Marea de Ferrol presentou a súa candidatura para as eleccións municipais do vindeiro 26 de maio, encabezada por Bernardo Lorenzo Cuétara e Lucía Vizoso Amado - E lembranza e sentida homenaxe ao noso finado compañeiro Mel Sanxoán -

MAREA DE FERROL PRESENTA A SÚA CANDIDATURA MUNICIPAL E HOMENAXEA A MEL SANXOÁN

Onte venres 3 de maio, Marea de Ferrol presentou na súa sede electoral, sita na Rúa Dolores 20, a súa candidatura para as eleccións municipais do vindeiro 26 de maio.

A candidatura encabezada por Bernardo Lorenzo Cuétara e Lucía Vizoso Amado, está conformada por persoas cunha ampla experiencia tanto no plano social como no político, contando cunha pluralidade de procedencias e compromisos con diversas plataformas: sanidade, saneamento, cultura, feminismo... Representamos unha diversidade de procedencias sociais e sectores de actividade, e destacamos a integración na lista de persoas con ampla experiencia en xestión, tanto no ámbito público como no privado.

En definitiva, conformamos unha candidatura veciñal, xestada desde as bases, que recolle a pluralidade da sociedade ferrolá, un espazo inclusivo fóra das lóxicas partidarias ou a da coalición de partidos.

Deste xeito, completan a candidatura, entre outras compañeiras, Ismael González, Bárbara Primo, Nicasio Malde, María Isasi Varela, Mercedes Lomba, Sara Manso, Rocío Arias, Manolo Pazo, Miguel Reimúndez, Xosé María Fontao ou Marité Riveira.

HOMENAXE A MEL SANXOÁN

No transcurso do acto de presentación, realizouse unha lembranza e sentida homenaxe ao noso finado compañeiro Mel Sanxoán, membro fundador do noso proxecto político e grande defensor da participación cidadá, no cabodano do seu pasamento. Coa presenza da súa muller e fillos, Marea de Ferrol inaugurou a sala principal do seu local co seu nome.

Local: Rúa Dores, 20 Baixo.
Correo-e: mareadeferrol@gmail.com
http://mareadeferrol.gal/
https://twitter.com/FerrolMarea
https://facebook.com/mareadeferrol

Enviado por:
Marea de Ferrol
-mareadeferrol@gmail.com-
4 de maio de 2019 15:13
__________

Xosé Manuel Sanxoán Caamaño (Mel), ... Por Amadeo Varela - No noso corazón quedará para sempre, porque era 'dos de sempre' - E alí onde estea, nós queremos estar con el - Ata sempre, amigo

Intervención do compañeiro Amadeo Varela, no nome do Colectivo Ártabra 21, no acto de Homenaxe a Mel, na contorna do Inferniñofolk, celebrado o pasado venres 4 de maio, no Centro Cultural Carvalho Calero do Inferniño (Ferrol).

Por Amadeo Varela [*]
07.05.2018

XOSÉ MANUEL SANXOÁN  (MEL)

Os integrantes do Colectivo Artabra 21, do que Mel foi fundador e colaborador activo, unímonos á súa dona, os seus fillos e demais familia, na dor por esta irreparable perda. E queremos participar neste homenaxe á súa persoa, como un intento de acompañar a Mel, na súa derradeira viaxe.

Fóisenos MEL, con só 63 anos escasos. Como é lóxico supoñer, para a súa familia significa unha perda irreparable, pero tamén para nós, os deste Colectivo, a súa ausencia é un duro golpe, pois que era un verdadeiro “compañeiro de fatigas”; desas fatigas diarias que da a vida, nunha cidade tan abandonada e maltratada como é a nosa.

Sen pretender facer un relatorio dos seus méritos, que todos coñecemos, queremos lembrar a Xosé Manuel Sanxoán, como un deses inesquecibles compañeiros, dedicados a unha loita solidaria e continua, na defensa dos dereitos de todos. Activista consagrado, sempre estaba disposto a aportar traballo e ideas, alí onde podía axudar.

Mel era activista por convencemento; el sabía que tanto nas pequenas aldeas, como nos pobos ou nos barrios das cidades, a loita continua da veciñanza é, a única posibilidade para acadar unhas melloras indispensables, na educación, na cultura e na sanidade, aspectos nos que el participaba decididamente.

Firme defensor do asociacionismo, participou nun feixe de agrupacións, asociacións e plataformas, tratando de axudar na solución de problemas e mellorar esta sociedade egoísta e insolidaria.

Pola súa incesante actividade era sinalado como “un dos de sempre”, deses que “sempre están metidos en todo”, deses que tanto molestan aos que, desde o poder, non aturan que os veciños os critiquen e lles pidan contas.

Mel nos deixa un oco imposible de encher, pois como dixo o poeta, “cando un amigo se vai, queda un espazo baleiro, que non se pode ocupar, con un novo compañeiro”. El era un máis deses “bos e xenerosos”, que na nosa terra loitan día a día por unha sociedade mellor.

No noso corazón quedará para sempre, porque era “dos de  sempre”. E alí onde estea, nós queremos estar con el.

Ata sempre, amigo.

[*] Amadeo Varela Rodríguez -Ferrol 1936, foi traballador de BAZAN, é o autor de "Recordos do vello Racing" publicado no 2000, "Bazan e Ferrol - Unha simbioses perfecta?" (a historia dunha época, "... detrás de cada barco que nace, hai moitas horas de esforzo. Nesa tarefa, miles de traballadores foron gastando a súa saúde e a súa vida") publicado no 2003 e coautor de "Retallos da Memoria II" ("Memorias de neno" sobre a súa vida de pequeno nunha familia republicana perseguida), publicado no 2009. Autor de numerosas cartas e artigos na prensa local. Autor de sitios na rede sobre Ferrol. Cofundador da Asociación San Fernando para defender o Patrimonio Histórico do barrio ferrolán de Recimil contra a súa pretendida demolición, membro do Colectivo Recimil co que promoveu a Plataforma Ártabra 21 e a Plataforma en Defensa dos Espazos Públicos. Na actualidade forma parte do Colectivo Ártabra 21.

_______________

Homenaxe ao compañeiro Mel, o vindeiro venres 4 de maio, ás 19:30hs no Centro Cultural Carvalho Calero, dentro do Festival Inferniñofolk que el promovía - Onde participará a Escola de Gaitas da asociación veciñal 'O Rosario', máis o 'Grupo Berros do Castro'

Dentro da edición deste ano 2018 do Festival InferniñoFolk, vai-se realizar unha Homenaxe ao compañeiro Mel (Xosé manuel Sanxoán Caamaño), que terá lugar o vindeiro venres 4 de maio, ás 19:30hs no Centro Cultural Carvalho Calero, coa participación da Escola de Gaitas da asociación veciñal 'O Rosario', máis o 'Grupo Berros do Castro'. Coa colaboración do Concello de Ferrol, a propia  Asociasción Veciñal O Rosario - Inferniño, da cal foi cofundador e a AFC Terra Meiga (Asociación Folclorica Cultural de Ferrol).

Enlace relacionado:

Morreu o noso compañeiro Mel, activista e gaiteiro... un home bo, un bo Galego - Mel era un activista e gaiteiro, así quería que se lle recoñecera, a súa paixón pola música tradicional, a súa paixón polo social, a súa paixón polo seu traballo veciñal, a súa paixón por un Ferrol participativo... - Queremos-te compañeiro, sempre estarás con nós. | Ir á Web.
__________________

Morreu o noso compañeiro Mel, activista e gaiteiro... un home bo, un bo Galego - Mel era un activista e gaiteiro, así quería que se lle recoñecera, a súa paixón pola música tradicional, a súa paixón polo social, a súa paixón polo seu traballo veciñal, a súa paixón por un Ferrol participativo... - Queremos-te compañeiro, sempre estarás con nós.

Mel Sanxoán Caamaño

Morreu o noso compañeiro Mel (Xosé Manuel Sanxoán Caamaño), este 5 de maio ía cumprir 63 anos. Nacera en Barallobre en 1955. Ante todo queremos expresar a nosa dor porque nos deixa, queremos deixar caer as nosas bágoas, non só por nós, senón porque deixa aos seus dous fillos (un menor) e a súa compañeira que os amaba con toda a súa alma e que para el era o primeiro. Non sabemos como expresar a nosa dor, mais até sempre compañeiro.

Mel era un activista e gaiteiro, así quería que se lle recoñecera, a súa paixón pola música tradicional, a súa paixón polo social, a súa paixón polo seu traballo veciñal, a súa paixón por un Ferrol participativo. Loitaba para que a Participación Cidadán fora un feito real e efectivo, non mera propaganda. Participou na elaboración do Regulamento de Participación Cidadán de Ferrol, nos primeiros Orzamentos Participativos e promoveu os seus foros cívicos, formando parte da comisión de seguimento. Colaborou na confección da Axenda 21 Local de Ferrol, tan nomeada polos políticos e tan esquecida á hora de aplica-la. Así naceu Ártabra 21, na súa mente e na súa práctica. Mel da asociación veciñal 'O rosario' do Inferniño e Amadeo Varela do Colectivo Recimil pola Reahabilitación (Da asociación San Fernando), tiñan-no claro, había que unir forzas para gañar, e promoveron a súa constitución, xunto ao Colectivo de Sartaña Sempre Pública e a Comunidade Menáncaro, xuntaron a máis dunha ducia de colectivos na Plataforma Ártabra 21 e logo o Colectivo Ártabra 21. Foi membro da Federación de ANPAS e desfensor do ensino público. Promoveu a Escola Deportiva do Inferniño. Promoveu a Plataforma Contra o Malgasto. Participou na realización do Foro Social de Ferrol Terra e na loita contra a Planta de Gas. Participou na constitución da Plataforma na Defensa da Sanidade Pública da Área de Ferrol (SOS-Sanidade Pública) e agora era o coordinador da súa Permanente. Tamén na Plataforma que loitou pola recuperación da ribeira de Barallobre. Incansábel activista e boa persoa. Na Plataforma contra a Taxa do PP. E ultimamente na coordinadora da Plataforma de Ferrolterra na Defensa das Pensión Públicas e colaborando coa Plataforma na Defensa dos servizos Públicos, pola Remunicipalización.

Mel era un optimista por natureza, incansábel... observador...e un moi bo compañeiro.

Queremos-te compañeiro, sempre estarás con nós.

Ferrol a 25 de abril, de 2018.

Amadeo, Juan 'O Bon', Lupe, Ana, Tono, Rubén, Jove, Ramón, Santiago e Inácio

---
Nota.- Está no Tanatorio San Lorenzo (Catabois) Túmulo nº2.
_________