Apoio ás demandas da A.VV. Fontelonga de Esteiro para arranxar os danos causados no barrio polos efectos do ciclón Klaus

eu-ferrolterra@esquerdaunida.org
20 de abril de 2009 12:16


Prezad@s amig@s: vaivos no arquivo un comunicado de prensa do Grupo Municipal de Esquerda Unida en apoio das demandas expresadas pola A.VV. Fontelonga de Esteiro en relación con arranxos ligados ao ciclón Klaus e outros compromisos incumpridos. Grazas pola vosa atención. Un saúdo, Ramiro Marier

Ferrol, 20 de abril de marzo de 2009

• O CONSELLO GRUPO MUNICIPAL DE ESQUERDA UNIDA SÚMASE AS DEMANDAS EXPRESADAS POLA A.VV. FONTELONGA PARA ARRANZAR AOS DESPERFEITOS NO BARRIO E CAMPUS
• A VOCEIRA DO GRUPO, YOLANDA DÍAZ, RECLAMA CELERIDADE PARA ARRANXAR AS DESFEITAS PRODUCIDAS E O CUMPRIMENTO DOS OUTROS COMPROMISOS CONTRAÍDOS.
  

O Grupo Municipal de Esquerda Unida expresa o seu apoio ás demandas da A.VV. Fontelonga de Esteiro nas que reiteran as súas demandas para arranxar os danos causados no barrio polos efectos do ciclón extratropical Klaus, que barreu a cidade o pasado na noite do 23 para o 24 de xaneiro.

Esquerda Unida critica a deixadez para non acometer dende entón a subsanación dos danos producidos polo ciclón cando van tres meses dende o seu paso pola cidade. A enumeración do que non se arranxou deixa en mal lugar a celeridade e dilixencia que requiren estas actuacións: xunto a Casa do Patín hai unha árbore arrincada e un pinsapo deitado; na Praza de Ferrándiz resta un banco rachado xunto a unha pola de grandes dimensións que aínda non se retirou; falta repoñer na Praza Carlos Casares dúas camelias e outras ao carón dos bloques III e II de Fernando VI.

As denuncias reiteradas exténdense as tapas da rede de sumidoiros nas rúas Profesor Vázquez Cabrera e Álvaro Cunqueiro. A asociación denuncia que a situación se arrastra dende hai 14 meses. Prazos inaceptables para conquerir unha resposta eficaz ás demandas da cidadanía.

Esquerda Unida nas verbas da súa Voceira Yolanda Díaz demanda celeridade e dilixencia ao Goberno Municipal para restaurar os danos producidos polo Klaus e mailo cumprimento dos outros compromisos contraídos por EMAFESA E CESPA. A nosa organización así o manifestará na vindeira Comisión de Servizos.

Xunto a isto hai outros compromisos que restan de antano e que distan de materializarse: sinalizacións e outras árbores comprometidas na confluencia con López Porta con Españoleto, no macizo central da avda. de Esteiro e entre Uxío Novoneyra e González Llanos e mías en Eduardo Pondal.
__________________

Proxecto Esteiro: A veciñanza do barrio na procura da súa memoria histórica

Asociacion Veciñal Fontelonga

-avvfontelonga@mundo-r.com-
15 de abril de 2009 18:05


Esteiro na procura da súa memoria histórica.

A Asociación Veciñal fai un chamado para que as persoas do barrio colaboren na recuperación da MemoriaHistorica contribuindo, con fotos, debiuxos, revistas, libros, ... así como de viva voz, ...

[Clical acima do cartaz para ampliar]

___________

ESTEIRO-FERROL
ASOCIACION VECIÑAL FONTELONGA
-avvfontelonga@mundo-r.com-
Web veciñal
Blog veciñal
__________________________

Escola Infantil Pública en Esteiro

ASOCIACION VECIÑAL FONTELONGA
-avvfontelonga@mundo-r.com-
1 de março de 2009 11:16

A Asociación Veciñal de Esteiro "Fontelonga" vimos realizando unha campaña para que a Xunta de Galicia cumpra o seu compromiso de facer unha escola infantil pública en Esteiro, a outra estase construíndo en Caranza. O remate desta campaña será o día 22 de marzo.

Pedimos a vosa colaboración na recollida de sinaturas, se vos parece ben, e que no las fagades chegar antes do día 17 de marzo.

Moitas grazas e un saúdo.

Xunta Directiva da Asociación Veciñal de Esteiro " Fontelonga".

Asdo./X. Miguel López Pérez, presidente

Baixar o Escrito de recollida de asinaturas reivindicando unha Escola Infantil para Esteiro, en formato -pdf- , do arquivo do Colectivo Ártabra 21.

ESTEIRO-FERROL
ASOCIACION VECIÑAL FONTELONGA
-avvfontelonga@mundo-r.com-
Web veciñal
Blog veciñal
_______________________

Propoñen Moción para a recuperación para uso público da parcela do Cadro pequeno de Esteiro

De: BNG -bng@ferrol.es-
Para: artabra21@gmail.com
Data: 22 de setembro de 2008 11:02
Asunto: Informacion Iniciativas BNG


O BNG SOLICITA AO PLENO INICIAR O EXPEDIENTE DE RECUPERACIÓN DO CADRO PEQUENO DE ESTEIRO

O Grupo Municipal do BNG no Concello de Ferrol ven de presentar unha proposta, que será debatida na sesión plenaria a celebrar o vindeiro xoves 25 de setembro, na que solicita que o Concello inicie o expediente para a recuperación para uso público da parcela do Cadro pequeno de Esteiro, actualmente ocupada por Defensa.

Na iniciativa asinada polos concelleiros do BNG, Xoán Xosé Pita e Elia Rico, se destaca que a recuperación desta parcela para uso público axudaría á revalorización do patrimonio monumental de Fontelonga, xa que coa súa recuperación e posterior adecuación estaría aumentando o valor turístico e monumental deste espazo emblemático polo seu significado para a historia da cidade, sen esquecer que se lle devolvería ao barrio a súa fisionomía histórica, cos dous “cadros de Esteiro” : a actual Praza de Ferrandiz e a parcela ocupada actualmente por Defensa.

Consideramos, así mesmo, que o ideal sería a reversión na cidade de todo o conxunto de instalacións militares que ocupa o Terzo Norte de Mariñeiría, sobre todo a cesión do Cuartel de Dolores, que a día de hoxe se atopa infrautilizado.

O BNG lembra na súa proposta que nun dos laterais do Cuartel de Dolores existe unha parcela que formaba parte do denominado Cadro Pequeno de Esteiro e que até mediados dos anos 70 do século pasado era un espazo público que constituía á baixada natural ao conxunto monumental de Fontelonga.

Descoñecemos o procedemento legal mediante o cal esta parcela pasou a formar parte do Ministerio de Defensa e mediante o cal deixou de ser un espazo público para formar parte das instalacións militares do cuartel de Dolores.

Ferrol a 20 de setembro de 2008
Grupo Municipal do BNG no Concello de Ferrol

Para acceder ao documento "Mocion Cadro Pequeno de Esteiro", clicar acima de cada imaxe.
________________________




__________________________

Inaugurada a Praza da Paz: José Couso Permuy

De: ASOCIACION VECIÑAL FONTELONGA -avvfontelonga@mundo-r.com-
Para: artabra21@gmail.com
Data: 17 de maio de 2008 11:33
Asunto: Intervención da Asociación veciñal de Esteiro " Fontelonga", na inauguración da Praza da Paz: José Couso Permuy


Intervención da Asociación veciñal de Esteiro " Fontelonga", na inauguración da Praza da Paz: José Couso Permuy.

Ferrol a 16 de maio de 2008.

Boa tarde a todas e a todos no nome da Asociación Veciñal de Esteiro “ Fontelonga”.

O 30 de abril do 2004 presentamos no Concello de Ferrol a solicitude de que este lugar do barrio de Esteiro onde hoxe nos atopamos, onde esta a escultura dun dos mellores escultores galegos vivos Manolo Paz Mouta, levase o nome de Praza da Paz: José Couso Permuy.

Esta proposta, inicialmente non foi considerada e foi esquecida, finalmente, a proposta da Concelleira de Cultura, Dona Yolanda Díaz, foi aceptada de modo unánime polo Pleno do Concello de Ferrol do 24 de abril de 2008, catro anos despois.

Diciamos na nosa solicitude que “ O dereito á información séguese pagando coa vida” como así lle sucedeu ó foto xornalista ferrolá José Couso Permuy, quen o día 8 de abril do 2003 era asasinado no Hotel Palestina en Iraque polas tropas estadounidenses. Era asasinado para transmiti-la mensaxe de que ou se está cos Estados Unidos de Norte América ou se tropeza coa morte.

Entendiamos que a nosa proposta, e así era o sentido da mesma, se facía eco dos milleiros de ferroláns e ferrolás que dixemos “ Non á guerra” e logo de que por parte do Goberno de Ferrol se lle fixese un cativo homenaxe o venres 9 de abril de 2004, nun acto institucional ó que non foi convidada ningunha entidade asociativa da cidade.

Propoñiamos este lugar situado no progresista e obreiro Barrio de Esteiro, punto de encontro entre o vello Esteiro do século XVIII e o novo Esteiro de hoxe, nun espazo aberto e luminoso en un lugar preferente de acceso ó Centro Histórico da cidade de Ferrol.

Neste lugar preto do Santuario das Angustias construído en 1788, un dos monumentos que aínda se conservan do antigo barrio obreiro, onde se viñeron asentar os traballadores e as súas familias para traballar nos estaleiros .

Preto deses estaleiros que forxaron líderes obreiros e foron protagonistas principais en todo o Estado na loita contra a ditadura de Franco e na loita polas liberdades democráticas, loita na que entregaron a súa vida Amador Rey e Daniel Niebla, traballadores da Bazán asasinados pola Ditadura o 10 de marzo de 1972.

Preto do Monumento, realizado en 1986 polo escultor ourensán Xosé Cid Menor, que homenaxea á ilustre ferrolá de Ferrol Vello, Dona Concepción Arenal, defensora dos dereitos das mulleres e dos dereitos humanos, rebelándose contra a marxinación das mulleres e reivindicando a igualdade en tódalas esferas sociais para a muller.

Preto da representación das catro antigas rúas de Esteiro, nunha delas, na rúa San Nicolás naceu, o 18 de outubro de 1850, Pablo Iglesias Posse (fillo dun empregado do Concello de Ferrol), fundador do Partido Socialista Obreiro Español no 1879 e da Unión General de Traballadores no 1888.

Neste lugar e con eses veciños e veciña queriamos render homenaxe, na súa cidade natal, a José Couso Permuy , simbolizando nel a defensa da paz, da xustiza, da liberdade de prensa e dos dereitos humanos, como fixo José Couso Permuy e polo que foi asasinado.

Neste momento que se inaugura a Praza da Paz, non podemos por menos que esixir Xustiza, a paz sen xustiza é a paz dos cemiterios, Xustiza para que os seus asasinos sexan xulgados e se saiba toda a verdade, e Xustiza para que os responsables da invasión e da guerra do Iraque, inxusta e ilexítima, sexan tamén xulgados como criminais de guerra.

Queremos celebrar a inauguración desta Praza da Paz: José Couso Permuy e darvos as grazas a todos e a todas pola vosa presenza.

José Couso Permuy, está hoxe aquí , con nós e vivo, por que ninguén morre mentres é recordado.

Moitas Grazas.

Xosé Miguel López Pérez, presidente da Asociación Veciñal de Esteiro “ Fontelonga”

_________

ESTEIRO
Web veciñal
Blog veciñal
Artigos PA21
__________

Fotos cedidas pola Asociación Veciñal O Rosario - Inferniño
Blog veciñal
Artigos PA21
avvorosario@gmail.com
______________

http://www.josecouso.info/

Galería Fotográfica

Galería da Página realizada polos seus compañeir@s de Tele5.
camaras@informativost5.com
http://www.primeraplana.net/couso/index.html

Venres día 16 de maio ás 18 horas, inauguración da Praza da Paz: José Couso Permuy

De: ASOCIACION VECIÑAL FONTELONGA
-avvfontelonga@mundo-r.com-
Para: artabra21@gmail.com
Data: 15 de maio de 2008 10:45
Asunto: Inauguración da Praza da Paz: José Couso Permuy


Inauguración da Praza da Paz: José Couso Permuy

Desde a Asociación Veciñal de Esteiro " Fontelonga" , queremos lembrarvos e ó mesmo tempo convidarvos de novo, que mañá venres día 16 de maio ás 18 horas, se inaugura a Praza da Paz : José Couso Permuy na parte posterior da Igrexa das Angustias, na confluencia da Avenida de Esteiro coa rúa Zurbarán. O nome desa Praza fora proposto por Fontelonga.

O actos están organizados polo Concello de Ferrol , co Clube de Prensa de Ferrol e o Colexio de Xornalistas de Galicia, se enmarca dentro dos actos do "Día mundial da liberdade prensa", que continuará cunha ofrenda floral no Cantón ás 19 horas e rematará no Jofre ás 20 horas .

O programa da inauguración da Praza da Paz: José Couso Permuy é o seguinte:

• Intervención da Asociación Veciñal de Esteiro " Fontelonga.
• Lectura de poemas de Antón Cortizas.
• Intervención de Dona Yolanda Díaz, concelleira de Cultura do Concello de Ferrol.
• Intervención de Don Vicente Irisarri, Alcalde de Ferrol.
• Actuación musical.
• Intervención de Javier Couso Permuy.
• Descubrimento da placa por parte das familias Couso e Permuy.

Está instalada unha pequena carpa na citada praza.

Dámosvos anticipadamente as grazas pola vosa asistencia.

Ferrol a 15 de maio de 2008.

Xunta Directiva da Asociación Veciñal de Esteiro " Fontelonga".

Asdo./X. Miguel López Pérez, presidente

Inauguración da Praza da Paz: José Couso Permuy

De: ASOCIACION VECIÑAL FONTELONGA
-avvfontelonga@mundo-r.com-
Para: artabra21@gmail.com
Data: 9 de maio de 2008 17:18
Asunto: Inauguración da Praza da Paz: José Couso Permuy

Inauguración da Praza da Paz: José Couso Permuy

Achegámosvos cartel anunciador da inauguración da Praza da Paz : José Couso Permuy, convidándovos a que asistades ó citado acto.

Xunta Directiva da Asociación veciñal de Esteiro " Fontelonga"

[Clicar no cartaz para ampliar]

____________
____________________

Instan ao Concello para recuperar a parcela do INVIFAS para usos de carácter público: Escola Infantil, Centro Cívico, Residencia Universitaria, ...

De: ASOCIACION VECIÑAL FONTELONGA
-avvfontelonga@mundo-r.com-
Para: artabra21@gmail.com
Data: 29 de dezembro de 2007 11:47
Asunto: Graves danos no castro de Vilabuide


A Asociación Veciñal de Esteiro " Fontelonga", diante da nova aparecida nos medios de que a poxa pola parcela do INVIFAS, celebrada onte 28/12/07, quedou deserta, lles enviamos un novo comunicado de prensa, dándolles anticipadamente ás grazas pola súa publicación e difusión.

Xunta Directiva da Asociación Veciñal de Esteiro " Fontelonga".
Asdo../X. Miguel López Pérez, presidente


A Asociación Veciñal de Esteiro “ Fontelonga”, queremos reiterar a nosa oposición á subhasta da parcela sita entre a Avenida de Esteiro e a rúa Naturalista López Seoane, na Rotonda de González Llanos e que pertence, na actualidade, ó Ministerio de Defensa.

Temos coñecemento, a través dos medios de comunicación, que a citada poxa , celebrada o día 28 de decembro e que tiña un prezo inicial de 4.5 millóns de euros, quedou deserta ó non presentarse oferta algunha.

Volvemos a recordarlle á cidadanía que esta parcela foi cedida de modo gratuíto ó INVIFAS (Instituto de vivendas das Forzas Armadas) para a contrucción de vivendas para militares. Este instituto na actualidade está en período de disolución e na parcela citada, non se vai cumpri-lo fin para o que foi cedida.

É coñecido por todo o mundo que en Esteiro se necesita espazo para as novas esixencias da Universidade, nesa parcela, esta entidade veciñal, defendemos a idoneidade da mesma para a construción da Residencia Universitaria Pública que o Campus de Ferrol necesita e que ven demandando desde hai anos. O non ter Residencia Universitaria en Ferrol fai que o noso Campus compita en desigualdade con outras cidades de Galicia que si teñen ese servizo tan fundamental para a poboación universitaria.

En Esteiro, que se aproxima ós 13.000 habitantes, se precisa espazo para a construción dun centro cívico cultural municipal e esa parcela tamén sería axeitada para ese fin.

En Esteiro se precisa espazo para a construción dunha Escola Infantil Pública, comprometida pola Xunta de Galiza, e nesa parcela tamén sería posible a ubicación da Escola Infantil Pública.

Instamos ó Concello de Ferrol é o seu Alcalde, Sr. Irisarri para que demande e estableza as negociacións oportunas con Defensa para que se paralice unha nova poxa, e que a parcela do Invifas sexa cedida de maneira gratuíta ó Concello de Ferrol para dedicala a usos de carácter público como os que mencionamos: Residencia Universitaria Pública, Centro Cultural Municipal, Escola Infantil Pública ou calquera outro de carácter social é público.

Facemos un chamamento a tódolos grupos municipais do Concello de Ferrol a que se sumen á nosa demanda, se o estiman oportuno, de que se devolva á cidade de maneira gratuíta o que a cidade lle cedeu a Defensa tamén de maneira gratuíta.

Pensamos que aínda se está a tempo de facer as xestións oportunas e paralizar a segunda subhasta da parcela. En todo caso debe ser obxecto de negociación como o resto das propiedades de Defensa e se é preciso negociar un segundo convenio con Defensa na que se incluía dita parcela.

Non é xusto que unha parcela que a cidade de Ferrol cedeu de maneira gratuíta para un fin concreto que xa non se vai producir, sexa agora vendida, cando a cidade de Ferrol, que a cedeu de maneira gratuíta a precisa para fins sociais.

Cando vai rematar a política do Ministerio de Defensa de vender aquilo que xa non precisa e que recibiu de maneira gratuíta?.

Queremos recordarlle á cidadanía que o Concello de Ferrol posúe , no citado lugar, unha pequena parcela , pegada á que pretende subhastar Defensa, que ten unha superficie de cento e pico de metros cadrados é a que dá a Avenida de Vigo o que lle permite ó Concello de Ferrol ser chave no futuro da parcela, xa que habería que contar co Concello para calquera edificación, caso de non ser pública, que se pretendese facer.

Tamén queremos recordarlle á cidadanía que non é a primeira vez que neste país, máis ben é unha práctica habitual, a que haxa acordos previos entre posibles interesados para deixar deserta a primeira subhasta e poder obter unha redución importante no prezo nunha segunda e incluso nunha terceira subhasta , na que xa non habería prezo inicial. Instamos ós poderes públicos a que investiguen se houbo un acordo previo para deixar deserta esa primeira subhasta

Ferrol a 29 de decembro de 2007

Xunta Directiva da Asociación Veciñal de Esteiro “ Fontelonga”
Asdo./ X. Miguel López , presidente
___
ESTEIRO-FERROL
ASOCIACION VECIÑAL FONTELONGA
-avvfontelonga@mundo-r.com-
Web veciñal
Blog veciñal
Artigos PA21
____________________

Relacionados no Blog da PA21:

Comunicado aos medios ao respecto da subhasta da parcela do INVIFAS

__________

A A. V. de Esteiro Fontelonga, diante do anuncio do Concelleiro de Tráfico, de habilitar unha parcela próxima a Batallóns para dedicala a aparcamento

De: ASOCIACION VECIÑAL FONTELONGA
avvfontelonga@mundo-r.com
Para: artabra21@gmail.com
Data: 21 de dezembro de 2007 18:13
Asunto: A Asociación Veciñal de Esteiro “ Fontelonga”, diante do anuncio do Concelleiro de Tráfico, Sr. López Castrillón, de habilitar unha parcela próxima ó Campo de Batallóns para dedicala a aparcamento

_____
Comunicado ós medios. Desde a Asociación Veciñal de Esteiro " Fontelonga" enviámoslles un comunicado, agradecendo a súa publicación e difusión. Un saúdo. Ferrol 21 de decembro de 2007.

Xunta Directiva da Asociación Veciñal de Esteiro " Fontelonga"

Asdo../X. Miguel López, presidente

___________

Comunicado ós medios.(20/12/2007)

A Asociación Veciñal de Esteiro “ Fontelonga”, diante do anuncio do Concelleiro de Tráfico, Sr. López Castrillón, de habilitar unha parcela próxima ó Campo de Batallóns para dedicala a aparcamento, queremos manifestar publicamente o seguinte:

Na xuntanza que mantivo esta Asociación co citado concelleiro o 30 de outubro, diante da proposta de converter en aparcadoiro a citada parcela de Batallóns, xa lle manifestamos a nosa oposición a tal medida. Dixémoslle que se podía aceptar pola nosa parte, de maneira puntual no Nadal, que se autorizase o aparcamento nese lugar, pero de maneira puntual. Demandámoslle que desde o Concello se fixese un proxecto urbanístico, dentro da cualificación recollida no PXOM, para ese espazo, no tempo máis curto posible .

As obras que nesta semana se están a realizar por parte da Concellería de Tráfico, indican que o que se pretende e establecer de maneira definitiva unha área de estacionamento nese Cadro Pequeno de Esteiro, medida á que a Asociación Veciñal de Esteiro nos imos opoñer porque é ilegal ó ocuparse unha zona verde para aloxa-los coches.

No barrio de Esteiro tivemos que pelexar para que parcelas cualificadas como zona verde fosen recuperadas da degradación a que estaban sometidas polos coches, temos o exemplo dos Xardíns de Taxonera, na parcela de diante da Casa do Patín. Onde o concello de Ferrol tivo que gastar moitos cartos para recuperar eses espazos. Tivemos o exemplo na propia Avenida de Esteiro o consentir que se aparcarse sobre as beirarrúas, por mor das obras da Praza de España, e unha vez rematadas estas custounos moito traballo e moitas denuncias recuperar as beirarrúas para os peóns. Temos outra parcela que tamén é zona verde na entrada da antiga Escola Obreira, onde se celebra o Fervesteiro, que tamén está ocupada e degradada polos coches, como xa temos denunciado ás concellerías de Tráfico e Medio Ambiente.

Facemos un chamamento, para evitar ter que tomar outro tipo de medidas, ó Concello de Ferrol para que non permita o aparcamento na citada parcela , unha vez pasadas a festas de Nadal e Reis e que faga un balado arredor do Cadro Pequeno de Esteiro para preservar a citada zona verde e evitar así a súa degradación. O Concello está obrigado a cumpri-la lei e desde Fontelonga así llo demandamos.
_______________

ESTEIRO

Web veciñal

Blog veciñal

Artigos PA21

_________

Comunicado aos medios ao respecto da subhasta da parcela do INVIFAS

De: ASOCIACION VECIÑAL FONTELONGA
Para: artabra21@gmail.com
Data: 19 de dezembro de 2007 17:35
Asunto: Comunicado ós medios ó respecto da subhasta da parcela do INVIFAS


Comunicado ós medios ó respecto da subhasta da parcela do INVIFAS
[Instituto de Vivienda de las Fuerzas Armadas]


Desde a Asociación Veciñal de Esteiro " Fontelonga" achegámoslles comunicado de prensa e lles agradecemos anticipadamente a súa difusión e publicación.

Un saúdo.

Ferrol a 19 de decembro de 2007.

Asdo./X. Miguel López, presidente

[Clicar acima da imaxe para ampliar]

A Asociación Veciñal de Esteiro “ Fontelonga” queremos manifestar publicamente a nosa oposición a que a parcela sita entre a Avenida de Esteiro e a rúa Naturalista López Seoane, na Rotonda de Gonzalez Llanos e que pertence ó Ministerio de Defensa se subaste para dedicala a vivendas. Esta parcela que foi cedida de maneira gratuíta ó Instituto de Vivenda das Forzas Armadas (INVIFAS), para a construcción de vivendas para militares, e dado de que ese instituto está disolto e non se van a cumprir os obxectivos da cesión debe revertir de maneira gratuíta, tal como foi cedida, ó Concello de Ferrol.

É coñecido por todos que en Esteiro se necesita espazo para as novas esixencias da Universidade, nesa parcela, esta entidade veciñal, defendimos a idoneidade da mesma para a contrucción da Residencia Universitaria Pública que o Campus de Ferrol necesita e que ven demandando desde hai anos.

En Esteiro se precisa espazo para a construcción dun centro cívico cultural municipal e esa parcela tamén sería axeitada para ese fin.

En Esteiro se precisa espazo para a construcción dunha Escola Infantil Pública, comprometida pola Xunta de Galiza, e esa parcela tamén sería idónea para esa finalidade.

Instamos ó Concello de Ferrol é o seu Alcalde, Sr. Irisarri para que demande e estableza as negociacións oportunas con Defensa para que a parcela do Invifas sexa cedida de maneira gratuíta ó Concello de Ferrol para dedicala a usos de carácter público como os que mencionamos: Residencia Universitaria Pública, Centro Cultural Municipal, Escola Infantil Pública ou calquera outro de carácter social é público.

Pensamos que aínda se está a tempo de facer as xestións oportunas e paralizar a subhasta da parcela. En todo caso debe ser obxecto de negociación como o resto das propiedades de Defensa e se é preciso negociar un segundo convenio con Defensa na que se incluís dita parcela.

Non é xusto que unha parcela que a cidade de Ferrol cedeu de maneira gratuíta para un fin concreto que xa non se vai producir, sexa agora vendida, cando a cidade de Ferrol, que a cedeu de maneira gratuíta a precisa para fins sociais.

Cando vai rematar a política do Ministerio de Defensa de vender aquilo que xa non precisa e que recibiu de maneira gratuíta?.

Ferrol a 18 de decembro de 2007.

Asdo./ X. Miguel López , presidente
_______________
ESTEIRO
Web veciñal
Blog veciñal
Artigos PA21
_____________