Trinta comercios locais, do concello de Pontevedra, asinaron o seu compromiso coa lingua

O Pazo de Mugartegui acolleu a sinatura pública de trinta comercios locais do seu compromiso coa lingua. É unha iniciativa incluída dentro programa Proba en Galego, unha campaña da Concellaría de Normalización Lingüística para dinamizar o uso do galego na pequena empresa e no comercio locais, un labor contínuo deste departamento dende o ano 2006.

Os obxectivos da campaña Proba en Galego son:

• Dinamizar o uso do galego como lingua normal de comunicación no comercio e na pequena empresa
• Implicar as persoas que traballan no sector do comercio e da pequena empresa na mellora do uso do galego coa clientela e coas empresas provedoras
• Ofrecer espazos de reflexión e traballo para mellorar a calidade da lingua e a seguridade no seu uso no sector
• Estimular a clientela falante de galego para que manteña a súa lingua nas relacións comerciais
• Animar a clientela que non fala galego habitualmente a que probe a facelo
• Facer visible o uso da lingua galega nas relacións comerciais que se establecen na cidade
• Darlles continuidade ás campañas específicas para incrementar o uso do galego no comercio local e na pequena empresa

No acto as empresas asinaron o seguinte compromiso:

O comercio ao que represento: ......................................................... asinará no Concello de Pontevedra o documento de compromisos coa lingua galega que forma parte da campaña “Proba en galego”. Este requisito formal, que terá lugar o día 26 de marzo, ás 21 horas, dará acceso á participación na 1ª fase da campaña de publicidade. Para acceder ás seguintes fases a empresa manterá ao longo do ano 2013 os compromisos que se especifican a continuación.

Comprométome a que:

1ª fase:

1. O galego será a lingua empregada nos avisos, por megafonía ou escritos, e carteis temporais que precise o negocio a partir da data de sinatura deste documento.
2. No comercio comezaremos a atención á clientela en galego, para poñer en práctica a oferta positiva á que fai referencia o Plan Xeral de Normalización da Lingua Galega.
3. Participaremos na campaña de publicidade, cun paquete de insercións publicitarias co texto íntegra e exclusivamente en galego. Os espazos publicitarios levarán a sinatura final “Proba en Galego”.

2ª fase :

1. Manteremos os compromisos da primeira fase.
2. Realizaremos en lingua galega, como mínimo durante o ano que dura a campaña, o resto da publicidade do comercio.
3. Solicitarémoslle á xestoría que asesora o comercio ao que represento o uso da lingua galega na nosa relación comercial.

3ª fase:

1. Utilizaremos a lingua galega nas relacións profesionais do comercio coas empresas provedoras e auxiliares.
2. Demandaremos de todas as administracións públicas documentos e atención en lingua galega, para todos os trámites administrativos que teñan que ver co comercio ao que represento.

Durante todas as fases da campaña:

1. O persoal que traballa no comercio levará un cartón de cortesía coa imaxe da campaña “Proba en galego”, que servirá de presentación e de convite a utilizar o galego.
2. Participaremos no blog “Proba en galego”, específico para esta campaña; escribindo un pequeno texto relacionado coa campaña ou co uso do galego no comercio polo menos unha vez ao mes.
3. Presentaremos a documentación que se especifica para avaliar o seguimento da campaña e o cumprimento dos compromisos: unha pequena compilación, en papel ou en formato electrónico, de fotografías e/ou mostras dos documentos empregados para cumprir os compromisos.
4. De non poder demostrar o cumprimento destes compromisos, a empresa asumirá o pagamento da metade do importe da publicidade que a empresa aproveitou.

As empresas que asinaron este compromiso son:

•  Autocares Vda. de Cándido
• A Formiga no Carreiro
• Bolboretas de Papel
• Cafetería Tamanaco
• Centro de ensino ENOT
• Cervexaría O Gato Cheshire
• Cervexería O Grifón
• Corner Sports Bar
• Dicenfot  Fotografía
• Disney Pontevedra
• Droguería Moderna
• Entretementos Play
• Ernesto Filgueira
• Estouche Ben!. Centro de Terapias
• Flanagan, Cocktails & Gin
• Joyamar
• Juancartepiedra 
• Libraría Paz
• Lourdes Sampedro, Lencería.
• Olbe Téxtil
• Peral Moda.
• Portal 48, Espazo para a Creación
• Quercus, Armarios e Vestidores
• Rei Zentolo
• Restaurante O Eirado da Leña
• Saraiva, Centro de Día
• Ultramarinos O Cisne
• Viñoteca Bagos

Pontevedra, 26 de Marzo de 2013

http://www.pontevedra.eu/
_________________

Nace a Asociación de Medios en Galego para defender a presenza do idioma nos medios

Tempos Novos, Novas da Galiza, Galicia Confidencial, Que Pasa na Costa, Xornal Certo, Radiofusión, de Luns a Venres, Praza Pública, O Compás e Valminor.info son os impulsores desta nova asociación.

Santiago de Compostela - Afortalar os medios en galego, consolidar un espazo de comunicación na lingua propia ou contribuir á profesionalización do sector dos medios en galego son parte dos obxectivos da Asociación de Medios en Galego que se acaba de constituír.

Polo momento, dez medios en galego forman parte desta asociación; Tempos Novos, Novas da Galiza, Galicia Confidencial, Que Pasa na Costa, Xornal Certo, Radiofusión, de Luns a Venres, Praza Pública, O Compás e Valminor.info, aínda que outros, como Sermos Galiza, xa amosaron a súa intención de integrarse na mesma.

A iniciativa está aberta a todos os medios editados en galego e ten a súa orixe na experiencia Vitaminas para o Galego, unha iniciativa impulsada o pasado ano que desenvolveu varios eventos xornalísticos e culturais en defensa do noso idioma.

Obxectivos

Os principais obxectivos da nova Asociación de Medios en Galego serán defender os intereses dos seus asociados favorecendo así o afortalamento dos medios de comunicación en galego. Tamén contribuir ao proceso de asentamento do sector dos medios de comunicación de información xeral na lingua propia de Galicia e á consolidación dun espazo de comunicación en galego fomentando a presenza pública, tanto individual como conxunta, dos medios de comunicación neste idioma.

Esta asociación tamén contribuirá á profesionalización do sector de xeito que as empresas se doten de estruturas sólidas que garantan a proxección de cada medio conseguindo a independencia económica e represetnará ao sector diante das distintas administracións en todo aquelo que afecte aos medios de comunicación en galego.

Tamén debaterá colectivamente os temas de interese para o sector e asesorará ás entidades produtoras de medios integradas para facer fronte aos problemas profesionais comúns, promoverá iniciativas lexislativas e administrativas que beneficien ao sector. Ademais, desenvolverá accións, eventos e campañas de sensibilización tendentes a visibilizar na sociedade a existencia dos medios de comunicación en galego, intercambiará coñecementos e información entre os membros da Asociación e promoverá proxectos comúns e contribuirá ao proceso de normalización lingüística.

Socios

Serán socios desta asociación, as persoas físicas ou xurídicas cuia actividade principal sexa a produción e tratamento de información calquera que sexa o seu soporte e que, entre outros requisitos, utilicen o galego, teñan unha periodicidade non superior a un mes, teñan unha vida mínima anterior á constitución de seis meses e que máis do 70% da súa extensión ou tempo de emisión estea adicada a contidos non publicitarios. Non poderán formar parte da asociación os organos de expresión de administracións públicas ou entiades dependentes, partidos políticos, organizacións sindicais, patronais e colexios profesionais, así como calquera outra de análoga natureza, nin as asociación ou entidades que se atopen incursas en procesos concursais ou de disolución, ou que manteñan débedas con traballadores ou ex traballadores.

Os medios interesados en formar parte desta asociación poden informarse enviando un mail a: contacto@mediosengalego.org

Fonte: http://vitaminasparaogalego.blogspot.com.es/
___

Este Domingo, 27 de Xaneiro, Manifestación Nacional en Compostela - “Pola lingua que nos une”

A manifestación que terá inicio na Alameda de Santiago de Compostela o Domingo 27 de Xaneiro, ás 12 do mediodía, está convocada pola Plataforma Ciodadá Queremos Galego

Manifestación “Pola lingua que nos une” pretende trasladar ás ruas o malestar existente nun amplo abano de sectores sociais coa política lingüística da Xunta, especialmente tras as sentencias do Tribunal Superior de Xustiza de Galiza que derruban o decretazo contra o galego no ensino posto en marcha polo actual goberno do Partido Popular.

AUTOCARROS DESDE FERROL TERRA

Hora de saída: 10:00 hs.

Sairán buses de:

• Ferrol – perante ao local da CIG (Esteiro). Reservas Local comarcal da CIG-981 35 87 60 ou Ana-689 39 28 61
• Narón – perante á Casa do concello de Narón. Reservas Local comarcal da CIG-981 35 87 60 ou Ana-689 39 28 61
• San Sadurniño: Saída ás 10 da Casa do Concello de S. Sadurniño. Inscricions: 670854329 (Suso)

Billete ao prezo  de 6€ (euros).

http://www.queremosgalego.org/
____

É imposíbel vivir en Castelán nos colexios galegos ... Eu aínda diría máis, vivimos nun país no que é imposible vivir en Castelán

Non ten perda, carta publicada no Faro de Vigo, ao través de Richi Ricardo Vales Varela --> "Veño de ler neste xornal un artigo segundo o cal Galicia Bilingüe denuncia a imposibilidade de vivir en castelán nos colexios galegos.

Escribo esta carta para amosar o meu total apoio a esa teoría. Eu aínda diría máis, vivimos nun país no que é imposible vivir en castelán.

Voulles contar a miña historia. Teño dous fillos aos que sempre falei en castelán. E así falaban eles, ata que comezaron a ir ao colexio público. Con tres anos abandonaron totalmente a súa lingua materna, e agora só falan galego. Só len en galego. Só escriben en galego. Viven nun mundo tan altamente galeguizado que me miran con extrañeza porque falo castelán, e incluso me preguntan por que non son coma todo o mundo, por que non falo en galego. Pero se fosen só as mestras... Os compañeiros e compañeiras, os seus pais e nais, as profesoras das actividades extraescolares... pero tamén as caixeiras do supermercado, os carteis de todos os comercios vaiamos onde vaiamos, a pediatra, o persoal do banco, a fisioterapeuta, todo o mundo que nos rodea fala en galego. Os impresos do Sergas, os recibos dos bancos, as propagandas de fontaneiros, mesmo os xornais, este mesmo, no que, de 76 páxinas, non puiden atopar nin unha soa noticia en castelán!!! Por non falar dos debuxos animados, por máis que busco, só nunha canle botan programas infantís en castelán.

É certo: nesta cidade na que vivo non hai xeito de facer unha vida normal en castelán. As persoas castelán-falantes estamos totalmente discriminadas e temos que chegar a facer xuntanzas especiais nos parques para que os nosos fillos poidan escoitar falar castelán con normalidade. Eu mesma non sei por que estou a escribir en galego. Será que á fin conseguiron adoutrinarme sen eu querelo.

Un saúdo e forza a todas as persoas que, coma min, se senten estranxeiras no seu país por mor de usar a súa lingua." ;)

Nota.- Postado por Pequeno Monstro no Facebook.
________________

A rapazada de Chapela, ao rescate da lingua galega - Escrito por Dioivo - Vídeo - Lipdub

Alumnos, mestres, persoal non docente, pais e nais, veciñas e veciños... En total unhas catrocentas persoas participaron o pasado 5 de xuño no IES de Chapela na gravación dun Lipdub que onte luns foi presentado publicamente e que é, sobre todo, unha inxección de alento para a lingua galega. Ironía, entusiasmo e mocidade logran nesta montaxe resucitar o idioma de Galiza e rescatalo do departamento de linguas mortas para asegurarlle un futuro que ten como banda sonora o I will survive, de Gloria Gaynor.

Eu falarei! é o nome do lipdub, concibido e realizado no IES de Chapela (Redondela), e que é, segundo os seus autores, o Equipo de Dinamización da Lingua Galega dese centro, "un canto de amor en defensa da Lingua Galega, mais tamén é unha denuncia da situación que vive un idioma que esmorece lentamente vendo recortada a súa presenza nos medios de comunicación ou na propia escola, e que día a día perde falantes entre a xente nova". Con feitío de curtametraxe, moito humor e unha visión realista, pero ao tempo positiva e vitalista do futuro da lingua galega, o lipdub Eu falarei! anda desde xa pola rede coa súa carga de entusiasmo viral, que escribe un futuro novo para o idioma de noso. Aquí fica o vídeo.



http://youtu.be/AerLPRrnIaA

Fonte: Dioivo.

Creative Commons 2012 Dioivo. BY-NC-SA 2.5.
Licenza CC

AVANTE COA LINGUA GALEGA!
Equipo de Dinamización da Lingua Galega do IES Chapela
Chapela, 25 de xuño de 2012
http://oberete.blogaliza.org

Audios empregados:
"Behind the murderer" de Opusvertigo
Versión instrumental do "I will survive" de Gloria Gaynor

Publicado en 25.06.2012 por EDLG Chapela
__________________

Mareando as Nosas Letras 2012, unha travesía pola Ría de Ferrol: fraternidade, paisaxe, palabras, música e poesía.

Un ano máis a Asociación Cultural 'Lefre de Caldereta' organizou o 'Mareando as Nosas Letras' (omareonosopatrimonio). Pasadas as doce e media da mañá, do Domingo 17 de Xuño, desatracaba a lancha mariñeira rumo a unha travesía pola nosa fermosa, mais depauperada Ría de Ferrol. As marabillas paisaxísticas e patrimoniais, converxeron coas cancións e poesías da xornada. O tempo non acompañou de todo, mais non podemos dicir que se portara mal. Deixou que as persoas, crianzas, mozas e maiores gozaran da travesía das nosas letras.

Agardemos tamén que o goce da travesía, faga pensar na necesidade que temos de salvar a Nosa Ría, das gadoupas do Capitalismo depredador e cobizoso que non respecta o medio ambiente nin a saúde das persoas. A Ría require xa un plano integral de recuperación: saneamento, limpeza e rexeneración. E Reganosa fora xa!

Agora podemos tamén gozar da galería fotográfica que tivo a ben publicar o noso compañeiro Suso.

Fotos: Susete'70.

Pode-se acceder ou baixar o Folleto coas Letras de Cancións Mariñeiras

Rúa do Sol, 224-230, 1º B.
15401 Ferrol
lefre@lefredecaldereta.com
lefredecaldereta.com





Enlace relacionado:

Ártabra 21: Poesía e Música do Mar, este Domingo 17 de Xuño en Ferrol: "Mareando as Nosas Letras 2012"
______________

Acto unitario polas Nosas Letras na Praza Rosalía de Castro de Ferrol - Fotos

Este Domingo 20 de Maio de 2012, ás 12 do mediodía tiña lugar na Praza de Rosalía de Castro un acto unitario polas Nosas Letras. Unha parte do movimento asociativo e cultural da cidade quixo render unha homenaxe na figura da nosa Rosalía, a todas as escritoras e escritores que utilizan o galego nas súas obras. Criticou-se as políticas dereitistas do PP que desde o poder institucional lexislan contra o Galego. Na defensa da Lingua houbo música, flores, poesía, intervencións e manifestos.

Fotos de Susete'70.
__________________

Este Domingo 20 de Maio, ás 12 do mediodía Acto Unitario polas Nosas Letras na Praza Rosalía de Castro

DOMINGO 20 DE MAIO
ACTO UNITARIO
NA PRAZA ROSALÍA DE CASTRO
EN FERROL
ÁS 12 DO MEDIODÍA

Este Domingo 20 de Maio de 2012, ás 12 do mediodía celebrara-se a homenaxe a Rosalía de Castro que todos os anos ten lugar na Praza que leva o nome da escritora galega. O Colectivo Ártabra 21 soma-se á convocatoria aberta, á que polo de agora se somaron a asociación Fuco Buxán, o Toxos e Froles, a Fundaçom Ártabria, o Ateneo Ferrolán, o Colectivo Sociocultural A Revolta de Trasancos, e a Asociación Sociocultural López Bouza, ... agardando que outras entidades participen nesta autoconvocatoria pola Lingua.

Todas as asociacións convocantes facemos un chamamento a toda a cidadanía para participar no Acto Unitario da Praza Rosalía de Castro, no barrio de San Xoán, para celebrarmos a nosa Lingua e as Nosas Letras. Un acto no que se escoitarán, desde distintas sensibilidades, valoracións e reivindicacións referentes á situación da Lingua e Cultura galegas, e unha expresión artística e popular que tamén vai reivindicar a todas as escritoras e escritores que utilizan o Galego.

O acto consistirá nunha ofrenda floral, música, lectura de poemas, manifestos, proclamas, ... este acto está aberto a toda a cidadanía.

A convocatoria unitaria desenvolvera-se a partir das 12 do mediodía, ao redor da pequena figura de Rosalía de Castro, que preside a praza no barrio de San Xoán de Ferrol, este Domingo 20 de Maio, polas Nosas Letras, nun momento moi crítico para a nosa lingua, onde a propia administración lexisla contra a súa normalización.

Clicar acima da imaxe para ampliar

__________________

Os dereitista do PP que gobernan no Concello de Santiago tenta evitar a manifestación "En defensa da nosa Lingua" do 17 de Maio

O Concello de Santiago tenta evitar que haxa manifestación polo Día das Letras
Nunha resolución sorprendente, comunicada 48 horas antes da manifestación, o Concello nega os permisos para colocar palco e megafonía.

Queremos Galego recorreu hoxe mesmo nos tribunais e mantén a convocatoria "con máis razóns que nunca".

Carlos Callón: "Se nos denegan o palco e a megafonía, usaremos as gorxas para exclamar moi alto polos nosos dereitos".

A plataforma Queremos Galego, impulsada e coordinada pola Mesa pola Normalización Lingüística, e que aglutina máis de 700 entidades, encontrouse esta mañá cunha comunicación "sorprendente" do Concello de Santiago de Compostela.

Cando faltan 48 horas para a manifestación cidadá en defensa da lingua, o goberno municipal resolve negativamente unha petición "que sempre foi de trámite" para poder colocar un palco, para usar o punto de luz necesario para a megafonía do acto final e para poder colocar unha faixa informativa na Alameda de Santiago de Compostela.

Carlos Callón, como presidente da Mesa e portavoz nacional de Queremos Galego, asevera que "desde que A Mesa existe, hai 26 anos, nunca nos encontramos cunha resolución tan disparatada para unha mobilización en defensa do noso idioma". "Quérennos deixar sen voz: temos máis razóns que nunca para erguela e para acudir a Compostela o Día das Letras", aseverou Callón, quen considera que, "o actual goberno de Santiago ten un problema moi serio coa tolerancia lingüística e cultural e coa liberdade de expresión, como puidemos ver primeiro co Correlingua e agora coa manifestación do 17 de maio".

O Concello denega case todos os puntos solicitados por Queremos Galego baseándose en que "a manifestación coincide coa Ascensión", excepto a petición do punto de luz preciso para a amplificación do son, na cal non utiliza a escusa das festas, senón que non ofrece ningún motivo. Porén, desde a plataforma sinalan que "parece unha burla querer denegar esa licenza baseándose na Ascensión, xa que non é a primeira nin será a última vez que o día 17 de maio coincide con eses festexos". O presidente da Mesa di ironicamente que "a culpa é de Rosalía de Castro por asinar a dedicatoria do primeiro libro contemporáneo en galego nun 17 de maio".

O Concello coloca todos os obstáculos que pode para esta manifestación, "dentro do seu ámbito de competencias", mais non pode prohibir o acto, xa que este foi solicitado "en tempo e forma" na Delegación do Goberno. "O que nos deixa estupefactos é que todas estas xestións, que todos os anos son de trámite, se queiran converter agora en impedimento para exercer o noso dereito democrático a manifestarnos", sinala o presidente da Mesa e portavoz de Queremos Galego.

Enviado por:
FranciscoXavier.Iglesias.Mouriz@sergas.es
-FranciscoXavier.Iglesias.Mouriz@sergas.es-
15 de maio de 2012 23:14
_____________

5.1 A lingua propia de Galiza é o Galego - Vídeo - Enlaces

5.1 A lingua propia de Galiza é o Galego.
[Estatuto de Autonomía de Galicia]

Enlaces de interese:

• A Mesa Pola Normalización Lingüística
• Asociación de escritores en lingua galega
• Asociación de Medios Escritos en Galego
• Asociación Puntogal
• Associaçom Galega da Língua
• Bivir Traductores Galegos
• Galego21
• Páxina oficial de WordPress en lingua galega
• Plataforma Queremos Galego
• Portal Galego da Língua
• ProLingua - Plataforma a prol da defensa e promoción da Lingua Galega
• RAG

http://youtu.be/KRfREFi3eqk


Poema de Celso Emilio Ferreiro interpretado por Dios ke te crew

Letra:
Lingoa proletaria do meu pobo,
eu fáloa porque sí, porque quero, porque me gosta,
porque me peta e dame a gaña;
porque me sai de dentro, alá do fondo
dunha tristura aceda que me abrangue
ao ver tantos patufos desleigados,
pequenos mequetrefes sen raíces
que ao pór a garabata xa nan saben
afirmarse no amor dos devanceiros,
falar a fala nai,
a fala dos avós que temos mortos,
e ser, co rostro erguido,
mariñeiros, labregos do lingoaxe,
remo i arado, proa e rella sempre.

Eu fáloa porque sí, porque me gosta,
e quero estar cos meus, coa xente miña,
perto dos homes bos que sofren longo
unha historia contada noutra lingoa.
Non falo pra os soberbios,
non falo pra os ruis e poderosos,
non falo pra os finchados,
non falo pra os baleiros,
non falo pra os estúpidos,
Non falo pra os soberbios,
non falo pra os ruis e poderosos,
non falo pra os finchados,
non falo pra os baleiros,
non falo pra os estúpidos,
que falo pra os que agoantan rexamente
mentiras e inxusticias de cotío;
pra os que súan e choran
un pranto cotidián de volvoretas,
de lume e vento sobre os ollos núos.

Como é?

Eu non quero arredar as miñas verbas
de tódolos que sofren neste mundo.
E ti vives no mundo,
Galicia, dóce mágoa das Españas,
deitada rente ao mar, ise camiño...
deitada rente ao mar, como é?
É Celso Emilio Ferreiro
e Garcia MC

Lingoa proletaria do meu pobo,
eu fáloa porque sí, porque quero, porque me gosta,
porque me peta;
porque me sai de dentro, alá do fondo
dunha tristura aceda que me abrangue
ao ver tantos patufos desleigados,
pequenos mequetrefes sen raíces
que ao pór a garabata xa nan saben
afirmarse no amor dos devanceiros,
falar a fala nai,
a fala dos avós que temos mortos,
e ser, co rostro erguido,
mariñeiros, labregos do lingoaxe,
remo i arado, proa e rella sempre, sempre.

Eu fáloa porque sí, porque me gosta,
e quero estar cos meus, coa xente miña,
perto dos homes bos que sofren longo
unha historia contada noutra lingoa.
Non falo pra os soberbios,
non falo pra os ruis e poderosos,
non falo pra os finchados,
non falo pra os baleiros,
non falo pra os estúpidos,
que falo pra os que agoantan rexamente
mentiras e inxusticias de cotío;
pra os que súan e choran
un pranto cotidián de volvoretas,
de lume e vento sobre os ollos núos.
Eu non quero arredar as miñas verbas
de tódolos que sofren neste mundo.

Artigo relacionado:

Ártabra 21: 5.1: a verdade revolucionaria, ... Por Fran P. Lorenzo

______________

"Os medios públicos galegos, son precisos?", ... Por Carlos Blanco - Vídeo

Podemos prescindir do galego?
Falou Carlos Blanco, e falou ben.

Carlos Blanco Vila, nado en Vilagarcía de Arousa en 1959, é un actor galego.

Actor de teatro e presentador da Radio Galega, comezou a traballar na TVG como presentador do programa A Reoca en 1990 con Antonio Durán. Colaborou noutros programas como Sitio Distinto ou Luar e foi Ladislao Couto en Mareas vivas. A súa carreira cinematográfica comezou con Sei quen es (1999) e continuou n' O lapis do carpinteiro (2003) e Cargo (2005). Posteriormente presentou o programa da TVG Somos unha potenzia. En 2008 co-produce con Abada a súa obra de teatro Humor neghro.


http://youtu.be/HX8z0AbG_fU

Fonte do vídeo: Canle agalegapublica
Fonte da biografía: galipedia

Enlaces de interese:
http://www.culturagalega.org/
http://gl.wikipedia.org/wiki/Carlos_Blanco_Vila

Enlaces relacionados:

Manifesto en Defensa da Radio e Televisión Públicas de Galiza

Pola defensa dos medios de comunicación públicos de Galicia. Para o Comité intercentros da CRTVG, esta nova Lei contén unha serie de aspectos especialmente lesivos para os traballadores da compañía e tamén un conxunto de medidas que poden chegar a...

Ler máis...

A Dirección da CRTVG, a compañia da radio e televisión pública galega, exerce represalias despois da Folga do pasado 10 de Outubro - Os vídeos de traballadorxs indignad@s e comprometid@s que non puideron soportar desde a prepotencia do PP e da Dirección da Coompañía

A Folga na CRTVG foi convocada o pasado 10 de Outubro "en defensa duns medios de comunicación galegos e públicos" As represalias por parte da Dirección da Empresa Ana Pérez e Alfonso Hermida ían presentar o especial informativo da TVG correspondente...

Ler máis...

Información baseada na enviada por:

Joam Tavia

-jtavia@gmail.com-

22 de novembro de 2011 18:26

___________________

O Grupo Municipal de Esquerda Unida: “hai que cumprir e facer cumprir as disposicións en materia de normalización lingüística aprobadas por todas as Corporacións democráticas até agora”

INFORMACIÓNS DO GRUPO MUNICIPAL DE ESQUERDA UNIDA

Ferrol, venres 12 de agosto de 2011

• O GRUPO MUNICIPAL DE EU RECLAMA DO VOCEIRO DO PP QUE SE AXUSTE Á LEGALIDADE NA DEFENSA DO GALEGO
• HAI QUE CUMPRIR E FACER CUMPRIR AS DISPOSICIÓNS EN MATERIA DE NORMALIZACIÓN LINGÜÍSTICA APROBADAS POR TODAS AS CORPORACIÓNS DEMOCRÁTICAS ATÉ AGORA, SUBLIÑA YOLANDA DÍAZ

O Grupo Municipal de Esquerda Unida quere saír ao paso das posicións verquidas polo Voceiro do PP no Goberno Municipal, no que avanzou a súa defensa dos postulados máis contrarios ao proceso de normalización lingüística do galego, asumindo os postulados que buscan afogar a cultura galega e o noso idioma.

Yolanda Díaz, Voceira do Grupo Municipal de Esquerda Unida subliñou que “hai que cumprir e facer cumprir as disposicións en materia de normalización lingüística aprobadas por todas as Corporacións democráticas até agora”. Normas que van dende a ordenanza de normalización lingüística até ao Plan de Normalización da nosa lingua, que busca espallar por todos os relanzos da vida social ferrolá, e que constitúen no eido local a plasmación do consenso democrático e das normas aprobadas no Parlamento Galego dende a fin da ditadura franquista. Neste eido, Yolanda Díaz salientou o traballo desenvolvido polas Comisións de traballo do Consello Municipal da Lingua no tempo en que se puxeron en marcha baixo o impulso de Javier Galán, insistindo no valor da súa continuidade e extensión.

Para Esquerda Unida se non se quere defender a lingua e cultura galegas hai que cambiar toda a lexislación; do contrario estamos a despeñarnos polos carreiros antidemocráticos, que son os únicos nos que periga o galego. So durante os reximes ditatoriais, en particular durante o franquismo, se atacou ao galego. O noso Grupo reclama do PP que non se sume aos coros interesados da ultradereita que tenta rachar consensos democráticos e construír unha guerra cultural na que somentes vai sufrir a nosa lingua e cultura.

Esquerda Unida fai un chamado ao Goberno para que amose con feitos o seu compromiso co galego, cun orzamento axeitado ás necesidades do proceso normalizador cara o orzamento de 2012, e co pulo ás comisión de traballo do Consello Municipal da Lingua seguindo o regueiro de traballo posto en marcha por Javier Galán.

Enviado por:

Ferrol Esquerda Unida

-eu-ferrolterra@esquerdaunida.org-

12 de agosto de 2011 17:04

Ola !
Remitimos un Informacións do Grupo Municipal de EU Ferrol, no que reclamamos do Goberno Municipal o cumprimento da normativa de promoción ao galego vixente. Saúdos, Ramiro Marier
________________

NÓS-Unidade Popular exige ao Governo municipal de Ferrol o cumprimento da Ordenança de Normalizaçom Lingüística, nom o seu rebaixamento

Diversos meios informam hoje de que o Partido Popular, governante em Ferrol após as últimas eleiçons municipais, recebeu ontem umha representante do coletivo ultra 'Galicia Bilingüe', dedicado a defender a imposiçom do espanhol e a discriminaçom legal do galego.

Parece-nos grave que um governo que di ser “democrático” receba representantes de um grupo que despreza abertamente a língua própria da Galiza. Porém, ainda nos parece mais grave a total harmonia que parece existir entre o governo municipal do PP e as ideias supremacistas defendidas por esse coletivo.

Desde 1997, existe em Ferrol umha Ordenança Municipal de Normalizaçom Lingüística que nengum dos sucessivos governos até hoje tem assumido nem cumprido na prática, além das declaraçons de intençons. Na realidade, a implacável imposiçom do espanhol no seio da sociedade ferrolana e galega exige medidas de fomento do galego mais ambiciosas do que essa Ordenança estabelece, pois hoje continua a ser maioritariamente incumprida sem que nengum dos grupos municipais pareça preocupar-se com isso, já que todos eles passárom já polo governo.

Agora, o Partido Popular incrementa a pressom contra o galego e anuncia, através do presidente da Cámara em funçons, Jose Manuel Vilarinho, umha reforma que rebaixe os conteúdos dessa Ordenança Municipal, atendendo às reinvidicaçons discriminatórias de 'Galicia Bilingüe'.

Os movimentos socias e o conjunto dos ferrolanos e ferrolanas comprometidas com o nosso idioma devemos manifestar a nossa enérgica repulsa às pretensons do PP, plenamente identificadas com as dos ultras de 'Galicia bilingüe', e atuar para evitar novos ataques à nossa língua.

Ferrol é umha cidade galega, onde o galego tem sido historicamente a língua própria e nom vamos admitir e umha elite de senhoritos e renegados continuem a espoliar o nosso principal património coletivo.

A Ordenança Municipal de Normalizaçom Lingüística deve ser cumprida e incorporar elementos mais ambiciosos para a recuperaçom total dos usos do galego. Se o PP pretende fazer o contrário, deveremos pressionar até conseguirmos que mude de opiniom ou abandone o governo, pois um partido inimigo do galego nom merece ocupar umha posiçom de poder institucional como essa.

Por um Ferrol em galego, polo cumprimento da Ordenança de Normalizaçom Lingüística

Assembleia Comarcal de NÓS-Unidade Popular

Web de NÓS-UP

Ferrol, 12 de agosto de 2011

Enviado por:

NÓS-UP Trasancos

-nosuptrasancos@gmail.com-

12 de agosto de 2011 15:22

______________________

Elena Arteagoitia entrevista a Séchu Sende - "Moitos dos problemas para que a xente dea o paso e fale unha lingua minorizada son psicolóxicos"

[Sende tratou de hipnotizar onte os oíntes co seu péndulo. (J.Chávarri)]

Sechu Sende, profesor e escritor.

Utiliza a hipnose como "unha burla" e como un modo de denunciar o "absurdo" dos prexuízos que se crearon ao redor da súa lingua, tanto os que xera un mesmo, como os que fomentan quen gobernan en Galicia, que están ocasionando unha perda de falantes.

Gasteiz. Sechu Sende puxo a nota de cor á segunda xornada do Encontro Europeo de Mozos Falantes de Linguas Minoritarias/Minorizadas que se celebra estes días en Vitoria cunha intervención na que botou man dos seus coñecementos en parapsicología e hipnose. O escritor adiviñou palabras en galego, eúscaro ou bretón escritas dentro dun sobre e atreveuse ata a ler a mente dos participantes, que non daban crédito. Así, tratou de convencerlles de que o humor é unha boa forma para achegarse ás linguas.
------

Resulta que os mozos levan días traballando duro para atopar estratexias que permitan preservar as linguas minorizadas e vostede chega cun método infalible.

A hipnosis? Ja, ja, ja... . Cando era neno falaba castelán e nun momento da miña mocidade empecei a falar galego. Foi entón cando me dei conta de que moitos dos problemas para que a xente nova dea o paso para empezar a falar unha lingua minorizada son psicolóxicos. É dicir, hai unha serie de condicionantes sociais que a comunidade xera e que moitas veces fai que a nosa propia imaxe crenos inseguridades. A hipnose é un método surrealista, con moito humor, onde o que realmente se pretende é ridiculizar ese medo a falar nas nosas linguas minorizadas.

É un antídoto contra os prexuízos, entón.

Si, realmente podemos chegar a ser tan ridículos como para non falar galego porque temos medo a que nos identifiquen cunha determinada ideoloxía política ou non falar asturiano porque a xente pode pensar que somos paletos. A mellor forma que temos de destruír eses prexuízos, eses estereotipos, é rirnos deles. E o método de hipnose é unha burla e un modo de levar todo isto ao surrealismo e ao absurdo a través do humor galego, da retranca.

Un dos problemas cos que se atopan as linguas minorizadas é a poboación nova, que parece que se resiste a falalas. Diría que eses prexuízos cúranse co paso do tempo?

A mocidade é unha época na que a xente quere cambiar o mundo, non quere vivir como os maiores. E é onde hai máis valentía e rebeldía precisamente contra algo que fai que o futuro sexa conservador e siga unha inercia, que son os prexuízos. A xente nova ten os motores máis preparados para superar os prexuízos, non ten medo a cambiar. Cando en Galiza a xente decide porse a falar en galego é precisamente nestas idades, cando senten seguros de que queren axudar a construír o camiño do seu propio idioma.

Entón ocorre o contrario que en Euskadi, onde o coñecemento do eúscaro entre a mocidade é maior que nunca, pero a lingua non chega á rúa na mesma proporción.

Non, en Galiza tamén sucede, pero é diferente porque alí nin sequera asegúrase a aprendizaxe do galego na escola. Alí o galego está máis minorizado que noutros lugares. Aínda que é certo que aumentou o coñecemento como en Euskadi, tamén o é que non se fala tanto como nos gustaría a moitos. Alá onde hai máis protección, onde hai máis respaldo político, quizá non se gañen falantes pero polo menos estase conseguindo que non se perdan. En Galiza, en cambio, ao haber unha desprotección e unha desigualdade tan grande, estase dando unha perda masiva de falantes, sobre todo nas cidades. Hoxe en día só fala galego un 4% da mocidade de Ferrol e menos do 5% en Vigo. Se a política lingüística fose por outros camiños seguramente o panorama sería distinto.

As políticas lingüísticas son tan importantes para preservar unha lingua minoritaria ou se pon demasiadas esperanzas nelas?

Para que haxa un cambio social ten que haber unha base xurídica mínima de igualdade. As políticas lingüísticas non só son inevitables, senón absolutamente imprescindibles. O que ocorre é que en Galiza o PP tomou varias medidas desde a súa posición institucional que van facer moito dano ao futuro pero tamén ao presente. Trátase dun decreto, que chama de plurilingüismo, que marxina ao galego e que condena aos nenos de 0 a 6 anos a non ter ningún contacto con esta lingua na escola, e a reducir a presenza tanto en Primaria como en Secundaria.

Diría que o Goberno é un obstáculo para fomentar o galego?

Absolutamente. Ademais, o PP non só está atacando a lingua de todos os galegos a nivel lexislativo, tamén a través dos seus vehículos de comunicación, cos que está institucionalizando os prexuízos lingüísticos. Estamos volvendo escoitar en boca dos propios responsables políticos que o galego limita. Díxoo o conselleiro de Cultura, que tipo de valores están transmitindo á sociedade?

Recomendaríalle un pouco de humor, entón?

Desde logo. Nós rímonos moito deles, lles ridiculizamos e botamos man da retranca. A política lingüística do PP en Galiza é realmente absurda e surrealista, penosa e triste. Que imos facer? No camiño do sufrimento ten que haber espazo para rirse porque a risa atópanos e sácanos á rúa para que nos xuntemos e sexamos así máis creativos. Necesitamos moito diso, xuntarnos e sentir que estamos todos defendendo os nosos dereitos.

Elena Arteagoitia - Xoves, 21 de Xullo de 2011.

Fonte: noticiasdealava.com

Enviado por:

Lupe Ces

-lupeces@gmail.com-

24 de julho de 2011 12:33

http://lupeces.blogspot.com/
From: Alexandre Carrodeguas
-republicadetraballadoras@gmail.com-
2011/7/24
________________

Os medios en galego importan [Asina]

Un país é o que fala. Galicia é o Galego. Ninguén pode matar unha lingua. Pero é moi fácil deixala morrer de inanición e abandono. Tod@s somos responsables de que a nosa lingua reciba a xustiza que merece e as oportunidades que se lle negaron na historia. Que haxa medios en galego importa. Resulta imprescindible para que a nosa lingua viva e medre con futuro. Apoiar ós medios en galego é axudarnos a nós mesm@s e o que somos. Resulta cínico e irreal esperar que anos de intervención do mercado a favor do castelán vaian corrixirse sós. Alguén ten que facelo e ten que facelo agora.

Ningunha administración pública deste país pode declararse allea ou ausente cando pechan un tras doutro os xa poucos medios que apostaban pola nosa lingua. Ningunha administración pública pode dicir, sen faltar á verdade, que fixo todo o que podía facer, ou que non hai recursos porque estamos en crise. Demandamos do goberno que poña a vontade política e os recursos que non dubida en poñer para axudar a outros sectores ou medios que non o precisan tanto. Demandamos das administracións públicas que tomen a decisión de axudar aos medios en galego porque é xusto, porque o merecen e porque se lles debe.

Ningunha persoa  lectora ou espectadora deste país pode tampouco declararse allea ou ausente cando pechan un tras outro os medios que se fan na nosa lingua. Os únicos que realmente poden garantir o futuro de calquera medio son os lectores e as lectoras, as audiencias e os anunciantes. Algo falla nun país onde tanta xente se declara amante da súa lingua ou tantas empresas utilizan a galeguidade para posicionarse nos mercados, pero logo non hai nin lectores nin anunciantes para os medios que se fan en galego. A desaparición dos medios no noso idioma non é un problema nin unha responsabilidade da administración, é un problema e unha responsabilidade de tod@s.



Entrar na web:

http://www.osmediosengalegoimportan.com/

Enviado por:

Rafael Aguirrebengoa

-r_aguirrebengoa@hotmail.com-

8 de julho de 2011 19:56

_______________________________

Queremos Galego impulsa a defensa da lingua este 17 de Maio por medio dunha “mobilización expansiva” que chegará a máis de medio cento de localidades

Haberá concentracións en defensa do galego en Bruxelas, Florencia, Oxford, Belfast, Nova York, Madrid, Barcelona, Santa Cruz de Tenerife, Bos Aires ou Xenebra.

Ferrol, 16 de maio de 2011.- Mañá martes 17 realizaremos en Ferrol unha das concentracións que se desenvolverán en máis de medio cento de localidades galegas e varias fóra do territorio de noso.

Todas elas teñen como nexo de unión principal trasladarmos forte e claro á sociedade galega unha mensaxe: PAREMOS OS ATAQUES CONTRA O GALEGO! Nos dous anos que leva o Partido Popular no goberno da Xunta aínda non se lle coñece unha soa medida de impulso ao galego e si moitas para reducir a súa presenza a favor do castelán, resalta Carlos Outeiro, coordinador da plataforma na comarca de Ferrol.

Leremos textos do grande referente político galego do século pasado, Castelao, nos que se amosa a desgrazada vixencia das súas análises. Por exemplo:

* ¿Con que dereito se nos obriga a deprender a língoa de Castela e non se obriga aos casteláns a deprender a nosa? ¿con que dereito se prescinde do idioma galego nas escolas de Galiza para que os galegos non se afagan a leelo e non seipan escribilo?
* O que nos preocupa e indina é que o galego sexa un idioma proscrito das escolas primarias de Galiza.

En Ferrol a concentración será en Esteiro na Praza do Himno ás 12 h.

Contaremos coas intervencións de:

• Alfonso Tellado - Participante no programa televisivo de Buenafuente.
• Antón Cortizas – Escritor.
• Carlos Outeiro - Coordinador de QUEREMOS GALEGO e da Mesa pola Normalización Lingüística (comarca de Ferrol)
• Eliseo Zahera - Presidente do Ateneo Ferrolán.
• Francisco Rodríguez – Escritor.
• Xaquín Campo – Portavoz de QUEREMOS GALEGO Ferrol e párroco de Mandiá.
• Estarán acompañados de:
• Escorreghei na Lama - grupo de música tradicional.
• María Manuela e Xurxo Varela – cantantes.

Un saúdo.

Carlos Outeiro.

Coordinador na Comarca de Ferrol

Plataforma Cidadá QUEREMOS GALEGO

Manifesto Día das Letras Galega 2011

PAREMOS OS ATAQUES CONTRA O GALEGO!

As galegas e os galegos festexamos no Día das Letras o feito de termos un idioma propio, milenario e fértil. Celebramos a lingua que nos une; a fala que herdamos e queremos deixar en herdo; a escrita que nos pensa, nos canta e nos soña.

Mais neste Día das Letras do ano 2011 non só podemos festexar e celebrar. Tamén nos vemos na necesidade de chamar a atención sobre os ataques que está a recibir nestes momentos o noso idioma. Estas inxustas agresións poñen en perigo o futuro da nosa lingua e da nosa cultura, ademais de debilitaren gravemente a convivencia e a cohesión social do país.

Temos que erguer a nosa voz para denunciar que a indefesión dos nosos dereitos lingüísticos é maior desde o momento en que a persoa que debería ser a primeira valedora do noso idioma –o presidente da Xunta– é o seu inimigo número un. Desde que Alberto Núñez Feijóo tomou posesión como presidente do Goberno galego, hai xa dous anos, a Xunta aínda non adoptou nin un mísero adianto para a nosa lingua en ningún ámbito. Ben ao contrario, desde 2009 estamos a ver como se tenta facer, pola vía dos feitos, que o galego deixe de ser na realidade lingua oficial.

É difícil facer unha listaxe completa de todo o destruído, mais recordemos cando menos algunhas cousas:

• A pesar da oposición dos sindicatos, o PP aprobou en solitario unha reforma da Lei da Función Pública que elimina de feito o galego como requisito, colocándoo nunha posición secundarizada a respecto do castelán.
• A pesar do rexeitamento de sindicatos, asociacións de nais e pais, asociacións estudantís, institucións culturais, Consello Escolar de Galiza, etc., a Xunta aprobou un decretazo contra o galego que supón o modelo educativo máis regresivo de todo o Estado español. O galego é o único idioma do Estado que ten prohibido o seu uso en determinadas materias de ensino. Nestes momentos, só 10% da educación infantil das cidades é en galego, a pesar de que o solicitaron 40% das familias. Esta realidade amosa o verdadeiro sentido da mal chamada Lei de Convivencia, que persegue reducir aínda máis a presenza do galego na escola.
• Na administración de Xustiza, a Xunta distribuíu un programa informático que, desde maio do ano pasado, impide usar o galego.
• A Xunta ordenou aos centros de ensino que se desfixesen de 190.000 libros de texto gratuítos para as familias, adquiridos pola propia Xunta na anterior lexislatura e que tiñan unha vida útil de dous anos máis. O motivo é que estaban escritos en galego. A Asociación Galega de Editores calcula en 3,8 millóns de euros o valor dos volumes desbotados, que nunha parte volveu a financiar a Xunta –cun diñeiro público que sería moi necesario para outros cometidos–, e que tiveron que cubrir as familias no resto.
• A Xunta de Galiza, que tanto vende “austeridade”, leva malgastadas cantidades inxentes de diñeiro só en tentar reducir o galego no sistema educativo. A eses 3,8 millóns de euros de libros de texto inutilizados hai que sumarlle os 40.000 euros que custou mudar as Galescolas en Galiñas Azuis, os 160.995 euros da pseudoconsulta ás familias, etc. A presión social logrou parar unha campaña sobre o decretazo que a Xunta xa tiña adxudicada, por valor dun millón de euros, mais descoñécese a indemnización que a Xunta afrontou pola suspensión do proxecto.
• O presidente da Xunta ameaza con derrogar a Lei de normalización lingüística, aprobada por unanimidade no Parlamento hai case 30 anos. Quere que os nosos nomes de lugar deixen de ter como forma oficial a propia, a galega.
• A vida cultural galega, nas súas diferentes expresións (audiovisual, teatro, música, etc.), está a ser minusvalorada e desprotexida pola Xunta, ao mesmo tempo que desprezada e infrarrepresentada na CRTVG.
• A pesar de que o Estatuto de Autonomía sinala a obriga dos poderes públicos galegos de potenciar o uso do noso idioma tamén no ámbito informativo, moitos dos medios que utilizaban con normalidade a nosa lingua viron na obriga de fechar. A Xunta deu de baixa as subscricións e negouse a pór publicidade nos xornais electrónicos ou impresos que usaban o noso idioma e daban unha visión da realidade diferente á oficial. Debemos denunciar con claridade que esta política pon en perigo a liberdade de expresión.

O poeta Lois Pereiro, a quen lle dedicamos este ano o Día das Letras, di nun dos seus poemas:

A amizade protexe e o amor cura
o odio contaxia e fire
a indiferencia mata.

Apliquemos estes versos á nosa lingua. Fronte ao odio e fronte á indiferenza, o noso amor.

Paremos os ataques contra o galego!

Sitio web oficial da Plataforma:
http://www.queremosgalego.org/

Enviado por:

serxio perille

-serxiocanido@yahoo.es-

16 de maio de 2011 16:04

____________________

Galería Fotográfica do Acto de Lefre de Caldereta: "Mareando as Nosas Letras 2011" - Paseo Marítimo: "Poesía e Música do Mar"

Esta foi a segunda edición de "Mareando as Nosas Letras" organizada pola asociación cultural "Lefre de Caldereta"

Celebrando as Nosas Letras 2011

(omareonosopatrimonio)

No peirao tivo lugar primeiro, ás 12 do mediodía, deste Domingo 15 de Maio de 2011, un recital poético onde interviñeron: Antón Cortizas, Guillermo Ferrández, Karlotty, Xosé Leira e Xurxo Souto.

Despois un paseo marítimo pola Ría de Ferrol, coa música e cancións de, Manolo Bacallao, María Manuela e Xurxo. Antón Varela foi o gaiteiro abordo. A xente d'A Revolta, xa dun xeito máis "informal", cantou o seu repertorio de cancións mariñeiras.

Foi unha xornada de Poesía e Música do Mar.

Foi unha xornada na defensa da nosa Cultura Mariñeira.

Varias embarcación e "O Ría de Ferrol" acompañaron a tarvesía.

Embarcados nun Cantar: Reparteu-se un folleto con letras de cancións mariñeiras.

-------

Galería Fotográfica do Acto: "Mareando as Nosas Letras 2011"

Fotos de Suso Pazos - Susete'70.

Álbum recopilatorio de Suso Pazos
Celebrando as Nosas Letras en Ferrol Terra:

"As nosa Letras 2011 - Lembrando a Lois Pereiro"
____________________

Ártabra 21 soma-se ao Acto Unitario pola Nosa Lingua da Praza Rosalía do Luns 16 de Maio

O Colectivo Ártabra 21 suma-se ao convite que diversas asociacións da nosa comarca, lanzan a toda a cidadanía para participar no Acto Unitario da Praza Rosalía de Castro, no barrio de San Xoán, para celebrarmos a nosa Lingua e as Nosas Letras. Un acto no que se escoitarán, desde distintas sensibilidades, valoracións e reivindicacións referentes á situación da Lingua e Cultura galegas, e unha expresión artística e popular que tamén vai reivindicar a figura de Lois Pereiro.

A convocatoria unitaria desenvolvera-se a partir das seis da tarde, ao redor da pequena figura de Rosalía de Castro, que preside a praza no barrio de San Xoán de Ferrol, este Luns 16 de Maio, véspera do Día das Letras.


Exibir mapa ampliado

Nota.- Foto de Jesús Rodríguez Montero - Lois Pereiro nun acto celebrado en Monforte de Lemos en 1992 - Na presentación do seu libro "Poemas 1981-1991". tirado da Fotobiografía Sonora - Ouvirmos  edición 2010.
_______________

Jornada Lúdico-Reivindicativa no Dia das Letras - Sábado 14 de Maio

JORNADA LÚDICO-REIVINDICATIVA NO DIA DAS LETRAS

Com motivo do Dia das Letras, a Fundaçom Artábria organiza umha Jornada Lúdico-reivindicativa o vindouro sábado 14 de Maio.

Programa:

A jornada começará às 12.30h com umha ruada, sob a legenda "Todo o ano EM GALEGO", que sairá da Praça do Hino Galego e acabará no nosso Centro Social após percorrer o bairro da Madalena.

Jantar Popular

Recuperaremos forças com um jantar popular cuja ementa será composta de churrasco, que terá umha preço de 5€/dose e polvo que custará 7€/dose.

Conta-contos

Por problemas mágicos, o Fiz nom poderá estar connosco sábado. No seu lugar, contaremos com os contos para crianças de Eli Rojas.

Concerto

À noite, é a vez para a música, às 22h começarám os concertos no nosso Centro Social, que serám de entrada gratuita. Nesta ocasiom, contaremos com o punk-rock dos ferrolanos Nhió!; desde a Corunha chegará Sés com a sua formosa voz, que nos apresentará o seu último projeto acústico e também desde a Corunha contaremos com a fusom dos Skarallaos.

Nom podes faltar! Vem connosco berrar bem alto EM GALEGO todo o ano!

A Directiva da Fundaçom Artábria

--
A Fundaçom Artábria é um projecto popular em defesa da língua e cultura nacional, os valores solidários e os direitos históricos da Galiza. Entidade de carácter sociocultural sem ánimo de lucro que está declarada de Interesse Galego e classificada de interesse cultural, com o nº 54 no registo de fundaçons da Xunta de Galicia.
Código de Identificaçom Fiscal (CIF): G15645518.
Morada: Travessa de Batalhons nº7 Esteiro
15403 Ferrol - GALIZA
Telefone do Centro Social: +34 981369099
Fax do Centro Social: +34 981369920


Sítio webda Fundaçom Artábria
http://www.artabria.net
Sítio web do festival da Terra e da Língua
http://www.artabria.netfestival

Enviado por:

Fundaçom Artábria

-artabria@artabria.net-

13 de maio de 2011 12:37

_______________

A luita por um Ferrol e por umha Galiza em Galego continua ... Fundaçom Artábria

Este 17 de Maio chega em tempo eleitoral e, ainda que a Artábria nom se apresenta nem se apresentou nunca às eleiçons, nom podemos deixar de ter em conta esse facto, já que o seu resultado influi diretamente na língua e a própria campanha eleitoral já aponta alguns dados interessantes nesta questom que tanto nos preocupa.

Influi, por exemplo, no facto de que este ano nom haja convocatória de manifestaçom nacional, depois de que no ano passado houvesse nom só no 17 de Maio, mas também noutras datas, importantes mobilizaçons de muitos milhares de pessoas contra a política lingüística do PP.

A falta de convocatória nesta ocasiom aponta já para umha evidência, que nos sempre situamos como um problema: nom existe umha movimentaçom normalizadora independente dos interesses institucionais e eleitoralistas do BNG, força que impulsiona a plataforma “Queremos Galego”, na qual a Fundaçom Artábria nom participa precisamente porque no seu dia reclamamos a total independência do movimento normalizador em relaçom a qualquer sigla.

Nom se confunda essa reclamaçom com um rejeitamento genérico e preconceituoso aos “partidos políticos”. O que rejeitamos é a instrumentalizaçom partidarista dos instrumentos de luita social, porque isso os esteriliza como forças de verdadeira participaçom e transformaçom. Quando os movimentos estám montados por e ao serviço de umha organizaçom política concreta, como é o caso que comentamos, pode ser ativado ou desativado em funçom de interesses alheios à própria luita concreta, neste caso a normalizadora. Ou será que neste ano nom existem já os motivos que havia no ano passado para convocar umha mobilizaçom nacional pola língua?

Por outra parte, a campanha eleitoral está a deixar claro também, no caso de Ferrol, o absoluto desprezo que a maior parte das forças políticas que participam nas eleiçons sentem pola língua e sua necessária normalizaçom.

Seguramente o caso mais vergonhoso é o do PSOE, força governante cujo principal dirigente, Vicente Irisarri, ainda nom aprendeu a falar a língua deste país com um mínimo de dignidade e correçom. Alguém pode imaginar um dirigente partidário de qualquer força política a falar um espanhol tam ruim como o galego de Irisarri? A resposta é evidente: Nom.

No PP, suposta alternativa, os seus candidatos falam espanhol quase a tempo completo, com algumhas pinceladas de galego para enganar algum incauto, mas sem nengumha referência às medidas normalizadoras que irám implantar se ganharem as eleiçons. Isso é normal, proque essas medidas nom existem no caso do galego. Sim no caso do espanhol, que continuará a ser a língua imposta como tem sido durante tanto tempo que o nosso povo está a perder a língua própria de maneira acelerada.

Independentes por Ferrol segue o guiom da direita espanhola que representa, igual que o PP, neste tema. Nada podemos esperar de Juan Fernández e dos seus, salvo mais espanholizaçom e marginalizaçom do galego.

É verdade que forças como IU ou sobretodo o BNG representam algo diferente. Nom som agressivas nem desprezam o galego. Porém, as duas já governárom e nengumha delas aplicou um programa normalizador para regaleguizar o concelho de Ferrol. Nom passam de boas palavras e de umha galeguizaçom superficial da vida administrativa e da propaganda institucional: isso nom chega nem para começar a dar a volta à situaçom.

Diante desta paisagem, à Fundaçom Artábria, como parte do tecido associativo popular ferrolano, corresponde continuar a denunciar e a exigir mudanças políticas que possibilitem a recuperaçom do protagonismo social e institucional para a nossa língua. Nunca demos, nem vamos dar agora, cheques em branco a ninguém, porque sabemos que isso nom é bom e nom serviria à causa que estamos a reivindicar hoje aqui e todo o ano nas nossas atividades.

Estender a consciência, mostrar a utilidade e o orgulho de exercermos como galegos e galegas a tempo completo, reclamar a reorientaçom da Galiza para o mundo de mais de 200 milhons de pessoas que fala a nossa língua. Eis o labor a que temos dedicado todos estes anos de existência e que nos permite denunciar os incumprimentos e falta de compromisso dos partidos e das instituiçons. Só o espalhamento da consciência e a vontade de mais língua, de mais galego, poderá impor as transformaçons políticas necessárias que possibilitem umha Galiza em galego.

A luita por um Ferrol e por umha Galiza em Galego continua!

Na Galiza, em Galego!

Ferrol, 17 de Maio de 2011

--
A Fundaçom Artábria é um projecto popular em defesa da língua e cultura nacional, os valores solidários e os direitos históricos da Galiza. Entidade de carácter sociocultural sem ánimo de lucro que está declarada de Interesse Galego e classificada de interesse cultural, com o nº 54 no registo de fundaçons da Xunta de Galicia.

Código de Identificaçom Fiscal (CIF): G15645518.
Morada: Travessa de Batalhons nº7 Esteiro
15403 Ferrol - GALIZA
Telefone do Centro Social: +34 981369099
Fax do Centro Social: +34 981369920

Sítio web da Fundaçom Artábria
http://www.artabria.net

Sítio web do festival da Terra e da Língua
http://www.artabria.net/festival
______________