"Souto de Leixa", a loita continua - Coa privatización do Centro, a Xunta de Galicia, pretende eliminar 51 postos de traballo - Este Luns 21 de Febreiro mobilicemo-nos contra o despedimento

Mobilización en contra da amortización de 51 postos de traballo no C.E.E. Terra de Ferrol

O luns día 21 de Febreiro, a Xunta de Galiza convocou a Comisión de Persoal para tratar a amortización de 51 compañeir@s do CEE Terra de Ferrol. Isto significa que estamos diante do maior despedimento colectivo realizado polo Goberno de Feijoo ao servizo da súa política privatizadora de servizos públicos. Esta xuntanza celebrase no Edificio da EGAP en Compostela, no Polígono de Fontiñas, ás 10 da mañá. A esa mesma hora, a CIG realizará unha concentración diante do propio edificio, para o cal, necesitamos a colaboración de todos aqueles que poidan acoder. A CIG poñerá un bus para garantir o transporte con saída o luns 21 de Febreiro ás 8.15 h. do CEE Terra de Ferrol, con parada na Avda. Esteiro (fronte ao Sindicato), Caranza e Fene.

Estes postos de traballo, explican dende a CIG-Administración Autonómica, “sobran” segundo a Xunta despois de que a administración decidira dividir xurídica e fisicamente un único centro en dous: o Terra de Ferrol. Este quedaría como público, mentres que o Souto de Leixa sería privatizado.

O día 15 de Febreiro publicábase no DOG a formalización do contrato de xestión do centro Souto de Leixa por case 6 millóns de euros á empresa Clece S.A. “O resultado desta operación é doarlle á empresa de Florentino Pérez un centro feito con cartos públicos e 6 millóns de euros para xestionalo. As consecuencias son a privatización dun servizo público, o deterioro do servizos prestados aos usuari@s, nenos e nenas discapacitad@s, que ven como diminúe o persoal que os atende, e 51 despedimentos de traballadores e traballadoras con sobrada experiencia e coa condición de empregados/as públicos/as”, denuncian.

A este respecto, critican a falsa política de austeridade do Partido Popular, que consiste en limitar o gasto no capítulo de persoal reducindo emprego público “para darlle eses cartos a empresas privadas. Consiste en deteriorar os servizos públicos para logo xustificar a súa privatización”. Dende a CIG-Autonómica subliñan que os 51 postos de traballo que pretende amortizar a Xunta, súmanse aos case 200 empregos que o goberno do PP ten amortizado nestes anos de mandato.

Así mesmo, censuraron o “indigno papel de CCOO” que se negou a participar na mobilización convocada pola CIG e UGT diante da Escola Galega de Administración Pública, e a que o Comité de Empresa de persoal laboral de Educación na provincia da Coruña tivese a súa reunión na EGAP en Compostela, coincidindo coa Mesa Xeral, en solidariedade cos compañeir@s despedid@s”.

AGARDAMOS A VOSA SOLIDARIEDADE COAS COMPAÑEIRAS E COMPAÑEIROS DO TERRA DE FERROL

A CIG-Saúde solidariza-se coas compañeiras e compañeiros do "Terra de Ferrol" e fai un chamamento para participar na concentración deste Luns 21 de Febreiro en Compostela, diante do Edificio da EGAP en Compostela, no Polígono de Fontiñas, ás 10 da mañá.

Enviado por:

cig-saude.asf@sergas.es

-cig-saude.asf@sergas.es-

18 de fevereiro de 2011 18:50

www.cig-saude.org/ferrol
____________________________

A Xunta incrementa os equipamentos do Souto de Leixa nas vésperas de entregar a súa xestión a Clece e executar 54 despedimentos

O Comité Intercentros do Persoal Laboral da Xunta rexeita a privatización deste centro asistencial de Ferrol

O Comité intercentros do Persoal Laboral da Xunta de Galiza vén de emitir un comunicado de rexeitamento á decisión do goberno galego de privatizar o centro asistencial Souto de Leixa, en Ferrol. A Xunta adxudicou por sete millóns de euros a xestión das instalacións á empresa Clece, e ten previsto despedir a 54 traballadores e traballadoras que até o de agora atendían aos usuarios e usuarias deste centro.

A continuación reproducimos o contido do comunicado:

O comité intercentros da Xunta de Galiza, máximo órgano de representación dos/as empregados/as públicos no que ao seu ámbito laboral se refire, emite o seguinte comunicado:

O comité intercentros da Xunta de Galiza, no que están presentes as organizacións sindicais CCOO, UXT, CIG e CSIF, manifesta a súa total oposición contra a decisión da Consellaría de Traballo e Benestar de proceder á privatización do centro asistencial Souto de Leixa do Ferrol.

A decisión de peche deste centro, contradi as promesas electorais do PP, de mellorar os servizos públicos. Constitúe un exemplo mais da súa posición en materia social.

Souto de Leixa do Ferrol ofrece un servizo público de calidade que da resposta as necesidades de 170 persoas maiores de 21 anos, con trastornos condutuais diversos e unhas necesidades educativas especias.

A privatización proposta polo goberno significa que unhas instalación públicas serán entregadas a unha empresa privada. A empresa privada ten obxectivos de lucro polo tanto os obxectivos relacionados coa prestación social quedan relegados a segundo plano.

Que supón esta privatización para os cidadáns e cidadás?

• A perda dun servizo social gratuíto
• O pago de mais de 200 € o mes polos servizos, antes gratuítos.
• O pago dun servizo de transporte que antes era gratuíto
• A necesidade de aumentar o número e importe das pensións de invalidez o das axudas da dependencia para afrontar estes importes, que pagamos todos.

Que gana a sociedade con isto?

• Que unha sociedade anónima teña garantidos uns beneficios económicos sen asumir risco empresarial, sen desembolso de capital.

Pero non so se lle entrega a CLECE unhas infraestruturas e uns servizos, ademais en vésperas de consumarse a privatización, auméntanse a dotación de equipamentos. Dotacións que até agora foron denegadas. E ademais, CLECE recibe case sete millóns de euros para a xestión do centro no período 2011-2013.

Rexeitamos que se lle entreguen unhas instalacións e unhas dotacións públicas a unha empresa privada para o exercicio do capitalismo, en detrimento da prestación social da que son merecedores, cando menos, as persoas máis desfavorecidas e necesitadas.

E que pasa cos traballadores/as públicos que viñan atendendo a estes asistidos? Todos/as á rúa. Cincuenta e catro traballadores/as a engrosar as listas do paro para axudar a redondear os cinco millóns de todo o Estado. Traballadores/as formados/as, experimentados/as e que eran o referente diario destas persoas con trastornos físicos e psíquicos, que eran parte da súa familia. Algúns traballadores/as veñen traballando cos mesmos usuarios/as até 20 anos continuados.

Con esta privatización, a Consellaría de Traballo e Benestar externaliza parte da súa principal competencia. Imaxinade que a Universidade, especializada na formación, decide externalizar algún dos seus títulos, por ex. Medicina, para entregarlla a unha empresa multiservizos como a do presidente do Real Madrid.

Non á privatización. Non ao despedimento de 54 traballadores e traballadoras.

Santiago de Compostela, 23 de decembro de 2010.

Fonte: Avantar
_______________________

Posicionamento da Plataforma en Defensa da Sanidade Pública de Ferrol respecto da privatización do Souto de Leixa

A Plataforma en Defensa da Sanidade Pública de Ferrol manifestamos a nosa oposición á privatización da xestión do Centro Souto de Leixa, no que traballan 117 persoas e que atende a 200 alumnos e alumnas con discapacidade, que vai supoñer unha redución importante do cadro de persoal e unha peor calidade asistencial.

A privatización dos servizos públicos e unha constante da actual Xunta de Galicia que tamén se quere facer extensiva á Sanidade Pública e que esta Plataforma en Defensa da Sanidade Pública de Ferrol de Ferrol vimos denunciando. A actual Xunta de Galicia pretende converter a xestión dos servizos sociais nun negocio para certas empresas, a pesar de saber que se vai reducir e precarizar o emprego e ofertar unha peor asistencia. Esta denuncia nosa tamén é compartida por 14000 persoas de Ferrolterra que, a través da súa sinatura, xa expresaron a súa oposición á privatización da xestión do Centro de Souto de Leixa e de calquera outro centro público.

Nesta comarca a Xunta de Galicia tamén quere privatizar a xestión dos Centros de Saúde que se proxecta construír nos Concellos de A Capela, Ares, Cedeira e Narón, Privatización que vai supoñer un maior custo para a cidadanía e que abrirá a porta de pago por algunhas das prestacións que ata o de agora eran universais e gratuítas.

Desde a Plataforma en Defensa da Sanidade Pública de Ferrol queremos amosar o noso total apoio ó cadro de persoal do Souto de Leixa, apoio que se fai extensivo ós alumnos e alumnas e ás súas familias que serán quen sufran unha prestación de servizos de moita peor calidade.

Sábado, 18 Decembro 2010

Plataforma en Defensa da Sanidade Pública de Ferrol
_____________________________

Manifesto Sindical Unitario en apoio das e dos traballadores do "Souto de Leixa" e contra a privatización da xestión do Centro - E peche na sede do PP en Ferrol

O pasado día 3, deste mes de Decembro, produciu-se unha boa nova, as unións comarcais de tres centrais sindicais asinaban un Manifesto Sindical Unitario en apoio das e dos traballadores do "Souto de Leixa", así como das familias de usuari@s e d@s propi@s usuari@s, e contra a privatización da xestión do Centro. A defensa dos postos de traballo dos centros "Terra de Ferrol" e "Souto de Leixa", torna-se unha reivindicación fundamental das centrais sindicais asinantes, mais a defensa de que os servizos sociais públicos, segan sendo de titularidade pública e mantendo a súa xestión en mans públicas, forma tamén parte destas reivindicacións tan importantes que o colectivo de traballadoras e traballadores levan máis de dous meses defendendo tan consecuentemente. Desde Ártabra 21 non temos máis que aledar-nos por este comezo do entendimento de que a unidade sindical e de clase, é un principio imprecindíbel para combatir as políticas do Capital e vencer ao neoliberalismo, neste caso na súa versión monicreque na Xunta de Galicia, gobernada nesta lexislatura pola dereita populista. Agardemos que non sexa tarde para paralizar o proceso de privatización, dado que xa pasaron dous meses e medio, desde que o goberno do PP na Xunta de Galicia anunciara, en rolda de prensa, a privatización da xestión do citado Centro de Atención a Persoas con Discapacidade Intelectual -para maiores de 21 anos de idade.

Manifesto das centrais sindicais

Manifesto das Confederacións Sindicais Comarcais de CIG, UGT e CCOO sobre a privatización da xestión pública do Centro Souto de Leixa

Os representantes comarcais de Ferrol das Confederacións de CIG, UGT e CCOO manifestamos a nosa oposición a privatización da xestión da atención ás persoas con discapacidades psíquicas e outras asociadas que, no momento actual e desde hai moitos anos, están a seren atendidos no Centro de Educación Especial Terra de Ferrol.

Os xestores actuais da Administración galega téñense embarcado nunha carreira de renuncias á xestión directa das súas obrigas de tutela, auxilio e apoio ás persoas necesitadas dunha especial cobertura social. Para iso iniciaron unha política de apertura da xestión dos servizos sociais esencias ás empresas privadas, poñendo a satisfacción desas necesidades ao servizo do beneficio das empresas privadas.

As razóns para a nosa oposición están ben definidas:

1. Estamos diante dunha posición apriorística, fundamentalista, a prol das bondades do mercado e en contra da xestión pública dos servizos tamén públicos. Non existe ningún fundamento, nin na práctica ata agora desenvolvida, nin nos estudios académicos realizados, que xustifiquen esa defensa ultra das bondades do mercado con respecto á xestión pública. Si existen múltiples prexuízos sobre este tema, prexuízos mantidos e fomentados a pesar de que a experiencia nos indica que a xestión pública dos servizos esenciais á comunidades é unha garantía da súa calidade e, sobre todo, da súa neutralidade económica.

Non se prestan só aos mellor situados socialmente. Tampouco se establecen discriminacións en función da renda individual de cada un dos asistidos. Estes prexuízos favorecen as posicións daquelas empresas que ven que poden obter beneficios inmediatos acudindo aos concursos que as Administracións convocan. Tal e como están as cousas non podemos senón preguntarnos cal é o pago que as empresas beneficiarias realizan a cambio de poder entrar no xogo de repartirse os fondos públicos destinados a servizos sociais.

2. Doutro lado, a decisión de privatizar esta xestión implica a supresión de decenas de postos públicos existentes na nosa comarca. Postos que están a ser ocupados por persoas en precario pero que eran e son susceptibles de consolidar e estabilizar. Postos que, en última instancia estaban abrigados por un convenio e polo Estatuto básico dos empregados públicos. Elimínanse eses postos e créanse algunhas decenas menos en condicións peores que as que tiñan os suprimidos. Onde había precariedade seguirá a habela, pero ademais aparecerán as sobrexornadas, os despedimentos improcedentes, e outros males presentes en boa parte do tecido empresarial, sobre todo naquel que está moi maioritariamente feminizado.

3. O respecto pola xestión pública dos servizos sociais é un elemento clave á hora de asegurar a súa calidade. A estas alturas todos somos conscientes das disfuncións que poden causar os mercados cando actúan sen control, desreguladamente. Tamén todos somos conscientes de que non todos perdemos o mesmo nesa situación. Mesmo hai que obtén fabulosos beneficios. As Administracións públicas están obrigadas a garantir que unhas liñas de accións social que aseguren a cobertura das necesidades sociais esenciais. De ningún xeito deben poñer estas en función dos negocios privados.

4. Finalmente, estamos convencidos de que non son posíbeis uns servizos públicos de calidade sen unha forte presenza do sector público nesa área de actividade. A pretensión de que estes servizos se desenvolvan mediante empresas que atendan esencialmente ás sinais dos mercados, é dicir, beneficios inmediatos, ameazas de perdas ou realización das mesmas, é, por un lado, unha falsificación da realidade porque esas empresas se aseguran de ter a cobertura necesaria das Administracións para que o seu negocio nunca dea perdas. Pola outra parte, elimina unha referencia estritamente necesaria, a da actividade pública que non se guía polo beneficio senón pola valoración acaída de necesidade social á que obedece ese servizo.

É por todo isto que rexeitamos a privatización da xestión do servizo público no centro Souto de Leixa, expresamos a nosa solidariedade cos traballadores e traballadoras afectados, tamén cos usuarios e usuarias que van ver radicalmente modificados os principios de actuación que ata agora estaban a ser desenvolvidos para atendelos e chamamos a máis ampla mobilización en defensa duns servizos públicos de calidade.

Ferrol, 3 de decembro de 2010.

[02.12.2010 - Peche  do persoal do "Souto de Leixa" na sede do PP de Ferrol - Foto: CIG]

Persoal do Souto de Leixa péchase na sede ferrolá do PP contra a privatización do centro

Traballadores e traballadoras do centro Souto de Leixa e sindicalistas da CIG pecháronse o xoves, 2 de Decembro de 2010, pola tarde na sede do Partido Popular de Ferrol, nunha nova acción de protesta pola privatización do centro asistencial que a Xunta está a levar a cabo e que pon en perigo tanto a cualidade do servizo como a continuidade dos empregos.

O persoal, que foi atendido polo responsábel local do PP, prosegue así co calendario de mobilizacións iniciados dende que a Xunta anunciou a súa intención de privatizar o centro asistencial, pondo en perigo os postos de traballo e a cualidade dun servizo público que atende a persoas con discapacidades psíquicas.

Dende o colectivo de traballadores/as volveuse a instar Xunta para que garanta a continuidade da xestión pública do centro "Souto de Leixa" no proceso de segregación e posta en funcionamento, mantendo os postos de traballo da totalidade do cadro de persoal adscrito ao Centro de Educación Especial "Terra de Ferrol", na súa condición de empregados públicos, e garantindo a calidade asistencial aos usuarios e usuarios, do mesmo xeito que se viña facendo até o de agora.

O persoal, que foi atendido polo responsábel local do PP, prosegue así co calendario de mobilizacións iniciados dende que a Xunta anunciou a súa intención de privatizar o centro asistencial, pondo en perigo os postos de traballo e a cualidade dun servizo público que atende a persoas con discapacidades psíquicas.

Dende o colectivo de traballadores/as volveuse a instar Xunta para que garanta a continuidade da xestión pública do centro "Souto de Leixa" no proceso de segregación e posta en funcionamento, mantendo os postos de traballo da totalidade do cadro de persoal adscrito ao Centro de Educación Especial "Terra de Ferrol", na súa condición de empregados públicos, e garantindo a calidade asistencial aos usuarios e usuarias, do mesmo xeito que se viña facendo até o de agora.

Fonte: Avantar
_________________

Enlaces relacionados:

Ártabra 21: A Administración é como unha grande apisoadora que todo o esmaga - SOS "Souto de Leixa": na defensa dos postos de traballo, na defensa dos servizos sociais públicos, non permitamos a privatización da súa xestión

Ártabra 21: Reportaxe sobre a Manifestación contra a privatización do centro "Souto de Leixa", celebrada en Ferrol o pasado Sábado 20 de Novembro

Ártabra 21: Concurrida manifestación en Compostela contra a privatización do "Souto de Leixa" - Este Sábado 20 de Novembro, a manifestación será en Ferrol

Ártabra 21: Manifestación en Compostela, o 17 de Novembro, contra a privatización do "Souto de Leixa"

Ártabra 21: Privatización ao pé da casa

Ártabra 21: Solidariedade da CIG Aministración - Ferrol co persoal do "Terra de Ferrol" - "Souto de Leixa" e alerta sobre a vaga de privatizacións desenvolvidas e na axenda do Partido Popular

Ártabra 21: Non á privatización do Centro "Souto de Leixa" - Os servizos públicos non deben ser un negocio
_______________________

A Administración é como unha grande apisoadora que todo o esmaga - SOS "Souto de Leixa": na defensa dos postos de traballo, na defensa dos servizos sociais públicos, non permitamos a privatización da súa xestión

O venres pasado, 26 de Novembro, despois de dúas horas de peche no Edificio Administrativo da Xunta de Galicia en Ferrol, as traballadoras e traballadores do "Terra de Ferrol" - "Souto de Leixa", eran desaloxados pola policía, sen ter conseguido estes os obxectivos de entrevistar-se coas autoridades autonómicas, mais si, en certa medida, os obxectivos propagandísticos de oposición á privatización e de que a loita continua.

A administración non é sensíbel ás reivindicacións, ... o concurso, os trámites, os prazos, as decisións, todo un entramado administrativo segue o seu curso implacábel. O pasado 22 de Novembro a Mesa para a contratación da xestión do "Souto de Leixa", decidía definitivamente a admisión con capacidade para contratar ás dúas empresas presentadas: a integrista católica e multinacional "Hermanas Hospitalarias del Sagrado Corazón de Jesús" y a multinacional de multiservizos Clece, S.A, empresa do grupo ACS, grupo con case 900 empresas con presencia en todo o mundo. Agora só queda a decisión da adxudicación a unha delas. Para estas empresas coas súas enormes estruturas e complexas organizacións, a adxudicación deste servizo social público, só supón unha parcela máis a dominar, no seu afán monipolizador, do controlo social, do dominio ideolóxico e da expansión do negocio. Para nós pode supoñer unha batalla máis perdida, unha sociedade: menos nosa, menos xusta e menos democrática.

A Xunta estivo a semana pasada dotando ao centro de novo material, un material que antes se negaba. ao Igual que se nega a información e o diálogo, xa non digamos a negociación. Todo é unha política de feitos consumados. A todas luces deplorábel. Xogando coa vida da xente, deixando na incertidume a 118 persoas que ainda non saben o que vai ser do seu futuro inmediato, e estamos falando que isto sucede nunha administración pública.

Só unha decisión política, pode paralizar a inminente privatización da xestión do CAPD "Souto de Leixa". E para que exista unha decisión política tiña que aparecer un revulsivo social, un salto cualitativo e cuantitativo nas demandas, nos apoios e nas accións. Un mes de mobilizacións, 25 días de peche continuado no Pazo Municipal do Concello de Ferrol, manifestacións, máis de 14.000 sinaturas contra a privatización, accións sorpresa, entrevistas, mocións, apoios institucionais e parlamentarios, ... todo un cúmulo de traballo sindical, non dobrega a vontade privatizadora do goberno do PP na Xunta de Galicia. O goberno Feijóo segue directrices marcadas polo FMI, a OMC, o  BM, a Comisión Europea, políticas neoliberais que tamén aplica o goberno zapatero en Madrid. A deriva privatizadora, non é nova e non hai goberno que se resista, nen central, nen autonómico, nen local, ... Hai un Acordo Xeral sobre o Comercio de Servizos (AGCS), de 1995, adoptado no seo da OMC -Organización Mundial do Comercio- que persegue a liberalización progresiva de todos os servizos para o comercio internacional e a progresiva mercantilización do sector público. A privatización dos servizos públicos sociais, supón sinxelamente, converter en puro negocio, o que son dereitos básicos da cidadanía. Non chega cun apoio puntual sen que teña unha consecuencia práctica. As centrais sindicais son as principais responsábeis de que non haxa un accionar sindical e cidadán decidido contra as privatizacións. En segundo lugar os partidos políticos e cargos institucionais que en plena precampaña eleitoral, buscan máis o protagonismo da sigla que o obxectivo a acadar que o "Souto de Leixa", siga sendo de xestión pública. En terceiro lugar o movimento social e veciñal desmobilizado, sen obxectivos claros na defensa do benestar social. Primeiro hai que crer-se que podemos gañar a batalla e despois accionar entre todas e todos na mesma dirección e sentido. Só unha acción decidida, consciente, conxunta e unitaria de todos os sectores progresistas defensores do público frente as privatizacións, vai conseguir dobregar a vontade privatizadora do goberno do PP na Xunta de Galicia.

A esquerda social e política, non ten só que combatir os intentos de privatizacións dos servizos públicos, senon que debería pasar a ofensiva contra o neoliberalismo, formulando propostas xá de rescate dos servizos públicos privatizados.
__________________

Reportaxe sobre a Manifestación contra a privatización do centro "Souto de Leixa", celebrada en Ferrol o pasado Sábado 20 de Novembro

O centro atende á persoas con discapacidade

Manifestación en Ferrol en contra da privatización do centro Souto de Leixa

Varios centos de persoas participaron o pasado sábado 20 de novembro na manifestación convocada en contra das intencións da Xunta de privatizar os servizos de atención a persoas con discapacidade achegados no centro Souto de Leixa. Dende a CIG-Administración de Ferrol esíxese á Xunta que manteña este servizo público, xa que é a única vía para garantir a cualidade asistencial e a continuidade dos empregos de traballadores e traballadoras que acumulan anos de experiencia.

As rúas de Ferrol acolleron o pasado sábado unha nova manifestación en contra das políticas privatizadoras que está a pór en práctica a Xunta de Galiza, e que neste caso afectan á xestión do centro de educación especial Souto de Leixa. Estas privatizacións, denuncian dende a CIG-Administración de Ferrol, implican confirmar unha política de apertura da xestión dos servizos sociais á empresa privada, poñendo a satisfacción de necesidades básicas da cidadanía ao servizo do beneficio das empresas privadas.

Dende hai anos o CEE Terra de Ferrol (antigo Carmen Polo) comezou un proceso de segregación da parte de alumnos/as menores de 21 anos dos/as alumnos/as maiores de 21 anos, que actualmente conviven no mesmo centro. No ano 2005 iniciáronse as obras para a división física do centro, creando unha residencia para alumnos menores de 21 anos con unha capacidade para 35 residentes e a remodelación da parte dos alumnos maiores de 21 anos, quedando así divididos fisicamente os dous centros.

Xa co bipartito, no ano 2008, estabeleceuse unha distribución do persoal laboral, escribíndose daquela unha parte á Vicepresidencia e outra á Consellaría de Educación. Finalmente, en 2009 constituíse formalmente a denominada parte de maiores, baixo nome CAPD Souto de Leixa e que vai ocuparse dos alumnos de máis de 21 anos. Na actualidade hai 117 traballadores/as no CEE Terra de Ferrol, dos cales 55 son postos vacantes, coñecidos como interinos, mentres que o resto dos postos están ocupados por persoal laboral fixo.

O pasado 13 de outubro, nunha rolda de prensa onde estaba o Delegado Territorial mais os Secretarios Xerais das Consellarías de Educación e Traballo, anunciábase a xestión privada do Souto de Leixa; mais en ningún momento a Xunta de Galiza se dirixiu ao Comité de Empresa ou Comité Intercentros para negociar esta problemática. Dende entón, os traballadores e traballadoras viñeron desenvolvendo un calendario de mobilizacións na defensa deste servizo público e dos seus empregos.

Dende a CIG-Administración de Ferrol advirten que privatizar estes servizos suporá o despedimento dun elevado número de traballadores e traballadoras con experiencia adquirida ao longo de moitos anos desenvolvendo as súas funcións e substituílos por outros en situación de maior precariedade laboral. “O respecto pola xestión pública dos servizos sociais é un elemento clave á hora de asegurar a súa calidade. Non son posíbeis uns servizos públicos de calidade sen unha forte presenza do sector público nesa área de actividade”, denuncian nun comunicado.

CIG-Administración exixe, xa que logo, que se manteña o carácter público da xestión que se realiza neses centros de referencia nas súas comarca se denuncia que “estamos diante dunha actitude de eliminación permanente de servizos públicos por parte do Partido Popular no goberno galego e de converter a actividade que se estaba a desenvolver desde a Administración Pública Galega nun negocio".

Publicado en Avantar
_________________________

Concurrida manifestación en Compostela contra a privatización do "Souto de Leixa" - Este Sábado 20 de Novembro, a manifestación será en Ferrol

As traballadoras e traballadores do "Terra de Ferrol" - "Souto de Leixa", acudiron, o 18 de Novembro, diante do edificio de San Caetano, sede da Xunta de Galicia, para mostrar o seu rechazo ao proceso privatizador que sofre o seu centro. Contaron co arroupe das compañeiras e compañeiros do centro "Santiago Apostolo" d'A Coruña, que tamén loitan contra a súa privatización. As familias de usuari@s, activistas das centrais sindicais, membros dalgúns partidos políticos, e traballadoras e traballadores doutros centros públicos de Ferrol, enchian a comitiva que se desprazou á cidade compostelá.

Ás 11 da mañá partía unha numerosa marcha até a esplanada diante do Edificio Administrativo de San Caetano que reune as administracións centralizadas das diferentes consellarías. Os lemas escritos nas faixas, identificaban ben a loita contra a privatización da xestión do centro, que a Xunta pretende dar a unha empresa privada, para facer da xestión un negocio.

A manifestación tivo un carácter moi reivindicativo, con forza e convencimento berraba-se contra a privatización, a favor da xestión pública.

As traballadoras e traballadores en loita, manteñen unha intensa actividade na defensa dos postos de traballo e contra a privatización dos servizos públicos. Recolleron, e seguen a recoller, miles de firmas en apoio das súas reivindicacións; manteñen entrevistas con cargos públicos e presentan as súas demandas ante as autoridades da Xunta. Ademais, manteñen as manifestacións diarias en Catabois, o peche indefinido no Concello de Ferrol, concentracións na praza do Concello, e ante-onte estiveron manifestado a súa protesta no CIS d'A Cabana, onde se atopaba o Conselleiro de Presidencia, ... Sr. Rueda, contando-nos "milongas" de cumprimentos e compromisos de creación de postos e traballo a través do Plano Ferrol.

As centrais sindicais e os sectores da esquerda política e social de Ferrol e Comarca, teñen enfrente un combate práctico contra a formulación efectiva das políticas neoliberais de entrega ao Capital dos servizos públicos. Até pode que o asunto colla un cariz máis forte, a nivel ideolóxico, pois parece  ser que unha das empresas privadas que optan a conseguir a concesión, está ligada ao integrismo católico. Hai que redobrar esforzos, tomar conciencia de que podemos cambiar a situación e impedir que se leve adiante a privatización do CAPD "Souto de Leixa". Mobilicemo-nos.

O Comité de Empresa e familiares de usuari@s, apoiados polas Centrais Sindicais, convocaron unha manifestación este Sábado, 20 de Novembro, con saída ás 12 do mediodía da Porta Nova [Praza de España], fagamos todo o posíbel para que sexa todo un suceso.

Vídeos da manifestación, en Compostela, do 17 de Novembro de 2010.

Fonte: http://www.youtube.com/user/inaciogz?feature=mhum

____________________________

Manifestación en Compostela, o 17 de Novembro, contra a privatización do "Souto de Leixa"

Mobilizacións contra a privatización do Centro "Souto de Leixa"

O vindeiro Mércores, 17 de Novembro de 2010, ás 11:00 hs, en San Caetano - diante dos Edificios Centrais da Administarción Autonómica, en Santiago de Compostela, está convocada unha manifestación , contra a política privatizadora da Xunta de Galicia, en defensa dos postos de traballo e para que o centro "Souto de Leixa" siga sendo público.

Desde Ferrol haberá autobuses que sairán ás 9 da mañá de enfrente aos propios centros de "Terra de Ferrol" e "Souto de Leixa" [Telefono de contacto 696191701]

Na actualidade hai 118 personas traballando no Centro de Educación Especial "Terra de Ferrol", dos cales 55 son postos vacantes, coñecidos como interinos, o resto dos postos están ocupados por persoal laboral fixo.

O pasado 13 de Outubro, nunha rolda de prensa onde estaba o Delegado Territorial, Diego Calvo, mais os Secretarios Xerais das Consellarías de Educación e Traballo, anunciaban a xestión privada do "Souto de Leixa".

Isto ten un só significado o desmantelamento por parte da Xunta de Galiza dos servizos públicos esenciais e básicos para este tipo de usuari@s dependentes e semidependentes. Os traballadores e as traballadorasas entendemos que esta política que está a empregar a Xunta, non só significa a eliminación do persoal laboral senón unha mingua xeneralizada na calidade asistencial aos usuari@s. Como por exemplo menos talleres ocupacionais, menos persoal de atención directa, menos persoal de servizos, menos persoal de enfermería e médicos, ...

Instamos á Xunta de Galicia a garantir o mantemento da xestión pública do centro "Souto de Leixa" no proceso de segregación e posta en funcionamento mantendo os postos de traballo da totalidade da plantilla hoxe adscrita ao CEE "Terra de Ferrol", na súa condición de empregados públicos, garantindo a calidade asistencial desenvolta ao día de hoxe.

IMPORTANTE O APOIO DE TOD@S, CÓMO USUARI@S E TRABALLADORAS E TRABALLADORES!

O Sábado 20 de Novembro, está convocada unha manifestación en Ferrol
[Por confirmar lugar de saída e hora]

Información baseada na publicada no sitio web da CIG-Saúde.
_________________________

Enlaces relacionados:

• Ártabra 21: Privatización ao pé da casa
• Ártabra 21: Solidariedade da CIG Aministración - Ferrol co persoal do "Terra de Ferrol" - "Souto de Leixa" e alerta sobre a vaga de privatizacións desenvolvidas e na axenda do Partido Popular
• Ártabra 21: Non á privatización do Centro "Souto de Leixa" - Os servizos públicos non deben ser un negocio

________________________________

Privatización ao pé da casa

En moitas ocasións temos escoitado e reproducido o discurso das organizacións políticas, sindicais e sociais de esquerda en relación á vontade privatizadora dos servizos públicos por parte dos gobernos da dereita. Este discurso enmarcou desde sempre esta ansia privatizadora, na necesidade do capital financieiro de expandir a súa actividade a aqueles ámbitos da vida que teñen recoñecida a calificación, na nosa sociedade, de dereitos básicos, como son a saúde e a educación.

Nos últimos anos, con reivindicación e moito esforzo, o dereito á asistencia para todas aquelas persoas que presentan diversidade funcional, ou dependencia, comezou a estar recoñecido, aínda que sen chegar aos niveis que acadaron o dereito á saúde e á educación. Aínda que os servizos creados para atender estas necesidades non chegaron a ser nunca universais, si cubrían as necesidades básicas e teñen convertido aos servizos públicos dos que disfrutamos nun referente mundial, un modelo a seguir e conquistar por moitos outros países dos distintos continentes.

Este discurso que alertou sempre do perigo das privatizacións, foi moitas veces asimilado máis como un referente a ter en conta que como unha realidade. As privatizacións, entre outras, da construción e xestión de futuros hospitais e centros de saúde por parte da actual Consellería de Sanidade mobilizou miles de persoas e anunciaba un novo tempo onde a protección dos servizos públicos quedaba desconectada. Mais é agora, cos plans de privatización por vía de urxencia do centro “Souto de Leixa”, que vemos ao pé da casa que o tsunami privatizador está a piques de barrer todo o noso sistema de protección social.

A crise económica provocada, entre outros factores, pola desordeada, irresponsábel e codiciosa actuación do capital financieiro, está servindo de coartada, curiosamente, para que estes mesmos irresponsábeis, codiciosos e arroutados, comecen a xogar no seu casino das finanzas cos nosos servizos públicos, estes que temos ao pé da casa, e como é o caso deste centro, atendeu até agora a 200 usuari@s cunha plantilla de 118 traballadores e traballadoras, como cómpre a un servizo asistencial de calidade e que custeabamos entre todos e todas dun xeito solidario a través dos orzamentos públicos. Agora pretenden que unha empresa privada opte a un concurso público por vía de urxencia, e se encargue de xestionalo, engadindo o factor “beneficio privado”, ao espazo onde concorrían solidariedade compartida no mantemento do servizo público, e dereitos garantidos para usuarios e usuarias, para as súas familias, e para os traballadores e traballadoras públicos que os atendían ata agora.

É por iso que as persoas que asinamos estas reflexións, pertencentes a diferentes correntes sindicais e políticas, vemos a necesidade de converter a luita dos traballadores e traballadoras do “Souto de Leixa”, nunha loita político-sindical onde se impliquen todos os sectores laborais e sociais, construíndo un verdadeiro dique de contención, que nos defenda da tempestade privatizadora que comeza a mostrar a súa face máis virulenta neste centro educativo-asistencial, pero que sabemos ten como obxectivo a destrución do noso sistema público garante de dereitos básicos, e de protección social.

E son, precisamente, os sindicatos os que poden e deben desenvolver a solidariedade de clase con estas compañeiras e compañeiros.

Por Inácio Martínez Orero (CIG), Lupe Cés Riobóo (CIG), Manuel Cendán Dopico (UGT), Alejandro Sevilla Rodríguez (UGT), José M. Martín Rodríguez (CCOO) e Rafael Pillado Lista (CCOO)
_______________________

Solidariedade da CIG Aministración - Ferrol co persoal do "Terra de Ferrol" - "Souto de Leixa" e alerta sobre a vaga de privatizacións desenvolvidas e na axenda do Partido Popular

A Executiva comarcal de CIG Administración Pública de Ferrol quere mostrar a súa solidariedade e apoio á loita dos traballadores e traballadoras do Centro de Educación Especial Terra de Ferrol, contra a privatización e pala defensa dos seus postos de traballo.

Tomamos a decisión de enviar aos nosos servizos xurídicos a Orde do día 29 de outubro na que se contrata a xestión da atención residencial e diurna para persoas con discapacidade intelectual. Unha orde de tramitación urxente, con prazos mínimos e sen garantía provisoria, que ten toda a aparencia de encubrir a concesión a unha empresa privada amiga para que faga o negocio co futuro dos nosos discapacitados/as.

Asistimos á apropiación polo empresa privada dun espazo e usos públicos no que o Partido Popular dá un paso cualitativo e pasa a mans privadas a parte asistencial das persoas discapacitadas maiores de 21 anos, e deixa sen ocupación aos empregados/as públicos.

É o mesmo caso que se anuncia para as oficinas do Igape no estranxeiro, cedidas a unha asociación patronal ou, na nosa cidade, as instalacións da casa do Mar, cedidas a unha asociación asistencial.

Estamos diante dunha actitude de eliminación permanente de servizos públicos e de converter a actividade que se estaba a desenvolver desde a Administración nun negocio. Así se fixo co servizo de comedores escolares, despedindo a traballadoras/es eventuais, ofrecendo o negocio a 'catterings' privados e abandonando a poboación escolar de Moeche, As Somozas, Cerdido, Mañón e outros concellos da nasa comarca; negándose a cubrir as demandas dos pais e nais do Colexio Atios de Valdoviño, a pesar de ter un posto de traballo creado e a unha traballadora sen posto asignado, nunha manifestación de malgasto da fondos públicos.

Os traballadores e traballadoras do Terra da Ferrol teñen todos os motivos do mundo para estaren preocupados pola súa estabilidade e o seu futuro laboral, vendo como esta Administración decide trasladar con carácter forzoso ao persoal de cociña saltándose o previsto no Convenio e actuando nos organismos sen ningún ánimo negociador, impoñendo a súa vontade. As consecuencias legais de todo isto veranse no futuro.

O Partido Popular ten atopado a fórmula para desmantelar os servizos públicos, con unha estratexia que desde logo non ten nada de oculta. A paralización de toda a administración autonómica é palpábel, non hai máis que ver o DOG, convertido día a día nun raquítico boletín que volve ter contidos mínimos que non se daban desde os primeiros anos 80, ao principio da autonomía. Logo, cunha hábil campaña a través de algúns medios amigos, minusvalorízase o público e véndese a idea de privatizar. Por último, aparecen empresas xestoras cuxas características e fins podemos ver en sumarios coma o Gürtel.

En Ferrol temos casos escandalosos, como que as persoas que solicitan unha minusvalía teñen que agardar máis de 18 meses para ser atendidas, con só un equipo de valoración para máis de 150.000 persoas (a media son de 6 a 9 meses de espera no resto de Galiza). Hai servizos que non dan chegado á cidade aínda que necesitarían unha dotación mínima. Pola contra, vanse gastar 600,000 € en reformas interiores dun edificio, o da Xunta de Galiza na cidade, que ten menos de dez anos de funcionamento.

Agora cedemos para o negocio privado a atención ás persoas discapacitadas psíquicas. A mentira e o engano preceden tamén a este atropelo. O mesmo Diego Calvo, en entrevista con este sindicato ao principio do seu mandato, asegurábanos que, en todo caso, as privatizacións nunca afectarían a centros e instalacións existentes.

Todo indica que o seguinte obxectivo da especulación vai ser o centro de maiores de Caranza. É necesario, pois, a unidade dentro dos colectivos laborais e ampla difusión entre a cidadanía do que nos estamos a xogar.

Esther Leira Penabad

Secretaria Comarcal de CIG-Administración

09.11.2010

Fonte: Avantar
____________________________

Non á privatización do Centro "Souto de Leixa" - Os servizos públicos non deben ser un negocio

No Centro de Educación Especial "Terra de Ferrol" [*], para persoas con discapacidade intelectual e outras discapacidades asociadas, traballan 117 persoas que atenden a máis de 200 alumn@s. Este centro que depende da Consellería de Educación, en Abril de 2009 divideu-se formalmente en dous, constituíndo-se o Centro de Atención a Persoas con Discapacidade "Souto de Leixa", para atender aos alumn@s maiores de 21 anos, e o CEE "Terra de Ferrol", que vai atender aos menores de 21. Foi en  2005 cando comezaron as obras para dividir o centro e a construción, no mesmo recinto, dun novo edificio que albergaría novas dependencias residenciais,  que posibilitou, en Abril de 2009, a separación física, non orgánica nen xurídica, dos dous centros. Agora a Xunta acordou segregar este último e traspasa-lo a Consellería de Traballo e Benestar, que decide privatizar a súa xestión, anunciado isto en rolda de prensa celebrada o pasado 13 de Outubro deste ano, 15 días antes de saír publicada, no DOG, a resolución.

Un novo centro para asistir a 172 persoas

Nas instalacións do CEE "Terra de Ferrol" seguirán as alumnas e alumnos menores de 21 anos. Máis os alumn@s maiores de 21 anos, pasarán a depender do novo centro -CAPD "Souto de Leixa"- con capacidade para asistir a 172 persoas [25 prazas en réxime residencial para persoas con discapacidade gravemente afectadas, 68 prazas en réxime residencial para persoas con discapacidade con certa autonomía, 47 prazas en centro de día e 32 prazas de centro ocupacional], construído, como xa mencionamos, dentro do recinto do CEE "Terra de Ferrol".

A privatización

Mais a cousa no queda aí, pois a Xunta acordou, na aplicación das políticas neoliberais, privatizar a xestión do novo centro-residencia para atender ás persoas con discapacidade intelectual e outras asociadas que necesiten este servizo público asistencial-ocupacional. Con esta medida a Xunta non só pon en perigo un importante número de postos de traballo, senón que rebaixa a calidade asistencial, tira por terra anos de traballo e ensino, entregando un servizo público moi necesario a unha empresa para que faga negocio coas nosas necesidades asistenciais e protección social ás persoas dependentes.

Un mero negocio

Teoricamente a segregación e a construción dun novo centro residencial-asistencial tería que supoñer unha mellora substancial da capacidade e calidade asistencial, máis coa privatización da xestión, o que tería que ser un avance na protección social dos máis débiles, converte-se nun negocio para unha empresa privada sustentada con diñeiro público, co diñeiro de tod@s nós.

Perdida de postos de traballo

Coa segregación do Centro e a súa privatización, segundo fontes sindicais, o "Terra de Ferrol" só atendería sobre 50 alumn@s, co que a súa plantilla [117 persoas] quedaría moi sobredimensionada, ao pasar a xestión privada, o resto do alumnado maior de 21 anos, que serían atendidos no "Souto de Leixa". Condénase ao paro a máis de 50 persoas e a outras a ser trasladadas despois de máis de 20 ou 30 anos de servizo. E todo isto nunha comarca en declive, cuxa taxa de paro que supera á media estatal.

Uns 6,7 millóns de euros para a xestión privada

Todo isto vai moi acelerado, foi o 13 de Outubro, ainda non hai un mes, cando se soubo da intención da Xunta de privatizar estes servizos, máis sen escoitar nen valorar a opinión das organizacións sociais, sindicais, veciñais,  de familiares de usuari@s e Comité de Empresa. O pasado 29 de Outubro, pasaba á execución do seu acordo, pois o DOG publicaba unha Resolución do 21 de Outubro de 2010, da Secretaría Xeral da Consellería de Traballo e Benestar, pola que se anunciaba a "contratación da xestión, en réxime de concesión, de prazas de atención residencial e atención diúrna para persoas con discapacidade intelectual e/ou outras discapacidades asociadas, no centro de atención á discapacidade Souto de Leixa-Ferrol, polo procedemento aberto e tramitación urxente". O concurso fixa un importe de 6,7 millóns de euros [7.732.061,68 € con IVE] para a xestión privada do centro até o 2013.

As mobilizacións

Unha vez que se soubo da resolución da Xunta de privatizar o novo Centro, as traballadoras e traballadores do CEE "Terra de Ferrol" comezaron as mobilizacións, colocaron varias faixas reivindicativas nas portas do Centro, comezaron a manifestar-se todos os días pola zona da Rotonda de Catabois e Hospital Arquitecto Marcide, solicitaron apoio dos grupos municipais do Concello, desprazáronse a diferentes barrios da Comarca para recabar apoio, e están recollendo sinaturas da cidadanía en apoio as súas reivindicacións e contra a privatización do servizo público. Paralelamente, fixeron chegar información aos grupos parlamentarios e as asembleas da inmensa maioría de Nais e Pais de Usuari@s pronunciaronse contra a privatización.

Peche no Concello de Ferrol

A comunidade educativa e asistencial decidiu comezar hoxe un peche indefinido contra a privatización do "Souto de Leixa", no Pazo Municipal do Concello de Ferrol. Desde Ártabra 21 facemos un chamado á cidadanía para que mostre a súa solidariedade, non só cos trabalhadores e traballadoras, senon como un xeito de mostrar o noso rechazo á privatización dos servizos públicos.

A sospeita

Por outra banda, o escaso prazo de tempo, desde que se publicou no DOG a resolución [29.10.2010] e a data de finalización do prazo [Data e hora 06-11-2010 14:00] para presentar as propostas para facer-se coa concesión, sexa tan escaso, tan só de 8 días, no medio dunha ponte de "defuntos" -Sábado 30, Domingo 31 e Luns 1 de Novembro, fai pensar que este asunto está máis que masticado e que o concurso é un mero trámite e que, na práctica, a concesión xa está adxudicada.

Os servizos públicos non deben ser un negocio. Desde o movimento social, sindical e veciñal, debemos esixir uns servizos públicos de calidade, en contra das privatizacións e en defensa do emprego público.

Desde Ártabra 21 queremos amosar o noso apoio e solidariedade a esta loita.

Enlaces de interese:

Aqui pode-se acceder ao DOG referenciado, ás condicións administrativas e tecnicas esixidas, aos prazos e aos modelos de solicitudes:

http://www.contratosdegalicia.es/resultado.jsp?N=15302

Aquí pode-se acceder ao sitio web da CIG-Administración Autonómica con abundante documentación:

http://autonomica.cigadmon.org/sitio2009/

[*] O Centro de Educación Especial "Terra de Ferrol" é o antigo "Carmen Polo" que levaba o nome da muller do ditador e xenocida Francisco Franco, que cambiou de nome en aplicación da Lei da Memoria Histórica. O Centro, foi inaugurado en 1971 e está situado en San Pedro de Leixa, na Rúa Irmandade de Donantes Ferrol Terra, no concello de Ferrol, nas inmediacións do Hospital Arquitecto Marcide.
_____________________