-Sil que encomendou a xestión a Xunta e Augas de Galicia mediante Convenio, entidade que daquela era a titular da depuradora, emisario submarino (EDAR) e o cruce e impulsora d'A Malata (EBAR).

Diante da carta de Emafesa negando-se a emitir factura do que se pagou, a Plataforma elaborou un modelo de contestación que a continuación achegamos.

✔ Escrito de Emafesa onde xustifica a inclusión na factura do "Cobro Fraccionado...". | Acceder/Baixar.

✔ Modelo de escrito da Plataforma, para contestar á citada carta de Emafesa. | Acceder/Baixar.

Con posterioridade presentar no Rexistro Xeral do Concello unha Queixa contra Emafesa, por negar-se a emitir novo recibo coas facturas xa pagadas.

✔ Modelo de instancia xeral coa Queixa dirixida ao Concello de Ferrol contra Emafesa. | Acceder/Baixar.

Foto: Depuradora de augas residuais de Ferrol-Narón en Cabo Prioriño.

#EmafesaCenPorCenPublica
#Remunicipalizar
#Remunicipalización
#Emafesa

PLATAFORMA NA DEFENSA DOS SERVIZOS PÚBLICOS,
POLA REMUNICIPALIZACIÓN
Abonda de saqueo! Hai outras alternativas!
Pódese, débese e precísase!
Correo-e: remunicipalizacion.plataforma@gmail.com
Web: https://plataformaferrol.blogspot.com.es/
Facebook: @RemunicipalizarFerrol   |  Twitter: @municipalizarFT
_______

Emafesa atrasou dous meses a emisión dos recibos correspondentes a Novembro/Decembro 2020, facendo-os chegar ás vivendas varios días despois do seu vencemento - Atraso na emisión dos recibos de Emafesa, hackers e 'cartel da limpeza' - Paradoxos e negativas de Emafesa - Custes reais de explotación da depuración

Atraso na emisión dos recibos de Emafesa, hackers e "cartel da limpeza"

Os recibos de Emafesa elaboran-se na sede central de Urbaser en Madrid, que á súa vez é a empresa matriz de Socamex (parte privada de Emafesa). Parece ser que os servidores informáticos, onde se almacena a base de datos, ao menos, de todo o Estado, incluído os de Ferrol (Emafesa), recibiron un ciberataque por parte de hackers que "esixiron unha contraprestación para non facer pública a información que obtiveron ao introducirse de forma presuntamente ilegal nos servidores da compañía". Mágoa que eses segredos non saian á luz, e por outra banda, agardemos que os nosos datos persoais non sexan vendidos. Dá a casualidade que o hackeo coincidiu co proceso de venda do xigante das empresas chamadas medioambientais, propiedade da Firion Investments, unha empresa controlada indirectamente polo fondo da industria Huayu, no que participan Jiangsu Dagang Co Ltd e China Tianying Inc (CNTY), fondo transnacional de orixe chinés que comprou Urbaser en 2016, ao consorcio transnacional de Florentino Pérez (ACS). Un ano antes (2015) Urbaser fora sancionada xunto con outras 50 empresas polo que se coñeceu como o "cartel da limpeza". A Comisión Nacional dos Mercados e a Competencia (CNMC) impuxo unha multa histórica de 98 millóns ás principais compañía do sector por pactar prezos para repartirse o mercado das concesións municipais da limpeza.

Paradoxos e negativas de Emafesaamosamos na imaxe

O recibo correspondente a Novembro/Decembro de 2020, con data do 23 de xaneiro de 2021, está chegando aos nosos fogares estes días. Paradoxo é que cheguen ás caixas de correos das vivendas con posterioridade á data de vencemento que no caso deste recibo que amosamos na imaxe, como doutros miles, é o 23 de marzo deste ano 2021.

Emafesa atrasou dous meses a emisión dos recibos, por mor do mencionado hackeo dos seus servidores, facendo-os chegar ás vivendas varios días despois do seu vencemento. Tamén resulta paradoxo que sendo o recibo de 23 de xaneiro de 2021, no apartado das mensaxes -situado na parte baixa do recibo- coloquen unha débeda con data posterior: 16 de marzo deste ano 2021. Cousas máxicas de quen emite os recibos.

E por último no apartado dos paradoxos, na mesma zona de mensaxes do recibo di textualmente Emafesa que "se necesita factura, póñase en contacto con nós", cousa que fixeron varias persoas despois de pagar, pedindo a emisión dun novo recibo, coas facturas correspondentes ao pago do tratamento dos residuos sólidos urbanos que corresponde a Sogama; da factura recollida e transporte de residuos (RSU) que corresponde a Urbaser; da factura da taxa do Canon da Auga que corresponde a Augas de Galicia; e polo conxunto de conceptos da factura da auga, por todos os conceptos excepto o de "Cobro Fraccionado Taxa Depuración (Atrasos)" que corresponde a Emafesa; e esta, en vez de emitir un novo recibo con esas facturas, responde que é legal que poña o do "Cobro Fraccionado...". Emafesa claro que pode redactar o recibo como queira, mas nós temos o dereito a pagar aquilo que pensamos que nos corresponde, nen un céntimo máis. O que se lle pide a Emafesa é que emita factura do que se pagou, todo menos o dos supostos atrasos no concepto xa mencionado de "Cobro Fraccionado...", por considerar que non se prestou ese servizo ate pasado o 3 de abril de 2017 e que é discriminatorio -no caso de que tivera que ser así- cargar os custes da reparación, probas e mantemento, só sobre unha parte da veciñanza de Ferrol, deixando libre de pago a outra parte que polo de agora non están pagando nada ate que se poña  en funcionamento o sistema de interceptación d'A Malata (como é lóxico) e o do saneamento da zona rural (polo de agora no mundo do esquecemento);  e á veciñanza de Narón que non se lles comezou a cobrar ate despois do citado 3 de abril de 2017 (como tamén é lóxico). Quen realmente se tiñan que facer cargo deses custes eran os concellos de Ferrol e Narón, Augas de Galicia e a Confederación Hidrográfica del Miño-Sil que encomendou a xestión a Xunta e Augas de Galicia mediante Convenio, entidade que daquela era a propietaria da depuradora e emisario submarino (EDAR) e o cruce e impulsora d'A Malata (EBAR).

Custes reais de explotación da depuración

A Plataforma, e sabe-o de sobras o Concello, denunciou que os custes reais de explotación da depuración, anteriores ao 3 de abril de 2017, cando aínda non estaba conectado o sistema de saneamento e depuración, son moito menores que os valores utilizados para calcular a taxa que se nos está cobrando como Atrasos de Depuración. A estafa continúa, e a nosa denuncia tamén.

Documentos de Referencia:

✔ Cartas ao Concello e e Emafesa, solicitando a emisión de novos recibos coa facturas pagadas (Sogam, Urnbaser, Augas de Galicia e Emafesa (Sen Atrasos). | Acceder/Baixar Carta a Emafesa. | Acceder/Baixar Carta ao Concello.

✔ Escrito de resposta de Emafesa negando-se a emisión de novo recibo coas facturas. | Acceder/Baixar.

#EmafesaCenPorCenPublica
#Remunicipalizar
#Remunicipalización
#Emafesa

PLATAFORMA NA DEFENSA DOS SERVIZOS PÚBLICOS,
POLA REMUNICIPALIZACIÓN
Abonda de saqueo! Hai outras alternativas!
Pódese, débese e precísase!
Correo-e: remunicipalizacion.plataforma@gmail.com
Web: https://plataformaferrol.blogspot.com.es/
Facebook: @RemunicipalizarFerrol   |  Twitter: @municipalizarFT
_______

Despois dun longo ano, a Queixa ante a Valedora do Pobo chega ate o final do seu percorrido, ao menos na súa primeira fase, sen que se conseguiran as nosas peticións de diálogo, ante un goberno municipal, o do Sr. Ángel Mato, 'hostil e entorpecedor'

Un goberno municipal, o do Sr. Ángel Mato, "hostil e entorpecedor"

O 4 de febreiro do pasado ano 2020, a Plataforma e 12 dos seus membros da comisión coordinadora, faciamos entrega no rexistro xeral da Xunta de Galicia en Ferrol, do escrito de Queixa á Valedora do Pobo de Galicia contra o Concello de Ferrol, Queixa á que se foron unindo progresivamente, mediante escritos á Valedora, sobre unhas 200 persoas máis, veciñas de Ferrol, ás cales tamén lles foron chegando, mes tras mes, os diferentes relatorios da institución. Mantivemos unha xuntanza en Compostela e nove foron os escritos remitidos pola Valedora, dando-nos conta dos pasos que ía tomando, mesmo manifestando as dificultades que tiñan, pois o Concello non atendía aos seus requirimentos, tendo que reitera-los ate en varias ocasións. Mesmo no penúltimo escrito, recibido pola Plataforma o 22 de decembro do pasado ano 2020, a Valedora manifestaba que "o goberno municipal non atende aos seus reiterados requirimentos, feitos por terceira vez, en poucos meses. Que esta institución ven de comunicar ao Concello, a obriga de atender os seus deberes legais para coa institución, dando-lle un prazo de cinco días para contestar aos seus requirimentos. De non face-lo, o Concello de Ferrol sería considerado como hostil e entorpecedor das súas funcións, facendo-o público de inmediato e destacando tal cualificación no seu informe anual ou especial, se é o caso, ao Parlamento". O Goberno municipal non tardou cinco días, nin seis, tardou máis dun mes en contestar desde a data na que se nos queixou a Valedora, contestou o 22 de xaneiro de 2021, confirmando o seu perfil dun goberno municipal, o do Sr. Ángel Mato, "hostil e entorpecedor".


Soberbios e prepotentes

Despois dun longo ano a Queixa ante a Valedora do Pobo chega ate o final do seu percorrido, ao menos na súa primeira fase. Non porque se atendera a nosa Queixa, senón porque a xudicialización do asunto e as sentenzas negativas, segundo a Valedora, impiden-lle ir máis aló. E o Concello nega-se a manter un diálogo, porque segundo o Alcalde non hai nada que tratar que temos outras canles de participación, así lle contesta á Valedora: "...a veciñanza ten os seus mecanismos legais previstos para as súas consideracións, incluídos o portal de participación cidadá na actividade municipal ademais do marco participativo previsto na lexislación local e de procedemento administrativo". A veciñanza que lle presenta recursos que non responden, a veciñanza que lle pide reunións, información, documentación, ... peticións que non son atendidas... pasando da participación e a transparencia debidas coa cidadanía, establecidas no Regulamento Municipal de Participación Cidadán e na Ordenanza de Transparencia,  non entra nos seus singulares parámetros de participación cidadá. Neste Ferrol non temos sorte cos alcaldes, ou xa o eran así, ou se transforman unha vez que chegan á alcaldía: soberbios e prepotentes.


O final dun percorrido. A consecuencia de non entrar no fondo do asunto: o cobro por un servizo non prestado e a discriminación entre iguais.

A Queixa chegou ao final do seu percorrido. Foi perante un pouco mais dun ano completo. A Valedora nom responde ao asunto do trato desigual ante situacións iguais. Desviase e só fala do sabido e que nós mesmas lle explicamos na Queixa e na reunión que con ela mantivemos na sede institucional en Santiago de Compostela.

A Valedora resposta reproducindo na sua totalidade unha anterior información co Informe do Concello de xuño. Agora emite un novo informe, sen cuestionar-se o feito de nin sequera contestar ás nosas peticións. Podemos imaxinar-nos quen redactou os informes do Concello. No fundamental, foi o Director Xerente de Emafesa, Alejandro Pisa, pois coincide coa carta que está enviando Emafesa ás persoas que solicitan a emisión dun novo recibo sen o concepto de "Cobro Fraccionado Atrasos Depuración".  O último "Oficio da Valedora do Pobo" que nos chegou, e está chegando aos fogares das persoas que apoiaron a Queixa, dá por rematada a mediación da Valedora, sen suceso, ao negar-se o Concello a manter diálogo coa Plataforma, repetindo que o Concello se veu obrigado por sentenza xudicial a aprobar as liquidacións pola depuración de augas residuais de antes de abril de 2017 e os padróns municipais de abonados ao servizo. Sentenza do TSXG que o Concello decide non recorrer, sen facer público o ditame da asesoría xurídica e sen que haxa petición de responsabilidades aos diferentes políticos responsábeis da desfeita que nos fan pagar á veciñanza. Esta Plataforma solicitou no seu momento, que se recorrera a sentenza ante o Tribunal Supremo.

Consideramos lamentábel o citado "Oficio da Valedora", pois non reproba a actitude do Concello de non responder aos nosos requirimentos de diálogo, ás miles de sinaturas reclamando o mesmo, e aos diferentes recursos presentados. O Concello só resposta á Plataforma, a través de terceiros (A Valedora), logo dun ano de continuos requirimentos desta, e aos requirimentos desta Plataforma desde que foi elixido Alcalde en 15 de xuño de 2019. Pensamos que despois de tanto tempo, a Valedora non quere entrar no fondo da Queixa, ante un goberno municipal que se comportou de xeito "hostil e entorpecedor". Para nós o asunto é grave. Como dicimos na Queixa , é grave que só se nos pase factura de 31 meses (7,21 millóns de euros) a unha parte da veciñanza de Ferrol, que na súa grande maioría aínda non estabamos conectados á rede. E á veciñanza de Narón se lles exime de pagar este período de reparación, probas e manutención:

"Consideran este un acto administrativo de discriminación ao tratar de xeito diferente a persoas en situacións similares sen que exista unha xustificación obxectiva e razoábel, vulnerando, co mesmo, o principio de igualdade recollido no artigo 14 da Constitución Española e no artigo 21 da Carta dos Dereitos Fundamentais da Unión Europea e de toda a normativa que deles emanan".

"Polo que, ao non se prestar o servizo, prestación á que está suxeita o pago dunha taxa (artigo 2 da Lei xeral Tributaria), o feito impoñíbel non se produce, segundo o disposto no artigo 13 da Lei 8/1989, de 13 de abril, de Taxas e Prezos Públicos. A prestación do servizo de recepción obrigatoria que especifica a ordenanza, non se produce, o feito impoñíbel non está a ter lugar, polo tanto non se devenga, artigo 15 da citada Lei 8/1989".

E non é algo que non o esteamos repetindo... Penso que temos tratado case todo o que se pode tratar... Mais o problema principal foi que se aprobou unha ordenanza fiscal en 2014 que non foi impugnada polos partidos políticos que daquela votaran encontra (EU, PSOE e BNG), ordenanza que so éra para un ano e aínda seguimos coa mesma en 2021. Logo accedeu á alcaldía un membro da plataforma contra a taxa, Jorge Suárez Fernández, e saíu como saíu, o tema da suspensión acordada en último momento antes do Pleno (que non existe na lexislación), na vez de derogación (que era a proposta inicial) ou modificación, e todo o que xa sabemos: fraude, mentiras, desidia e políticas a favor dos intereses da parte privada de Emafesa (Urbaser-Socamex). Un Alcalde que menosprezou a opinión e contribución, da plataforma veciñal e dos partidos que o puxeron na alcaldía (PSOE e BNG). Polo que a loita contra esta inxustiza continua: Non Pagar.


Obxectivo: Remunicipalizar

Desde a Plataforma partimos da convicción de que os Servizos Públicos non deben ser un negocio, mais desde hai tempo as grandes corporacións multinacionais dedican grandes esforzos para facer-se cos servizos públicos. Para estas corporacións todo é privatizábel e actúan en consecuencia para mercantilizar as nosas vidas aínda máis do que xa están.

A nosa Plataforma pertence a ese movemento internacional que loita para impedir que se privaticen máis servizos públicos, e para rescatar para a xestión pública aqueles que foron privatizados. A municipalización destes servizos é o noso principal obxectivo.

Cando falamos de servizos como o abastecemento da auga, recollida e tratamento dos residuos sólidos e saneamento e depuración de augas residuais, estamos a falar de servizos básicos. O abastecemento da auga e o saneamento xa foron recoñecidos, como dereitos humanos pola Organización de Nacións Unidas en 2010. Esta, polo tanto, é unha das tarefas principais que a veciñanza encomenda ao seu goberno local, que lle garanta estes dereitos e que eses dereitos sexan cubertos por servizos de calidade e a prezos xustos. Baixo o noso criterio, estas dúas condicións, de calidade e prezos xustos, só se poden cumprir cando servizos básicos destas características son de xestión 100% pública.

Ademais nun Concello en declive socioeconómico crónico, cabeceira dunha Comarca de iguais características, non nos podemos permitir que as plusvalías xeradas, na xestión dos servizos públicos por corporacións privadas, fuxan da contorna en forma de beneficios, subtraendo o pouco diñeiro que temos que debera ser reinvestido nesta zona.

#Emafesacenporcenpublica
#Remunicipalizar
#Remunicipalización
#Emafesa

PLATAFORMA NA DEFENSA DOS SERVIZOS PÚBLICOS,
POLA REMUNICIPALIZACIÓN
Abonda de saqueo! Hai outras alternativas!
Pódese, débese e precísase!
Correo-e: remunicipalizacion.plataforma@gmail.com
Web: https://plataformaferrol.blogspot.com.es/
Facebook: @RemunicipalizarFerrol   |  Twitter: @municipalizarFT

_______

A Plataforma irá aos barrios onde abrirá mesas informativas sobre como reclamar ao Concello, despois das cartas de Emafesa requirindo o pago por un servizo de depuración non prestado - Calendario de Mesas Informativas

A Plataforma informará nos barrios mediante mesas informativas sobre como reclamar ao Concello, despois das cartas de Emafesa requirindo o pago por un servizo de depuración non prestado. Mesas onde facilitará os modelos de escritos e as instrucións para facer efectiva dita reclamación. Ademais de informar e facilitar modelos de escritos, a través das súas contas nas redes sociais median, as consultas na conta de correo-e [remunicipalizacion.plataforma@gmail.com] e na súa Web.

MESAS PARA DIFUNDIR O MODELO DE CARTA E INFORMAR

✔ Martes 24 de Novembro, de 11:00 a 12:30 horas, no Mercado de Caranza.

✔ Mércores 25, co mesmo horario na praza da Ilustración, diante de Emafesa.

✔ Xoves 26, co mesmo horario diante do Edificio da Xunta.

✔ Venres 27, co mesmo horario, no Inferniño, nas inmediacións da Farmacia (Esquina Estrada de Castela con Sánchez Calviño).

✔ E o luns 30, co mesmo horario nas inmediacións da porta traseira de entrada ao Rexistro no Concello.

ACTIVIDADE NAS MESAS-INFO

Nas mesas informamos, entregamos modelos, axudamos acubri-los e os recollemos se queredes que o entreguemos desde a Plataforma.

PARA REXISTRAR

Cubrir o modelo de petición ao Concello e presentar no Rexistro Xeral, mais antes por mor da pandemia polo Covid-19, hai que pedir Cita Previa (Hai unha lista de espera de 7 a 10 días)  no 981 944 000, Ext. 230. Polo que recomendamos a quen poida que o envíe por correo-e ao rexistro do Concello, escaneando antes o modelo cuberto e asinado, mais lembra de gardar a mensaxe que se envía, pois é o xustificante de ter enviado. Mais polo xeral o Xefe de Rexistro, remite un xustificante de entrada no mesmo, coa data e asignando un número.

A conta de correo do Rexistro Xeral de Ferrol:
rexistro@ferrol.es

#Emafesacenporcenpublica
#Remunicipalizar
#Remunicipalización
#Emafesa

PLATAFORMA NA DEFENSA DOS SERVIZOS PÚBLICOS,
POLA REMUNICIPALIZACIÓN
Abonda de saqueo! Hai outras alternativas!
Pódese, débese e precísase!
Correo-e: remunicipalizacion.plataforma@gmail.com
Web: https://plataformaferrol.blogspot.com.es/
Facebook: @RemunicipalizarFerrol   |   |  Twitter: @municipalizarFT

_______

A Plataforma en Rolda de Prensa facendo públicas as reclamacións ao Alcalde de Ferrol, Ángel Mato, despois das cartas de Emafesa requirindo o pago por un servizo de depuración non prestado

A Plataforma en Rolda de Prensa facendo públicas as reclamacións ao Alcalde de Ferrol, Ángel Mato, despois das cartas de Emafesa requirindo o pago por un servizo de depuración non prestado.

A representante da Plataforma nesta comparecencia pública, asegurou que "hoxe temos unha boa noticia porque un novo concello, o manchego de Alcazar de San Juan, municipio de pouco máis de 30.000 habitantes, gobernado polo mesmo partido que goberna no noso concello, iniciou o proceso de remunicipalización do servizo de augas, un novo concello que se suma ao movemento pola recuperación de servizos públicos de calidade, con 100% de xestión pública".[1]

"Pola contra -continuou Lupe Ces- estamos aquí para denunciar que a empresa mixta de augas EMAFESA, está enviando cartas aos veciños e veciñas, con advertencia da vía executiva, para reclamarlle atrasos do 2015 cando o servizo de depuración e saneamento non se estaba dando".[2]

A Plataforma anunciou que van invitar a toda a cidadanía afectada a presentar diante da alcaldía un escrito,[3] onde a maiores de sinalar o feito de que até abril de 2017 o sistema de saneamento e depuración non estaba a funcionar, solicitan do alcalde que execute tres reclamacións.

A primeira fai mención á solicitude que leva cada carta para que o Concello certifique a data de conexión ao sistema da vivenda de quen asina a carta, facendo mención ás distintas lexislacións, mesmo á xurisprudencia dunha sentenza do Tribunal Supremo[4] onde se dita que, só se poderá cobrar unha taxa cando a persoa reciba o servizo directamente, non polo feito de que ese servizo se dea: "... existe unha reiterada doutrina xurisprudencial que declara que a efectiva prestación dun servizo municipal é presuposto imprescindíbel para que poida esixirse taxa por tal concepto, por canto o feito impoñíbel no mesmo vén constituído pola efectiva prestación dun servizo que beneficie ou afecte de modo particular ao suxeito pasivo, sen que a mera existencia do servizo municipal sexa suficiente para constituír a unha persoa en suxeito pasivo da taxa establecida para o seu financiamento".

A segunda solicitude fai mención aos recursos[5] presentados no mes de febreiro, vía rexistro municipal, en relación precisamente a estes cobros, que non foron contestados aínda.

A terceira, que a representante da Plataforma cualificou como "situación vergoñenta", é á que fai referencia á Queixa Colectiva[6] presentada diante da Valedora do Pobo. Unha institución que xa en dúas ocasión fixo requirimentos[7] ao Concello de Ferrol e non tiveron resposta. "Solicitamos que o Concello responda a eses requirimentos da Valedora", mentres a Plataforma chama á veciñanza de Ferrol a seguir loitando contra esta estafa que continua da man de EMAFESA, co seu socio privado SOCAMEX e a colaboración necesaria do goberno municipal.

A Plataforma facilitará ás veciñas e veciños, o modelo de escrito dirixido ao Alcalde, Ángel Mato, por medio de correo-e, colgando o enlace nas redes sociais e na web, así como dentro das posibilidades das restricións pola pandemia polo Covid-19, colocando mesas informativas nos barrios. Escrito para entregar no Rexistro Xeral do Concello. Mais por mor das citadas restricións, hai que pedir cita previa por teléfono no 981 944 000, extensión 230.

Notas.-

[1] Web oficial do concello manchego, Alcazar de Sanjuan. | Asinadas as operacións de crédito por valor de 5´5 millóns de euros para remunicipalizar Augas de Alcázar. | 19.11.2020 | Ir á Web.
[2] Carta enviada por Emafesa ás veciñas e veciños de Ferrol, na primeira quincena de novembro deste ano 2020, requirindo o pago. | Acceder/Baixar.
[3] Modelo de Carta elaborada pola Plataforma, dirixida ao Alcalde como Presidente do Concello de Ferrol e como Presidente do Consello de Administración de Emafesa, contestando a Carta de Emafesa, para entregar pola veciñanza afectada, no Rexistro Xeral do Concello en formato pdf. | Acceder/Baixar.
[4] Sentenza do Tribunal Supremo| EDJ 1996/566 STS (Contencioso) de 20 febrero de 1996 | Tribunal Supremo (Contencioso), sec. 2a, S 20-02-1996, rec. 3377/1992 | Acceder/Baixar.
[5] Recurso presentado por veciñas e veciños de Ferrol en Febreiro de 2020, no Rexistro Xeral do Concello contra os recibos emitidos por Emafesa en concepto de "Atrasos Facturación Servizo Depuración". | Acceder/Baixar.
[6] Queixa á Valedora do Pobo, presentada en febreiro de 2020.
[7] Requirimentos da Valedora do Pobo. | Acceder/Baixar.

#Emafesacenporcenpublica
#Remunicipalizar
#Remunicipalización
#Emafesa

PLATAFORMA NA DEFENSA DOS SERVIZOS PÚBLICOS,
POLA REMUNICIPALIZACIÓN
Abonda de saqueo! Hai outras alternativas!
Pódese, débese e precísase!
Correo-e: remunicipalizacion.plataforma@gmail.com
Web: https://plataformaferrol.blogspot.com.es/
Facebook: @RemunicipalizarFerrol   |   |  Twitter: @municipalizarFT

Enviado por
Plataforma Remunicipalizacion
-remunicipalizacion.plataforma@gmail.com-
20 de novembro de 2020 18:52
_______

A Plataforma prepara a resposta ás cartas enviadas por Emafesa para cobrar 'atrasos' da taxa de depuración, do período onde non se prestaba o servizo - Pide a certificación da data da conexión das vivendas ao sistema de saneamento; que se conteste aos recursos presentados en febreiro e aos requirimentos da Valedora do Pobo

Emafesa está enviando cartas ás veciñas e veciños que non pagaron o recibo da taxa de depuración, do período onde non se prestaba o servizo, e a maioría da poboación nin tan sequera estaba conectada ao sistema. Pretende cobrar facturas por un importe de 7.129.145,59 euros (Incluído IVA) en concepto de taxa de depuración de augas residuais, por un período de 31 meses onde non se prestou o servizo. Son 31 meses, desde principios de setembro de 2014 até o 3 de Abril de 2017, que é a data na que oficialmente se puxo o sistema a funcionar. A carta é unha notificación onde se dá un prazo, ate o 9 de decembro, para pagar os recibos, antes de que os envíen ao Concello para que este os cobren por "vía executiva", e alerta de "recargos" se non se fan efectivos antes da data sinalada.

A propia Xunta de Galicia, na páxina de Augas de Galicia, na información sobre a Depuradora de Ferrol, entre outras informacións, di que o seu inicio foi en 2017.

Ante isto, a Plataforma quere manifestar a súa desconformidade co cobro destes recibos e manifestar publicamente que sigue mantendo a súa loita contra esta inxustiza e segue chamando a non pagar eses atrasos.

A Plataforma chamou a non pagar, dentro deste período de 31 meses, onde non se prestou o servizo, só tres recibos:

- O primeiro que corresponde ao período que vai desde o 1 de Setembro ao 31 de decembro de 2014, que emitiu Emafesa no mes de Xaneiro de 2015, que xa caducou, polo tanto nom o poden reclamar. Era un recibo único, de cor sepia, sen outros conceptos, só os dous da depuración (Cota Servizo e Cota Variábel por Consumo).

Os outros dous recibos, tamén únicos como o anterior, mais de cor azul verdoso son :

- O segundo comprendido no período que vai desde o 1 de xaneiro a 30 de xuño de 2015 que Emafesa emitiu en Xuño de 2019.

- O terceiro que corresponde ao período que vai desde o 1 de Xullo a 17 de Setembro de 2015 que emitiu en Xaneiro de 2020.

Estes dous últimos recibos, son os que Emafesa, agora coa carta, está requirindo o seu pago, aínda que os períodos que sinala Emafesa na carta, están trabucados, mais están-se referindo aos períodos mencionados con anterioridade.

Temos que dicir que a Plataforma no seu momento estivo na rúa nos meses de Xaneiro e Febreiro, deste ano 2020, informando á veciñanza e compartindo con qune quixer un modelo de recurso que moitas veciños e veciñas de Ferrol entregamos no Rexistro Xeral do Concello, sen que polo de agora o Alcalde, Ángel Mato, se dignara a responder, como é o seu deber, polos principios de responsabilidade, transparencia e participación.

Con non pagar estes tres recibos (os que está reclamando agora EMAFESA por carta), pensamos que chega para manter viva a loita e buscar unha saída xusta.

Sobre os outros "Atrasos" que están pasando a cobro incluídos nos recibos bimesuais

Con respecto ao resto dos recibos no que veñen incluido o concepto "Atrasos" (Co concepto: "Cobro Fraccionado da Taxa de Depuración"), mesturado con outros conceptos da auga e facturas doutros servizos que cobra Emafesa, mais que son doutras entidades, como o Canon da Auga (Xunta de Galicia - Augas de Galicia), URBASER (Recollida e Transporte de Residuos Solidos Urbanos) e SOGAMA (Polo tratamento dos RSU), desde a Plataforma nom estamos recomendando "non pagar", porque causa moitos problemas, dado a complexidade do recibo e do método para pagar.  O primeiro recibo que incluia entre outros conceptos "Atrasos" comezaron a cobra-lo co segundo recibo do ano 2020, emitido en Abril. Na pandemia polo Covid-19, o Concello acordou adia-los e non cobrar estes "Atrasos" nos dous seguintes recibos bimensuais, mais agora no recibo que están pasando a cobro, emitido en Outubro, xa volven a cobrar estes "Atrasos".

Non Pagar

A Plataforma responte con "Non Pagar" ás cartas que está enviando Emafesa as veciñas e veciños que non están de acordo que lle pasen a cobro a taxa de depuración, do período onde non se prestaba o servizo. Quere lembrar que está presentado un Recurso en febreiro deste ano ante o Concello e unha Queixa ante a Valedora do Pobo. E agora elaborou unha Carta ao Alcalde en resposta  á que está enviando Emafesa, carta que transcribimos a continuación e o enlace á mesma en formato pdf, para a súa difusión e entrega no Rexistro Xeral do Concello.


SR. Alcalde Presidente do CONCELLO DE FERROL, D. Angel Manuel Mato Escalona, e presidente do Consello de Administración da Empresa Mixta de Aguas de Ferrol (EMAFESA).

ASUNTO:

Carta de EMAFESA de Novembro deste ano 2020, co asunto “recibos pendentes de pago”, notificando de supostos non pagos correspondentes ao servizo de depuración dentro do período comprendido entre o 1 de xaneiro e o 17 de setembro de 2015.

Nome e Apelidos: ...................................................................................................................... .
DNI Nº: ......................... . Rúa/Avda/Praza: ................................................................................................. . Núm: ........, Escaleira: ......., Andar: ......., Porta: ...... . Código Postal: .............. . Nº Contrato: .................. .

En relación coa carta emitida por Emafesa, requirindo o pago do servizo de depuración correspondente a un período de 2015, diríxome a Vd. para manifestarlle o meu asombro porque se tardara cinco años en reclamarme un pago por un servizo non prestado e que foi obxecto de denuncia por parte dese mesmo Concello por ser legalmente incorrecto. Non me estou negando a pagar polo servizo de depuración que me corresponda, pero desexaría expoñerlle os seguintes feitos relacionados con esta reclamación:

EXPOSICIÓN DE FEITOS:

1º Na ordenanza municipal nº 17 (artigo 2) indícase que a Taxa será exixible a partir da recepción, posta en servizo e explotación. Do mesmo xeito, o artigo 7 desta ordenanza establece que nace a obrigación de pago cando se inicie a actividade que constitúe o “Feito Impoñible”, entendéndose iniciada a mesma, desde que teña lugar a efectiva posta en servizo das instalacións de recollida e depuración das augas residuais, nos termos establecidos no artigo 3.

2º Por outra parte, o artigo 26, (parágrafo 1, parte b) do Real Decreto Lexislativo 2/2004, de 5 de marzo, Lei Reguladora das Facendas Locais, establece que o “Devengo da TAXA” producirase cando se inicie a prestación do servizo.

É oportuno ter en conta a Sentenza do Tribunal Supremo (Contencioso), sec. 2ª, S 20-02-1996, rec. 3377/1992, onde se aclara que “... a efectiva prestación dun servizo municipal é presuposto imprescindible para que poda exixirse taxa por tal concepto, por canto o feito impoñible no mesmo, ven constituído pola efectiva prestación dun servizo que beneficie ou afecte de modo particular ao suxeito pasivo, sen que a mera existencia do servizo municipal sexa suficiente para constituír a unha persoa en suxeito pasivo da taxa establecida para a seu financiamento, si o servizo non se presta en forma que aquela poda considerarse especialmente afectada por aquel, en forma de beneficio efectivo ou provocación da actividade municipal”.

3º De acordo cos informes de xestión da empresa mixta EMAFESA dos anos 2014, 2015, 2016 e 2017, o informe do enxeñeiro municipal de agosto de 2015, os informes das dúas consultoras de enxeñería contratadas polo propio concello (PW Advisory & Capital EAPPLUS Norcontrol), e actas dos plenos municipais, así como noticias da prensa local, que demostran que o sistema de colectores e interceptación non estaba conectado entre os tanques de tormenta, e a depuradora EDAR de cabo Prioriño, non funcionaba no momento de entrar en vigor a Ordenanza nº 17, publicada no BOP de A Coruña o 3 de setembro de 2014, nin nos 31 meses posteriores, polo que o devengo non debera exixirse segundo establece a Lei e xurisprudencia antes citadas.

A correcta exacción da taxa requiría establecer un plano de control e seguimento das vivendas que, en cada caso, se ían incorporando ao servizo de interceptación e depuración e unha certificación de que realmente se estaba depurando segundo os parámetros exixidos pola normativa vixente, aplicable ao tratamento das augas residuais urbanas. Isto non se fixo.

Tendo en conta os datos aportados por EMAFESA nos seus informes de xestión podemos determinar con bastante precisión o grado de funcionamento do sistema de saneamento e depuración entre os anos 2014 a 2017 como sigue:

De acordo coa táboa anterior, obsérvase que durante o ano 2014, EMAFESA cobrou en exceso o 97% dos contratos suxeitos ao servizo de depuración sen que recibiran a prestación; no ano 2015 o 90% ; no ano 2016 o 80% e no ano 2017 o 50%, considerando na estimación os caudais de auga, consumo eléctrico e lodos citados nos informes sinalados, a respecto dos esperados nun ano normal.

4º Están sen contestar os recursos interpostos, diante deste concello, en febreiro deste ano, contra o cobro dos recibos, onde se solicita a anulación das facturas emitidas por EMAFESA do período comprendido entre setembro de 2014 e marzo de 2017.

Polo exposto anteriormente, SOLICITO atentamente:

1º Certificación fundada, emitida por ese Concello, da data de inicio da prestación efectiva do servizo de depuración da miña vivenda arriba citada, de acordo coa Ordenanza nº 17 e as leis/xurisprudencia sinaladas na EXPOSICIÓN DE FEITOS, co obxecto de poder facer efectivo, no seu caso, o pago agora requirido por EMAFESA.

2º Que se contesten os recursos presentados no mes de febreiro deste ano.

3º Que se contesten os reiterados requirimentos feitos pola Valedora do Pobo.

Ferrol, a . . . de novembro de 2020.

Atentamente,


Documentos:

✔ Carta enviada por Emafesa ás veciñas e veciños de Ferrol, na primeira quincena de novembro deste ano 2020, requirindo o pago. | Acceder/Baixar.

✔ Modelo de Carta elaborada pola Plataforma, dirixida ao Alcalde como Presidente do Concello de Ferrol e como Presidente do Consello de Administración de Emafesa, contestando a Carta de Emafesa, para entregar pola veciñanza afectada, no Rexistro Xeral do Concello en formato pdf. | Acceder/Baixar.

✔ Recurso presentado por veciñas e veciños de Ferrol en Febreiro de 2020, no Rexistro Xeral do Concello contra os recibos emitidos por Emafesa en concepto de "Atrasos Facturación Servizo Depuración". | Acceder/Baixar.

#Emafesacenporcenpublica
#Remunicipalizar
#Remunicipalización
#Emafesa

PLATAFORMA NA DEFENSA DOS SERVIZOS PÚBLICOS,
POLA REMUNICIPALIZACIÓN
Abonda de saqueo! Hai outras alternativas!
Pódese, débese e precísase!
Correo-e: remunicipalizacion.plataforma@gmail.com
Web: https://plataformaferrol.blogspot.com.es/
Facebook: @RemunicipalizarFerrol   |  Twitter: @municipalizarFT

_______

O BNG acusa ao goberno local de negarse a abordar o problema de fondo do saneamento, diante das declaracións feitas polo Alcalde considera que Angel Mato está a eximir de responsabilidade, coas súas omisións, tanto ao Ministerio de Fomento como á Xunta

O Bloque Nacionalista Galego de Ferrol diante das declaracións feitas esta mañá polo Alcalde considera que Ángel Mato está a eximir de responsabilidade, coas súas omisións, tanto ao Ministerio de Fomento como á Xunta, responsábeis principais dun sistema de saneamento inasimilable para a cidade.

O BNG censura que por parte do goberno municipal non se queira abordar o problema de fondo do saneamento e se limite a discutir a porcentaxe que debe pagar sen poñer en dúbida o modelo, nin a forma de xestión e indícalle que a mellor maneira de deixar de pagar o 100% polos custos de saneamento é devolverlle a EDAR ao seu propietario Augas de Galiza.

Iván Rivas, portavoz municipal do BNG, indicou que o convenio con ACUAES debe rectificarse desde tres perspectivas. A primeira, a que ten que ver co computo das porcentaxes de consumo, nas que Ferrol está moi lonxe de supoñer o 70% destas.

A segunda , e que ignora o Alcalde da cidade, é que desde o Mº Fomento se pretende que os ferroláns e as ferrolás pasen a pagar o 25% dunhas obras que cando se asinou o convenio se limitaba ao 10% e que debería asumir integramente o Estado por tratarse dunha obra declarada de interese xeral en 1997.

Isto acontece por responsabilidade exclusiva de ACUES que rematou as obras en 2017, cando o seu compromiso era ter todo rematado en decembro de 2015, e produto deste atraso perdeu parte da financiamento da UE, algo que o goberno local obvia.

E a terceira, ten que ver con que o modelo de saneamento escollido incumpre todo o marco legal que existe ao redor dos sistemas de depuración, mesturando augas pluviais e fecais e que supón uns custes medioambientais e económicos que o actual Alcalde tamén ignora.

Para o BNG compre reclamar ao Ministerio de Fomento o firme compromiso económico para transformar a actual infraestrutura en separativa dado que foi exclusivamente o Estado o responsable da súa construción, pero que pretende que paguemos todos e todas as ferrolás.

Por outra parte hai que lembrar que ACUAES non ten ningún contrato para xestionar os interceptores e os tanques de tempestades e por tanto os importes a aboar deberían ser valorados por este concello previamente a facer efectivo o seu pago, tanto os derivados da construción das obras como os derivados da súa xestión.

Do mesmo modo a mellor maneira de resolver o conflito con Narón é entregar a depuradora ao seu lexítimo propietario, Augas de Galicia, deixando de pagar o 100% da depuración. Deste modo Augas de Galicia emitirá unha factura a cada concello de maneira independente. A partir de aí o concello de Ferrol decidirá aboar ou revisar esa factura pero cando menos pero deixaremos de pagar o 100% dos custes como acontece desde 2014.

Hai que lembrar que ademais de asumir o 100% dos custes de depuración , en base a este convenio eximimos do pago dos tributos correspondentes por esta infraestrutura ao seu propietario, Augas de Galicia e ao seu xestor, EMAFESA, e os veciños e veciñas pagan o custe da reparación dunha EDAR defectuosa que non podía funcionar cando se nos entregou.

O convenio con Augas de Galicia é anual, e por tanto compre que o goberno local deixe sen efecto este convenio o antes posible para evitar ter que seguir asumindo uns custes que non nos corresponden.

Ferrol a, 22 de outubro, de 2020.

Ferrol | Web | Facebook | Twitter.


bng@ferrol.es





Enviado por:
Inácio GZ
-inaciogz@gmail.com-
23 de outubro de 2020 11:07
_______

A Plataforma interven no Pleno Municipal de Ferrol para demandar actuacións concretas do goberno municipal na solución do conflito da depuración, diálogo co Concello de Narón, depurar responsabilidades nas lecturas estimadas irregulares, revisión inmediata da taxa, poñer fin á inxusta situación do barrio de Recimil, mesa de diálogo, transparencia, participación,...

Onte, luns 19 de outubro de 2020, tiña lugar sesión extraordinaria do Pleno de Ferrol, no Pazo Municipal, ás 20:30 horas, (continuación do Pleno ordinario de setembro) para abordar a Proposta de desestimación do requirimento efectuado polo Concello de Narón ao acordo do Concello (Pleno de Ferrol de 28 de novembro de 2019) e aprobación de nova liquidación. E unhas mocións, unha para darlle pulo á construción do monumento ás vítimas do franquismo; outra para instar á Consellería do Mar a dar solucións ás mariscadoras da nosa ría e unha máis relativa á situación do marisqueo na Ría de Ferrol.

Antes de comezar o Pleno tiña pedida a palabra a Plataforma, e no seu nome interveu Lupe Ces nestes termos:

Boa noite!  Concelleiras, Concelleiros, ...  Sr Alcalde...

A Plataforma na Defensa dos Servizos Públicos pola Remunicipalización, levamos sete anos, e tres gobernos municipais, denunciando os abusos e irregularidades que a empresa EMAFESA e o Concello de Ferrol, practican contra a veciñanza, en relación ao servizo de auga, saneamento e depuración.

Así queda rexistrado cos numerosos escritos, recursos, peticións e participación noutros plenos, que vostede leva ignorado na parte que lle corresponde, como está demorando e ignorando, as contestacións aos sucesivos requirimentos da Valedora do Pobo, a raíz da nosa Queixa colectiva, pola vulneración do principio de igualdade e non discriminación en relación ao cobro da taxa de depuración das augas residuais.

No contexto dunha empresa de xestión 100% privada a cargo de SOCAMEX, filial de Urbaser, á súa vez propiedade do fondo chinés Firion Investments S.L. ; cando non se ten reparo en realizar, cando precisa liquidez, lecturas estimadas avultadas; cando se mantén durante décadas o cobro de 20m³ lineais a barrios enteiros por falta de contadores (Recimil, e antigas sindicais); cando non se ten reparo en manter como potábel a auga consumida na cidade, aínda sabendo da presenza de trihalometanos; cando non se tivo reparo en conceder a EMAFESA a xestión da depuradora, sabendo que o prego de condicións non lle daba opción a un servizo que na realidade é supramunicipal, e que debera ser de xestión mancomunada; cando non se ten reparo en permitir esa xestión sen unha nova licitación pública, por aumento do volume de negocio nun 67,5%; cando se mantén intacto o custe do prezo no recibo polo concepto de saneamento cando unha parte xa non lle corresponde, ao haber unha variación significativa no servizo e mesmo estar incluído xa no cálculo da taxa de depuración das augas residuais; cando se aplican tarifas abusivas ao pequeno comercio, despachos e negocios; cando se lle permite a unha empresa que non devolva os cobros indebidos e cando o Concello atrasa a aplicación das bonificacións ás familias máis vulnerábeis; cando a empresa mixta retén o canon da auga e o canon concesional para un irregular financiamento..., nese contexto hai que entender a complicidade dos distintos gobernos municipais, que non só non fan o seu labor de fiscalización da xestión privada de EMAFESA, senón que se converten en cómplices e facilitadores deses abusos e irregularidades; nese contexto hai que entender que neste Pleno non se queira atender as alegacións do concello de Narón, como se desoen todas as alegacións e recursos presentados pola veciñanza ao redor deste servizo.

Fronte a isto, a empresa non ten aberto ningún expediente administrativo. Mesmo non se recorreu a sentenza da suspensión da aplicación da ordenanza ante o Tribunal Supremo, sentenza que lesiona gravemente os intereses da veciñanza desta cidade, e non corrixe a inxustiza do trato discriminatorio que representa, aplicando un cobro inxusto dunha taxa avultada, a unha veciñanza que na súa maioría non estaba enganchada ao sistema de interceptación e depuración, polo tanto non se lle prestaba o servizo, segundo o entende a Lei de Facendas Locais, que esta maldita Ordenaza 17 do Concello de Ferrol, vulnera flagrantemente. Discriminando a unha parte da veciñanza a respecto doutras zonas do concello onde aínda agora non se pasa a cobro, e a respecto da veciñanza do concello de Narón.

Nese contexto é que, independentemente das actuacións que continúe a realizar esta Plataforma, diante da Valedora do Pobo, diante da Comisión Nacional dos Mercados da Competencia, diante do Consello de Contas de Galicia, da Oficina Independente de Regulación e Supervisión da Contratación, do Tribunal de Contas, e diante de todas aquelas institucións ás que houbese lugar

SOLICITÁMOSLLE

1. Que recupere o diálogo co Concello de Narón e forme unha fronte común, para devolver a xestión das instalacións do servizo de depuración a Augas de Galicia, quen debería realizar a xestión mentres non exista un ente supramunicipal dos concellos de Ferrol e Narón para realizala.

2. Que abra expediente administrativo á empresa EMAFESA por todas as irregularidades que se mencionaron aquí. Sinaladamente a masiva aplicación de lecturas estimadas moi abusivas, moi por riba do permitido na Ordenanza e no Regulamento da Auga, e polo tanto se siga o trámite de solicitude de apertura de expediente administrativo, que esta Plataforma fixo con data de 25 de maio de 2018, para o que se nos deu audiencia, na que nos personamos o 27 de xuño do mesmo ano. Nesta solicitude pediamos que se depuraran responsabilidades por un suposto financiamento irregular por parte de EMAFESA a conta da veciñanza.

3. Que faga efectivo o acordo do pleno celebrado no 27 de febreiro deste ano, onde quedou aprobado por unanimidade poñer fin á inxusta situación do barrio de Recimil, coa instalación de contadores individuais de abastecemento de auga nas vivendas para pór fin ao cobro lineal de 20 m³ por dous meses de consumo de auga, moi abusivo para á maioría da veciñanza, fogares dunha ou dúas persoas maiores que conviven soas que como moito consumen 8 m³ de auga. Situación provisional que se prolonga por case dúas décadas. Acordo que se debe facer extensivo ás Vivendas Sindicais.

4. Que, alegrándonos de que nos últimos recibos non se estea pasando a cobro os supostos atrasos correspondentes ao servizo de depuración, cando a maioría da cidade non estaba conectada ao sistema que aínda non fora finalizado, solicitamos información sobre a vontade deste goberno a respecto de resolver a situación do cobro dos citados atrasos do período setembro/2014, marzo/2017. Porque a sentenza só di que a ordenanza que regula a taxa non se podía suspender, o que non di a sentenza é a quen hai que cobrar a devandita taxa. O anterior alcalde, cando asinou o edito do 20 de agosto de 2018, aprobando as liquidacións e o Padrón de Contribuíntes, era consciente de que á maioría da veciñanza incluída nese padrón, e por ese período,non se lle prestara o servizo. Hai que corrixir esa inxustiza.

5. Que con carácter urxente se revise a taxa avultada de 2014, aínda en vigor, e todas as tarifas que aplica a empresa, incluído os custes de saneamento que non lle corresponde. Tal e como indica o Informe técnico-económico para a elaboración e cálculo da taxa, e tal e como figura na acta do pleno celebrado para a súa aprobación en 28 de agosto de 2014, “todas as taxas (en especial esta, por ser de nova implantación) deben ser revisadas cada ano, e máis aínda si se teñen producido alteracións significativas nos custes no exercicio en vigor ou son previsibles para o seguinte”. Ademais da urxente necesidade de revisión e actualización do sistema de bonificacións.

6. Solicitamos nos responda a todas as solicitudes, recursos e demais iniciativas que esta Plataforma ten presentando diante do Concello e ate agora seguen sen resposta. O mesmo que segue sen responder á petición de constitución dunha mesa de diálogo, máis necesaria que nunca dado que a aplicación da sentenza está a recaer sobre quen non ten responsabilidade algunha, nin na recepción dunha depuradora defectuosa, nin que non se rematara a tempo as obras dos interceptores, nin no desafortunado cálculo da taxa, nin na aprobación da ordenanza inxusta e discriminatoria, nin da incapacidade para modificar, derogar ou suspender unha taxa. Polo tanto, reiteramos a nosa petición, feita en numerosas ocasións, mesmo neste mesmo pleno en setembro de 2019, da creación dunha mesa de diálogo para abordar estes temas.

7. Aproveitamos esta intervención para amosar a nosa solidariedade cos traballadores e traballadoras do servizo de Parques e Xardíns. Como Plataforma na defensa dos Servizos Públicos, consideramos que a solución pasa polo rescate para a xestión pública deste importante servizo para a cidade, subrogando aos traballadores e traballadoras e dignificando as condicións laborais e sociais nas que se desempeña este servizo, sen contrato desde 2008.

8. Situación igualmente preocupante a do servizo de limpeza viaria e de recollida e transporte de residuos sólidos urbanos, con contrato caducado da empresa Urbaser desde 2014, onde a solución pasa polo rescate do servizo para a xestión pública e a subrogación do cadro de persoal. O que levaría parello unha mellora nas condicións de traballo, unha cidade máis limpa, unha factura menor para a veciñanza e unha mellor xestión dos residuos.

Sr Alcalde só pedimos transparencia, participación, trato xusto e servizos públicos de calidade.

Ferrol, 19 de outubro de 20120

💧 A intervención en formato pdf. - 7 páxinas. | Acceder/baixar.

💧 A intervención en formato de Áudio mp4. | Acceder/Baixar.

#Emafesacenporcenpublica
#Remunicipalizar
#Remunicipalización
#Emafesa

PLATAFORMA NA DEFENSA DOS SERVIZOS PÚBLICOS,
POLA REMUNICIPALIZACIÓN
Abonda de saqueo! Hai outras alternativas!
Pódese, débese e precísase!
Correo-e: remunicipalizacion.plataforma@gmail.com
Web: https://plataformaferrol.blogspot.com.es/
Facebook: @RemunicipalizarFerrol   |  Twitter: @municipalizarFT

_______

Valoración da Plataforma de Ferrol pola Remunicipalización, da reunión coa Valedora do Pobo e a responsábel da area municipal do alto comisionado, en relación á Queixa colectiva contra o Concello de Ferrol e a empresa mixta da auga Emafesa

COMUNICADO Á VECIÑANZA

- A Plataforma reuniu-se coa Valedora do Pobo e a responsábel da area municipal do alto comisionado.

-  A Plataforma deu a coñecer o proceso polo que unha parte da veciñanza de Ferrol está sendo discriminada polo cobro da taxa de depuración, dun período onde non se prestou o servizo e as diferentes irregularidades da xestión de Socamex en Emafesa..

-  Abríronse a raíz desta reunión unhas novas vías de actuación desta Plataforma.

Unha vez realizada a entrevista, solicitada por esta Plataforma coa Valedora do Pobo, o pasado venres 9 de outubro, en relación á QUEIXA colectiva contra o Concello de Ferrol, e no seu caso contra a empresa mixta EMAFESA, por presentar facturas por un importe superior a 7,12 millóns de euros en concepto de taxa de ‘depuración de augas residuais’, por un período de 31 meses (setembro/2014 a marzo/2017) onde non se prestou o servizo, esta Plataforma conclúe o seguinte:

1º Que no desenvolvemento de dita reunión, de máis de dúas horas de duración, na que estivo presente a propia Valedora, María Dolores Fernández Galiño, mais a responsábel da Area de Corporacións Locais e Servizos Municipais da institución, Carmen Cuiñas Durán, a Plataforma tivemos a oportunidade de explicar cal é a situación do servizo de abastecemento, saneamento e depuración de augas, no concello de Ferrol, e da situación da empresa EMAFESA, empresa mixta, mais coa xestión 100% privada do socio minoritario, SOCAMEX (Urbaser).

2º Que máis concretamente esta Plataforma deu a coñecer o proceso polo que unha parte da veciñanza de Ferrol está sendo discriminada polo cobro da taxa de depuración, dun período onde non se prestou o servizo. Cargando deste xeito os custes da reparación, arranque, posta en marcha e período de probas do sistema de saneamento, depuración e interceptación, só a unha parte da veciñanza de Ferrol. Cando é un sistema de carácter supramunicipal que benefician por igual tanto a toda a veciñanza de Ferrol, como á de Narón, como nun futuro á de Neda. Un acto administrativo que consideramos discriminatorio, ao tratar de xeito diferente a persoas en situacións similares sen que exista unha xustificación obxectiva e razoábel. Vulnerando co mesmo, o principio de igualdade recollido no artigo 14 da Constitución Española e no artigo 21 da Carta dos Dereitos Fundamentais da Unión Europea.

3º Trasladámoslle tamén a queixa dos veciños e veciñas de Recimil, e antigas sindicais de San Pablo e Serantes, polo cobro lineal de 20 m³ por dous meses de consumo de auga, moi abusivo para á maioría da veciñanza, fogares dunha ou dúas persoas maiores que conviven soas que como moito consumen 8 m³ de auga. Situación provisional que se prolongou por case dúas décadas. Con máis razón se o pasado 27 de febreiro quedou aprobado por unanimidade poñer fin a esta inxusta situación, coa instalación de contadores individuais de abastecemento de auga nas vivendas, sen que o goberno municipal comezase, logo de 8 meses, a dar pasos para resolve-la.

4º Así mesmo, esta Plataforma puido explicar como esta taxa está avultada, xa que nestes momentos, as cantidades reais de volumes de augas residuais tratados, cantidade de lodos e custe eléctrico, non se corresponden cos utilizados para o seu cálculo no ano 2014.

5º Informouse tamén das practicas abusivas da empresa EMAFESA (lecturas lineais, lecturas estimadas, duplicidade no cobro no concepto de saneamento...), e tamén a negativa de Emafesa a devolver os cartos cobrados de máis.

6º Explicouse tamén a situación legal de EMAFESA, que carece de contrato para asumir o servizo de depuración, cando debera saír a concurso público por aumentar en máis dun 65% o seu volume de negocio.

7º A Plataforma informou da falta de resposta do Concello de Ferrol ás nosas denuncias e peticións de información pública dos servizos que está a prestar con total autonomía a empresa Socamex, sen ningún control do propio Concello, facendo deixazón do seu papel fiscalizador da xestión privada de EMAFESA.

8º Informouse-nos da relentización, por parte do Concello, aos seus reiterados requirimentos de envío de información, demorando máis de 6 meses, para emitir un simple informe e mesmo que aínda está pendente, o goberno municipal, de responder a varias peticións de “informe complementario urxente” e o da petición de “mesa de diálogo” requiridos novamente o pasado 26 de agosto.

9º A Valedora do Pobo recolleu todas as nosas reivindicacións e solicitou documentación sobre a negativa dos diferentes gobernos municipais a darnos información sobre o servizo de auga e saneamento, quedando en analizalos e debatelos, entre outros asuntos, na próxima reunión con esta institución.

Abríronse a raíz desta reunión unhas novas vías de actuación desta Plataforma, das que iremos informando segundo se vaian realizando, todas encamiñadas á defensa dos dereitos fundamentais que como cidadanía nos corresponden, e na defensa duns servizos públicos que nos protexan do abuso das transnacionais que converten un dereito humano fundamental, como é o dereito á auga e ao saneamento, nun negocio que prima por riba do propio dereito.

Ferrol a, 13 de outubro, de 2020

#Emafesacenporcenpublica
#Remunicipalizar
#Remunicipalización
#Emafesa

PLATAFORMA NA DEFENSA DOS SERVIZOS PÚBLICOS,
POLA REMUNICIPALIZACIÓN
Abonda de saqueo! Hai outras alternativas!
Pódese, débese e precísase!
Correo-e: remunicipalizacion.plataforma@gmail.com
Web: https://plataformaferrol.blogspot.com.es/
Facebook: @RemunicipalizarFerrol   |  Twitter: @municipalizarFT

_______

A reivindicación da veciñanza de San Xoan, de sustituir a rede de tubos de fibrocemento, e as últimas roturas como a de Sánchez Calviño, reforzan a idea de que a xestión privada de Emafesa é un desastre para a cidade

A reivindicación da veciñanza de San Xoán, de substituír a rede abastecemento de auga pótábel de tubos de fibrocemento, e as últimas roturas como a de Sánchez Calviño, reforzan a idea de que a xestión privada de Emafesa é un desastre para a cidade

- A Plataforma demanda unha actuación concreta de elaboración dun Plano dos tramos da rede con fibrocemento, de control da cantidade de amianto na auga que chega aos fogares e un Plano de substitución con orzamentos e prazos.

A Plataforma na Defensa dos Servizos Públicos, pola Remunicipalización quere mostrar o seu apoio à reivindicación da asociación veciñal de San Xoan, conforme o concello de Ferrol debera aproveitar a obra das novas beirarrúas para retirar as tubaxes de fibrocemento e substituílas por tubos que non supoñan un perigo para a saúde. Este material, o fibrocemento está ocupando tamén en moitos outros barrios da cidade a función da canalización da auga potábel.

O Concello e Emafesa teñen a obriga de garantir que a auga potábel subministrada sexa limpa e saudábel, e que non conteña ningunha sustancia que constitúa un perigo potencial para a saúde, é por iso que desde a Plataforma esiximos o control da auga que chega aos fogares que se subministra a través de redes con tubos de fibrocemento, facendo analíticas periódicas en puntos concretos da rede.

O Estado Español asinou en 2008 o Convenio de Rotterdam, un tratado internacional para evitar que produtos perigosos danen a saúde humana, onde se inclúe o amianto presente no fibrocemento. A UE prohibe o uso e fabricación de fibrocemento. En 2017 a Comisión de Medio Ambiente do Congreso aprobaba un plan para a auditoría e substitución dos máis de 40.000 km de tubaxes de fibrocemento que aínda quedaban no estado español canalizando a auga potábel. Moitos concellos acometeron iniciativas para realizar esa substitución. Non é o caso de Ferrol, onde a empresa EMAFESA, xestionada por SOCAMEX, xa foi denunciada nun Informe de Fiscalización do Consello de Contas, nos primeiros anos do comezo da súa actividade, por non ter efectuado os obrigados investimentos na mellora das infraestruturas do tratamento e canalización da auga no noso Concello, en concreto ao deixar de realizar máis de 4 millóns de euros dos 10 previstos no Pliego de Condicións, concretado no Plan de investimentos 2001-2004.

Múltiples avarías cada ano, mostran a deteriorada situación da canalización. Este ano 2020 non está sendo diferente. En xaneiro era unha condución de fibrocemento no barrio de Telleiras e na rúa da Igrexa; en febreiro outra ruptura importante na Rúa Lepanto dese mesmo barrio; en marzo a ruptura era na Cabana; en abril na Graña e en agosto a ruptura en Sánchez Calviño e no Polígono d'A Gándara. Estas foron as informadas polos medios de comunicación, que con toda seguridade foron moitas máis, como así recollen os Informes Anuais de Xestión, para xustificar os gastos. Hai que sumar a situación de deterioro da canalización de auga que se fai ao longo da ponte das Pías, para os concellos de Fene, Ares e Mugardos. E agora en setembro un camión envorca en Freixeiro os lodos tóxicos da depuradora de Caneliñas.

Todas estas incidencias súmanse aos abusos e irregularidades que se lle veñen permitindo a esta empresa sen que se abra nin un expediente administrativo ou unha auditoría integral na xestión, tantas veces anunciada. Pola contra, e contra as reiteradas denuncias desta Plataforma e de miles de veciños e veciñas de Ferrol, se lle permite cobrar por servizos que non presta, como é a taxa de depuración antes de abril de 2017, ou pola xestión dos colectores, interceptores, emisarios submarinos, pozos, rexistros... que xa non son competencia desta empresa senón de ACUAES a través de Viaqua. Permitese-lle a aplicación de lecturas estimadas abusivas (para financiar-se de xeito irregular), ou de lecturas lineais (20m3 bimensuais) sen ter en conta o consumo, a barrios enteiros como Recimil ou as antigas sindicais de San Pablo e Serantes, e un longo historial de saqueo a esta cidade desde a creación de EMAFESA no ano 2000.

Unha empresa que en xullo de 2015 ocultaba que os trihalometanos presentes na auga que bebiamos, estaba a pór en perigo a nosa saúde; unha empresa que pretende cobrar máis de 7 millóns de euros por un servizo que non prestou; unha empresa que incumpre unha e outra vez a normativa da xestión a auga, non se vai a preocupar de planificar a substitución do fibrocemento dentro dun plan de mellora, como lle correspondería, das infraestruturas de abastecemento da auga potábel na nosa cidade.

Polo tanto, como Plataforma pedimos ao Goberno Municipal:

1º Que publique un relatorio da rede de condución da auga que se realiza por tubos de fibrocemento elaborando o seu Plano, coas caractrísticas concretas da tubaxe. Que indique se se realizou algunha substitución dese material e en que condicións e data.

2º Que se redacte un Plan de Substitución do Fibrocemento no concello de Ferrol (con orzamento e prazos), dando prioridade ao barrio de San Xoán coincidindo coas obras da beirarrúas.

3º Que se controle mediante analíticas concretas e periódicas, a cantidade de fibras de amianto que hai na auga que sae das billas nos fogares.

A  Plataforma na defensa dos Servizos Públicos, pola Remunicipalización, seguimos apostando pola recuperación para a xestión pública deste servizo, como único xeito de enfrontar a solución a todos estes problemas.

Ferrol, 9 de setembro de 2020

#Emafesacenporcenpublica
#Remunicipalizar
#Remunicipalización
#Emafesa

PLATAFORMA NA DEFENSA DOS SERVIZOS PÚBLICOS,
POLA REMUNICIPALIZACIÓN
Abonda de saqueo! Hai outras alternativas!
Pódese, débese e precísase!
Correo-e: remunicipalizacion.plataforma@gmail.com
Web: https://plataformaferrol.blogspot.com.es/
Facebook: @RemunicipalizarFerrol   |  Twitter: @municipalizarFT

_______