Acordo para a programación dos Actos de Difusión do Regulamento de Participación Cidadá

ACTOS DE DIFUSIÓN DO REGULAMENTO DE PARTICIPACIÓN CIDADÁ

Últimos acordos tomados na reunión da Comisión Provisional de Control do Regulamento de Participación Cidadá (xoves 14.01.10):

PROGRAMA (20, 21, e 22 XANEIRO): ANIMACIÓN DE RÚA NOS BARRIOS

Entidades que participan (días previos ao Jofre):

• Compañía de teatro “Ghazafelhos”
• Asociación Cultural A Revolta de Trasancos.
• Asociación Agarimo.
• Asociación cultural Trópico de Grelos, con Blo-Afro.
• Grupo de 10 cabezudos (da A.VV. Caranza), que portarán os veciños e as veciñas de diversos barrios.

Mércores 20 de Xaneiro - Barrio da Magdalena. Saída ás 18,30 horas. Dous itinerarios que conflúen no Cantón:

• A Revolta + 5 cabezudos, saindo do Local social da A.VV. Esteiro – San Amaro – Praza do Callao – Rúa Lugo- Galiano – Praza de Armas - Cantón
  
  
• Agarimo + 5 cabezudos, saíndo do Local social da A.VV. Ferrol Vello – San francisco – Praza Amboaxe – Real – Cantón.

• Actuará no Cantón compañía de teatro “Ghazafelhos”, co espectáculo “contos para escagarriñarse” (45 min.).
  
  
• En caso de choiva: Fundación Caixa Galicia.

Xoves 21 Xaneiro - Parroquia de Serantes. Saída ás 17,30.

• Itinerario: Rotonda Sexto Pino ate estrada de Covas pola Avenida 19 de Febreiro e retorno á Pista Polideportiva (Agarimo + 10 cabezudos).
  
  
• Actuará na pista polideportiva a compañía de teatro “Ghazafelhos”.
  
  
• En caso de choiva: interior do Local da A.VV. San Salvador de Serantes

Venres 22 de Xaneiro Barrios de Ultramar e Inferniño. Saída ás 17,30.

• Itinerario: Praza de Ultramar – Rúa Perú – Igrexa O Rosario – Rúa Fontemoura -Praza do Inferniño (Agarimo + 10 cabezudos).
  
  
• Actuará na Praza do Inferniño “Bloco-afro” (da Asociación Trópico de Grelos) (9 músicos) e a compañía de teatro “Ghazafelhos”.
  
  
• En caso de choiva: C.C. Carvalho Calero.

Outras actividades preparatorias:

Luns 18 de xaneiro:

• Inicio da pegada de carteis nos barrios do Inferniño e Ultramar ás 17,45 horas.
• Reunión ás 18,00 horas no C.C. Carvalho Calero, convocada polas asociacións veciñais de Inferniño e Ultramar, co obxecto de convocar a todas as entidades cidadás da zona para difundir as actividades (4 días)

Publicidade:

• 500 carteis,
• 5000 volandas.
• Pendente: publicación do Regulamento e o Glosario (2000 exemplares, hoxe en imprenta), que serán distribuidos no Teatro Jofre.
• Realizarase unha presentación ante os medios, con carácter previo ao sábado 23 a publicación, xunto aos representantes do Colexio Profesional de Ciencias Políticas e Socioloxía de Galicia, que redactaron o glosario de termos sobre democracia e cos que se iniciou unha vía de colaboración.
• Circular a todas as asociacións para o acto do 23.

ESCALETA - SÁBADO 23 DE XANEIRO NO TEATRO JOFRE

• Inicio. 20,30.
• Presentación do acto, xornalista Raúl Salgado (guión e enlace de todas as actividades, que explicará a cronoloxía do proceso).
• Intervencións esporádicas en clave de comedia, coa actriz e monologuista Cristina Moreira.
• Grupo de jazz-tango “Tiempo4”
• Intervención de Mapi Venancio, veciña participante do grupo de traballo que conformou o GAP (hoxe membro da Comisión Provisional de Control do RPC).
• Karlotty e Guillermo Ferrandez, poesías baixo a temática da participación cidadá.
• Pechará as intervencións o Alcalde, que entregará o documento do Regulamento aos 12 membros da Comisión Provisional de Control.
• Finaliza o acto coa actuación da Banda Municipal de Concello de Ferrol e da Banda do Tercio Norte.

* Orzamento total para todas as actividades (artísticas e de publicidade): 12.000 euros.

Agradécese a difusión destas accións, co obxecto de realizar un CHAMAMENTO A TODA A CIDADANIA para acudir tanto o sábado 23 ao TEATRO JOFRE como ás actividades de animación nos distintos barrios.

Área de Participación Cidadá E DEPORTES
Maica Rodríguez Freire, técnica en Participación Cidadá
Praza de Armas, s/n. 1º andar. 15402 Ferrol
Tel.: 981.944.015 / Móbil: 696.112.691
participacion@ferrol.es


Enviado por:

Participación Cidadá

-participacion@ferrol.es-

15 de janeiro de 2010 12:00

____________________

Constitúen a Comisión de Seguemento dos Orzamentos Participativos

CONSTITUCIÓN DA COMISIÓN DE SEGUIMENTO DOS ORZAMENTOS PARTICIPATIVOS DO CONCELLO DE FERROL

Constitúen a Comisión de Seguemento dos Orzamentos Participativos.

Está integrada por 12 persoas, representantes dos 5 barrios e parroquias nos que se executarán os proxectos elixidos e da Comisión Provisional de control de Participación Cidadá.

O concelleiro Manuel Santiago explica que realizará o seguimento e control de expedentes e das obras executadas con cargo aos Orzamentos Participativos,pioneiros en Galicia.

As 16 propostas xa aprobadas se entregarán ao alcalde, Vicente Irisarri, no pleno que se celebrará o 29 de decembro.

Ferrol, 23 de decembro de 2009.-

O concelleiro de Participación Cidadá, Manuel Santiago, deu conta esta mañá da constitución dun novo espazo de participación: a Comisión de Seguemento dos Orzamentos Participativos, proceso pioneiro en Galicia que convirte a Ferrol na primeira cidade da Comunidade Autónoma na que os veciños e veciñas do municipio teñen a oportunidade de elixir os proxectos que serán financiados con cargo a unha partida dos orzamentos municipais, de 350.000 euros.

A dita comisión, tal e como indicou o edil, foi constituída onte no Teatro Jofre, nunha reunión na que participaron o Grupo Motor, as Mesas de Propostas e a Comisión provisional de control de Participación Cidadá.

Este novo órgano está integrado por un total de 12 persoas: 2 representantes, xa nomeados paritariamente, de cada barrio e parroquia no que se estivo executando o proceso (Santa Mariña, San Pablo de Catabois e San Xoán de Filgueira-Bertón, no caso da zona urbana, e San Xurxo e Doniños, no ámbito rural) e outros 2 representantes que formaban parte da comisión provisional de control -estes serán seleccionados proximamente-.

As súas funcións, segundo explicou o concelleiro de Participación Cidadá, é a definición das actuacións que se levarán a cabo relativas ás 16 propostas que foron aprobadas recentemente nas asembleas urbana e rural celebradas os pasados 12 e 20 de decembro, respectivamente, toda vez que estas precisan da redacción concreta de proxectos de intervencións (obras e actividades).

Neste senso, Manuel Santiago subliñou que está prevista a creación dun espazo de encontro co persoal técnico e iniciar un diálogo entre a cidadanía. Así mesmo, esta Comisión de Seguemento terá como cometidos o seguemento e control de expedentes e das obras e actividades realizadas, unha vez sexan executadas.

A Comisión de Seguemento dos Orzamentos Participativos continuará funcionando baixo os criterios deste proceso participativo, xa que será o enlace cos veciños e veciñas en cada un dos barrios e parroquias obxecto das actuacións seleccionadas, recollendo información sobre o terreo dos avances destas propostas e informando á cidadanía do estado dos correspondentes expedentes, así como do nivel de implementación destes programas.

Unha vez iniciada a avaliación do proceso, en xaneiro de 2010, irase perfilando o novo modelo de Orzamentos Participativos para o vindeiro ano, no que se incorporarán máis zonas ao proceso.

Para esta avaliación serán convocados os membros do Grupo Motor, Mesas de Propostas e Comisión Provisional de Control dos procesos de participación cidadá. Neste senso, o equipo técnico encargarase da preparación de toda a información recollida desde o pasado mes de xullo nas numerosas xuntanzas de traballo -charlas informativas, sesións de elaboración do regulamento co Grupo Motor, reunión das Mesas de Propostas ou a celebración das asembleas-.

Outro dos aspectos que se tratou na reunión deste martes foi a valoración das asembleas de votación de propostas e o seu nivel de participación, ademais da preparación do acto de entrega das propostas cidadás ao equipo de goberno, previsto para o vindeiro martes, 29 de decembro.

Este celebrarase inmediatamente antes do inicio da sesión plenaria -ás 18.00 horas- na que se aprobarán os proxectos por parte da corporación municipal. A este respecto, o edil Manuel Santiago avanzou que dúas persoas, representantes do proceso participativo na zona urbana e rural, farán entrega dun dossier coas 16 propostas aprobadas nas asembleas co obxecto de que o alcalde, Vicente Irisarri, o presente á corporación.

O montante total destas ascende a 347.803 euros, dos cales 200.616 euros corresponden aos barrios de San Pablo de Catabois, San Xoán de Filgueira e Santa Mariña, e 147.187 ás parroquias de San Xurxo e Doniños.

Participación Cidadá.-

Publicado por Participación Cidadá de Ferrol para PARTICIPACIÓN CIDADÁ-FERROL el 12/24/2009 12:03:00 AM

• enderezo-e: comision.gap@gmail.com
• www.participacion-ferrol.blogspot.com

Enviado por:
Comision veciñal
-comision.gap@gmail.com-
24 de dezembro de 2009 16:03
______________________________

Celebrouse unha reunión do grupo de traballo, relativa á entrada en vigor do novo Regulamento de Participación Cidadá

Comisión provisional de seguimento_Regulamento Participación

Estimados/as veciños/as,

Onte mércores 25 de novembro, no Ateneo Ferrolán, celebrouse unha reunión do grupo de traballo (autoconvocatoria), relativa á entrada en vigor do Regulamento de Participación Cidadá. Tratáronse e acordáronse os seguintes:

• Acto no Teatro Jofre o sábado 23 de xaneiro, a partir das 19,00 horas. Pendente por concretar contidos, escaleta, etc.
  
  
• Actividades previas de animación de rúa, nos barrios, convocando á cidadanía a esta sesión, na que se entregará a publicación do Regulamento, coa historia do processo e un glosario de termos sobre democracia (achégase borrador do índice)
  
  
• Sobre esta publicación, asinarase un convenio de colaboración co Colexio Profesional de Ciencias Políticas e Socioloxía para a redacción do texto sobre vocablos de democracia (anexo).

A comisión provisional de seguimento e control de participación cidadá estará conformada por todas as persoas do grupo de traballo (GAP), que tivesen participado dende o inicio no proceso (maio de 2008), cun mínimo de continuidade e asistencia ás sesións; ademais que asinen a declaración de adhesión. Este foi un acordo da pasada reunión do 13.11.09 e que se ratifica onte, sumándose xa algúns membros. Ábrese un prazo de 10 días (habiles para o departamento), que finalizará o próximo 11 de decembro para adherirse a este novo grupo de traballo.

Un saúdo,

Área de Participación Cidadá E DEPORTES
Maica Rodríguez Freire, técnica en Participación Cidadá
Praza de Armas, s/n. 1º andar. 15402 Ferrol
Tel.: 981.944.015 / Móbil: 696.112.691
participacion@ferrol.es

Enviado por:
Participación Cidadá
-participacion@ferrol.es-
26 de novembro de 2009 11:44

Baixar dos Arquivos Ártabros os seguintes documentos enviados pola área de participación cidadá:

• GLOSARIO TERMOS: 200 vocablos para a participación cidadá  dende a administración local
  
  
• DECLARACIÓN DE COMPROMISO PARA FORMAR PARTE DA “COMISIÓN PROVISIONAL DE SEGUIMENTO E CONTROL DOS PROCESOS DE PARTICIPACIÓN CIDADÁ”
  
  
• ACTA-RESUMO: SESIÓN DE TRABALLO SOBRE O REGULAMENTO DE PARTICIPACIÓN CIDADÁ (RPC) 13.11.2009

__________________

Nova reunión, este mércores 23 de Setembro en Valón, para preparar e organizar a convocatoria das Asambleas de Barrios

Convocatoria Preparación de Asembleas Orzamentos Participativos

Estimados/as veciños/as,

Continuamos co traballo relativo ao proceso de orzamentos participativos; é o momento de preparar e organizar a convocatoria das Asambleas de Barrios dos próximos dias. A xuntanza do Grupo Motor e GAP será no local social da A.VV. do Cruceiro de Valón, ás 19,00 horas o mércores 23 de setembro.

Trataremos os seguintes puntos:

• Preparación das Asambleas: accións comunicativas de reforzo e difusión para a convocatoria.
  
  
• Organización das Asambleas: Selección de persoas coordinadoras de Asambleas, coordinadoras de seguimento do rexistro.
  
  
• Contidos e obxectivos da Asamblea: identificación e priorización de problemáticas nos barrios, selección de representantes na Mesa de Propostas e achega de información do prazo de presentación de propostas cidadás.
  
  
• Outros temas que xurdan relacionados coa Asamblea e/ou co proceso de OP.

Unha aperta,

Área de Participación Cidadá E DEPORTES
Maica Rodríguez Freire, técnica en Participación Cidadá
Praza de Armas, s/n. 1º andar. 15402 Ferrol
Tel.: 981.944.015 / Móbil: 696.112.691

participacion@ferrol.es

Enviado por:
Participación Cidadá
-participacion@ferrol.es-
15 de setembro de 2009 13:44
________________________

Avanza a participación cidadá no Concello de Ferrol: aproban o autorregulamento de Orzamentos Participativos para o 2009

Grupo Motor e GAP aproban o autorregulamento de Orzamentos Participativos para o 2009
Xoves, 10 de setembro de 2009

Acordan o baremo a aplicar para seleccionar as propostas de investimento e de actividades que se financiarán este ano. Os cidadáns que desexen participar no proceso poden inscribirse xa, e ata o día 18, nos sete Puntos de Información

O concelleiro de Participación Cidadá, Manuel Santiago, deu conta dos principais acordos alcanzados na última sesión de traballo entre o Grupo Motor e o Grupo de Análise e Proposta (GAP), órganos de participación que están a guiar o proceso de Orzamentos Participativos no Concello de Ferrol. Así, Manuel Santiago explicou que na xuntanza celebrada a semana pasada se aprobou o autorregulamento de orzamentos para o 2009 como experiencia piloto; se estableceron os criterios para determinar que propostas se financiarán con cargo á partida de 350.000 euros e se concretaron os horarios dos sete puntos de atención cidadá que se habilitarán na cidade para facilitar cumprida información sobre o proceso, favorecendo por tanto a participación no mesmo.

En relación aos criterios establecidos para a valoración e selección de propostas, Grupo Motor e GAP acordaron establecer unha clara diferenciación entre as propostas de investimento e mantenemento e as propostas de actividades e programas. As primeiras se valorarán en función de dous aspectos, a súa natureza e a súa contribución para paliar o grao de abandono ou deterioro da zona obxeto de intervención. Segundo cumpra en maior ou menor grao con estes principios, a proposta recibirá unha puntuación de cero a 20 puntos. En canto ás propostas de actividades e programas, se terá en conta o colectivo ao quen van dirixidas e o seu contido. Como no caso anterior, o grao de cumprimento establecerá unha maior ou menor puntuación cun máximo de 20 puntos.

Fonte: web do Concello de Ferrol

Máis info:

http://www.ferrol.es/ampliar.aspx?id=15606
___________________

Charla no local social de Valón sobre Orzamentos Participativos: 12 de Setembro

ASOCIACIÓN DE VECIÑ@S "O CRUCEIRO" DE VALÓN

Orzamentos Participativos

A Asociación Veciñal do barrio de Valón e o Concello de Ferrol organizan unha charla sobre os orzamentos participativos.

A Asociación de Veciños “O Cruceiro” de Valón e a Concellería de Participación Cidadá do Concello de Ferrol convocan a tódolos veciños do barrio o sábado día 12 de Setembro ás 20 horas a charla sobre os orzamentos participativos.

Dada a importancia do tema, prégase a asistencia de tódolos veciños e veciñas, para que entre todos e todas ver as necesidades dos barrios de Valón e asi poder presentar ante o Concello cuestións como investimentos, obras, adquisicións, servizos e actividades.

Na reunión poderán participar tódalas persoas maiores de 16 anos (conforme di o regulamento).

O presidente da entidade veciñal salienta a importancia da reunión xa que “nesta xuntanza os veciños e veciñas presentes poderán presentar as súas propostas”

Por outra banda, tódos aqueles que se queiran inscribir neste proceso xa o poden facer os Luns, Mércores e Venres de 18 a 20 horas no Local Social ou na propia charla do sábado.

--
AVV "O Cruceiro" de Valón
Tlf:981371272-981370246
asociaciondevalon@gmail.com

--
ASOCIACION VECIÑAL O ROSARIO- INFERNIÑO
CIF-G70006473
correo-e: avvorosario@gmail.com
blog : orosario-inferninho.blogspot.com

Enviado por:
asociacion Veciñal O Rosario-Inferniño
-avvorosario@gmail.com-
9 de setembro de 2009 18:53
_________________

Nova convocatoria de reunión para falar sobre os Orzamentos Participativos, o mércores 2 de Setembro, no local social de Valón

[O concelleiro de Participación Cidadá, Manuel Santiago, explicou o proceso
Foto de DANIEL ALEXANDRE ]

Convocatoria_Orzamentos Participativos

Estimados/as veciños/as,

O próximo mércores 2 de setembro ás 19:00 horas imos manter unha nova sesión no local social da A.VV. O Cruceiro de Valón. Sería convinte que puidésemos avanzar sobre os seguintes puntos:

1. Criterios de priorización de propostas en función do que traballou cada barrio e o GAP.
   
   
2. Que órgano aproba o regulamento (intentaremos traer a esta sesión tamén as achegas dos diferentes grupos políticos)
   
   
3. Datas das asembleas.
   
   
4. Xestión dos locais sociais para depositar a ficha do rexistro de participantes.

Apertas,

Área de Participación Cidadá E DEPORTES
Maica Rodríguez Freire, técnica en Participación Cidadá
Praza de Armas, s/n. 1º andar. 15402 Ferrol
Tel.: 981.944.015 / Móbil: 696.112.691
participacion@ferrol.es


Enviado por:
Participación Cidadá
-participacion@ferrol.es-
28 de agosto de 2009 13:46
______________________


Enlaces relacionados:

Venres, 28 de agosto de 2009

Asociacións e cidadáns deciden que persoas terán dereito a votar os proxectos que se financiarán con cargo aos Orzamentos Participativos

O edil Manuel Santiago dá conta dos acordos adoptados polo Grupo Motor e o GAP na súa última reunión de traballo. As charlas para difundir este proceso continuarán hoxe, no local da Xunta Veciñal de Doniños, a partir das 19 horas

Documentos interesantes:

• Poden-se baixar dos Arquivos Ártabros [en formato -pdf- 14 páxinas] o Borrador de Regulamento do proceso piloto para a elaboración de Orzamentos Participativos. Concello de Ferrol 2009: Baixar
  
  
• Enlace para consultar o Regulamento de Participación Cidadá -37 páxinas en formato pdf-
  

Blog que informa sobre:

• PARTICIPACIÓN CIDADÁ-FERROL

___________________________

Charla en Doniños, Venres 28 de Agosto, sobre as necesidades da parroquia e os orzamentos participativos

PARTICIPACIÓN CIDADÁ-FERROL

2ª CHARLA INFORMATIVA - DONIÑOS

2ª  Charla Informativa sobre Orzamentos Participativos.

Análise das necesidades da parroquia.

Día 28 de Agosto, ás 7 da tarde, no Local Social da Xunta Veciñal de Doniños.

Intervirán:

• María Fernández , Asoc. Mulleres Rurais de Doniños.
• Mª José Fernández, Asoc. San Román.
• Magdalena Gonzalez, Asos. Prioriño.
• Pilar Díaz, Asoc. Xunta Veciñal de Doniños.

Publicado por Participación Cidadá de Ferrol para PARTICIPACIÓN CIDADÁ-FERROL el 8/27/2009 06:53:00 PM

Enviado por:
x.mel sanxoan
-melsanxoan@gmail.com-
27 de agosto de 2009 21:19
_____________________

Convocatoria reunión sobre Orzamentos Participativos, para o 26 de Agosto no local social de Valón

Estimados/as veciños/as,

Continuamos co traballo relativo ao proceso de orzamentos participativos; como sabedes na última reunión do Grupo Motor e o Grupo de Análise e Proposta, acordamos manter unha nova xuntanza este mércores 26 de agosto; será no local social da A.VV. do Cruceiro de Valón, ás 19,00 horas.

Trataremos os seguintes puntos:

• Validar os acordos da última reunión e pechar o borrador do regulamento de orzamentos participativos 2009, determinando quen valida o documento (Grupo Motor e GAP) e/ou asemblea.
  
  
• Datas da planificación ou plan de traballo.

Unha aperta,

Área de Participación Cidadá E DEPORTES
Maica Rodríguez Freire, técnica en Participación Cidadá
Praza de Armas, s/n. 1º andar. 15402 Ferrol
Tel.: 981.944.015 / Móbil: 696.112.691
participacion@ferrol.es

Enviado por:
Participación Cidadá
-participacion@ferrol.es-
24 de agosto de 2009 11:47
______________

Documento interesante:

Poden-se baixar dos Arquivos Ártabros [en formato -pdf- 14 páxinas] o Borrador de Regulamento do proceso piloto para a elaboración de Orzamentos Participativos. Concello de Ferrol 2009: Baixar
__________________________

O movimento social e veciñal da cidade e o Regulamento de Participación Cidadá de Ferrol

O pasado 9 deste mes de Xullo, un Pleno Extraordinario aprobaba o Regulamento de Participación Cidadá do Concello de Ferrol. Este Regulamento foi consensuado co movimento veciñal e social da cidade. despois de moitas sesións de traballo, por fin o Regulkamento veu a luz e oassou a pleno para a súa aprobación definitiva, a falta de concretizar os organismos e actuacións que o propio Regulamento dispon constituir e facer. No transcurso do proceso o Grupo de Análise e Proposta, tivo un importante papel do cal vimos dando conta neste sitio do CA21. É por iso polo que dúas persoas no nome do Grupo, foron as encarregadas de falar no pleno no nome do movimento veciñal e social da cidade. A continuación transcribimos as súas intervencións.


Intervención no Pleno do 9 de Xullo de 2009 do Grupo de Análise e Proposta

[Primeira parte -Lida por Xosé Miguel López Pérez]

Sr Alcalde, señoras concelleiras, señores concelleiros, compañeiros e compañeiras do tecido asociativo, veciñas e veciños de Ferrol, ¡ Boas tardes ¡.

Dirixímonos a este Pleno do Concello de Ferrol e a toda a cidade no nome do Grupo de Análise e Proposta que está formado por varias entidades asociativas: veciñais, sociais, sociosanitarias, culturais, ecoloxistas, de comercio xusto e algúns cidadás a título individual, que fomos quen elaboramos o Regulamento que hoxe se pretende aprobar.

O 27 de outubro do 2008 interviñamos noutro Pleno Extraordinario neste mesmo salón en representación dunha parte moi importante do tecido asociativo da cidade para demandarlle ó Alcalde e a tódolos grupos municipais que non permitisen que Ferrol se quedase sen Participación Cidadá e que amosasen un apoio decidido ó proceso iniciado por D. Javier Galán no mes de maio do 2008 e continuado por D. Manuel Santiago, proceso participativo como nunca antes tiña sucedido na nosa cidade.

Demandabamos que os partidos políticos cumprisen as súas promesas electorais de gobernar para as cidadás e os cidadáns e sobre todo de gobernar coas cidadás e os cidadás.

Diciamos que nós tamén formamos parte da cidade e colaboramos día a día na construcción da mesma, no noso tempo libre, restando das nosas afeccións e roubándollo ás nosa familias, con moito esforzo e de maneira gratuíta, como non pode ser doutro xeito.

Hoxe, aínda que con máis atraso do desexado, estamos no camiño de que o que entonces demandabamos comece a ser unha realidade. Hoxe e un día moi importante para a cidade de Ferrol na súa aposta pola democracia participativa, xa que a democracia ou é participativa ou non é democracia. Hoxe vaise aprobar, de maneira inicial, a posta en marcha dun proceso de participación por parte da cidadanía de Ferrol na toma de decisións e na execución das mesmas como nunca se tiña producido e como non existe noutro Concello de Galicia.

A participación cidadá é absolutamente necesaria para construír a democracia. Por eso resulta fundamental para favorecer o control dos e das gobernantes, para transmitir mellor as preferencias da cidadanía, suaviza-los conflictos, favorecer os acordos e o consenso e facer menos custosa a toma de decisións políticas.

A Participación fomenta un tipo de cidadanía máis interesada en informarse dos asuntos políticos, por cooperar coas demais persoas e asociacións, que é máis respectuosa cos que son e cos que pensan diferente, o que reforza os vínculos sociais entre as persoas e favorece a compresión intercultural.

Coa aportación de homes e mulleres ós asuntos públicos dase un salto cualitativo da Democracia Representativa á Democracia Participativa, establécese un diálogo político que non pode afectar unicamente as relacións entre partidos, senón que se constrúen novas canles de comunicación entre os representantes políticos, democraticamente elixidos, e a base da sociedade civil.

É un feito incontestable que a democracia participativa real aumenta a eficacia das decisións e mellora a participación cidadá e non só non dificulta senón que facilita a xestión municipal e a fai moito máis transparente e facilita a percepción cidadá sobre as políticas públicas.

O Regulamento de Participación Cidadá revela o compromiso do Concello de Ferrol, desexamos que de tódolos grupos municipais, diante da cidadanía para fomenta-la participación democrática e a transparencia na toma de decisións e na execución dos asuntos públicos locais, segundo o ordenamento constitucional e conforme á Carta Europea de Salvagarda dos Dereitos Humanos ás cidades.

Haberá que dedicarlle os Orzamentos necesarios para a súa posta en marcha, se non se quere que sexa so un documento escrito. É preciso dedicarlle importantes partidas económicas que non se deben considerar nunca un gasto, senón un investimento moi rendible.

A Participación Cidadá non é por tanto unha concesión graciosa á cidadanía por parte dos partidos políticos senón que é un dereito das persoas.

O impulso da participación cidadá en Ferrol non é só unha obriga do Goberno Local, senón que tamén deben implicarse tódolos poderes políticos que interveñen no territorio, a Deputación da Coruña e a Xunta de Galicia, aínda que o Concello debe liderar o proceso.

Débense crear foros onde se poidan formar a políticos, funcionarios e dirixentes asociativos en materias de Participación Cidadá e de Orzamentos Participativos.

Este era un compromiso adquirido desde o pasado ano que demandamos o seu cumprimento.

Débese ter unha perspectiva ampla nos procesos de participación para incorporar a todas as persoas que teñen interese na cidade. Por exemplo : Alguén dubida do interese dun comerciante no funcionamento dos servizos do barrio onde desenvolve a súa actividade? Ou do interese do profesional do ensino que traballa con rapaces e rapazas. Non pode opinar sobre a mellora urbanística do barrio no que se atopa a escola na que imparte docencia?

Desde o mes de maio do 2008 estivemos nun proceso que, despois do día de hoxe, xa non vai ter volta atrás: O de Participación Cidadá, tanto de maneira individual como de maneira colectiva a través das case 300 asociacións rexistradas no Concello de Ferrol.

Participación na toma de decisións e na execución das mesmas en tódalas áreas de goberno e sobre todo tipo de problemas e de definición de políticas.

Non é doado botar a andar os procesos participativos o camiño está cheo de obstáculos, hai políticos que non os asumen de bo grao porque lles parece que perden poder de decisión, hai entidades que non os aceptan porque pensan que perden poder de influencia no Goberno Municipal e na vida política local, e hai cidadáns que desconfían de que eses procesos de participación teñan algún resultado positivo e dubidan de que non sexan máis que poses electorais.

Tamén hai algúns funcionarios, que recelan por entender que perden poder e capacidade de influencia no Concello.

Durante moitos meses un grupo aproximado de 20 entidades de todo tipo e algunha persoa a título individual, elaboramos un novo regulamento de Participación Cidadá que foi validado por máis de 70 asociacións de todo Ferrol nun Foro Cívico celebrado no campus de Esteiro.

Nese Foro Cívico tamén se aprobou a necesidade de que no Concello de Ferrol se puxese en marcha unha experiencia piloto en canto a Orzamentos Participativos. Esa demanda do Foro Cívico vai ser unha realidade neste ano 2009 cunha partida inicial de 350.000 euros que chegarán no conxunto dos orzamentos do 2009 e 2010 a dous millóns de euros.

Fomos capaces de consensuar que esa experiencia piloto se desenvolvese este ano nas parroquias rurais de San Xurxo e Doniños e nas urbanas de San Xoán, San Pablo e Santa Mariña o que non foi máis que unha nova demostración da madurez do tecido asociativo de Ferrol que soubo poñer por diante o intereses colectivos diante dos particulares, aínda que defender os particulares, dada a necesidade que tódalas parroquias e barrios teñen, tamén tiña xustificación.

A xenerosidade o consenso e a altura de miras foi unha constante o longo deste proceso de elaboración do regulamento, un proceso de participación como nunca se tiña dado antes en Ferrol, se cadra esa é a definición máis axeitada: Defensa dos intereses xerais fronte ós particulares, compromiso de traballo e consenso para chegar a acordos.

Por riba das cores políticas e dos diferentes xeitos de ve-la vida, sen grandes controversias e con moita ilusión fomos capaces de chegar a acordos.

O Regulamento estivo paralizado durante meses polo Secretario do Concello de Ferrol, nunha actitude, para nós, pouco entendible.

Aínda que tamén puidera ser que o Sr. Secretario quixese ter tódalas garantías xurídicas de que o Regulamento cumpría coa Lei, cousa que para nós non ofrecía dúbida ningunha.

Finalmente e por dúas veces o informe da Federación de Municipios e Provincias deunos a razón e outros secretarios municipais, como a de Vitoria, tamén nos deu a razón.

Estamos seguros que o Sr. Secretario poñerá o mesmo celo na elaboración de informes cando se trate de actuacións urbanísticas en prazas públicas ou cando se trate de procesos de persoal ou selectivos. Non temos ningunha dúbida de que o Sr Secretario poñerá o mesmo empeño para garantir a seguridade xurídica do Concello de Ferrol neses casos, estamos completamente certos.

O Regulamento de Participación Cidadá será unha realidade a partir de hoxe, porqué estamos convencidos que tódolos Grupos Municipais van emitir o seu voto favorable, e será a ferramenta coa que unha cidadanía mellor informada, máis consciente, máis preocupada e máis implicada nos problemas da cidade, poida traballar na elaboración de propostas e na busca de solucións ós problemas de Ferrol.

Hoxe coa aprobación inicial deste Regulamento a cidade de Ferrol ponse no primeiro lugar de Galicia en materia participativa, non nos cansamos de repetilo, e ese é un mérito que pertence a toda a sociedade ferrolá, ó seu tecido asociativo e, desexámolo de verdade, a todo o Pleno do Concello de Ferrol de xeito unánime.

Hoxe non é o remate do Proceso, hoxe é unha etapa máis que continuará co desenvolvemento de todo o Regulamento de Participación Cidadá e dos organismos que nel se recollen, para o que, repetimos, se precisan recursos económicos.

[Primeira parte -Lida por Xosé Miguel López Pérez]

[Segunda Parte - Lida por Xosé Manuel Sanxoán Caamaño]

O presente Regulamento de Participación Cidadá se caracteriza por:

• Dar relevancia á estructuración territorial da participación.
• Integrar nas estructuras territoriais de participación a tódolos sectores cidadáns que teñen influencia nun espazo concreto.
• Complementar os ámbitos de participación territorial con estructuras de carácter sectorial que conecten parcialmente distintos territorios.
• Aplicar mecanismos de participación cidadá a tódolos ámbitos da realidade local.
• Dar o maior grado de autonomía ós espazos de participación marcando diferencias coas accións políticas dos partidos.
• Respectar ós ámbitos propios da sociedade civil evitando que os órganos de participación cidadá solapen a súa actuación.
  

Neste Regulamento atopamos algúns organismos que agora citamos:

• A Comisión Especial de Suxestións e Reclamacións. Para a defensa dos dereitos da cidadanía, o Pleno creará a Comisión de de queixa e reclamacións integrada por concelleiros e concelleiras de tódolos grupos municipais, de xeito proporcional. Correspóndelle á citada Comisión defender os dereitos da cidadanía nas súas relacións coa administración local, supervisar a actuación desta, propoñer accións de mellora e informar das queixas de conformidade co exposto neste Regulamento
• As Asembleas de Barrio. Onde poderán participar tódalas entidades e persoas dese ámbito formulando propostas e que constitúen o espazo propio para o desenvolvemento do desenvolvemento dos orzamentos participativos.
• Os consellos sectoriais. Nos que se poidan definir e executar as políticas dun sector determinado como, como por exemplo o Turismo. Cando definimos os Planes turísticos da cidade e a súa promoción no exterior, non poden ser só as entidades que teñen interese económicos no Turismo as que definan ese Plan. O tecido asociativo, representado nese Consello Sectorial xoga un papel fundamental e desprovisto de intereses económicos.
• Os Foros Cívicos. Órganos de reflexión e debate de formulación de propostas e control da execución das mesmas.
• O Consello da Veciñanza. Que é o órgano no que conflúen o resto de órganos de participación do Concello.
• O Dereito á intervención nos Plenos e nas Comisións Informativas.
  

Ademais dunha importante figura, que foi o motivo dunha controversia infundada, que se incorpora neste Regulamento de Participación Cidadá:

• O Valedor Veciñal. Unha institución que ten como obxectivo ser a canle de diálogo, estudio e seguimento dos problemas que viven ás cidadás e os cidadáns fronte ó Concello e que será elixido de maioría cualificada do Pleno do Concello de Ferrol.

Como xa dixemos antes este Regulamento é o máis progresista e máis avanzado de Galicia ata o momento.

O longo proceso de elaboración do Regulamento de Participación Cidadá, obtivemos outro resultado moi importante ou quizais o máis importante: O coñecemento e a comunicación entre moitas entidades que non tiñamos relación e que mesmo nin sabiamos da existencia unhas de outras. Este proceso permitiu facerse visibles a moitas delas, que nos puidésemos comunicar, entender e tomar acordos de maneira sinxela, e demostrou que temos máis cousas en común que diferencias. Permitiu constatar que, en contra do que se poida pensar, temos un tecido asociativo amplo, variado e sobre todo activo, comparable o de calquera cidade de Galicia.

Este tecido asociativo so ten un grave problema: Precisa de renovación e incorporación de novos efectivos que teñan gañas e sobre todo ilusión. A Participación Cidadá e a posta en marcha dos Orzamentos Participativos axudará posiblemente a esa renovación.

A partir de agora as cidadás e os cidadáns de Ferrol , terán máis dereitos que votar cada catro anos, serán, se queren, os protagonistas ¡ Non hai volta atrás, xa non se pode parar a participación cidadá !.

No pasado ano 2008 tamén se puxeron en marcha as subvencións para o tecido asociativo veciñal para actos culturais con cargo á Concellería de Participación Cidadá: DEMANDAMOS que de maneira inmediata se poñan en marcha neste ano 2009 do que xa levamos consumidos seis meses.

Desde a aprobación do Regulamento de Participación Cidadá o Grupo de Análise e Proposta pasamos, de maneira provisional, a ser a Comisión de Seguimento da Aplicación do citado Regulamento. Seremos os garantes do seu cumprimento.

A participación cidadá non é un fin en si mesma senón que é un medio para conseguir un obxectivo e ese obxectivo é o que temos que definir de maneira colectiva.

Puidemos escoitar hai poucos días na presentación do Urban, como tanto en Pamplona, en Valladolid ou Xixón a participación do tecido asociativo na elaboración de proxectos e no control da súa execución non só foi necesaria, senón que cando esta participación se producía os resultados eran moito máis satisfactorios que cando as Administracións actuaban soas. Teñamos en conta ós que van máis adiantados que nós, fagámoslles caso e, do mesmo xeito que eles fixeron, abramos a participación no Urban a máis entidades que as veciñais e a máis colectivos que os dos propios barrios afectados.

As políticas de promoción da Participación cidadá non deberían de ser obxecto de loita política partidaria, xa que nese caso difícil atopar gobernos con suficiente audacia para propoñer innovacións se o prezo debe ter inmediata traducción electoral.

Debe formalizarse un acordo solemne do Pleno Municipal no que tódolos partidos que teñen representación no Concello se comprometen a apostar pola Participación Cidadá e a deseñar procesos e instrumentos de participación facendo seguimento da súa eficacia e da súa eficiencia e todos xuntos aprender dos acertos e dos erro compartindo os éxitos ou os fracasos.

O éxito ou o fracaso da Participación Cidadá deben ser de toda a cidade e nunca dunhas determinadas opcións políticas.

O compromiso coa participación cidadá é un compromiso de todos e todas os cidadás e as cidadás e todo o tecido asociativo de Ferrol estamos dispostos a asumilo e lle pedimos ós partidos políticos que camiñen con nós e fagamos o camiño xuntos . O resultado será máis positivo para a cidade.

¡ Moitas grazas no nome do Grupo de Análise e Proposta. !

Ferrol a 9 de xullo de 2009.

[Segunda Parte - Lida por Xosé Manuel Sanxoán Caamaño]

Nota.- Este documento e as persoas que actúan como portavoces do Grupo de Análise e Proposta (Xosé Manuel Sanxoán Caamaño e Xosé Miguel López Pérez ), foron consensuados na xuntanza do GAP mantida o luns día 6 de xullo ás 20:30 horas nos locais da Asociación Veciñal de Esteiro “Fontelonga”.

Enviado por:
Asociacion Veciñal Fontelonga -avvfontelonga@mundo-r.com- 16 de julho de 2009 18:31
________________

O Pleno aproba o novo Regulamento de Participación Cidadá de Ferrol consensuado co movimento asociativo e veciñal

Ferrol dispón dun novo Regulamento de Participación Cidadá pioneiro en Galicia Venres

O pleno aproba, por unanimidade o documento, que nace dun intenso traballo da cidadanía. A nova normativa establece novos mecanismos de participación na toma de decisións e na sua execución. A cidade dotase así dun regulamento que é de tódolos cidadáns e as cidadás.

Por unanimidade, o pleno do Concello de Ferrol aprobaba, este xoves 9 de Xullo de 2009, de xeito inicial un novo Regulamento de Participación Cidadá que sitúa á cidade na vangarda de Galicia dos procesos participativos. Un Regulamento que nace da propia cidadanía e que marcará un antes e un despois sen retorno. Suporá un cambio radical respecto ao vixente, que data de 1998, e que nacía á súa vez dunha reforma do primeiro Regulamento aprobado en 1986. Onte á tarde a cidadanía respondía masivamente á convocatoria e abarrotaba o salón de plenos para seguir o transcurso do pleno, no que tamén tomaron a palabra representantes do Grupo de Análise e Proposta (GAP): Xosé Miguel López e Xosé Manuel Mel Sanxoán. Tras a votación, un quinteto de clarinetes da Banda de Musica Ferrolá poñía o punto e final á sesión.

O proceso da segunda reforma do regulamento se poñía en marcha en abril de 2008 coa participación do tecido asociativo, axentes sociais e cidadáns a título particular. Naquel entón, se constituían tres espazos de participación. En primeiro lugar, os Foros cívicos, onde se presentaba o proceso participativo e se validaba o borrador do regulamento, que eran refrendados por máis de 70 entidades, cunha participación de 85 veciños e veciñas. Precisamente agora, resta no proceso a celebración dun terceiro foro para dar a coñecer o Regulamento final, logo da fase de achegas e poder designar así a Comisión Permanente de Seguemento dos procesos participativos. Unha comisión que cumpre un papel fundamental como avaliadora. Tamén un Grupo de Análise e Proposta (GAP), no que teñen representación 30 entidades e cidadáns individuais e que estivo a traballar en 15 sesións sobre o texto normativo. E o terceiro espazo de participación foi a Comisión Política de Seguemento, na que estiveron representados os cinco grupos políticos ao longo de todo o proceso e, unha vez validado o texto no segundo foro cívico (que data de outubro de 2008), comezaba a funcionar a través da Comisión Informativa da Área de Participación Cidadá, para a tramitación administrativa e xurídica do proceso. A maiores e a solicitude do GAP botaba a andar un cuarto espazo: as sesións de contraste entre este grupo de traballo e os cinco grupos municipais co fin de intercambiar información e coñecer os posicionamentos de todas as entidades implicadas nesta iniciativa.

Neste contexto, é destacable a excelente valoración que realizaban tódolos sectores implicados neste proceso participativo ao constituír unha “escola da cidadanía” na busca constante dun consenso. Asemade, serviu para depurar e actualizar o Rexistro de Asociacións, unha base de datos que se informatiza. E tamén servía para poñer en contacto a diversas entidades veciñais que, traballando no mesmo sector, descoñecían a realidade doutros barrios.

Cómpre lembrar que o proceso de información xurídica iniciábase o 6 de novembro de 2008, coa petición de informe á Secretaría Xeral. Inicialmente, existían discrepancias en relación ao sistema de aprobación da figura do Defensor da Cidadanía por maioría absoluta (sistema consensuado tanto pola cidadanía como polos grupos políticos, ademais do aval dos informes externos da FEMP e do Concello de Vitoria-Gasteiz). Os tres primeiros informes xurídicos da Secretaría Xeral recomendaban, nembargantes, un sistema de aprobación por maioría simple para esta figura, en base a unha interpretación da Lei de Bases de Réxime Local. Tras recibir o segundo informe aclaratorio dos Servizos Xurídicos da FEMP, a Secretaría Xeral entrega un cuarto informe xurídico non desfavorable ao sistema de aprobación por maioría absoluta desta figura. É entón cando se dá traslado á Comisión Informativa de Participación Cidadá da tramitación do expedente para a súa aprobación plenaria.

Historia do regulamento

O Concello de Ferrol aprobaba por unanimidade nun pleno extraordinario en xuño de 1986 o primeiro Regulamento de Participación Cidadá, que previamente fora refrendado por unha asemblea xeral das Asociacións Veciñais o 30 de maio dese ano. No acordo plenario se recollía que “o Concello ten a obriga de facilitar á cidadanía a máis ampla información sobre as súas actividades, fomentar a participación na xestión municipal, sexa a título individual ou asociativo, e favorecer o desenvolvemento das entidades veciñais para a defensa de intereses xerais ou sectoriais” .

Nesta normativa inicial, regulábanse órganos de participación como as xuntas de barrio rurais e urbanas, os consellos sectoriais; dereitos cidadás, como as consultas á poboación e tamén se daba luz verde ao “Rexistro Municipal de Asociacións”. E, na exposición de motivos deste regulamento precursor para as administracións locais no Estado, xa se destacaba unha idea moi vertebral para entender o obxecto daquel documento: que o Concello, como marco político-administrativo máis próximo á cidadanía, é o lugar ideal para que a democracia se poida exercer de forma directa. Ao tempo estipulaba que a democratización do concello esixe, non só a representatividade da veciñanza elixida polo pobo para a toma de decisións, senón tamén a intervención de todas e todos os cidadáns na planificación e control das actividades e políticas públicas. Así as cousas, o texto de 1986 recollía a filosofía do proceso participativo actual que xa vén lexitimado a este Pleno polo tecido social e polas forzas políticas e que hoxe comeza a dar os pasos para obter a súa legalidade e as súas garantías.

Nos anos noventa, creábase un Negociado de Participación Cidadá e unha comisión específica para a revisión do Regulamento, que se adapta á lei de administración local de Galicia de 1997. Comezaba tamén o traballo do Plan Comunitario de Caranza, como experiencia pioneira de participación cidadá. O novo texto aprobábase no pleno en setembro de 1998 (no 5º mandato da democracia). Nese contexto, poñíanse en marcha diversos consellos sectoriais (Educación, Muller, Língua, Servizos Sociais...) con certa intermitencia na súa creación e na periodicidade de sesións e iniciábanse diversos proxectos participativos como o plan de normalización lingüística (1999) ou a Axenda Local 21 (2003).

O regulamento aínda en vigor e que se vai a reformar recolle tan só como órganos de participación os consellos sectoriais e os patronatos. Non obstante,a administración debe de abrir novas canles de comunicación e de traballo conxunto coa cidadanía e crear figuras e organismos novos, que se adapten ás necesidades e demandas da veciñanza. Estes contidos foron especialmente os que se reformaron a través dun proceso participativo que se iniciaba o ano pasado e que remataba onte coa aprobacoón en pleno.

Fonte: web do Concello de Ferrol

Fotos: Susete70 e orosario-inferninho.blogspot.com

Para consultar o borrador do regulamento, prema aquí
_____________

Intervención do GAP no Pleno do Concello no que se sometía a aprobación inicial o novo Regulamento de Participación Cidadá

Achegamos a intervención do Grupo de Análise e Proposta no Pleno Extraordinario do Concello de Ferrol no que se sometía á aprobación inicial o novo Regulamento de Participación Cidadá do Concello de Ferrol.

Asociacion Veciñal "Fontelonga" de Esteiro

Intervención do movimento social e veciñal de Ferrol no Pleno Extraordinario do 27 de Outubro de 2008

Un sector moi importante do movimento social e veciñal da cidade, que contribueu na elaboración do regulamento de Participación Cidadá e no Foro Cívico, decideu solicitar a súa intervención no Pleno Extraordinario do Concello de Ferrol celebrado onte, luns, 27 de Outubro de 2008, intervención que lle foi concedida, sendo Xosé Miguel López Pérez, presidente da Asociación Veciñal de Esteiro “Fontelonga ”, o encarregado de falar no Pleno en representación de nove entidades. A continuación transcribimos a declaración que se leu no citado Pleno.

Ferrol 27 de outubro de 2008.

Sr Alcalde, señoras concelleiras, señores concelleiros, veciñas e veciños de Ferrol, ¡ Boas tardes ¡.

No nome das nove entidades que solicitamos intervir neste Pleno Extraordinario do Concello de Ferrol ( AV de Ferrol Vello, AV de Caranza, AV O Rosario-Inferniño, AV de Covas, AV Prioriño, AV San Pablo de Catabois, ADEGA, Ateneo Ferrolán e AV de Esteiro- Fontelonga), queremos DEMANDAR a continuidade do proceso de participación cidadá posto en marcha por este Concello de Ferrol desde a Concellería de Participación Cidadá no presente ano 2008.

Hai máis entidades que xa nos amosaron o seu apoio como a Xunta Veciñal de Doniños, AV de Valón, AV San Salvador de Serantes, AV da Zona Centro e a Asociación Cultural “Lefre de Caldereta” e outras máis o irán facendo ó longo da semana.

Non vimos a ser portavoces de ningún grupo político, non vimos a censurar nin a atacar a ningún grupo municipal, todos eles nos merecen o maior respecto.

Vimos, exclusivamente, a que se recoñeza o traballo que vimos desenvolvendo, de maneira consensuada, desde o mes de maio na elaboración dunha ferramenta de participación cidadá: O novo Regulamento, e agardamos que hoxe non sexa o día no que no Concello de Ferrol morra ou se mate, por intereses partidarios, a participación cidadá.

DEMANDAMOS dos cinco grupos municipais o apoio ó proceso de participación cidadá e agardamos que Vostede, sr. Alcalde, faga o mesmo.

Non se converta vostede, sr Alcalde, na persoa que desde a Alcaldía de Ferrol, matou a participación do tecido asociativo da cidade na vida municipal, sería para vostede, sr Alcalde, un triste logro.

Se algún grupo municipal pretende utilizarnos no seu favor, está fondamente trabucado.

Se algún medio de comunicación, como sucedeu o sábado e o domingo, ve no noso comportamento e nas nosas demandas algún apoio á algún partido político, trabúcase moito máis.

So vimos aquí a demandar que os partidos políticos cumpran o que prometen nas campañas electorais: Gobernar para os cidadáns e as cidadás e sobre todo cos cidadáns e as cidadás.

Non vimos aquí a cuestionar a lexitimidade dos grupos municipais, nin moito menos os queremos suplantar, pero queremos que se aprobe urxentemente o Regulamento de Participación Cidadá do Concello de Ferrol, elaborado e consensuado por máis de 70 entidades asociativas e por cidadáns e cidadás a título persoal, que fomos quen, por riba das nosas moitas maneiras de ver a vida, de chegar a un documento de todos e de todas, documento que, previo informe xurídico do Secretario Municipal, foi apoiado polos grupos municipais na xuntanza que mantivemos con eles.

• Queremos que se poñan en marcha as asembleas de barrio e de parroquia.
  

• Queremos que se poñan en marcha os consellos sectoriais.
  

• Queremos que se poña en marcha o Consello da Cidade e o Valedor Veciñal.
  

• Queremos que se poida intervir nos Plenos e nas Comisións Informativas.
  

• Queremos, sobre todo, no 2009 que se poñan en marcha os Orzamentos Participativos, que unha experiencia piloto nun barrio ou parroquia ou nunha área de goberno municipal poña en marcha os orzamentos participativos.
  

Como saberán vostedes no veciño concello de Fene, vano facer con 240.000 euros, 120.000 na parroquia de San Valentín e 120.000 na parroquia de Sillobre. En Ferrol a cantidade terá que ser sensiblemente maior.

Non dubide, sr. Alcalde, de que chegaremos a un acordo de en que barrio ou en que parroquia se fai a experiencia piloto, nós sabemos e queremos o consenso e xa o temos demostrado ó longo do proceso de elaboración do Regulamento de Participación Cidadá.

Agardamos e demandamos dos Grupos Municipais, e sobre todo de Vostede sr. Alcalde, que hoxe non se aprobe un Regulamento de Administración e Goberno do Concello de Ferrol, que vaia contra o proceso participativo, nin contra o froito dese proceso o Regulamento de Participación Cidadá, deixando baleiro de contido e convertendo en papel mollado.

Se isto sucedese, sr Alcalde, se hoxe morre ou matan a participación cidadá, saiba Vostede que o tecido asociativo non imos ficar nin mudos e moito menos imos ficar quedos.

• Nós non nos pronunciamos sobre quen ten que gobernar a cidade, non é a nosa competencia.
  

• Nós demandamos a continuidade da participación cidadá na vida municipal de Ferrol.
  

• Nós tamén formamos parte da cidade e colaboramos día a día na construción da mesma, no noso tempo libre, restandoo das nosas afeccións e roubándollo ás nosa familias, con moito esforzo e de maneira gratuíta, como non pode ser doutro xeito.
  

O tecido asociativo non pode ser só o río no que pescan os partidos políticos cando conforman as súas candidaturas as eleccións municipais, non somos entidades de usar e logo tirar, somos e temos vocación de ser moito mais.

Somos o tecido asociativo máis importante e máis vivo de toda Galicia e sempre que nos deixan ou nolo piden estamos dispostos a participar co noso traballo e co noso esforzo.

Non hai moitos días, sr Alcalde, e neste mesmo Salón de Plenos do Concello de Ferrol, Vostede recoñecía o importante labor desenvolvido por moitas entidades asociativas na elaboración do Plano Estratéxico de Servizos Sociais de Ferrol, posto en marcha desde a Concellería de Benestar Social, foron moitas horas, moito traballo e moito esforzo. Que non se pretenda hoxe deixarnos mudos.

Nun sistema democrático os comportamentos ególatras, irrespectuosos e “caudillistas”, están fóra de tempo e de lugar, Ferrol non os precisa e nós nin os practicamos nin os toleramos.

Queremos, xa para rematar, DEMANDAR dos Grupos Municipais do Concello de Ferrol, que non aproben ningún Regulamento de Administración e Goberno, que limite, menosprece ou minusvalore a participación cidadá.

DEMANDAMOS para o exercicio do 2009 orzamentos participativos, cunha partida económica importante.

DEMANDAMOS a aprobación e posterior desenvolvemento do Regulamento de Participación Cidadá, elaborado, de maneira consensuada e sen ningún dirixismo político, polo tecido asociativo.

Agardamos que os cinco Grupos Municipais aposten decididamente pola participación cidadá e agardamos que Vostede, Sr Alcalde, faga o mesmo.

¡ Moitas grazas !

Enviado por:
Asociacion Veciñal Fontelonga -avvfontelonga@mundo-r.com- 10 de julho de 2009 17:42
_____________

O Pleno aproba o novo Regulamento de Participación Cidadá de Ferrol consensuado co movimento asociativo e veciñal
__________________

Abre-se un proceso de participación cidadá en materia orzamentaria no Concello de Ferrol

Por considera-la de interése transcribimos a noticia que publicou o Diario de Ferrol, na súa edición deste Sábado 4 de Xullo de 2009, sobre o acto de participación cidadá, referente aos orzamentos participativos que, como primeiro paso, responsábeis do Concello de ferrol e do movimento veciñal acordaron logo dun proceso de converxas e reflexions que duraron varios meses.

[O concelleiro de Participación Cidadá, Manuel Santiago, explicou o proceso
Foto de DANIEL ALEXANDRE ]

A cidadanía empeza a manexar as contas do Concello

REDACCIÓN > FERROL

Veciñas e veciños de cinco barrios serán os primeiros en ter capacidade de decisión sobre o destino de parte do diñeiro de todos. Nesta primeira experiencia de orzamentos participativos, a partida alcanza os 350.000 euros, pero se espera chegar aos dous millóns en 2010.

O local da Asociación Veciñal de San Xoán de Filgueira-Bertón encheuse onte con motivo da presentación dos orzamentos participativos, que terán precisamente neste barrio, xunto cos de Santa Mariña, San Pablo, Doniños e San Xurxo, as súas experiencias pioneiras e que permitirán aos veciños decidir o destino dunha partida de 350.000 euros este ano. A importancia da participación cidadá na construción da democracia foi o eixo central da totalidade das intervencións, empezando pola do responsable da área no Concello, Manuel Santiago, que explicou como se fraguou o proceso de orzamentos participativos e apuntou que o acto de presentación de onte é só un primeiro paso dunha campaña moito máis ambiciosa para lograr a implicación activa da poboación na toma de decisións.

Foi o presidente da Asociación Veciñal de Santa Mariña, Xosé Fontao, o encargado de pór voz á representación cidadá, e fíxoo como persoa que aglutina unha dobre experiencia: foi concelleiro na primeira corporación democrática e participou e participa activamente no movemento veciñal. Fontao recordou aqueles primeiros tempos de liberdades limitadas, pero apuntou que xa entón se consideraba que os veciños tiñan moito que dicir no día a día da cidade. Aínda recoñecemento que a auténtica democracia participativa poida ser unha utopía, o representante de Santa Mariña preguntouse que sería da democracia sen utopía. Recordou tamén Fontao aquel primeiro Regulamento de Participación Cidadá que confeccionou de xeito pioneiro en Ferrol a corporación en 1983, e ao fío disto, animou á veciñanza a acudir ao pleno do próximo xoves, no que se aprobará unha nova normativa deste tipo, unha ferramenta de participación pero que tamén implicará máis traballo e compromiso veciñal, apuntou.

Pola súa banda, o alcalde, Vicente Irisarri, asegurou que "ningunha cidade chegou en Galiza ao lugar onde está Ferrol en materia de participación" e quixo deixar claro que non se trata dunha conquista da esquerda nin dun determinado partido político, "senón dos cidadáns".

En materia de orzamentos participativos, o rexedor municipal precisou que haberá que "elixir e priorizar" á hora de establecer as partidas, e considerou tamén que será necesario realizar "un exercicio de extrema xenerosidade entre os barrios, para favorecer aos que teñan menos recursos e servizos". Xunto coa xenerosidade, a capacidade, o consenso, o traballo e o esforzo serán, dixo Irisarri, claves para o bo desenvolvemento desta iniciativa, polo que fixo un chamamento a que se eviten as discusións estériles. Tamén advertiu de que unha vez que se decida o destino do diñeiro aínda será necesario dar cumprimento a unha serie de trámites administrativos, aínda que matizou que "os proxectos que nacen do pobo terán menos filtros administrativos porque teñen o aval da cidadanía".

Fonte: Diario de Ferrol
_______

O goberno local acorda co tecido asociativo celebrar o próximo 9 de xullo o pleno para aprobar o Regulamento de Participación Cidadá

O edil Manuel Santiago avanza que a sesión incluirá intervencións dos cidadáns que participaron na elaboración

O concelleiro de Participación Cidadá, Manuel Santiago, anunciou que o pleno para aprobar o novo Regulamento Municipal de Participación Cidadá terá lugar o vindeiro día 9 de xullo, ás 20 horas. Así o acordaba Concello e tecido asociativo da cidade no encontro que mantiñan onte pola tarde no pazo municipal, logo de que se solventasen as dúbidas da Secretaría Xeral do Concello en torno ao sistema de elección do Defensor da Cidadanía. Nesta liña, o edil de área aseguraba que coa hora elixida se facilitará a asistencia dos cidadáns e as cidadás de Ferrol no que se espera sexa un pleno participativo e con gran afluenza veciñal.

Neste contexto, Manuel Santiago apuntaba que a cita de onte serviu non só para fixar a data, senón tamén para perfilar os contidos da sesión plenaria que terá como único punto da orde do día a aprobación do dito documento e que incluirá as intervencións dos cidadáns e cidadás que participaron no proceso.

Deste xeito, o concelleiro lembraba que co dictame favorable do documento na comisión do pasado luns, logo de recibir o último dos catro informes solicitados para dilucidar o sistema de elección do Defensor da Cidadanía, se salvaban tódolos obstáculos que existían para aprobar o novo Regulamento de Participación Cidadá do Concello de Ferrol. Un documento que nace dun proceso participativo que contou coa implicación activa de máis de 70 asociacións a través dun foro cívico, do Grupo de Análise e Proposta (GAP) e da Comisión Política, na que estiveron representadas as cinco forzas políticas municipais. E, nesta liña, destacou que a aprobación do novo Regulamento suporá un cambio radical respecto ao vixente na actualidade, que data de 1998. Este, á súa vez, nace dunha reforma do primeiro Regulamento aprobado en 1986.

Así mesmo, outro dos asuntos que se tratou na xunta de onte, segundo explicou Santiago, foi o estado actual do primeiro proceso de orzamentos participativos que se vai implantar na cidade, así como das accións preparatorias que se están a levar a cabo como paso previo ás asembleas que se porán en marcha a partir do mes de setembro. Nesta liña, Santiago destacaba que hoxe venres, a partir das 17.30 horas, na praza de San Xoán terá lugar a presentación pública de todo o proceso.

03/07/2009

Fonte: web do Concello de Ferrol
_______________

Momento actual da participación cidadá no Concello de Ferrol

Prezad@s amig@s: vaivos no correo un Informacións sobre a parálise e indefinición acerca da liña de subvencións para actividades culturais en Participación e a implicación do GAP na norma que regulamentará os orzamentos participativos. Saúdos, Ramiro Marier


INFORMACIÓNS DO GRUPO MUNICIPAL DE ESQUERDA UNIDA

Ferrol, 3 de xullo de 2009

• O GRUPO MUNICIPAL DE ESQUERDA UNIDA DEMANDA A CONTINUIDADE DAS SUBVENCIÓNS DO DEPARTAMENTO DE PARTICIPACIÓN CIDADÁ PARA ACTIVIDADES CULTURAIS COMEZADA O ANO PASADO
• JAVIER GALÁN RECLAMA AO GOBERNO MUNICIPAL QUE IMPLIQUE AO GAP NA ELABORACIÓN DA NORMA DOS ORZAMENTOS PARTICIPATIVOS
• ESQUERDA UNIDA ESIXE OUTRO RITMO E MANEIRAS DO GOBERNO MUNICIPAL PARA PULAR E XERAR SINERXIAS ENTRE A APROBACIÓN DO REGULAMENTO E O LANZAMENTO DOS OP,S
  

O Grupo Municipal de Esquerda Unida quere manifestar a súa fonda preocupación pola situación que atravesa o departamento de participación cidadá, que mediado o ano aínda non clarexou que vai facer coa liña de subvencións iniciada o exercicio pasado polo anterior concelleiro para actividades de carácter cultural. Entendemos que non é aceptable deixar morrer unha iniciativa que é susceptible de ampliar tanto no eido económico como no campo das posibles actividades, e que xa permitiu o ano pasado un traballo participado das diferentes entidades para acordar uns criterios de reparto.

En 2008, adicouse unha partida de 30.000 euros e o compromiso de incrementar a partida para o 2009. Neste ano aínda nada se sabe e logo vai sendo tempo de comprometer alomenos un esforzo semellante pola concellería para este exercicio orzamentario. Os tempos son esixentes e de non facerse con celeridade as entidades non poderán apenas programar e logo xustificar as actividades a desenvolver. Dende Esquerda Unida - consonte co expresado xa o ano pasado, apostamos polo incremento até acadar os 60.000 euros – reclamamos do concelleiro de participación cidadá que exprese con rotundidade o compromiso con esta liña de subvencións e a poña en marcha de xeito inmediato.

O Grupo Municipal de Esquerda Unida ao través de Javier Galán manifesta que diante da inmediata elaboración dunha norma que ordene o proceso de orzamentos participativos nesta experiencia piloto, o Goberno Municipal ten que recabar a colaboración do GAP, conformado polas persoas que máis traballo e implicación desenvolveron para configurar o Regulamento de Participación Cidadá , para que se impliquen e colaboren na elaboración desta norma. Non se pode desperdiciar o coñecemento e experiencia acumulados neste ano polas persoas que adicaron xenerosamente horas e compromiso para facer de Ferrol a cidade bandeira da democracia participativa en Galicia deixándoas de lado, o Goberno Municipal ten que contar con elas para a elaboración da norma de funcionamento dos OP,s. subliñou Javier Galán.

Esquerda Unida non quere deixar de manifestar o seu desacougo pola lenta marcha que arrostra todo o proceso de participación cidadá: 7 meses perdidos entre a indecisión e a parálise para aprobar o Regulamento de Participación Cidadá aprobado no Foro Cívico, ou a presentación – aínda agora – do proceso piloto hoxe pola tarde, cando estamos no verán e vai perdido medio ano. O Goberno Municipal non conduce o proceso coa vontade política e a dilixencia precisas, actúa case como un lastre do que teñen que estar a tirar o movemento asociativo máis consciente.

Esquerda Unida esixe un cambio nos ritmos e nas maneiras de actuar para que a actuación do Goberno Municipal produza un efecto positivo e que a conxunción da aprobación do Regulamento de Participación Cidadá o vindeiro xoves e o lanzamento da experiencia piloto dos OP,s xeren unha sinerxia que contamine toda a vida municipal e se estenda polo conxunto da cidade.

Enviado por:
eu-ferrolterra@esquerdaunida.org
-eu-ferrolterra@esquerdaunida.org-
3 de julho de 2009 13:34
_____________________

O goberno local prevé que o Concello recupere a xestión directa da piscina municipal de Caranza

• O edil Manuel Santiago asegura que a medida pretende facilitar o seu uso a máis clubes e aos propios veciños

• Afirma que o goberno local nunca xamais se planteou a privatización, que achaca a declaracións malintencionadas
  

O concelleiro de Deportes, Manuel Santiago, desmentiu taxantemente esta mañá as declaracións efectuadas polos responsables do Club Natación Ferrol nas que aseguraban que o Concello tiña previsto privatizar a piscina municipal de Caranza. Non só iso, o edil tachou as “afirmacións” de malintencionadas e asegurou que se afastan da realidade, xa que a intención da Administración local é precisamente a contraria: recuperar a xestión municipal directa a través de persoal municipal. En todo caso, o que si vai facer o goberno local, engadiu Santiago, é regularizar unha situación que impedía a moitos clubes do municipio (como Sincro Ferrol ou Triatlón Ferrol) e mesmo aos veciños deste barrio ferrolán acceder ás instalacións por mor da concesión realizada a esta entidade deportiva no pasado.

Neste contexto, Manuel Santiago explicaba que o Club Natación Ferrol accedía hai dez anos a unha concesión encuberta sen concurrencia nen publicidade, o que lles permitía facer uso das instalacións en exclusiva nunha franxa horaria da mañá e tamén pola tarde. A piques de rematar esta (setembro de 2009), o Concello, a través do concelleiro de área, intentaba poñerse infructuosamente en contacto cos responsables da entidade deportiva para comunicarlles a nova situación. Situación que, en todo caso, pasa por recuperar a xestión directa das instalacións e sacar a licitación o mantemento das mesmas. Nunca a xestión. E, ao fío, o edil lembraba que en todo o termo municipal non hai ningunha instalación que esté privatizada. O que si existe son concesións de servizos cos prezos públicos tasados polo Patronato de Deportes e aprobados en pleno.

Nesta liña, Santiago explicaba que con este modelo de xestión, o Concello pretende garantir o acceso ao vaso doutros clubes da cidade. Tamén dos veciños e veciñas de Caranza. Nembargantes, aseguraba que ao Club Natación Ferrol se lle concederá a lámina de auga proporcional ao número de deportistas con licenza federativa, tal e como sucederá co resto de entidades deportivas que soliciten estas instalacións municipais.

Así mesmo, Manuel Santiago tamén quixo garantir o uso e desfrute de todos os alumnos e alumnas da Escola Municipal de Natación, como non podería ser doutro xeito.

Ferrol, 30 de xuño de 2009
Saúdos; Gabinete de Comunicación

Área de Participación Cidadá E DEPORTES
Maica Rodríguez Freire, técnica en Participación Cidadá
Praza de Armas, s/n. 1º andar.
15402 Ferrol
Tel.: 981.944.015 / Móbil: 696.112.691
participacion@ferrol.es

Enviado por:
ASOCIACION VECIÑAL O ROSARIO- INFERNIÑO
CIF-G70006473
correo-e: avvorosario@gmail.com
blog : orosario-inferninho.blogspot.com
_____________

Asemblea de Barrio no Inferniño para presentar e debatir sobre o Regulamento de Participación Cidadá

Esta Asociación Veciñal O ROSARIO- INFERNIÑO, con representación no GAP (Grupo de Análise e Proposta), queremos iniciar unha ASEMBLEA DE BARRIO co obxecto de presentar e explicar a veciñanza o proceso do REGULAMENTO DE PARTICIPACIÓN CIDADÁ, este vindeiro xoves, día 11 de xuño as 7 h da tarde no Centro Cultural Municipal CARVALHO CALERO.

O principal fin é informar e difundir a toda a cidadanía o verdadeiro significado da PARTICIPACIÓN CIDADÁ así como involucrar as diferentes entidades socio- culturais e deportivas do barrio.

Trataremos de contar coa presenza de varios membros do GAP coa intención de informar respecto a este proceso , analizar e debater o auténtico alcance da DEMOCRACIA PARTICIPATIVA

Esta mesa estará composta por varios membros do GAP:

• Alberto Saavedra, Presidente da A.Veciñal de Ferrol- Vello.

• Magdalena Gonzalez da Asociación Prioriño.

• Miguel López, Presidente da Asociación Veciñal de FONTELONGA.

• Pilar Venancio, Presidenta da A. V. de Caranza.

• Maica Rodriguez, Asesora de Participación Cidadá,

• Manuel Santiago, CONCELLEIRO DE PARTICIPACIÓN CIDADÁ.
  

• Moderando esta presentación o membro do GAP, Xosé Manuel Sanxoán da Asociación Veciñal O Rosario-Inferniño.
  

Lembramos que os ORZAMENTOS PARTICIPATIVOS ( 2 MILLÓNS de € ano 2009-10) requerirán dun exercico do máximo consenso social e a participación directa de todas as entidades do barrio do Ensanche , no Inferniño, as cales serán expresamente convidadas a este acto.

Saúdos veciñais.

Asdo. Xosé M. Sanxoán - Secretario

e Ana J. López - Presidenta

ASOCIACION VECIÑAL O ROSARIO- INFERNIÑO
CIF-G70006473
correo-e: avvorosario@gmail.com
blog : orosario-inferninho.blogspot.com
_______________

Tertulia de xuño co Concelleiro Manolo Santiago sobre participación cidadán

Tertulia co Concelleiro Manolo Santiago sobre Participación Cidadá este Martes 9 de Xuño ás 9 da Noite no Pub Borsalino

O concello de Ferrol, desde o comezo deste mandato ven traballando na promoción de procesos de participación cidadá. O truncado goberno PSOE-EU, foi o responsable desta iniciativa representada, nomeadamente, por Jabier Galán (EU). Logo da ruptura do goberno, e tras dun importante receso, o PSOE recollía o testigo da man de Manolo Santiago, actual concelleiro de participación cidadá.


O camiño andado semella non ter volta atrás, e todo o asociacionismo e o conxunto da cidadanía ferrolá dispoñemos dun instrumento vital para afondar na democracia participativa. De vós depende, de nós depende e… por nós non vai ser.

O pasado ano elaborábase de forma participada un novo Regulamento de Participación Cidadá co que se pretende regrar toda unha chea de mecanismos que faciliten a participación de asociacións e cidadanía no devir do concello.

Este Regulamento vía a luz, nun “Foro Cidadán” no que se aprobaba por unanimidade o traballo que previamente fixeran moitos dirixentes veciñais, de asociacións ecoloxístas e outras persoas de forma individual desde unha Comisión de estudo (GAP-Grupo de Análise e Proposta).

A día de hoxe, logo dos preceptivos —e paralizantes— informes xurídicos, este Regulamento será aprobado nun Pleno en próximas datas.

Naquel Foro Cidadán, no que Lefre de Caldereta tamén participou, demandabase do concello un novo impulso, poñendo en marcha un proceso de orzamentos participativos que, logo de varios meses, parece que tamén se poñerá en marcha por medio dunha experiencia piloto.

Destas cuestións e doutros proxectos municipais relacionados coa participación é do que falaremos na nosa tertulia do segundo martes de xuño, coa participación de Manuel Santiago Pérez, actual concelleiro de participación cidadá.

Seguimos a falar no Borsalino.

A.C Lefre de Caldereta
http://lefredecaldereta.com/
______________________________

Participación Cidadán en Ferrol: Acta da reunión do Grupo de Análise e Proposta do 20 de Maio de 2009

Acta do GAP e información proceso aprobación

Achégase a acta do pasado 20 de maio, que incorpora tamén a información relativa á presentación de "Cidadanía, S.Coop." (táboas de investimento, etc.)

Na reunión de onte da comisión informativa de Participación, o secretario xeral deu conta do informe que solicitou á FEMP para aclarar de novo o sistema de aprobación da figura do valedor da cidadanía. Non obstante, a decisión é seguir adiante coa fixación dunha data para levar a pleno a normativa.

Atentamente,

Área de Participación Cidadá E DEPORTES
Maica Rodríguez Freire, técnica en Participación Cidadá
Praza de Armas, s/n. 1º andar. 15402 Ferrol
Tel.: 981.944.015 / Móbil: 696.112.691
participacion@ferrol.es

Proceso piloto para a implantación dos Orzamentos Participativos

Acta da reunión do Grupo de Análise e Proposta (GAP)
Mércores 20 de maio de 2009, Salón de Sesións. Casa do Concello, de 19,00 a 20:15 horas.

O listado das persoas e entidades participantes é o seguinte:

Colectivos e persoas
AA VV Ferrol Vello Alberto Saavedra
AA VV Prioriño Magdalena González Grandal
AA VV Cuco Ruíz de Cortazar Pilar Rodríguez Venancio
AA VV O Rosario Inferniño Xosé Manuel SanXoán
AA VV Fontelonga-Esteiro Xosé Miguel López Pérez
AAVV Centro Luis M. Taboada
AVV San Pablo de Catabois Ana Beceiro Mosquera
AVV Pedro Padrón do barrio da Madalena César Manso Platas
AVV Ensanche A e Federación Roi Xordo Fernando Ocampo Aneiros
AVV Ultramar Arcadio Ares Arias
AVV Santa Mariña José María Fontao Pita

A título iudividual Ramiro Santalices Martínez
Grupo Diversidade funcional Ferrol e comarca Pili Mata
Escola Deportiva Inferniño Emilio López Pérez

Concellería Participación Cidadá
Manuel Santiago Concelleiro de Participación Cidadá
Maica Rodríguez Freire Área de Participación Cidadá

Equipa Técnica
Rosa Muñiz Castro e Luis García García Cidadania, Soc Coop Galega

A xuntanza de traballo tiña a seguinte orde do día:

• Aclaración sobre o proceso de implantación dos Orzamentos Participativos
• Selección do barrio urbano para a posta en marcha dos Orzamentos Participativos durante o 2009-2010.
• Papel das entidades sociais ferrolás nos OP e reformulación das funcións do Grupo de Análise e Proposta (GAP).
  

Desenvolvemento da reunión e acordos tomados

Presenta a reunión Manuel Santiago, quen dá a benvida ás persoas participantes e recorda os asuntos a tratar na reunión.

Desde a equipa técnica se fai unha exposición da situación do proceso para a implantación dos Orzamentos Participativos. Como primeira cuestión se aclara as premisas xerais; tempos e partida orzamentaria. Nese sentido recórdase o acordo do Concello de implantar o proceso de OP ao longo dos anos 2009 e 2010. A partida orzamentaria a xestionar é de 2 millones de euros, dos que 350.000 serán xestionados ao longo do presente ano, quedando o resto para o ano seguinte.

Os barrios que participen este ano terán como referencia os 350.000 euros, ampliándose a participación doutras zonas da cidade no 2010.

Esta cuestión conviña aclarala de cara a selección do barrio da zona urbana pendente de decidir, xa que a selección do barrio non impide a apertura de novas zonas para o seguinte ano.

Aclarado esta información a equipa técnica fai unha exposición dos argumentos técnicos, sobre datos recollidos do concello, que orienten a selección do barrio. Aclárase que, polas dificultades de sistematización e actualización da información, tan só se poden xustificar unha serie de datos en base ás aos seguintes criterios técnicos:

Ámbito rural e urbano

Este criterio responde á necesidade de implementar os OP tendo en conta as diferencias que conforman a identidade e convivencia dos territorios do concello. Considerando a forte influencia da zona rural no concello (amplitude do territorio, número de habitantes da zona, etc) e ás necesidades específicas que estes espazos demandan en canto carencias de inversións e proxectos, infraestructuras, etc, cómpre recoñecer ao medio rural facéndoo participe na proposta de OP. Tendo en conta estes criterios, durante este ano os OP desenvolveranse nunha zona rural, como é a de Doniños-San Xurxo, tal e como se consensuou a súa elección por parte das entidades sociais na xuntanza do Grupo de Análise e Proposta celebrada o pasado 28 de abril.

Poboación beneficiaria

Número de persoas (veciños e veciñas) que se poden beneficiar do proceso, do alcance dos proxectos seleccionados.

Como documento informativo achégase a táboa da distribución da poboación do concello segundo os barrios que o conforman. A táboa recolle os barrios urbanos ou semiurbanos, atendendo que a selección da zona rural está pechada.

Os datos recollidos na táboa teñen unha compoñente provisional, seguindo criterios estatísticos, facilitados a través do CRI, atendendo a datos xeorreferenciados que se tratarán de forma desagregadas cando se determine a demarcación de cada barrio.

Barrios e zonas Habitantes Nivel de Preferencia
Caranza 12.271 - Preferencia 1
Ensanche A (Inferniño) (8665)- Estación (1668) 10.333 Preferencia 1
Ensanche B (Ultramar)(7733) - O Bertón (267) 8.000 Preferencia 2
Centro 7.601 Preferencia 2
Esteiro 6.353 Preferencia 2
San Xoán (3086)-Faxardo (2952) 6.038 Preferencia 2
Canido 6.043 Preferencia 2
Santa Mariña 3.134 Preferencia 3
Recimil (O Pilar) 2.498 Preferencia 3
San Pablo (629) – Catabois (1407) 2.036 Preferencia 3
Ferrol Vello 1.663 Preferencia 4
San Felipe-A Graña 480 Preferencia 4
Total 67.492

Tendo en conta o número de persoas por barrio, establecemos unha proposta inicial de ordenación ou preferencia:

1. Entre 15.000 e 9.000 habitantes: Preferencia 1.
2. Entre 8.999 e 5.000 habitantes: Preferencia 2.
3. Entre 4.999 e 2.000 habitantes: Preferencia 3.
4. Menos de 1.999 habitantes: Preferencia 4.

Dinamización comunitaria

A traxectoria do barrio desde o punto de vista de dinamización social e participación cidadá non só se mide en función do número de entidades e colectivos sociais que existen no barrio, tampouco en relación á cantidade de persoas socias de ditas entidades. Cando falamos de dinamización social referímonos ás dinámicas comúns, en torno a un proxecto ou proxectos conxuntos de mellora da calidade de vida das persoas, sobre o que pivotan dinámicas relacionais e espazos para o encontro. A finalidade é contribuír ao desenvolvemento das persoas, grupos e comunidades, capacitando, animando e motivando a utilización dos seus propios recursos para que a comunidade sexa protagonista do seu propio desenvolvemento.

Ao tempo, cómpre ter en conta a presenza doutro tipo de actores, espazos dinamizadores (os centros de ensino, os mercados, os centros de saúde, universidades, etc) entendidos como axentes e lugares de encontro de colectivos cidadás.

A continuación recóllese información que identifica, inicialmente, algunha das posibles dinámicas das que estamos a falar:

Barrios e zonas urbanas Número de colectivos sociais
Caranza 33
Ensanche A (Inferniño)- Estación 16
Ensanche B (Ultramar) - O Bertón 7
Centro 47
Esteiro 22
San Xoán 7
Canido 17
Santa Mariña 4
Recimil (O Pilar) 9
San Pablo – Catabois 5
Ferrol Vello 7
Total 174

o Investimentos proxectados

Os proxectos desenvoltos nos últimos anos (cuantitativa como cualitativamente falando) ou os previstos (infraestruturas, dotación de recursos e servizos públicos) dentro do barrio, son outro elemento de referencia á hora da selección da zona de intervención. Seguramente compartamos a idea de que as necesidades dun barrio nunca chegan a estar cubertas ao cen por cen; son moitas as melloras que se poden facer de cara a mellora da calidade de vidas das persoas que nel conviven; sempre queremos o mellor para o noso barrio. Sen embargo, deberamos ter presente o comportamento solidario que nos leve a actuar de forma democrática a través da colaboración, participación, equilibrio e apoio entre os diferentes territorios que conforman o concello. Comprender que as melloras que se desenvolvan nunha parte da cidade, do concello, son melloras dirixidas aos nosos veciños e veciñas, colectivo do que tamén formamos parte.

Fondo Estatal de Investimento Local. Ministerio de Administraciones Públicas

Barrios e zonas Orzamento barrio Orzamento por habitante Diferencia media -
Caranza 1.827.359,67 - 148,9 - -2,7
Ensanche A e Ensanche B 2.214.124,27 - 120,78 - -30,82
Centro 548.074,61 - 72,1 - -79,5
Esteiro 445.462,41 - 70,11 - -81,49
San Xoán 829.562,24 - 268,81
(só San Xoán) - 117,21 - 137,4
(San Xoán-Faxardo) - -14,2
Canido 929.091,39 - 153,7 - 2,1
Santa Mariña 254.030,08 - 81 - -70,6
Recimil (O Pilar) 2.066.430,84 827,2 675,4
San Pablo 794.999,99 - 1263,9
(só San Pablo) - 1112,3 - 390
(San Pablo-Catabois) 238,4
Total 9.909.135,5 - 151,6

Táboa de equipamentos:

Barrios Centros de ensino Sanitarios
- Caranza CEIP Manuel Madias, Centro de Educación Adultos, Colexio La Salle, Colexio Santa Juana Lestonnac, IES Ucha Piñeiro, IES Carballo Calero, Conservatorio de Música Xan Viaño ( 7) Fundación Hospital de Caridad, Unidade Drogodependencias (2)
- Ensanche A (Inferniño)- Estación Colexio Ludy, IES Concepción Arenal, Colexio Belén (3) Centro Saúde Fotenla Maristany, Punto de Atención Continuada, Unidade de Saúde Mental (3)
- Ensanche B (Ultramar)- O Bertón CEIP Ponzos (1) Sagrado Corazón (1)
- Centro Colexio Cristo Rei, Colexio Jesús Maestro, Colexio Tirso de Molina, Escola Oficial de Idiomas (4) Santa Teresa (1)
- Esteiro CEIP Esteiro CEIP Isaac Peral, Sofia Casanova, Saturnino Montojo, Colexio Compañía de María (5)
- San Xoán-Faxardo CEIP San Xoán (1)
-Canido CEIP Cruceiro de Canido, Gardería San Rosendo (2)
- Santa Mariña CPR Valle Inclán I (1)
- Recimil (O Pilar) CEIP Ibañez Martin, IES Marques de Suanzes (2)
- San Pablo – Catabois Juan de Gándara, Carmen Polo, IES Catabois (2)
- Ferrol Vello IES Ferrol Vello (1) Consultor Manuel Comellas (1)
Total 29 8

Expostos estes argumentos, faise unha rolda para recoller a opinión dos colectivos

Respecto dos datos expostos dubídase da certeza en canto ao número de habitantes identificados por barrio; nalgún dos casos pode ser real pero noutros se entende vive maior, ou menor, número de poboación, influíndo a distribución que fai o Censo electoral por barrio. O mesmo acontece cos datos referidos aos colectivos sociais rexistrados e a actividade real das entidades. Explícase que fontes de información ten o concello e que os barrios están xeorreferenciados de forma provisional dende o CRI.

A exposición da entidades:

- AVV Esteiro: Valórase positivamente ter deseñado o Regulamento de Participación Cidadá e dar saída á demanda exposta no Foro Cívico de iniciar unha experiencia piloto de Orzamentos Participativos no concello. Respecto da selección do barrio urbano, enténdese que se pode facer por consenso desde as entidades posto que calquera barrio que se elixa supón facer operativo a demanda cidadá. En todo caso a preferencia do barrio vén marcada polas características de desestruturación da zona e a inexistencia de planes específicos de intervención (excluídos do Urban, do Fondo Estatal de Inversión Local, etc). A opción, para esta experiencia piloto, é a de Santa Mariña-San Xoán-San Pablo.
- AVV Santa Mariña: por ser un dos barrios máis necesitado, mesmo abandonado polas administracións, elixen Santa Mariña-San Xoán-San Pablo.
- AVV Caranza: non fan proposta concreta. Ao fío da intervención deixa constancia do malestar na anterior reunión do GAP pola asistencia doutras entidades e da forma na que manifestaron a súa postura respecto do proceso de selección.
- Escola Deportiva Inferniño: Valórase a premisa de que todos os barrios teñen dereito a participar na experiencia piloto, polo que calquera elección é ben recibida.
- AVV O Rosario-Inferniño: Referencia a importancia do proceso participativo, independentemente do orzamento a xestionar. Ao marxe de elixir a zona de Santa Mariña-San Xoán-San Pablo, anima a que se faga extensible ao resto do barrios do concello.
- AVV O Prioriño: fai referencia á ausencia de colectivos rurais na reunión, entendo que a selección da zona rural non quita de estar presente no proceso de identificación do barrio urbano. Identifican Ferrol Vello como barrio onde comezar o proceso piloto.
- AVV Cruceiro de Canido. Comparte a elección da zona de Santa Mariña.
- AVV Ferrol Vello. Manifesta a urxencia de comezar o proceso e da necesidade de que a xente participe. Defende a selección de Ferrol Vello atendendo a deixadez do barrio, á ubicación e aos posibles problemas de poder participar activamente, desde as entidades, nos investimentos derivados do Plan Urban no propio barrio.
- AVV San Pablo de Catabois. Identifican a zona de Santa Mariña-San Xoán-San Pablo.
- AVV Ultramar: apoian a intervención en Santa Mariña-San Pablo-San Xoán.
- AVV Pedro Padrón. Identifican a zona de Santa Mariña-San Xoán-San Pablo. Ao tempo demandan a participación cidadá nos barrios de Ferrol Vello, A Madalena e Canido dentro do proxecto Urban.
- AVV Ensanche A e Federación Roi Xordo: apoian a proposta de Santa Mariña-San Xoán e San Pablo.
- Valoración do acordo e o consenso na toma de decisión para que a experiencia sexa crible e asegure unha garantía ao desenvolvemento de outros procesos participativos no concello.

Despois da rolda de intervencións queda consensuada a zona de Santa Mariña-San Xoán e San Pablo como barrio urbano para a o deseño do proceso piloto de OP para o 2009.

O papel da entidades sociais no proceso de OP: reformulación do GAP

Considerando preciso contar cun espazo de traballo e seguimento do proceso de OP por parte das entidades sociais, tal e como se fixo desde o GAP para a reforma do Regulamento, formúlase a necesidade de reformular dito espazo. Se o GAP se constitúe inicialmente cuns obxectivos de traballo específicos aos que dar resposta ata ter aprobado o Regulamento é lóxico que haxa que dotalo de novos cometidos unha vez que o proceso finaliza.

É por iso que querendo abrir a participación ás entidades se poida dar saída ao que o propio Regulamento de Participación establece como é creación de espazos para o seguimento das accións en fomento da participación cidadá. A tal efecto, a norma local fala da constitución do Consello da Veciñanza ao que lle precede, mentres non se constitúe, a Comisión Permanente ou de Seguimento. Este órgano ampliaría o espazo de áreas de traballo do actual GAP, asumindo novos retos, facendo un seguimento das accións de promoción da participación cidadá desde o concello, e abrindo a presenza de novas entidades que queiran formar parte deste espazo. A súa constitución ten sentido sexa aprobado en asemblea desde o Foro Cívico. Mentres, e ata a aprobación do Regulamento, o GAP segue estando activo.

Outros asuntos: proceso de aprobación do Regulamento de Participación Cidadá

Desde a área de participación cidadá se informa da recepción, nesa mesma mañá, do Informe da FEMP referida á consulta formulada sobre a elección do Valedor da Cidadanía. O informe é favorable á demanda cidadá respecto da maioría necesaria no Pleno para elixir figura do Valedor.

O informe será estudiado desde o Concello e trasladado aos grupos políticos. Unha vez se atenda a estas fases, o proceso continuará ata a aprobación do Regulamento en Pleno extraordinario.

Enviado por:
Participación Cidadá -participacion@ferrol.es- 2 de junho de 2009 11:59
______________________