Memorábel concerto conmemorativo do 50 aniversario do 10 de Marzo de 1972 - Interpretado polo quinteto de vento metal 'Hércules Brass' - Estrea da peza sinfónica 'Ferrol 1972' - Intevencións Juán Durán, Rafael Pillado e Angel Mato - Dez de Marzo Sempre !! - Memoria e Dignidade - Vídeo e fotos

Concerto conmemorativo do 50 aniversario Ferrol 10 de Marzo de 1972

Auditorio Municipal de Ferrol | 12.02.2022

As Asociacións Culturais Fuco Buxán e Memoria Histórica Democrática iniciamos onte a Conmemoración do 50º Aniversario do Dez de Marzo do 72, cun magnífico Concerto organizado polo Concello de Ferrol coa colaboración de ambas Asociacións, marco extraordinario para a estrea mundial da peza sinfónica “FERROL 1972” composta polo profesor Juan Durán, regalo impagable e xeneroso á nosa Cidade e a toda a Clase Obreira Galega.

Con enorme satisfacción amosamos a nosa gratitude ao público asistente que encheu o Auditorio, viaxando tamén desde moitos lugares de dentro e fora de Galicia, ao persoal do mesmo que nos colmou de atencións, aos intérpretes –Hércules Brass Quinteto de Metais, ao pianista e percusionistas- que sumaron á causa con entusiasmo o seu alto nivel artístico e profesional, ao Departamento de Protocolo, a Concellería de Cultura, ás e os representantes públicos e ao Alcalde de Ferrol, que abriu con este Acto un ano dedicado en plenitude a lembrar aqueles feitos do 72 e traelos pedagoxicamente ao centro da vida actual e futura como símbolo de solidariedade de clase e de organización pola consecución dos dereitos sociais, sindicais e democráticos.

O emotivo discurso do noso compañeiro Rafael Pillado foi unha emocionante síntese e lección de todo elo e co exemplo dos e das protagonistas de entón –os de todas e todos coñecidos e o de tantas persoas anónimas que neles participaron– continuaremos traballando en facer realidade, sempre, eses valores.
Reiterou, na súa intervención, a necesidade –que está sendo apoiada con numerosas firmas- de trasladar o Monumento, de Xoán Braxe, á localización exacta onde sucederon os feitos que simboliza, á Praza contigua, que deberá levar o nome de “Praza do Dez de Marzo”.

Moitas grazas a todas e todos e continuamos no labor.

Ferrol, 13 de Febreiro de 2022.

DEZ DE MARZO SEMPRE! MEMORIA E DIGNIDADE.



Fotos de Chelo Carballal e Fer Ocampo.
Vídeo do Concello de Ferrol.

10 de Marzo de 1972
50 Aniversario
Memoria e Dignidade

Achegamos: Manifesto. Relación de Adhesións. Logotipo.

Contacto:
10m72.50aniversario@gmail.com

Facebook:
Dez de Marzo Cincuenta Aniversario.

Documentos:

✔ Selo Logotipo 50 aniversario do 10 de Marzo. | Acceder/Baixar.

✔ Manifesto do 50 aniversario do 10 de Marzo. | Acceder/Baixar.

✔ Apoios ao Manifesto do 50 aniversario do 10 de Marzo. | Acceder/Baixar.

[*] Contactos:

✔ Fuco Buxán Asoc. Cultural - Ferrol
-fucobuxan@gmail.com-

✔ Asociación Cultural Memoria Histórica Democrática -memoriahistoricademocratica@gmail.com-

Relacionados:

✅ Iniciando as actividades do 50º Aniversario do Dez de Marzo: Concerto do quinteto de vento metal 'Hércules Brass' e estrea da composición 'Marzo 1972' de Juan Durán, no Auditorio Municipal de Ferrol - Sábado 12 de febreiro, ás 20:30hs - Reserva de entradas. | Ir Ártabra 21.

✅ Concerto no Auditorio Municipal: 'Ferrol 1972', peza sinfónica de Juan Durán, composta especialmente para conmemorar o 50 aniversario do Dez de Marzo - Estrea absoluta no Auditorio de Ferrol, o sábado 12 de Febreiro, ás 20:30 horas. | Ir Ártabra 21.
_______

O Comité Cidadán de Emerxencia para a Ría de Ferrol con Rafael Pillado

O CCE CON RAFAEL PILLADO

Desde este Comité Cidadán de Emerxencia para a Ría de Ferrol, compartimos, con tanta xente amiga, a dor e o sentimento pola grave enfermidade que afecta ao noso querido compañeiro Rafael Pillado Lista, cofundador deste CCE en defensa dá Ría, a Legalidade e a Vida, referente histórico da loita obreira, cofundador das CCOO, militante comunista desde 1960 e entregado sempre, desde os partidos e as organizacións de esquerdas e o movemento asociativo e cultural á loita polas conquistas sociais e democráticas e a favorecer sempre aos máis necesitados.

A Rafael acábanlle de diagnosticar un mesotelioma pulmonar, producido polo Amianto, que envelena a tantos traballadores do Naval, e doutras moitas industrias e a unha parte da cidadanía que inocentemente o sufriu cando os poderes públicos e as empresas eran conscientes e calaban o dano que producía.

Firme nas súas conviccións, de defensa do social antes que o persoal, quere dar a batalla para que os culpables paguen as consecuencias e estes feitos teñan máis difícil a súa repetición. Nesa batalla, desde este CCE estaremos ao seu lado con todas as nosas forzas. O escrito por el feito publico defíneo mellor que as nosas palabras.

"Estimadas amigas e amigos: estes días recibín a mala noticia de que padezo cancro. Cancro producido polo amianto. Un mesotelioma que limita o meu tempo de vida.

No transcurso de ese tempo, quero pedirvos que informedes a todo o mundo. Non quero que a miña enfermidade e a de tantos afectados, sexa clandestina. Pretendo ademais que a miña reclamación sexa ocasión para denunciar aos responsables dos nosos asasinatos silenciosos. Unha ditadura fascista que tras ser financiada pola Banca March, recibiu do ditador autorización, en exclusiva, para importar sin límites, o amianto, e que a través de Uralita contaminou as augas, as terras, os tellados i edificacións, e matou e segue matando a miles de persoas.

Pretendo tamén contribuír, mentres dure, á celebración do 50 Aniversario do 10 de marzo de 1972.

Aperta forte, sempre. Rafael Pillado"

Comité Cidadán de Emerxencia para a Ría de Ferrol
comitecidadan@gmail.com
www.comitecidadan.org
@ComitCEmerxenc


Foto: Rafael Pillado Lista (de Miguel Garcia Garcia).

Enviado por:
Comité Cidadán de Emerxencia
-comitecidadan@gmail.com
2 de fevereiro de 2022 16:23
_______

Carta de Rafael Pillado anunciado que padece cancro producido polo amianto

Este domingo 30 de xaneiro de 2022, Rafael Pillado facía público que padece cancro producido polo amianto. Na súa mensaxe manifesta que non quere que a súa enfermidade quede oculta e denuncia aos responsábeis dos miles de asasinatos silenciosos que causa o amianto. Desde o Colectivo Ártabra 21, pensamos que podemos falar por todos os seus membros, sentimos con dor a noticia. Para nós Rafael sempre é unha referencia, pola súa forza, ánimo e compromiso con todas as causas xustas, non só pola súa pegada na Historia deste pobo, en particular no mundo obreiro, senón pola súa actitude de dignidade, loita e solidariedade. Aínda que non compartamos todas as súas posicións políticas, si admiramos e respectamos a Rafael, porque del emanan valores para facer o ben e evitar o mal. É unha persoa que practica a ética na acción e non nos deixa indiferentes. Construtor de pontes, creador de iniciativas, sempre no camiño de facer o ben común e compartir a felicidade coas persoas. Ánimo Rafael, admiramos a túa actitude e desexamos de corazón que venzas a enfermidade.
 
Carta de Rafael

Estimadas amigas e amigos: estes días recibín a mala noticia de que padezo cancro. Cancro producido polo amianto. Un mesotelioma que limita o meu tempo de vida.

No transcurso de ese tempo, quero pedirvos que informedes a todo o mundo. Non quero que a miña enfermidades e a de tantos afectados, sexa clandestina. Pretendo ademais que a miña reclamación sexa ocasión para denunciar aos responsables dos nosos asasinatos silenciosos. Unha ditadura fascista que tras ser financiada pola Banca March, recibiu do ditador autorización en exclusiva para importar sen límites, o amianto, e que a través de Uralita contaminou a auga, as terras, os tellados i edificacións, e mata e sigue matando a miles de persoas.

Pretendo tamén contribuír, mentres dure, a celebración do 50 Aniversario do 10 de marzo de 1972.

Aperta forte, sempre.

Ferrol, 30 de xaneiro de 2022

Rafael Pillado

[*] Rafael Pillado Lista, San Cibrao (Cervo) o 12 de xuño de 1942, xubilado de BAZAN, é Vicepresidente da A.C. Fuco Buxán e membro do Comité Cidadán de Emerxencia para a Ría de Ferrol. Foi un activista sindical e político nos anos da ditadura franquista, sen deixar nunca a súa actividade social e política. Foi condenado polo TOP (Tribunal de Orden Público da Ditadura Franquista), no chamado proceso dos 23 de Ferrol, polos sucesos de Marzo do 72, polo que foi encarcerado en Carabanchel e con anterioridade na prisión da Coruña. Foi Secretario Xeral do PCG e foi concelleiro en Ferrol co PSOE no que estivo afiliado até finais 2011. Participou no Encontro Social e na Rede de Apoio Mutuo de Ferrol Terra e nas Marchas da Dignidade de Ferrolterra. Agora está ligado a Podemos. Escribe artigos sobre a actualidade nos medios locais. Ten escrito un importante e moi interesante libro sobre unha parte da nosa historia recente "O Latexo da vida e da conciencia - Memorias Colectivas de Rafael Pillado - I (Primeiro Volume)". E xa en decembro de 2019, publicou o segundo volume das súas memorias: "A dura luz da memoria | PALABRAS AFIADAS | Memorias colectivas de Rafael Pillado - II".

Foto: Rafael Pillado, histórico sindicalista ferrolán | Rafa Vázquez
_______

Rafael Pillado

Rafael Pillado

Aquela BAZÁN fabricaba buques de ferro pero fabricaba tamén “Homes de Ferro”….

Neste ano de conmemoracións do 50 Aniversario do Día da Clase Obreira Galega, entre as moitas biografías, sucesos, debates, efemérides… que pasarán por este face e polos Actos que se organicen, pensamos que teñen que ter un lugar destacado as moi numerosas vítimas do Amianto. Ese asasino silencioso e cruel de tantos traballadores do Naval e doutras industrias e de tanta cidadanía inocente do seu prexuízo…

Hoxe - con moita dor - comentámosvos, pola seu expreso desexo, que ao noso querido compañeiro RAFAEL PILLADO LISTA, acábanlle de diagnosticar un mesotelioma pulmonar ocasionado polo asbestos.

Coa mesma decisión e enerxía que loitou contra a ditadura, polas liberdades e polos dereitos humanos e cidadáns, está disposto a dar a batalla, até onde poida e co noso apoio, polos dereitos das vítimas do amianto e os seus familiares.

Desde as Asociacións AGAVIDA, FUCO BUXÁN e MEMORIA HISTÓRICA DEMOCRÁTICA, nesa loita, acompañarémolo con todas as nosas forzas. Unha batalla que desde hai máis de 20 anos vimos mantendo contra unha Empresa e un Sistema que ocultou deliberadamente este perigo e as súas consecuencias.

Foto de “Aceiro sobre a auga” de Ramón Loureiro. Edic. Liceo Rubia Barcia.
_______

A comisón 'Dez de Marzo - 50 Aniversario' estivo co Alcalde d'As Pontes e Presidente da Deputación d'A Coruña e nunha charla-coloquio no IES Becerreá, que imparteu Rafael Pillado, explicando ao alumnado o que aquela data supuxo respecto da loita da Clase Obreira organizada fronte a Ditadura en defensa da liberdade e dos dereitos laborais e democráticos

Continúan os preparativos entorno á conmemoración do próximo 50 aniversario do Dez de Marzo do 72, promovida pola A.C. Memoria Histórica Democrática e da A.C. Fuco Buxán, onte mércores 15 de decembro. Desta vez cunha charla-coloquio no IES Becerreá e no concello d'As Pontes co seu Alcalde e Presidente da Deputación Provincial d'A Coruña.

O noso compañeiro Rafael Pillado, un dos protagonistas do Dez de Marzo do 72, cofundador das CCOO, veterano de tantas loitas solidarias, xubilado da Bazán e agora directivo da A.C. Fuco Buxán, estivo no IES Becerreá, explicando ao alumnado o que aquela data supuxo respecto da loita da Clase Obreira organizada fronte a Ditadura en defensa da liberdade e dos dereitos laborais e democráticos. Esta actividade de levar as novas xeracións aqueles valores democráticos e de solidariedade é unha das máis ilusionantes entorno a conmemoración do próximo 50 aniversario do Dez de Marzo “Día da Clase Obreira Galega”.

Os compañeiros Manuel Fernández Pita, Presidente da A.C. Memoria Histórica Democrática, Manuel Rodríguez Carballeira e Víctor García Novás, directivos da A.C. Fuco Buxán, foron recibidos polo Presidente da Deputación d'A Coruña e Alcalde do Concello d'As Pontes de García Rodríguez, Valentín González Formoso, facéndolle entrega do Manifesto Dez de Marzo, 50º Aniversario e comentándolle as liñas xerais dos actos que estas dúas Asociacións, co apoio doutras moitas e de institucións, entidades e particulares, van levar a cabo ao longo do vindeiro 2022 para conmemorar dignamente esta efeméride, constituída en “Día da Clase Obreira Galega”.

Temos que agradecer o interese por parte do Alcalde e Presidente sobre os temas expostos e a súa aberta disposición a colaborar, desde as Institucións que preside, para a adecuada realización destas actividades.

10 de Marzo de 1972
50 Aniversario
Memoria e Dignidade

Achegamos: Manifesto. Relación de Adhesións. Logotipo.

Contacto:
10m72.50aniversario@gmail.com

Facebook:
Dez de Marzo Cincuenta Aniversario.

Documentos:

✔ Selo Logotipo 50 aniversario do 10 de Marzo. | Acceder/Baixar.

✔ Manifesto do 50 aniversario do 10 de Marzo. | Acceder/Baixar.

✔ Apoios ao Manifesto do 50 aniversario do 10 de Marzo. | Acceder/Baixar.

Enviado por:
10M72 50Aniversario
-10m72.50aniversario@gmail.com-
15 de dezembro de 2021 18:36
16 de dezembro de 2021 09:56
_______

O cárcere de curas (Apaiz kartzela - La cárcel de curas), proxección hoxe en Ferrol, luns 29 novembro, ás 19:30hs pase único, nos Cines Duplex de Esteiro - O film da represión dos curas durante o franquismo, e nel se entrevista entre outros a Nicanor Acosta (A Coruña) e a Vicente Couce (Ferrol) - Logo da proxección haberá un coloquio no que intervirán: Ritxi Lizartza (Director de MALUTA Films) Anxo Currás (Historiador) e Rafael Pillado (da A.C. Fuco Buxán)

O cárcere de curas (Apaiz kartzela - La cárcel de curas), proxección hoxe en Ferrol, luns 29 novembro, ás 19:30hs pase único, nos Cines Duplex de Esteiro - O film da represión dos curas durante o franquismo, e nel se entrevista entre outros a Nicanor Acosta (A Coruña) e a Vicente Couce (Ferrol)

Unha viaxe real nunha situación aparentemente irreal. Catro sacerdotes presos no cárcere de curas de Zamora (1968-1976) volven visitar a prisión onde foron condenados, nalgúns casos, a penas de máis de dez anos por dicir sermones nos que denunciaban a represión franquista. Foi precisamente Franco quen, utilizando o Concordato asinado co Vaticano, creou ese Cárcere Concordataria, a única do mundo para relixiosos.

Este é unha viaxe atípico, pois non adoita ser habitual poder visitar o cárcere onde se levou a cabo a condena. É a ponte para contar a historia da viaxe real ao que foron sometidos 53 relixiosos de Madrid, Galicia, Cataluña e País Vasco no seu traslado forzoso a devandito penal. Unha viaxe que quere rescatar unha historia descoñecida aínda hoxe en día. Unha viaxe contra o esquecemento.

Logo da proxección haberá un coloquio no que intervirán: Ritxi Lizartza (Director de MALUTA Films) Anxo Currás (Historiador) e Rafael Pillado (da A.C. Fuco Buxán).

Ver o tráiler


Título orixinal: Apaiz Kartzela.
Ano: 2021.
Duración: 85 minutos.
Idioma orixinal: Español.
Dirección: Oier Aranzabal, Ritxi Lizartza, David Pallarès.
Guión: Jon Mikel Aldanondo, Mielanjel Elustondo, Martín Etxeberría, Xabier Etxeberría (Idea: Javier Barallas).
Montaxe: Maialen Sarasua Oliden.
Son: Haimar Olaskoaga.
Música: Joserra Senperena.
Fotografa: Fernando Sa Casado.
Productora: Maluta Films, Azaroa Films, Zabriskie Films.
Distribuidora: Syldavia.

Enviado por:
Inácio GZ
-inaciogz@gmail.com-
29 de novembro de 2021 12:05
_______

Monumento ao 10 de marzo: símbolo da Clase Obreira Galega, ... Por Rafael Pillado Lista

Por Rafael Pillado Lista [*]
07.11.2021

MONUMENTO AO 10 DE MARZO: SÍMBOLO DA CLASE OBREIRA GALEGA

Hai tan só unha semana, presentábase no  Parador de Turismo de Ferrol, a iniciativa que Memoria Histórica Democrática e a Asociación Fuco Buxán, apoiadas por unha vintena de agrupacións e centos de cidadáns, elaboraran para celebrar, no 2022, o 50 Aniversario dos  tráxicos acontecementos sucedidos en 1972 a nivel de Galicia, primeiro en Ferrol e, inmediatamente, en Vigo e outras localidades, dando lugar ao recoñecemento parlamentario da xornada do 10 de marzo como “Día da Clase Obreira Galega”.

No devandito Manifesto, que expresaba a vontade de considerar todo o ano afectado por esa celebración, sinaláronse algúns trazos fundamentais dese Aniversario, destacando, entre eles, un tema concreto: a vontade de rescatar da  vergonzante marxinalidade o simbólico e significativo Monumento que lle fai xustiza; para iso, resulta imprescindible o seu traslado ao centro da praza, onde lle corresponde de pleno dereito.

En paralelo, reclámase a denominación de “Praza do 10 de marzo” ao espazo público abarcado.

No seu día, o 12 de setembro de 1994, publicara na prensa, unha carta dirixida ao Sr. Alcalde, lembrándolle que a remodelación de toda a zona desprazara a localización do Monumento.

Naquel escrito, expresábame nos seguintes termos: Tras as obras de remodelación da entrada á cidade e a creación dunha praza, desprazando lateralmente as estradas de entrada e saída, o Monumento ao 10 de marzo foi marxinado de forma extrema….

Aténdonos á Verdade Histórica, a intervención policial do día de autos, coa pretensión de cortar pola metade a manifestación que, desde a Estrada de Castela, discorría xa pola Estrada das Pías (denominada naqueles momentos como Av. Jorge Vigón), chegou e até superou a actual zona de emprazamento do Monumento, ata que a heroica resposta dos traballadores -pedras contra fusís- obrigoulles a retroceder e refuxiarse no Cuartel.

Esa brutal intervención “das forzas da orde” obrigou aos traballadores a desprazarse á zona de entrada da estrada para pórse a salvo.

Quen fomos testemuñas directas dos feitos sabemos que foi o lugar que hoxe ocupa a “Porta Nova”, o centro de todos aqueles feitos, que haberían de culminar coa morte dos compañeiros Amador e Daniel por disparos da Policía, que causaron, ademais, numerosos feridos indefensos, reos do delito de demandar unha vida digna para as súas familias.

Sabemos tamén que as dúas vías de entrada e saída á cidade, coincidían co centro da actual praza, polo que a nosa pretensión de traslado do monumento está máis que xustificada.

Por todo iso, reclamo a maior atención a esta esixencia e o seu cumprimento, cando transcorreron 50 anos daqueles acontecementos, con proxección histórica, presentes aínda nunha memoria cidadá, merecedora de verdade e de Xustiza.

Sí, “…esiximos un decoroso e digno emprazamento do monumento en lugar privilexiado da nova Praza…”, facémolo para sacalo da incomprensible marxinalidade a que, por razóns non o suficientemente explicadas, viuse relegado. O seu autor, Xoan Xosé Braxe Rei, artista comprometido e solidario, tamén llo merece.

As efemérides do 10 de marzo significa para Ferrol e as súas Traballadoras e Traballadores -como o representa para Galicia (e aínda máis aló)-, unha data de insoslaiable referencia no longo camiño por conseguir Dereitos e Liberdades que a ditadura franquista negara por máis de corenta anos á Sociedade Española.

A Clase Obreira Galega hoxe demándanos que tanto esforzo, tanto sacrificio, tanto sangue derramado non sexan en balde e, de igual modo, que se lle recoñeza o seu protagonismo na vangarda, ao longo e ancho da nosa Longa Noite de Pedra, algo que, por desgraza, están a pretender sepultar no esquecemento unhas voces que só representan o rostro máis escuro e sinistro do fascismo ilustrado.

Ferrol, 15 de outubro de 2021

[*] Rafael Pillado Lista, San Cibrao (Cervo) o 12 de xuño de 1942, xubilado de BAZAN, é Vicepresidente da A.C. Fuco Buxán e membro do Comité Cidadán de Emerxencia para a Ría de Ferrol. Foi un activista sindical e político nos anos da ditadura franquista, sen deixar nunca a súa actividade social e política. Foi condenado polo TOP (Tribunal de Orden Público da Ditadura Franquista), no chamado proceso dos 23 de Ferrol, polos sucesos de Marzo do 72, polo que foi encarcerado en Carabanchel e con anterioridade na prisión da Coruña. Foi Secretario Xeral do PCG e foi concelleiro en Ferrol co PSOE no que estivo afiliado até finais 2011. Participou no Encontro Social e na Rede de Apoio Mutuo de Ferrol Terra e nas Marchas da Dignidade de Ferrolterra. Agora está ligado a Podemos. Escribe artigos sobre a actualidade nos medios locais. Ten escrito un importante e moi interesante libro sobre unha parte da nosa historia recente "O Latexo da vida e da conciencia - Memorias Colectivas de Rafael Pillado - I (Primeiro Volume)". E xa en decembro de 2019, publicou o segundo volume das súas memorias: "A dura luz da memoria | PALABRAS AFIADAS | Memorias colectivas de Rafael Pillado - II".

10 de Marzo 1972
50 Aniversario. Memoria e Dignidade

Adxunto:. Manifesto. Relación de Adhesións. Logotipo.

10m72.50aniversario@gmail.com
Facebook:  Dez de Marzo Cincuenta Aniversario.

Documentos:

✔ Selo Logotipo 50 aniversario do 10 de Marzo. | Acceder/Baixar.

✔ Manifesto do 50 aniversario do 10 de Marzo. | Acceder/Baixar.

✔ Apoios ao Manifesto do 50 aniversario do 10 de Marzo. | Acceder/Baixar.

Enviado por:
10M72 50Aniversario
-10m72.50aniversario@gmail.com-
7 de novembro de 2021 13:03
_______