Unha vez máis a Horta Comunitaria de Caranza en perigo. A presidenta da asociación veciñal volve á carga, na súa teima obsesiva contra as hortas urbanas do barrio - Mesmo o Alcalde, Jorge Suárez e Ferrol en Común, votaron con Ciudadanos e o Partido Popular, facendo gala dunha política clientelar, para contentar a Mapi Rodríguez Venancio, na súa cruzada particular contra toda iniciativa que no controla.

O luns 30 de xullo de 2018, tiña lugar en sesión extraordinaria urxente a continuación do Pleno de fin de mes, que se estivo celebrando o xoves da pasada semana. Foron cinco horas de Pleno e entre os puntos que quedaban por tratar, estaba unha moción do grupo municipal de Ciudadanos que presentaba a concelleira Ana Rodríguez Masafret e que apoiaba a presidenta da "Asociación de Veciños de Caranza", Mapi Rodríguez Venancio, que ten unha teima desmesurada contra a horta comunitaria de Caranza. Horta que foi creada hai xa uns 7 anos nuns terreos da Autoridade Portuaria, por ser parte dun recheo da enseada que baña a ribeira leste do barrio, sobre uns 4.800 metros cadrados que están cultivando, na actualidade, sobre unhas 35 persoas.

Mesmo a presidenta da asociación veciñal, Mapi R. Venancio, chega a mentir no Pleno na súa intervención, vítima da súa obsesión, falando de problema, chabolismo e que lle constaba de que había persoas que vivían nas hortas.

Non é a primeira vez que a presidenta da asociación veciñal quere desfacer-se das hortas, xa hai uns anos que o intentara, mais daquela brotara, case de inmediato, a solidariedade da xente e de asociacións do barrio como López Bouza, Fuco Buxán, A Revolta, as ANPAs dos centros públicos, a da asociación de mulleres e a de operadores do Mercado Municipal. Con esta solidariedade e cos medios que expuxeron o que estaban a facer nas hortas, conseguiu-se paralizar a mala intención de Mapi R. Venancio.

Agora coa desculpa da moción din que pretende "poñer a disposición dos veciños un horto urbano dentro do Parque do Montón". Mapi R. Venancio, pretende destruír as actuais hortas urbanas de Caranza, coa desculpa de abrir uns hortos no Montón. Non só o descoñecemento da realidade de cada cousa leva á concelleira Masafret a propoñer tal cousa, senón a manipulación de Mapi é a que, de xeito oportunista, pretende con esta moción eliminar a iniciativa das hortas de Caranza. As instalacións municipais do Montón, albergan un parque botánico con decenas de especies catalogadas (e máis de 1.200 árbores), unha zona de descanso (con mesas e bancos), unha edificación e uns poucos bancais para hortos didácticos (para cursos e visitas escolares), nunca colleiteiros, como son os das actuais hortas de Caranza. Peor foi a actitude dos grupos políticos municipais que apoiaron o terceiro punto da moción, PP, Ciudadanos e o do Alcalde Jorge Suárez, Ferrol en Común, sen ter en conta a opinión das persoas que na actualidade están traballando nas hortas urbanas de Caranza. Desastrosa actuación deste goberno municipal que clamaban pola participación cidadá antes de ser goberno municipal e mesmo que levan no seu programa o apoio a estas iniciativas que se dan en Caranza e noutros barrios da cidade.

No parque botánico do Montón, na zona do mesmo nome, onde se chegaron a investir máis de 700 mil euros de diñeiro público, hai un abandono absoluto por parte do goberno municipal. Un parque onde non hai nin vixilancia, nin mantemento. No que roubaron as portas, cun absoluto deterioro do recinto de protección, onde prolifera un vertedoiro incontrolado e o deterioro da edificación rehabilitada é patente. Unha edificación obxecto de vandalismo, onde desapareceron as cañeiras, a instalación eléctrica, as portas e as contras e xanelas. Tal é o abandono que uns sen teito, fixeron da edificación a súa vivenda. Esta é a terceira moción que o Concello aproba para "recuperar" de novo O Montón. Unha nova función de hipocrisía. Para tapar a súa incapacidade e mal goberno, queren utilizar, de chibo expiatorio, ás persoas que desde hai tempo fixeron da explanada improdutiva da ribeira de Caranza, unha zona produtiva, de agricultura colleiteira, de lecer e didáctica, de aprendizaxe de cultivos, onde se plantaron máis de 40 arbustos e árbores froiteiras, da creación de sistemas de rego e recollida de auga da chuvia, cría de aves de curral e elaboración de compost a través de residuos orgánicos, e un verdadeiro recreo para moitas persoas que gozan vendo traballar e contribuíndo coas súas vivencias pasadas na aldea... As hortas urbanas de Caranza, son un exemplo de convivencia en relación coa natureza e de obtención de produtos do campo de xeito ecolóxico para o autoconsumo...

Pasado o verán de 2015, o Alcalde Jorge Suárez, recen estreado como tal, visitou as hortas de Caranza e fixo unha reunión coas persoas que nelas traballaban, comprometendo-se a súa regularización e dotar de auga ás mesmas. Cousa que non cumpriu até a data, até tal punto que despois se lle volveu requirir que cumprira os seus compromisos e mesmo desprazou-se unha comisión para falar co Concelleiro delegado Luís Victoria, para solictar-lle un punto de auga demanda que non se atendeu. Ao final desta primavera e principios de verán, as comunitarias recolleron máis de 1.500 sinaturas para solicitar unha fonte no paseo de Caranza e que esta puidera dar servizo ás hortas, demanda que segue sen  resposta. Mais agora a resposta do goberno municipal, xa se ve cal é, actuar praticando unha política clientelar, favorecendo as obsesión dunha presidenta que teima con desfacer-se de todo o que non controla no barrio, nada se pode mover, nin iniciativa que saia adiante, sen a súa aprobación e consentimento, unha verdadeira actuación negativa para a participación e a felicidade das persoas que conseguen tirar uns poucos produtos da terra, sen facer dano a ninguén.

As hortas de Caranza, son un paso moi importante na autoxestión veciñal, o paso que ten que dar o goberno municipal é cumprir as súas promesas, axudar ás comuneiras e dotar de auga ás hortas, consensuar un regulamento coas persoas usuarias e facilitar máis espazos, mesmo no Bertón, para quen quixer cultivar en zona urbana.

---
O vídeo que segue é un detalle do Pleno, onde se tratou a moción citada, punto que durou case unha hora, os primeiros minutos son a intervención da presidenta da asociación veciñal Mapi R. Venancio.


https://youtu.be/DL-9unxAsMU

Manifesto da Horta Comunitaria de Caranza: Para que en Ferrol non falte o pan. | Acceder/Baixar. Este manifesto foi entregado por rexistro no Concello de Ferrol, logo de que o Alcalde visitara a Horta en Outubro de 2015.

Facebook da Horta Comunitaria de Caranza.

---

Colectivo Ártabra 21
artabra21@gmail.com
https://artabra21.blogspot.com/
---

Acto Terceiro Aniversario que celebra Ferrol en Común: 'Tres Anos de Municipalismo', no Centro Cívico de Canido, o sábado 2 de xuño, desde as 5 da tarde, coa participación de Sonia Mauriz, Modesto Renda, María Chao, María Rozas e os alcaldes d'A Coruña e Ferrol Xulio Ferreiro e Jorge Suárez

Acto Terceiro Aniversario: 'Tres Anos de Municipalismo' que celebra Ferrol en Común, no Centro Cívico de Canido, o sábado 2 de xuño, desde as  5 da tarde, coa participación de Sonia Mauriz (Presentadora do acto), Modesto Renda (Vilalba Aberta), María Chao (Xunt@s por As Pontes), María Rozas (Compostela Aberta), Xulio Ferreiro (Marea Atlántica) e Jorge Suárez  (Ferrol en Común).

Centro Cívico de Canido
Rúa Poeta Pérez Parallé, 15401 Ferrol
Sábado, 2 de xuño, de 20189, ás 17:00hs

Evento en facebook.

Páxina de Ferrol en Común no Facebook |
ferrolencomun@gmail.com |
https://ferrolencomun.gal/

______________

Unha vez aprobados inicialamente os orzamentos xerais de Ferrol e o cadro de persoal para 2018, comeza un período de exposición pública e alegacións

Os acordos entre os grupos municipais da bancada da esquerda, sobre os investimentos demandados pola veciñanza, sobre Emafesa e a taxa, facilitaron que Ferrol tivera os seus orzamentos, para posibilitar o funcionamento regular do Concello, os investimentos pendentes e consolidar un cadro de persoal que aínda que quedou escaso había que amarrar.

Agora queda un período de exposición pública e alegacións, onde aínda pode haber sorpresas, pois o goberno de Jorge Suárez é cativo e ten por costume non atar todos os cabos e o tempo é de tempestade.

Por outra banda as incorporacións, con tan pouco tempo, das contribucións dos grupos do BNG e do PSOE que implicou un endebedamento a maiores de case 2 millóns de euros máis, poden traer-lle complicacións ao grupo de goberno. E xa non digamos o de retirar a capacidade de aprobar subvencións directas para Emafesa, sen pasar polo Pleno, para equilibra contas.

Logo está o de pactar unha taxa "xusta", cando estamos tan só a uns días da celebración do último Consello de Administración da empresa mixta de augas, cuxo contido do tratado e aprobado, está oculto. Unha empresa mixta que ten sen aprobar as súas contas desde 2014. Unha empresa mixta que nos enganou por varias veces (Trialometanos, depuración,...), que emite miles de facturas estimativas avultadas todos os meses, vixiada de perto pola Plataforma na Defensa dos Servizos Públicos, pola Remunicipalización que reclama a saída da parte privada Socamex, para facer de Emafesa unha empresa 100% pública.

Moito nos tememos que a Socamex que lle trae sen coidado ou crecente endebedamento de Emafesa e o seu millonario pasivo acumulado de máis de 8 millóns de euros, non se vai quedar de brazos cruzados e presentará alegacións a estes orzamentos, para aumentar no seu haber nunha suposta demanda que ao mellor está preparando contra os membros do Consello de Administración (anteriores e os de agora) que o son en representación da parte pública e subsidiariamente ao Concello de Ferrol. Socamex que é do mesmo grupo que a empresa de recollida de lixo e limpeza viaria (Urbaser - Firion Investments SL -
Ying Zhan Investment Hk Limited) que leva desde finais de 2014, "facendo o servizo" sen contrato, o que ven a indicar que o futuro das dúas está moi ligado. Unha grande transnacional que só lle importa a conta de resultados e a súa marca e que para eles Ferrol só é un punto nun mapa, un punto a eliminar.

Os pasos despois desta aprobación inicial son os que dispón o Artigo 169. "Publicidade, aprobación definitiva e entrada en vigor", da Lei Reguladora das Facendas Locais (Real Decreto Legislativo 2/2004, de 5 de marzo, polo que se aproba o texto refundido da mesma) que di  "Aprobado inicialmente o orzamento xeral, expoñerase ao público, previo anuncio no boletín oficial da provincia ..., por 15 días, durante os cales os interesados poderán examinalos e presentar reclamacións ante o Pleno. O orzamento considerarase definitivamente aprobado si durante o citado prazo non se presentaron reclamacións; en caso contrario, o Pleno dispoñerá dun prazo dun mes para resolvelas". Logo publicara-se o orzamento xeral, definitivamente aprobado, que será inserido no boletín oficial da provincia, resumido por capítulos de cada un dos orzamentos que o integran e entrará en vigor. Os orzamentos terán que ser de acceso público, polo que terán que estar a disposición de quen quixer na web do Concello.
_____________

41 persoas, activistas achegadas á Plataforma, instan ao Alcalde a que faga unha rectificación pública, por utilizar a descualificación persoal e levar ao termo privado, o que é o exercicio da acción pública, a participación cidadá e veciñal, da sociedade civil, no exercicio da defensa dos seus dereitos e intereses, como persoas, veciñanza e cidadáns

Cando o pasado 19 de marzo, presentamos unha denuncia no Xulgado de Ferrol, contra o Alcalde e o responsábel da xestión de Emafesa, a reacción do Alcalde arroupado por membros do seu goberno municipal, estiveron infestadas de descualificacións persoais irracionais e inxustas cara ás persoas que forman parte desta Plataforma e a representan colexiadamente. No seu momento esta Plataforma acordou emitir unha "Breve nota de Urxencia", onde cualificabamos estas palabras de "intentos de descualificacións persoais lamentábeis e inxustas". Sen querer entrar, mais neste asunto que podería desviar o importante do circunstancial, mais un número importante e maioritario da Plataforma, pensaba que o asunto non podía quedar así que o Alcalde tiña que desculpar-se, polo que se promoveu unha carta dirixida a Jorge Suárez instando-lle a unha rectificación pública das súas palabras. Son 41 persoas as que asinan o escrito que transcribimos que se entregou polo rexistro do Concello de Ferrol, o pasado venres 20 de abril.

As persoas que asinan a carta son: Ramón Castiñeira, Manuel Vázquez, Inácio Martínez, Lucia Vizoso, Rafael Pillado, Iolanda Teixeiro, Olga Fernández, José Carballo, Manuel Dopico, Alejandro Toimil, Carmen Serantes, Fernando Docampo, Gloria Cruz, Pablo P. Serantes, Esther Malde, Manuel Afonso, Francisco Montero, Manuel Bellón, Angeles Rivera, Esperanza Vidal, Helga Méndez, Manuela López, Belén Aneiros, José Vilela, Chelo Carballal, Xosé María Fontao, Anxo Fernandez, Amadeo Varela, Luís Gómez, Victor L. Casal, Xoán F. Lópes, José Martín, Victor G. Novas, Susana Alaniz, Manuela Rodríguez, Nicasio Malde, Lupe Ces, Alexandre Carrodeguas, Bernardo Rego, Pablo Portero e Fernando Ramos.

AO ALCALDE PRESIDENTE DO CONCELLO DE FERROL

As persoas abaixo asinantes en apoio da Plataforma na Defensa dos Servizos Públicos, pola Remunicipalización, con enderezo a efectos de notificación en Ferrol (15406), na rúa Armada Española, nº32 baixo, e correo-e: remunicipalizacion.plataforma@gmail.com, ante esa alcaldía expoñen:

Que o pasado 19 de marzo, esta Plataforma presentou unha denuncia no Xulgado de Ferrol,[1] diante de todas as irregularidades rexistradas na xestión do sistema de saneamento e depuración de augas residuais por parte de Emafesa e desa Alcaldía, para que no caso de corresponder, se diriman as responsabilidades que houber lugar, asín como potenciais actos fraudulentos, enganos e inaccións. Este camiño de apelar á vía da denuncia xudicial, tomabámolo despois de ver como unha tras outra tiñamos pechadas as portas do diálogo, a falta de resposta aos innumerábeis escritos e peticións de documentación dirixidos a esa Alcaldía, os recursos non contestados, mobilizacións... 

Que esa Alcaldía coñece que os feitos que se describen no texto da denuncia son certos e, en repetidas ocasións, vostede mesmo así os comunicou á opinión pública ou en plenos da corporación municipal. Na nosa denuncia non hai ningún ataque ao honor, nin falsidades, calquera que a lea poderá-se dar conta de que o que se transluce nela é a defensa dos intereses veciñais e medio ambientais.

Que a reacción desa Alcaldía, e do seu goberno municipal, transmitida en rolda de prensa e a través das redes sociais, ao coñecer a nosa denuncia xudicial, foi pouco afortunada e impropia dun representante público polas descualificacións persoais irracionais e inxustas cara ás  persoas que forman parte desta Plataforma.

Polo anterior, instamos-lle a esa Alcaldía a que faga unha rectificación pública, por utilizar a descualificación persoal e levar ao termo privado, o que é o exercicio da acción pública, a participación cidadá e veciñal, da sociedade civil, no exercicio da defensa dos seus dereitos e intereses, como persoas, veciñanza e cidadáns. Non podemos deixar de manifestar o noso malestar polas actitudes dun representante público, que utiliza a difamación e o menoscabo da integridade moral e persoal de quen conformamos os movementos sociais e veciñais, independentemente de quen estea no goberno municipal.

Polo que instamos a esa Alcaldía, A que faga unha rectificación pública das súas palabras, no momento máis oportuno que considere.

En Ferrol, a 17 de abril, de 2018

Asinado.-

[1] Con posterioridade o día 23 un escrito de correccións e o 27 do mesmo mes de marzo, o texto refundido da denuncia que recae no Xulgado de Instrución nº2  co procedemento PR 0000759/18.
______________

Engano, fracaso e fraude, así calificamos desde a Plataforma na Defensados Servizos Públicos, pola Remunicipalización, o acordo do Alcalde Jorge Suárez e o seu goberno municipal, de propoñer en Comisión e Pleno a recuperación da Taxa de Depuración do Partido Popular - Diante desta situación a Plataforma acordou esixir a dimisión do rexidor municipal, se continua adiante con esa proposta

Concentración contra a Taxa do Partido Popular
17.02.2015 - Foto deRaúl Salgado en Ferrol 360

Rolda de prensa, en Ferrol, dos alcaldes "rebeldes" sobre En Marea e as Eleccións Autonómicas previstas para Outubro de 2016 - Vídeo completo

Rolda de prensa, en Ferrol, dos alcaldes "rebeldes" sobre En Marea e as Eleccións Autonómicas previstas para Outubro de 2016.

Xulio Ferreiro, Martiño Noriega e o anfitrión Jorge Suárez, realizaron unha Rolda de Prensa no Ateneo Ferrolán, onte martes 5 de Xullo, ás 5 da tarde. A rolda de prensa, foi convocada sen temario previo, tanto aos medios, como a simpatizantes e achegados de Ferrol en Común. Era, o que se di, unha rolda de prensa "sorpresa", mais intuía-se, que senón..., que se ía falar sobre as Eleccións Autonómicas, algo sobre o que se veñen pronunciado ultimamente.

Antes da hora xa había unha grande expectación cun enorme despregue de medios de comunicación... fotógrafos, cámaras, xornalistas, achegados de Ferrol en Común e outras persoas.

Chegaron os protagonistas con pouca puntualidade como manda o protocolo de quen se fai esperar.

Despois de 1.000 fotos, sesión fotográfica de máis de cinco minutos, desde que apareceron pola rúa Madalena, acompañados do concelleiro de participación cidadán e tenente alcalde do concello de Ferrol, Álvaro Montes, até que comezou de feito a rolda de prensa.

Comeza a rolda de prensa, lendo un comunicado de cinco páxinas que previamente foi repartido aos medios presentes. A lectura do comunicado que durou sobre uns 15 minutos, foi feita a partes iguais entre os tres rexedores, logo houbo unha quenda de poucas preguntas, ... mais que non obtiveron as respostas concretas, só: "unidade", "consenso", "que eles non se postulan para candidato á presidencia da Xunta", "proceso" e "depende". E iso si moitas risas e complicidade coa maioría das persoas que representaban aos medios alí convocados.

Mais, para unha mellor e obxectiva información, aquí publicamos a rolda de prensa na súa integridade.


https://youtu.be/1d3D59kCAF4

Edita: Colectivo Ártabra 21
artabra21@gmail.com
http://artabra21.blogspot.com.es/
______