Iván Rivas: 'O concello debe liderar as demandas educativas da cidade en defensa do ensino público' - A Federación de ANPAS salientou a necesidade de crear unha nova zonificación, co obxectivo da adscribir ao alumnado a un centro de ensino público preto do seu domicilio

Iván Rivas: “O concello debe liderar as demandas educativas da cidade en defensa do ensino público”

O BNG de Ferrol mantivo un encontro coa Federación de ANPAS de centros públicos de Ferrolterra co obxectivo de abordar e coñecer de primeira man a situación na que se atopa o ensino público na cidade e da que os nacionalistas sacan varias conclusións de cara ao vindeiro mandato.

En Ferrol estase a producir un detrimento constante do ensino público en favor dos centros concertados. Os dados de matriculación en Ferrol dos últimos catro anos amosan que mentres a privada-concertada segue a manter o mesmo número de unidades (pese ao descenso de alumnado), centros públicos coma os de Pazos (-1), Recimil (-2) e A Laxe (-1) perderon catro unidades. No último curso escolar 2018/2019  a oferta de prazas nos colexios públicos de Ferrol foron 291, fronte as 400 da privada-concertada. O Concello, como administración pública que é, debe adoptar medidas urxentes para poñer en valor o ensino público na cidade, medidas que pasan, por exemplo, por bonificar aos centros públicos con axudas tanto á escolarización como aos comedores escolares.

A Administración local debe servir ademais de intermediaria e interlocutora entre os centros o resto de organismos coma o CIS ou a Universidade, co obxectivo de converterse nun elemento dinamizador dos centros públicos, poñéndoos en valor a través de convenios e converténdoos en atractivos para incrementar as súas matrículas. Isto conséguese a través da alianza entre los colexios públicos e os centros de investigación potentes ou centros culturais de referencia, o que favorecerá e aumentará o prestixio nestas escolas.

En dito encontro, os nacionalistas e a Federación de ANPAS de centros públicos de Ferrolterra abordaron tamén a situación actual dos comedores escolares, tristemente protagonizada pola precarización non só do servizo, senón da situación laboral dos seus traballadores e traballadoras. Cómpre esixirlle á Xunta de Galiza que cumpra coas súas obrigas para rematar dunha vez por todas coa pasividade dos últimos oito anos e o deterioro constante do servizo.

Outro dos aspectos a tratar foi o transporte escolar. Para o BNG é aberrante a mestura do transporte regular e escolar posta en marcha pola administración autonómica. Os nenos e nenas desta cidade deben contar cun transporte exclusivo, polo que o obxectivo do BNG é un servizo para todos os centros públicos, sen que estes se vexan condicionados polo horario de dito transporte (tal e como acontece na actualidade en algúns centros da cidade). Os nacionalistas denunciarán a nova concesión que FeC e Xunta teñen acordado, e que vai en contra dos intereses das familias ferrolás.

Dende a Federación de ANPAS de centros públicos de Ferrolterra salientouse ademais durante o encontro a necesidade de crear unha nova zonificación na cidade, co obxectivo da adscribir aos nenos e nenas a un centro de ensino público preto do seu domicilio. Cómpre evitar, tamén, os colexios “refuxio” para determinadas problemáticas.

Doutra banda, o BNG considera imprescindible que o Concello manteña un liderado das demandas educativas da cidade con respecto ás infraestruturas, establecendo unha orde de prioridades, para que o desenvolvemento desas infraestruturas por parte da administración competente non se faga con carácter discrecional. Exemplos claros disto atopámolos nos vestiarios do Masdías ou no ascensor do Sofía Casanova. O Concello debe loitar para frear o deterioro do ensino publico, deixando de lado a actitude neutra e pasiva que se leva mantendo nos últimos anos, co obxectivo de que os nenos e nenas conten coa posibilidade de acceder a un ensino público de calidade que non responda a ningunha doutrina.

Ferrol, 7 de maio de 2019.

Coas Ideas Claras
http://ideasclaras.bng.gal/

Ferrol | Web | Facebook | Twitter.
#AgoraGaliza
#AgoraBNG
#Agora Ferrol


Enviado por:
BNG Ferrol
-bngferrol@gmail.com-
7 de maio de 2019 11:44
___________

A Plataforma Galega en Defensa do Ensino Público convoca folga en todos os niveis educativos de Galiza para o día 9 de marzo - En Ferrolterra, Manifestación desde a Praza Amada Garcia diante do Edificio Administrativo da Xunta de Galicia, ás 11:30hs.

A Plataforma Galega en Defensa do Ensino Público convoca folga en todos os niveis educativos de Galiza para o día 9 de marzo.  “A Plataforma Galega en Defensa do Ensino Público pretende con esta folga asestar un golpe mortal e definitivo á LOMCE e aos recortes no ensino público para restituír os dereitos laborais e salariais do profesorado e mellorar a calidade do ensino mediante una Lei Galega de Educación”, explica o seu portavoz Anxo Louzao.

A Plataforma Galega en Defensa do Ensino Público considera que unha vez máis é necesario que nos mobilicemos en defensa do ensino público galego, reclamando a derrogación plena da LOMCE e unha lei galega de educación ante a posibilidade de que se elabore un pacto entre as forzas políticas estatais que prexudique gravemente a situación do noso ensino. Este pacto mantería os principios fundamentais da LOMCE e o que é peor, blindaríaos para os vindeiros anos.

Ante o éxito da xornada de folga do 16 de febreiro temos que volver saír á rúa desde unha óptica centrada no país e na súa realidade educativa. En Galiza non sufrimos os recortes do mesmo xeito que no resto do Estado, e o noso ensino ten necesidades específicas pola nosa realidade diferenciada. Por iso é fundamental que a xornada de folga do día 9 sexa todo un éxito.

No entanto, considerando que a derrogación da LOMCE é imprescindíbel a Plataforma Galega en Defensa do Ensino Público acordou convocar folga para o día 9 de marzo en todos os niveis educativos do ensino de Galiza, mantendo as nosas reivindicacións e accións propias que dan continuidade ás que xa vimos realizando, concretadas en manifestacións en diferentes localidades ás 11.30 horas.

A Coruña: Praza de Vigo.
Ferrol: Praza de España.
Lugo: Praza da Horta do Seminario.
Ourense: Subdelegación do Goberno.
Pontevedra: Praza da Peregrina.
Santiago: Alameda.
Ribeira: Diante do IES Nº1.
Vigo Praza América.

MANIFESTO DA PLATAFORMA GALEGA EN DEFENSA DO ENSINO PÚBLICO

9 de marzo
Todos e todas á folga!!!

Non á LOMCE!
Non aos recortes!
Lei galega de educación!

Unha vez máis é necesario que nos mobilicemos en defensa do ensino público galego, reclamando a derrogación plena da LOMCE e unha lei galega de educación ante a posibilidade de que se elabore un pacto entre as forzas políticas estatais que prexudique gravemente a situación do noso ensino. Este pacto mantería os principios fundamentais da LOMCE e o que é peor, blindaríaos para os vindeiros anos.

Ante o éxito da xornada de folga do 16 de febreiro temos que volver saír á rúa desde unha óptica centrada no país e na súa realidade educativa. En Galiza non sufrimos os recortes do mesmo xeito que no resto do Estado e o noso ensino ten necesidades específicas pola nosa realidade diferenciada. Por iso é fundamental a participación masiva na folga que a Plataforma Galega en Defensa do Ensino Público acordou convocar para o día 9 de marzo en todos os niveis educativos do ensino de Galiza, mantendo as nosas reivindicacións e accións propias que dan continuidade ás que xa vimos realizando, concretadas en manifestacións en diferentes localidades ás 11.30 horas.

A Plataforma  Galega en Defensa do Ensino Público está comprometida en continuar na loita contra a LOMCE até a súa derrogación definitiva e en paralizar os recortes que están desmantelando o ensino público.

Grazas ás permanentes e importantes mobilizacións  e folgas que levamos a cabo, fomos capaces de paralizar a aplicación das reválidas en 6º de Primaria, 4º de ESO e 2º de Bacharelato. Mais temos presente que a LOMCE segue vixente e as reválidas adiadas, non derrogadas, até coñecer o resultado do “pacto pola educación”.

O PP continúa obstinado na súa aplicación, malia o rexeitamento maioritario e a decisión do Congreso dos Deputados de paralizala. Consideramos, por tanto, que é necesario seguir na loita como única maneira de conseguir a derrogación definitiva da LOMCE, a desaparición das reválidas, a paralización dos recortes no ensino público, a restitución de todos os dereitos que lle foron arrebatados ao profesorado e a mellora do ensino público.

Temos  razóns mais que sobradas para denunciar o engano e a farsa que supón o punto de arranque do chamado “pacto pola educación” proposto polo PP, cuxo obxectivo non é outro que consolidar os principios e fundamentos da LOMCE, revestidos agora da auréola do “pacto pola educación”.

O punto de partida, a concepción do mesmo, o procedemento e os obxectivos que persegue procuran un modelo educativo neoliberal, confesional, cada vez máis españolizado e profundamente mercantilizado, no que a relixión seguirá sendo materia curricular. A privatización continuará mediante os concertos en todos os ámbitos educativos e o ensino será cada vez máis elitista e segregador. Hai que desenmascarar todo esta armazón propagandística que o único que pretende é facer máis presentábel socialmente a aplicación da LOMCE.

Calquera acordo educativo ten que partir, como mínimo, dun amplo debate social e de participación de todas as organizacións e entidades, tanto sociais como políticas, sindicais e educativas.

A Plataforma Galega en Defensa do Ensino Público exixe:

• A derrogación da LOMCE e das súas reválidas e a elaboración dunha lei galega de educación.
• A defensa inequívoca do ensino público, galego, laico, coeducativo e gratuíto.
• O recoñecemento e asunción da pluralidade nacional, cultural e lingüística do Estado para poder conformar un sistema educativo galego, enraizado na nosa realidade social, cultural, histórica e lingüística.
• Compromiso de dedicar o 7% do PIB á Educación.
• A eliminación inmediata das subvencións aos centros que segregan alumnado por razón de xénero, co obxectivo de suprimir os concertos no ensino non obrigatorio e continuar co resto dos concertos educativos para conseguir unha única rede, a pública.
• Redución das ratios máximas do alumnado por aula: 15 en educación infantil e 20 no restos dos niveis educativos e a  redución destas cando se escolarice alumnado con necesidades especiais.
• Gratuidade e oferta pública suficiente de prazas en educación infantil de 0 a 3 anos.
• Derrogación do Decreto 79/2010 de plurilingüismo e elaboración dunha nova norma que garanta a vehiculización do ensino en galego para a plena normalización lingüística.
• Eliminación da materia de Relixión do currículo escolar.
• Restitución de todos os dereitos arrebatados ao profesorado -horario, salarios etc.
• Dotación de suficiente profesorado en todos os niveis educativos que garantan a atención á diversidade e a unha educación adecuada, co persoal necesario, ao alumnado con necesidades específicas de apoio educativo. Dotación doutro persoal necesario nos centros -persoal coidador, sanitario, educador social, etc.
• Oferta ampla de emprego e supresión das taxas de reposición para dar resposta ás necesidades de profesorado dos centros e rematar coa precariedade e temporalidade do profesorado.
• Obrigatoriedade de dotar todos os centros públicos de persoal administrativo.
• Garantirase a gratuidade dos libros de texto e do material didáctico na educación infantil e obrigatoria e do servizo de comedor escolar.
• Xestión democrática dos centros, ampliación e mellora da participación do profesorado, elección democrática dos cargos directivos, traslado das competencias pedagóxicas ao claustro e facer do Consello Escolar un órgano colexiado de participación da comunidade escolar. Isto é,  democratizar a escola e xestionala coa participación e corresponsabilidade de todos e todas.
• Incremento de bolsas de estudo e das súas contías. A carencia de recursos non debe comportar a imposibilidade de estudar.
• Non á aplicación do 3+2 no ensino universitario por reducir a duración dos graos a 3 anos e os mestrados a 2 anos, que supón, entre outras cuestións, un encarecemento dos estudos universitarios.
• A modificación lexislativa necesaria para que as ensinanzas artísticas superiores poidan adscribirse á universidade.
• Elaboración dun plan específico de apoio ao ensino no rural.
• Un plan de actuación integral nos centros educativos, co obxecto de solucionar todas as carencias e necesidades, e dotalos de todas as dependencias e instalacións precisas, así como tomar a medidas necesarias para evitar calquera risco na saúde da comunidade escolar -amianto, radon, etc.

O 9 de marzo, ás 11.30 horas, participa nas mobilizacións da Plataforma Galega en Defensa do Ensino Público.

Fonte: http://plataformagalegadefensaensinopublico.blogspot.com.es/

________

Como en toda Galiza, o ensino universitario e medio estará en Folga en Ferrolterra, este Martes 24 de Marzo - A manifestación en Ferrol partirá da praza Amada Garcia, diante do edificio da Xunta, ás 11:30hs

Mañá o ensino galego está chamado a unha nova xornada de Folga, Ferrol tamén terá a súa mobilización

Este martes 24 de marzo a mocidade galega sairemos ás rúas da Galiza para loitar contra os ataques do PP ao ensino público galego. Os poderes españois pretenden impor o decreto 3+2 para continuar deteriorando a educación e limitando o seu acceso a unha minoría privilexiada.

Como en toda Galiza, o ensino universitario e medio estará en Folga en Ferrolterra, a manifestación en Ferrol partira da praza Amada Garcia, diante do edificio da Xunta, ás 11:30hs.

Enlace relacionado sobre a pasada Folga do 26 de Febreiro:

Ártabra 21: 26F Folga no Ensino Público e as mobilizacións en Ferrol contra o “Decreto 3+2” e en defensa da Universidade Pública e un ensino popular, científico, antipatriarcal e galego - Fotos e Vídeo do acto realizado ao final da manifestación de Ferrol.
_____

26F Folga no Ensino Público e as mobilizacións en Ferrol contra o “Decreto 3+2” e en defensa da Universidade Pública e un ensino popular, científico, antipatriarcal e galego - Fotos e Vídeo do acto realizado ao final da manifestación de Ferrol

Como en toda Galiza en Ferrol houbo folga e manifestación contra o “Decreto 3+2” e en defensa do ensino público

Un númeroso grupo de estudantes de Ferrolterra, convocados polo Sindicato de Estudantes, por unha banda e o sindicalismo estudantil nacionalista, agrupados nos Comités e diferentes asembleas, por outra, foi á folga e manifestou-se contra o “Decreto 3+2” e en defensa da Universidade Pública e un ensino popular, científico, antipatriarcal e galego. Apoiado polo movimento sindical e as Marchas da Dignidade.

A Folga tivo importante suceso sobre todo no ensino medio, a manifestación amosou-se combativa, partiu da Praza Amada Garcia, diante do Edificio Administrativo da Xunta de Galicia, até a Praza de Armas, diante do Palacio Municipal. Na concentración interviñeron representantes das organizacións estudiantís convocantes e un membro da mocidade comunista, rematando o acto co canto do Himno Galego.


http://youtu.be/fHVcWynZyNk
________________

As Marchas da Dignidade apoian a Folga no Ensino Público do 26F e as mobilizacións por un ensino popular, científico, antipatriarcal e galego. - En Ferrol o Sindicato de Estudiantes e o sindicalismo estudantil nacionalista e convoca unha manifestación ás 12 do mediodía na Praza Amada Garcia, diante do Edificio da Xunta

Coa escusa da crise económica e da "austeridade" que nos queren impor os gobernos nacional, estatal e europeo en conxunto cos poderes económicos, a situación de miseria, explotación e recortes leva sendo moito tempo inaguantable e intolerable para o pobo. O desastre non deixa de medrar e só nós podemos paralo.

Esta situación chega tamén ao estudantado, que ve como os dereitos acadados polas xeracións anteriores están a ser destruídos en beneficio duns poucos. Porén, eses poucos non saben que estamos dispostas a saír a rúa para loitar polo noso presente e polo noso futuro, para dicir dunha vez por todas que xa abonda.

Xa abonda da destrución e privatización do ensino público e gratuíto coa escusa da xeración de beneficios. Xa non nos tragamos a súa grande estafa, que non busca outra cousa que manter os privilexios dunha minoría.

Xa abonda dunha educación patriarcal, que segrega por sexos e que oprime á muller en defensa dos seus valores retrógrados. Un ensino que eduque en igualdade non só é necesario, senón que é de xustiza.

Xa abonda de ataques á nosa lingua: mentres que as estatísticas mostran un alarmante descenso no número de galegofalantes, o goberno autonómico impón a redución do seu uso nas aulas, retrotraéndonos unha vez máis a eses tempos nos que falar galego era de bárbaros.

É hora de defender o que é noso, o que queremos que sexa de todas e non duns poucos; é hora de saír ás rúas para defender o público. Quérennos caladas pero nós imos alzar as nosas voces nun berro unitario: por iso, este 26 de febreiro apoiamos as mobilizacións galegas por un ensino popular, científico, antipatriarcal e galego.

Pola dignidade das estudantes!

Pan, traballo e teito!

---

En Ferrol convocan unha manifestación:

Sindicato de Estudantes, por unha banda e o  e o sindicalismo estudantil nacionalista por outra, contra o “Decreto 3+2” e en defensa da Universidade Pública e un ensino popular, científico, antipatriarcal e galego.

MANIFESTACIÓN:
Xoves, 26 de febreiro, ás 12 hs, na Praza Amada Garcia, diante do Edificio Administrativo da Xunta de Galicia.
_________

Non o desmantelamento da Universidade Pública Galega - A A.C Fuco Buxán amosa o seu total apoio ao Ensino Público Galego e á Universidade Pública Galega ante os salvaxes recortes, agresións e ataques levados a cabo polo Conselleiro de Ensino Xesus Vázquez e polo goberno de Feijoo e do PP da Xunta de Galicia

A A.C Fuco Buxán amosa o seu total apoio ao Ensino Público Galego e á Universidade Pública Galega ante os salvaxes recortes, agresións e ataques levados a cabo polo Conselleiro de Ensino Xesús Vázquez e polo goberno de Feijoo e do PP da Xunta de Galicia.

Denunciamos que o goberno de Feijoo e do PP desde a súa chegada ao goberno da Xunta de Galicia no ano 2009 recortou uns 86 millóns de euros á financiación das Universidades Públicas Galegas e como denuncian os seus reitores o goberno de Feijoo está levando a cabo un ataque sistemático contra as Universidades Públicas Galegas asfixiándoas economicamente e levándoas a unha situación de emerxencia social e de total abandono por parte das Administracións Públicas. Cremos que estes salvaxes recortes son profundamente ideolóxicos, clasistas e neoliberais, pois rachan a igualdade de oportunidades, converten as Universidades nun coto privado so accesíbel aos ricos, mercantilizan o Ensino, expulsan das Universidades Publicas ao alumnado con menos recursos económicos co salvaxe recorte das becas e a subida brutal das taxas universitarias, converten o Ensino nun negocio e nun privilexio para unha minoría e buscan que o Capital Privado faga negocio nas Universidades Publicas Galegas. Tamén denunciamos o recorte dos fondos públicos destinados ao Ensino Público e as Universidades Públicas Galegas que vai destinado a incrementar os beneficios do Ensino Privado e Concertado Galego.

Desde a A.C. Fuco Buxán defendemos e seguiremos defendendo un Ensino Público Galego, gratuíto, universal, de calidade, científico, democrático, de todos/as e para todos/as. Un Ensino Publico Galego que defenda o noso idioma galego, que fomente o pensamento crítico, o progreso e benestar social de toda a cidadanía, a igualdade de oportunidades, os valores democráticos,o respecto aos Dereitos Humanos e a igualdade de dereitos entre persoas, pobos e países.

Celso Posada Fernández

Área de Ensino e Xuventude.

Fuco Buxán, A. C.

Rúa Armada Española, 32 baixo- 15406 - Ferrol
Apartado Correos 240 C.P. 15400 Ferrol
Telefono. 981325492
www.fucobuxan.net
fucobuxan@yahoo.es
Foto: Alumnado e profesores de CS e 2º de bacharelato do IES Leixa visitou o campus de Ferrol da UDC. | 28.01.2015 | https://twitter.com/udc_gal

Enviado por:
A.C. Fuco Buxán Fuco Buxán
-fucobuxan@gmail.com-
31 de janeiro de 2015 10:14___________________

Apupan ao Rei, a Feijóo, a Wert e a Vázquez por inaugurar o curso nun centro público mentres se desmantela o sistema educativo - Vídeo

A CIG-Ensino denuncia que se limitou o dereito de manifestación durante a visita do monarca español ao centro Ben-Cho-Shey de Ourense

CIG-Ensino denunciou esta mañá, no decurso da concentración convocada pola Plataforma Galega en Defensa do Ensino Público coincidindo coa inauguración do curso escolar no centro Ben-Cho-Shey de Pereiro de Aguiar, a hipocrisía das institucións que participaron no acto: Monarquía, Xunta, Ministerio e Consellaría de Educación.


“Veñen inaugurar o curso, nun centropúblico, institucións que son precisamente as artífices do seu desmantelamento”, afirmou Anxo Louzao.

O secretario nacional da CIG-Ensino denunciou ademais que malia ter solicitado e concedido, en tempo e forma, o permiso de concentración, a policía impediu ás persoas congregadas diante do centro Ben-Cho-Shey colocarse en fronte do propio colexio.

Louzao explica que as e os asistentes á mobilización foron desprazados varios metros para que cando pasara a comitiva “os señores monarcas non nos viran”.

Pero o máis grave é que un grupo dunhas 40 ou 50 persoas foron retidas a un quilómetro de distancia e non se lles permitiu avanzar até que non pasaron os reis. Unha actuación policial coa que a CIG-Ensino considera que se conculcaron os seus dereitos fundamentais, nomeadamente o dereito á liberdade de expresión.

A pesar disto, a Plataforma conseguiu o seu obxectivo, desenmascarar este tipo de actos que Louzao cualificou como “propagandísticos, cargados de cinismo e hipocrisía”, ao que engadiu que “non nos pasa desapercibido que sexa a monarquía española quen veña inaugurar o curso a Galiza porque tanto esta institución, como o ministro de Educación,ou a consellaría, están ao servizo da españolización, da defensa dos intereses do ensino privado, clasista e confesional”.

Para a CIG-Ensino é “unha tomadura de pelo, un sarcasmo e unha provocación” que se inaugure ademais o curso nun concello e nun centro “ao que se lle negou no seu día a ampliación dunha unidade e porén simultaneamente,se concertaba con dous centros privados no mesmo concello”.

O portavoz da plataforma e secretario nacional de CIG-Ensino tamén considerou outra provocación que para o acto oficial se escollera precisamente un centro que leva o nome de Ben-Cho-Shey, “unha persoa da historia do noso país que tiña ideais diametralmente opostos ao que poden representar as institucións e persoas que están inaugurando este curso”, dixo.

Con esta mobilización a Plataforma e a CIG tiñan ademais como obxectivo denunciar a posta en marcha dun curso escolar conflitivo, pola supresión de 63 unidades no ensino público mentres se amplían en 79 as unidades no privado concertado e pola aplicación da LOMCE, que introduce novos recortes na ensinanza pública, pon en tea de xuízo a igualdade de oportunidades e o dereito á educación.

A este respecto Louzao denunciou o “cúmulo de despropósitos” da consellaría, pola publicación dos currículos cando xa estaba comezado o curso e a actitude do propio conselleiro de Educación “sobre o que pesa máis o seu posicionamento ideolóxico, a súa submisión absoluta aos mandatos de Madrid e a defensa dunha visión retrógrada e reaccionaria do ensino que o seu deber de estar ao servizo dun sistema educativo galego de calidade, que defenda a normalización lingüística e que garanta unha praza e un ensino de calidade a todas e todos os cidadáns galegos”.

Publicado en CIG-Ensino | 16.09.2014

__________________