Amosando publicacións coa etiqueta Alternativa Galega de Esquerda. Amosar todas as publicacións
Amosando publicacións coa etiqueta Alternativa Galega de Esquerda. Amosar todas as publicacións

venres, abril 17, 2015

Presentada unha batería de iniciativas no Parlamento Galego, a través da Alternativa Galega de Esquerda (AGE), contrarias á ampliación de Reganosa


O Comité Cidadán de Emerxencia para a Ría de Ferrol, informa que foron presentada unha batería de iniciativas no Parlamento Galego contrarias á ampliación de Reganosa a través da Alternativa Galega de Esquerda (AGE).


Polo referido, o grupo parlamentar da AGE presenta a seguinte interpelación:
- Apoia o goberno galego a construción dun novo tanque e a ampliación das capacidades gasísticas da planta de gas de Reganosa malia ser unha instalación ilegal, perigosa e innecesaria?

- Como apoia a Xunta unha ampliación da capacidade de regasificación cando a demanda de gas está a caer e a ráteo de utilización da planta de Reganosa cae cada ano?

- Que previsión de investimento manexa a Xunta para a totalidade do proxecto de amplaición da planta de gas radicada no interior da ría de Ferrol?

- Que previsión de axudas públicas tería ese proxecto de ampliación das capacidades de regasificación nas diversas formas de axudas, exencións e bonificacións?

- Non contempla a Xunta realizar os trámites oportunos para conquerir o deamantelamento da planta de gas de Reganosa no interior da ría de Ferrol?
Polo referido, o grupo parlamentar da AGE presenta a seguinte proposición non de lei:
- O Parlamento Galego insta á Xunta a que denegue os permisos oportunos para ampliar as capacidades de almacenamento e regasificación da planta de gas de Reganosa.

- O Parlamento Galego insta ao goberno da Xunta a realizar as accións oportunas para desmantelar a planta de gas de Reganosa do seu emprazamento no interior da ría de Ferrol.

Comité Cidadán de Emerxencia: Iniciativa contraria á ampliación de Reganosa

Engadimos documento da iniciativa do Grupo AGE no Parlamento de Galicia, contra a ampliación da Planta de Gas de Reganosa (e restantes documentos ampliatorios desta iniciativa, para maior información).

Documentos

Achegamos o enlace, aos Arquivos Ártabros, para Acceder/Baixar, cinco documentos -en formato pdf- coas iniciativas de AGE presentadas no rexistro do Parlamento o 16 de Abril de 2015:
Prescrita Reganosa C VI 090036342, 3 páxinas. | Pregunta para a súa resposta escrita, relativa a pretensión de ampliar as instalacións da planta de gas de Reganosa. | Acceder/Baixar.

PC Reganosa C VI 090036343, 3 páxinas. | Pregunta para a súa resposta oral en Comisión, relativa a pretensión de ampliar as instalacións da planta de gas de Reganosa. | Acceder/Baixar.

PNC Reganosa C VI 090036341, 3 páxinas. | Proposición non de lei para o seu debate na Comisión VI, relativa a pretensión de ampliar as instalacións da planta de gas de Reganosa (Para o seu debate en Comisión). | Acceder/Baixar.

PNC Reganosa C VI 090036340, 3 páxinas. | Proposición non de lei para o seu debate na Comisión VI, relativa a pretensión de ampliar as instalacións da planta de gas de Reganosa (Para o seu debate no Pleno). | Acceder/Baixar.

INT Reganosa C VI 090036339, 3 páxinas | Interpelación, relativa a pretensión de ampliar as instalacións da planta de gas de Reganosa. | Acceder/Baixar.

Comité Cidadán de Emerxencia para a Ría de Ferrol
comitecidadan@gmail.com
www.comitecidadan.org
@ComitCEmerxenc

O COMITÉ CIDADÁN DE EMERXENCIA PARA A RÍA DE FERROL, TAMÉN NECESITA NESTES MOMENTOS AXUDA ECONÓMICA, PARA CONTINUAR COS PROCESOS XUDICIAIS E ADMINISTRATIVOS ABERTOS: COLABORA.

Información baseada na enviada polo:

Comité Cidadán de Emerxencia
-comitecidadan@gmail.com-
16 de abril de 2015 20:36
_______________

venres, decembro 12, 2014

Lidia Senra denuncia que Alcoa está utilizando á plantilla como "refén" na negociación


Alcoa, non podemos consentir nin un só despido. | A eurodeputada Lídia Senra cualifica de "intolerábel" a "chantaxe" que a empresa está facendo á sociedade. | Denuncia que Alcoa está utilizando á plantilla como "refén" na negociación | A eurodeputada de Alternativa Galega de Esquerda en Europa (AGEe), Lídia Senra considera que a chantaxe que estes días estamos vivindo na Galiza e noutras partes do Estado por parte da multinacional Alcoa "pon de manifesto varios aspectos interesantes aos que debemos prestar atención".

En primeiro lugar, sinala, "demostra que as políticas de privatización só serven para traspasar empresas e recursos públicos ao gran Capital". Ese é o caso precisamente desta multinacional, que conseguiu facerse ca concesión no ano 1998 a través do  proceso de privatización de Inespal.

En segundo termo, a situación de Alcoa revela as incongruencias do recorrente mito da eficiencia, habitualmente empregado para argumentar as decisións de privatizar en base á suposta maior eficiencia da empresa privada en comparación ca xestión pública. No caso de Alcoa, observamos que, a conta do erario publico, esta empresa leva anos gastando entre o 40 e o 50% da enerxía que se consome na Galiza, pero pagándoa a un terzo do prezo de calquera usuaria normal. Polo tanto, "se Alcoa pagase a electricidade ao prezo normal perdería competitividade", sinala Senra, "é mentira que sexan máis eficientes, o que realmente sucede é que a súa eficiencia baséase en seguir sacando das arcas publicas, é dicir, de todas e todos nós".

A eurodeputada de AGEe veo claro, "estamos diante dunha nova chantaxe na que, nun momento de crise como a que estamos a vivir, Alcoa toma aos traballadores e traballadoras como reféns para chantaxear á sociedade, para que consintamos e xustifiquemos a costa de todas e todos nós o abastecemento de enerxía a prezos de ganga". De feito, co seu posicionamento Alcoa busca facernos responsábeis da decisión de pechar para irse a outros lugares; "unha decisión que con toda seguridade ten xa tomado para instalarse onde os salarios, as condicións laborais e os custos sexan moito menores que aquí", advertiu. Esta é a clave na que traballa Alcoa, o seu problema non son as perdas, senón querer gañar máis.

Dende AGEe valoramos que, a través deste conflito que vén de crear a empresa, Alcoa busca engordar os beneficios do accionariado e do gran Capital, sen importarlle os milleiros de familias que este inverno non poderán nin prender a calefacción porque os intereses dese mesmo Capital deixaronas sen traballo, sen fogar e, no mellor dos casos, baixo un teito prestado. Aliás, abondou Senra, "tampouco lle  importa a Alcoa os milleiros de PEMES e explotacións agrarias asfixiadas, entre outros motivos, debido ao custo enerxético imposto á súa actividade".

A Alternativa Galega de Esquerda, considera que a enerxía é un ben común, imprescindíbel para a vida, ao que toda a poboación e as empresas deben ter garantido o aceso. Pero para que se cumpra este axioma humano fundamental, "cumpriría que tanto os gobernos como a Unión Europea, en base ás súas competencias, non consintan nin unha soa chantaxe por parte das grandes empresas, nin coa enerxía, nin coa fiscalidade, nin con ningunha outra cousa", sentenciou.

Por iso dende AGEe demandamos a retirada inmediata do expediente de extinción de Alcoa, garantido o mantemento de todos os postos de traballo. E, no caso de que este expediente seguira adiante, "tanto a Xunta como o goberno do Estado deben esixir a devolución de todos os beneficios e diñeiro público que percibiu esta empresa,  e empregalo en xerar postos de traballo para a xente que ten empregada na actualidade".

Por outra banda, dende a perspectiva da soberanía enerxética dos pobos, Senra demandou "elaborar políticas industriais e de desenvolmento con criterios de redución de consumo e de eficiencia enerxética", así como o desenvolvemento de enerxías renovábeis "con proxectos que non ameacen o medio nin outras actividades", garantindo por exemplo que estas políticas enerxéticas "non se fagan a costa de reducir a base territorial, imprescindíbel para garantir a Soberanía Alimentar dos nosos pobos".

Por último, a eurodeputada de AGEe, Lídia Senra, quere trasladar ás traballadoras e traballadores de Alcoa a súa máis fonda "solidariedade e apoio" nesta loita.

[*] Lidia Senra, eurodiputada, da Alternativa Galega de Esquerda en Europa, no Grupo Confederal da Esquerda Unitária Europeia/Esquerda Nórdica Verde.

Máis información:
Lídia Senra, eurodeputada de Alternativa Galega de Esquerda en Europa-GUE/NGL |Tlf: 609 845 861, lidia.senra@europarl.europa.eu |
_________________

mércores, outubro 29, 2014

Antón Sánchez no Parlamento Galego: "O PP é un partido estruturalmente corrupto" - Vídeo


O deputado de AGE, Antón Sánchez, destacou no pleno do Parlamento de Galicia que os continuos casos de corrupción que se están a coñecer e que implican a altos cargos do Partido Popular a todos os niveis, demostran que estamos a falar "non de casos illados senón dun partido estruturalmente corrupto". A reacción da presidenta do Parlamento, Pilar Rojo, como non podía ser outra, chamar á orde ao deputado de AGE mentres os deputados e deputadas do PP prefiren abandonar o hemiciclo con rostro de indignación. Seica hai verdades que non gusta escoitar.


http://youtu.be/0PhJHhVlXpw

Publicado no canle Hai Alternativa | 28.10.2014

http://alternativagalega.com/
______________________

mércores, setembro 17, 2014

A Alternativa Galega de Esquerda reclama á Xunta que actúe para protexer os fondos da biblioteca e da hemeroteca do Ateneo Ferrolán


O Concello de Ferrol xoga a asfixiar a histórica agrupación cultural malia que os materias que atesoura pertence á rede de bibliotecas de Galicia e contan cunha figura especial de salvagarda


As obras de mellora do edificio cedido polo Concello de Ferrol ao Ateneo da cidade, realizadas entre 2010 e finais de 2012, desembocaron nun ataque do Partido Popular á unha das institucións culturais senlleiras da cidade, por extensión, do país. Os seus importantes fondos de hemeroteca e biblioteca -con coleccións de máis de 450 cabeceiras e 7.500 volumes, respectivamente- atópanse en mans da empresa Mudanzas Félix, que reclama 39.000 euros pola súa almacenaxe durante o tempo que durou a reforma. O concello, gobernado polo PP e cun alcalde mergullado na Operación Pokemon, négase a pagalos, aínda que adquirira o compromiso previo de facelo. “O Ateneo, fundado en 1879, sempre tivo problemas en épocas de ditaduras e de réximes autoritarios. Agora é o PP de Ferrol, de xeito sibilino, que ataca a institución”, expuxo esta mañá o seu presidente, Eliseo Fernández, en rolda de prensa no Parlamento de Galicia coa viceportavoz de Alternativa Galega de Esquerda Yolanda Díaz e o deputado Xabier Ron.

Precisamente o grupo parlamentario de Díaz e Ron esixiu á Xunta que asine un convenio de colaboración co Ateneo que “garanta as condicións materiais necesarias para que os fondos da biblioteca hemeroteca teñan condicións óptimas de preservación e consulta nas dependencias” da agrupación. Mañá, na comisión parlamentaria de cultura, Alternativa Galega de Esquerda defenderá unha proposición non de lei (pnl, no documento anexo) neste sentido. ”Pedimos este convenio coa Xunta”, explicou Yolanda Díaz, “para que sufrague o gasto do almacén e os materiais do Ateneo volvan ao seu lugar. Se o PP non o acepta, será unha actitude delitiva, e non só en termos metafóricos”. A biblioteca do Ateneo de Ferrol está declarada polo Goberno autónomo como de “titularidade privada de especial interese” e dende 1996 intégrase na Rede de Bibliotecas de Galicia. “Todo este asunto”, denunciou o parlamentario Xabier Ron, “tamén amosa a incompetencia do responsábel de Cultura na Xunta, o señor Anxo Lorenzo, que a preguntas dos xornalistas respondeu que non coñecía o tema”.

Eliseo Fernández ofreceu datos da efectiva mestura de ineficacia e mala vontade do Partido Popular das administracións local e nacional. “Os 39.000 euros que reclama Mudanzas Félix serían menos se o concello cumprise o seu compromiso e pagase nada máis rematar as obras no Ateneo, a comezos de 2013”, lembrou. A reforma do edificio, situado no histórico barrio da Ilustración, a Magdalena, custou un millón de euros así que, engadiu Fernández, “non se entende que o concello non pague agora os 39.000 euros que o Ateneo non ten”. O alcalde ferrolán, Jose Manuel Rey Varela, nin sequera recibiu á dirección do Ateneo, malia que esta llo solicitou en repetidas ocasións, xa dende antes de que estourase o problema actual. “O que vemos é como o PP aposta por aparatosas infraestruturas culturais baleiras”, concluíu o presidente do Ateneo, o historiador Eliseo Fernández, antes de remachar: “Nós pedimos sensibilidade, comprensión e xustiza”.

Antes da chegada do Partido Popular á alcaldía ferrolá, un convenio municipal contribuía ao funcionamento do Ateneo ferrolán. Ese convenio desapareceu. Unha manifestación cidadá percorreu onte as rúas de Ferrol en apoio á histórica agrupación cultural.

Santiago de Compostela, 17 de setembro de 2014

Foto: o historiador e presidente do Ateneo Ferrolán Eliseo Fernández, a viceportavoz de AGE Yolanda Díaz e o deputado Xabier Ron.

ALTERNATIVA GALEGA DE ESQUERDA
Gabinete de comunicación do grupo parlamentario
Tania Porta e Daniel Salgado
606 675 524 / 619007734
tania.porta@parlamentodegalicia.es
daniel.salgado.garcia@parlamentodegalicia.es
prensa@alternativagalega.com
twitter.com/alternativagz
http://www.facebook.com/AlternativaGalega
http://www.youtube.com/user/HaiAlternativa?feature=mhee

Enviado por:
Paula
-pmeizoso@gmail.com-
17 de setembro de 2014 13:32

_______________

martes, maio 06, 2014

O programa Electoral de AGE en Europa, ... Por Manuel Dios Diz

Por Manuel Dios Diz [*]
06.05.2014


Ben sei que o PP e os seus altofalantes non paran, nin pararán, de salientar que AGE, Alternativa Galega de Esquerda, parte da Esquerda Plural e da European Left, é unha opción política antisistema (non hai mellor louvanza hoxe), e moi experta en romper o boato parlamentario. Ocultarán, como veñen facendo, todo o traballo propositivo e de control, mesmo nunha cámara asfixiada pola maioría absoluta conservadora do PP.

Dirán o mesmo en campaña electoral. AGE en Europa non ten programa nin futuro, está dividida. Sen entrar nas pinzas e nos ataques, máis ou menos sutís, contra de Lidia Senra, a nosa candidata, que algúns medios e moitos trolls xa empezaron con entusiasmo, aínda que aburran, sería razoable que botaramos unha ollada ós documentos de cada quen. E AGE en Europa presenta un Programa Político e Social para as Eleccións Europeas de case que noventa páxinas que non pode ser todo retórica e ideoloxía baldeira. Digo eu.

Como tiven a honra de colaborar -cooperativamente- na súa elaboración, voume permitir destacar algúns aspectos que non sempre aparecen nos mitins, e sobre os que considero, desde a miña humilde perspectiva, que teñen moito interese.

Compre empezar por desmontar mitos. O acordo programático foi total entre Anova, Esquerda Unida e o Espazo Ecosocialista Galego. O Programa Político e Social agrupouse en sete grandes bloques: As razóns da política de AGE en Europa; A fronte de esquerda transformadora como alternativa; Democracia e participación; Economía e emprego; Medio ambiente e ecoloxía social. Soberanía Alimentaria e política agraria común; A Europa da Cidadanía e dos dereitos; Cultura, lingua e comunicación e, por último, A Europa da paz, da solidariedade e do internacionalismo.

Ademais de apelar á Europa dos Pobos como gran obxectivo, fixemos moito fincapé tamén na Europa da Cidadanía Democrática e das persoas, da sociedade civil, da xente do común, para facer fronte ás políticas austericidas da Troika, reclamando iniciativas como a Renda Básica Universal, a imposición sobre as transaccións financeiras internacionais (Taxa Tobin) e sobre as grandes fortunas, ou unha Axencia Europea de Rating, xunto cun Plan de Rescate das persoas e da cidadanía excluída, roubada ou desafiuzada e un Plan de Medidas Urxentes en I+D+i que facilite o regreso das mozas e mozos a Galicia e de apoio á investigación complementado con políticas activas contra da pobreza, a desigualdade e a exclusión, e un Plan Europeo de apoio á dependencia e a converxencia salarial europea.

Na profundización da democracia, democratizar a democracia que diría Boaventura de Sousa Santos, moi na liña das medidas de radicalidade democrática que compartimos, fanse propostas sobre referendos e iniciativas lexislativas populares en Europa, orzamentos participativos, consultas imprescindibles para tratados que afecten ás constitucións dos Estados, particularmente sobre intervencións militares, tratados de libre comercio, como o que se está a negociar secretamente cos EE.UU, protección ambiental e social, entre outros. Neste apartado, por exemplo, asúmense as medidas que as organizacións da sociedade civil europea, agrupadas na Alianza EYCA, fan sobre cidadanía democrática.

Quixera facer mención tamén á defensa dunha Europa Laica, o apoio á Carta Europea pola laicidade, a supresión do Concordato co Vaticano ou a materia de Educación para a Cidadanía e os Dereitos Humanos na que ocuparía un lugar relevante a educación para a igualdade entre homes e mulleres ou a prevención da violencia de xénero, aspectos que tamén teñen un lugar destacado no propio programa, feminismo e democracia paritaria, dereitos sexuais e reprodutivos, como os dereitos das persoas migrantes e xitanas, a protección e impulso do principio de xustiza universal, a protección e a tutela dos dereitos a nivel europeo e mesmo a proposta dun Relator específico de Dereitos Humanos na Unión.

O capítulo dedicado á sustentabilidade ambiental, ecoloxía social, soberanía alimentaria e política agraria común, que tan ben coñece Lidia Senra, ocupa un lugar central sobre a base da defensa dos nosos sectores produtivos estratéxicos. Compre resaltar a asunción do coñecido como Programa da Terra presentado polas principais organizacións ecoloxistas internacionais para as Eleccións Europeas, con medidas relacionadas co comercio das emisións renovables, redución de gases de efecto invernadoiro, fondo económico e tecnolóxico a prol da sustentabilidade, prohibición da técnica do fracking

Para rematar, o capítulo 7, moi querido para min, a Europa da paz, da solidariedade e do internacionalismo, recolle moitas das reivindicacións que desde o movemento pacifista internacional, en particular, desde a educación e a investigación para a paz, vimos reclamando, como é a reforma en profundidade da ONU para que sexa realmente democrática e garante da paz, a defensa da xustiza e dos valores cívicos e democráticos, tan necesarios hoxe, xunto coa honestidade, a decencia e a honradez, parece mentira ter que reivindicalos!, do desarmamento, da prevención de conflitos, o control do comercio de armas, a independencia de Europa fronte das políticas de EE.UU e da OTAN, o rexeitamento das bases e dos drons militares, a disolución da OTAN, a promoción dunha Lei Europea de Fomento da Cultura da Paz, o respecto escrupuloso nas relacións internacionais dos dereitos humanos, a soberanía nacional e o dereito de autodeterminación, o rexeitamento da violencia armada como método para cambiar gobernos ou as ocupacións ou intervencións militares en territorios soberanos e o apoio decidido á supresión da pena de morte no mundo. Deféndese, ademais, unha Convención Internacional polo Desarmamento, a desnuclearización do planeta, a redución drástica dos gastos militares, a separación completa da presenza militar da vida civil ou a Memoria democrática fronte dos discursos racistas, xenófobos e neofascistas xunto cun Plan Europeo contra da Intolerancia e a discriminación.

Hai programa, teremos unha magnífica eurodeputada, Lidia Senra, e un moi bo candidato á presidencia da Comisión, Alexis Tsipras, líder da Syriza grega e da European Left, alternativa da esquerda transformadora europea ó bipartidismo decadente.
[*] Manuel Dios Diz é mestre, licenciado en Xeografía e Historia, doutorando en Estudios Contemporáneos pola Universidade de Santiago de Compostela, fundador e presidente do Seminario Galego de Educación para a Paz (1985-2008), profesor xubilado. Activista pola non violencia, pola Paz e a concordia. Escritor, articulista, investigador, ... foi varias veces premiado polos seus numerosos contributos sociais e pedagóxicos [+info].

Enviado por:
Inácio GZ
-inaciogz@gmail.com-
06 de maio de 2014 12:05

http://espazoartabro.blogspot.com/

_________________

mércores, marzo 05, 2014

Esquerda Unida e os problemas de organización do tráfico dos transportes públicos - iniciativa parlamentar a propósito da situación casa natal de Carvalho Calero en particular e Ferrol Vello en xeral


Javier Galán demanda a convocatoria da comisión de Urbanismo, Seguridade e Tráfico “que está para algo máis que para aprobar licenzas “
| Esquerda Unida levará as reivindicacións das asociacións de veciños á comisión de urbanismo e tráfico cando sexa convocada. | O grupo municipal de Esquerda Unida critica o desleixo do goberno do PP ante a grave situación de Ferrol Vello.

Ao igual que a semana pasada, na correspondente comisión de urbanismo, o grupo municipal de Esquerda Unida pediu explicacións pola improvisada ordenanza reguladora de tráfico na próxima, que non será esta semana, comezaremos tanto a levar as reivindicacións das entidades e veciñanza que se ven prexudicadas polas decisións do PP como a continuar co xa exposto no pleno a propósito dos seus contidos aprobados só inicialmente.

O grupo municipal de Esquerda Unida fai súas as demandas das asociación de veciños  e comerciantes de Esteiro e Ultramar e volverá de novo, en preguntas e suxestións porque noutro punto non hai posibilidade, a levar a problemática do tráfico á comisión de urbanismo e seguridade cando o Partido Popular teña a ben convocala. Neste sentido criticamos como grupo a falta de iniciativa do goberno municipal para levar con tempo suficiente para o debate e toma en consideración as propostas que presenta. Como mostra a última sesión: na orde do día só figuraba licenzas e a aprobación inicial da ordenanza de terrazas para ser inmediatamente levada ao pleno ao día seguinte. En “rogos e preguntas” a oposición no seu conxunto plantea dezaoito preguntas (á parte de sete que EU vén incluíndo dende o 30 de maio de 2012 reiteradamente e que algunhas tocan ao seu fin: asfaltado da rúa Herbosa) das que  sete son Esquerda Unida:tráfico paradas de autobuses a centros sanitarios e marquesiñas, problemas de saneamento no medio rural, talas de árbores e mantemento etc.

 Esta é a tónica común: saturación de demandas veciñais como suxestións da oposición ante a imposibilidade de que o asociacionismo canalice as súas demandas polas institucións participadas. Por iso aínda non sabemos nada do prometido novo plan especial para Ferrol Vello por iso non son quen de convocar asembleas de barrios para que os veciños poidan libremente expresar as súas demandas e opinións sobre a zonal azul ou a ordenación tráfico, por iso non son quen de convocar ao consello da veciñanza e, dotándoo dun regulamento interno, facelo partícipe da toma de decisións sobre tráfico, transporte público ou investimento en rexeneración urbana para lograr a recuperación económica e comercial de determinados  barrios sumidos no máis absoluto e interesado abandono como estamos a padecer.

Ferrol 4 de marzo de 2014



Á MESA DO PARLAMENTO GALEGO

Yolanda Díaz Pérez, Xabier Ron Fernández e Ramón Vázquez Díaz, integrantes do Grupo Parlamentar da Alternativa Galega da Esquerda, ao abeiro do recollido no artigo 156 do Regulamento da Cámara, presentan a seguinte Pregunta para a súa resposta oral no Pleno, relativa a situación de ruína da casa de Carvalho Calero en Ferrol.

Co derrube dunha  parede medianeira da casa de Carvalho Calero  confirmamos o mal que corroe o barrio de Ferrol Vello, o espazo primixenio da cidade, que sofre unha progresiva degradación que semella imparable, diante da práctica parálise coa que se conducen as administración públicas competentes todas nas poutas do PP.
É unha confesión do desinterese do PP a realidade do retraso que acumula o goberno municipal para aprobar o plan especial de protección e rehabilitación de Ferrol Vello, que agora se nos anuncia para fins de mes, logo de contemplar a paisaxe de Sarajevo que presenta o barrio, dende a praza de Ferrol Vello en ruínas ate a rúa Curuxeiras pechada hai un ano, unha sucesión de desaloxos  e que agora presenta este derrubo nun inmoble cuxa rehabilitación se vén adiando sen motivo, ou con el: a pura falla de interese.

A Xunta de Galicia declarou o barrio de Ferrol Vello como ben de interese cultural ( decreto 33/2011, do 10 de febreiro) atendendo a importancia do conxunto histórico como elemento nuclear e orixinario da cidade de Ferrol. Esa figura garante unha protección integral que vencella a todas as administración públicas. Logo de 3 anos nada se  fixo e o barrio segue a virse abaixo. Que fai a Xunta de Galicia para facer efectivo o previsto no artigo 25.2 da lei do patrimonio cultural de Galicia?
Ferrol Vello precisa unha actuación rehabilitadora decidida e nese ámbito a casa de Carvalho Calero pode xogar un punto de inflexión desa derrota de ruína que os gobernos local e da Xunta practican con el. Regresión demográfica e falla de servizos e equipamentos son os complementos desa derrota de ruína. A pouco que se desenvolvan unha serie de actuacións definidas no corazón do barrio este daría un volco completo, pero a Xunta amosa unha nula vontade de actuación.

En atención ao sinalado, o Grupo Parlamentar da Alternativa Galega da Esquerda achega a seguinte pregunta para a súa resposta oral na comisión:
  • Que actuacións desenvolveu e cales vai desenvolver en adiante o goberno galego para garantir a protección integral que reporta a declaración de BIC do barrio de Ferrol Vello?
  • Que actuacións de urxencia vai desenvolver o goberno galego para coadxuvar a evitar a degradación e ruína de Ferrol Vello e en particular para recuperar e rehabilitar a casa de Carvalho Calero?
  • Que financiamento vai habilitar a Xunta de Galicia para a rehabilitación de Ferrol Vello?
Compostela, 4 de marzo do 2014.

Asdo. Yolanda Díaz Pérez
Asdo. Xabier Ron Fernández
Asdo. Ramón Vázquez Díaz

---

Esquerda Unida de Ferrol
R/ do Sol 124 Entrechán Esquerda
981944035

www.euferrol.org
https://www.facebook.com/esquerdaunida.ferrol
https://twitter.com/EUFerrol
http://www.esquerdaunida.org/ferrol.html

Enviado por:
Ferrol Esquerda Unida
-eu-ferrolterra@esquerdaunida.org-
4 de março de 2014 12:57

Boas. Enviámosvos nota do grupo municipal pola que nos posicionamos diante dos problemas de organización do tráfico transportes públicos e urbanismo que padece a nosa cidade. Adxuntamos a proposición parlamentar que a iniciativa de  esquerda Unida presenta hoxe o grupo parlamentar de AGE no Parlamento a propósito da situación casa natal  de Carvalho Calero en particular e Ferrol Vello en xeral. Grazas e un saúdo, Secretaría de Comunicación. Consello Político Local.

_____________

Foto: Ferrol Vello, de Urban Idade.
__________________________

mércores, xuño 26, 2013

A oposición a Reganosa no Parlamento Galego - Vídeo - Documentos


Despois de máis dunha década de loita do Comité Cidadán de Emerxencia para a Ría de Ferrol contra a localización da Planta de Gas de Reganosa, hoxe debateuse no Parlamento de Galicia a Moción presentada polo Grupo Alternativa Galega de Esquerda -AGE, esixindo o desmantelamento da Planta, o cumprimento da Sentenza firme do Tribunal Supremo de maio 2012 e a denuncia do Convenio secreto asinado polo Presidente Fraga e o accionariado da Planta.

A Moción, con emendas do PS de G – PSOE e BNG, foi rexeitada pola maioría absoluta do Partido Popular.

Unha representación do CCE, asistiu ao debate no Parlamento, desde dependencias anexas, xa que logo non lle foi permitido acceder ao salón de Plenos.

Nota de AGE

Texto da Moción

Intervención de Yolanda Díaz.

Yolanda Díaz esixe o peche da planta de gas de Reganosa na vila de Mugardos

A vicevoceira de AGE, Yolanda Díaz, presentou unha proposición non de lei na que se exise ao goberno de Núñez Feijoo que cumpra a lealidade e respecte as sentenzas nas que se declara nula a modificación puntual feita en Mugardos coa que se intentaba adecuar á legalidade a planta de gas de Reganosa. Yolanda Díaz sinalou que o problema da planta de gas de Reganosa naceu cun pecado orixinal como foi o convenio asinado entre Fraga e as empresas que sustentan a planta cun pacto corrupto de convivencia político- empresarial vulnerando a legalidade. Así, seguimos a ter unha auténtica bomba a tan só metros dun arsenal militar e que tanto o ministerio de defensa entre outros moitos alertaron dos riscos e perigo que supón para todos os veciños e veciñas aos que a Xunta limitouse a repartir folletos e un kit de emerxencia por se saen voando.


http://youtu.be/kUGwrDLO038


Información baseada na enviada polo:
comitecidadan
-comitecidadan@gmail.com-
26 de junho de 2013 17:28
______________

venres, maio 17, 2013

A Yolanda Díaz pregunta ao Feijoo polas súas perigosas amizades con Marcial Dorado e Manuel Cruz - Vídeo


A vicevoceira de Alternativa Galega de Esquerda, Yolanda Díaz, preguntoulle ao presidente da Xunta, Alberto Núñez Feijoo, polas súas perigosas amizades co narcotraficante Marcial Dorado e tamén con Manuel Cruz "coñecido en Ferrol polos seus negocios co narcotráfico e ser guerrilleiro de Cristo Rey entre outas cousas". Feijoo evita contestar as preguntas de AGE, mais tampouco nega ningunha das denuncias feitas pola vicevoceira de AGE.


http://youtu.be/Hkd-f95fjCk

Fonte: http://alternativagalega.com/
______________

martes, marzo 05, 2013

Presentación en Ferrol do libro "AGE. A emerxencia da Alternativa Galega de Esquerda", este xoves 7 de marzo, ás 20hs, no Centro Cultural Carvalho Calero do Inferniño

|Clicar na imaxe para ampliar|

Presentación en Ferrol do libro "AGE. A emerxencia da Alternativa Galega de Esquerda".

Día: xoves 7 de marzo.
Hora: ás 20hs,
Lugar: En Ferrol, no Centro Cultural Carvalho Calero do Inferniño.

A Asemblea Popular do Movimento Social de Ferrol Terra en apoio a AGE, presenta o libro: "AGE. A Emerxencia da Alternativa Galega de Esquerda", dos xornalistas Manuel Darriba e Daniel Salgado. Un libro, en palabras de Manuel Martínez Barreiro, "intelixible, interesante e intelixente", no que se entrevista a Xosé Manuel Beiras, Yolanda Diaz Perez, Martiño Noriega Sánchez e Xabier Ron sobre esta "experiencia insólita".

Nesta presentación, en Ferrol, contaremos coa presencia dun dos autores, o xornalista Manuel Darriba; coa parlamentaria Yolanda Díaz; coa colaboración do xornalista de 'Diario de Ferrol', Nicolás Vidal; e co editor Antón Lado.

Os resultados das eleccións autonómicas do 21 de outubro de 2012 debuxan un novo mapa político na sociedade galega coa súbita irrupción da plataforma electoral da Alternativa Galega de Esquerda, convertida en terceira forza no Parlamento Galego con 9 deputados.

A emerxencia de AGE como nova alianza de partidos trae tamén consigo o retorno de Xosé Manuel Beiras, nas súas palabras, “un político dun ciclo histórico que remata”, que procurou “navegar en mar de fóra” para o seu retorno á arena da cámara galega, no que el mesmo considera como o seu epílogo político.

"AGE. A emerxencia da Alternativa Galega de Esquerda", terceiro título da colección xornalistas, é a crónica do proceso de conformación da AGE, dos seus como e por que e a delimitación das coordenadas políticas deste novo proxecto de alianzas na voz dos seus protagonistas. En palabras dos autores: "O contido deste libro xorde da curiosidade xornalística por un proxecto que achega novas claves á política galega, a institucional e a exercida a nivel de bases. Os autores quixemos pescudar na rebotica da AGE –pensamento político, contactos, negociacións–, o seu programa e as súas expectativas. O mecanismo elixido foron as conversas con catro líderes significados da coalición. Ao tratarse dun experimento tan recente e en permanente construción, non existen aínda elementos nin perspectiva para un ensaio valorativo, moito menos un balance, do que supón a Alternativa Galega de Esquerda. O territorio de traballo é o da crónica de urxencia. O propósito que nos guiou foi suscitar conversas sobre aspectos que no seu día quedaron fóra da cobertura xornalística, conversas nas que estiveran excluídas, na medida do posible, a corrección e a gramática partidistas. Especial interese ten o testemuño dun Beiras que proclama o final do seu ciclo, convencido de pertencer a un tempo político que remata".

***

xoves, febreiro 14, 2013

Alternativa Galega de Esquerda coincide co diagnóstico da delegación do Parlamento europeo sobre a alta contaminación na Ría de Ferrol e manifesta continuar co apoio ao Comité Cidadán de Emerxencia co que seguirá a traballar para acabar coas ilegalidades e irregularidades que contaminan o affaire Reganosa



Grupo parlamentario de Alternativa Galega de Esquerda

Alternativa Galega de Esquerda coincide co diagnóstico da delegación do Parlamento europeo sobre a alta contaminación na ría de Ferrol

A viceportavoz do grupo parlamentario, Yolanda Díaz, afirma que a planta de gas de Reganosa “é un exemplo da mestura corrupta entre política e negocios

Santiago de Compostela, 13 de febreiro de 2013.- Unha delegación do Parlamento Europeo, formada por oito eurodeputados, comprobaron esta mañá á forte contaminación existente nunha ría ateigada de agresións como é a de Ferrol cos constantes vertidos  de Reganosa e a falla de saneamento e que a vicevoceira de Alternativa Galega de Esquerda ten denunciado máis dunha ocasión.

O voceiro da delegación , Philippe Boulland, destacou a grave ameaza a que están sometidas as zonas de explotación marisqueira. Os membros da delegación chegaron a preguntar ás autoridades da Xunta canta xente estaba no cárcere despois de comprobar a forte contaminación. Así, o presidente da delegación nunha reunión coa delegación do Comité e das confrarías manifestou que o affaire Reganosa non podía, nin moito menos, darse por pechado.

Alternativa Galega de Esquerda insta á Xunta de Galicia e o Ministerio a que resolvan o que consideran as hipotecas que están a lastrar a ría de Ferrol como son  os vertidos de Reganosa, o perigoso tráfico que supoñen as instalacións gaseiras no interior da ría e os continuados atrasos para realizar o saneamento integral da ría que impiden a actividade marisqueira. A esta grave situación súmase a ameaza que formula o ministerio de fomento coa pretención de construír uns accesos ao porto exterior que suporían a morte da enseada de A Malata. 

Ao fío da visita da delegación europea a vicevoceira de AGE, Yolanda Díaz, reafirmou hoxe na pregunta formulada ao presidente da Xunta de Galicia, Alberto Núñez Feijoo, a corrupción derivada da maridaxe entre política e negocios privados que supón a planta de gas de Reganosa. Desde AGE quere manifestar o apoio ao  Comité Cidadán de Emerxencia co que seguirá a traballar para acabar coas ilegalidades e irregularidades que contaminan o affaire Reganosa.

ALTERNATIVA GALEGA DE ESQUERDA
Gabinete de comunicación do grupo parlamentario 
Tania Porta e Daniel Salgado
tania.porta.bujan@parlamentodegalicia.es
daniel.salgado.garcia@parlamentodegalicia.es
prensa@alternativadeesquerda.net
twitter.com/alternativagz

Enviado por:
Comité Cidadán de Emerxencia
-comitecidadan@gmail.com-
13 de fevereiro de 2013 22:31

_____________

xoves, xaneiro 24, 2013

Presentado o libro 'AGE. A Emerxencia da Alternativa Galega de Esquerda'


Éxito total de afluencia na presentación de 'AGE. A Emerxencia da Alternativa Galega de Esquerda', dos xornalistas Manuel Darriba e Daniel Salgado. Un libro, en palabras de Manuel Martínez Barreiro, "intelixible, interesante e intelixente", no que se entrevista a Xosé Manuel Beiras, Yolanda Diaz Perez, Martiño Noriega Sánchez e Xabier Ron sobre esta "experiencia insólita".

Os resultados das eleccións autonómicas do 21 de outubro de 2012 debuxan un novo mapa político na sociedade galega coa súbita irrupción da plataforma electoral da Alternativa Galega de Esquerda, convertida en terceira forza no Parlamento Galego con 9 deputados.

A emerxencia de AGE como nova alianza de partidos trae tamén consigo o retorno de Xosé Manuel Beiras, nas súas palabras, “un político dun ciclo histórico que remata”, que procurou “navegar en mar de fóra” para o seu retorno á arena da cámara galega, no que el mesmo considera como o seu epílogo político.

AGE. A emerxencia da Alternativa Galega de Esquerda, terceiro título da colección xornalistas, é a crónica do proceso de conformación da AGE, dos seus como e por que e a delimitación das coordenadas políticas deste novo proxecto de alianzas na voz dos seus protagonistas. En palabras dos autores:

O contido deste libro xorde da curiosidade xornalística por un proxecto que achega novas claves á política galega, a institucional e a exercida a nivel de bases. Os autores quixemos pescudar na rebotica da AGE –pensamento político, contactos, negociacións–, o seu programa e as súas expectativas. O mecanismo elixido foron as conversas con catro líderes significados da coalición. Ao tratarse dun experimento tan recente e en permanente construción, non existen aínda elementos nin perspectiva para un ensaio valorativo, moito menos un balance, do que supón a Alternativa Galega de Esquerda. O territorio de traballo é o da crónica de urxencia. O propósito que nos guiou foi suscitar conversas sobre aspectos que no seu día quedaron fóra da cobertura xornalística, conversas nas que estiveran excluídas, na medida do posible, a corrección e a gramática partidistas. Especial interese ten o testemuño dun Beiras que proclama o final do seu ciclo, convencido de pertencer a un tempo político que remata.

Manuel Darriba (Sarria, 1973)
Traballou como xornalista en El Progreso e colaborou en medios como El Periodico de Catalunya, Expansión, El Mundo e El País. Na actualidade é columnista do xornal De Luns a Venres. Escribe guións de ficción e dirixe documentais e programas de televisión. A súa obra literaria recibiu diversos premios e parte dela está traducida para español.

Daniel Salgado (Monterroso, 1981)
Traballou como xornalista na edición galega de El País e colabora con A Trabe de Ouro, Protexta ou o Xornal da Central Unitaria de Traballadores. Como poeta, publicou títulos como Días no imperio (premio Esquío, 2004), Éxodo (Xerais, 2006) ou Ruído de fondo (Xerais, 2012). Tradutor de Allen Ginsberg para galego e de Lois Pereiro para español. É membro da banda de música electrónica Das Kapital.

http://www.20editora.com/index.php/age-a-emerxencia-da-alternativa-galega-de-esquerda.html
__________________

mércores, xaneiro 23, 2013

A Alternativa Galega de Esquerda -AGE, esixe a dimisión da Conselleira de Mar pola situación do salvamento marítimo e presenta unha 'Proposición Non de Lei' sobre marisqueo


Comunicado de Alternativa Galega de Esquerda en que o grupo parlamentario volve esixir a dimisión da Conselleira de Mar pola situación do salvamento marítimo e na que explica a proposición non de lei sobre marisqueo rexistrada no Parlamento e que se achega.

Daniel Salgado - Prensa de AGE


Alternativa Galega de Esquerda volve esixir a dimisión da conselleira de Mar por “antepor os beneficios dunha empresa privada ao salvamento de vidas
O deputado Juan Fajardo presenta, ademais, unha proposición non de lei para que as eléctricas non abran unilateralmente os encoros, cuxas riadas causan enormes danos nos bancos de marisco.

Santiago de Compostela, 23 de xaneiro de 2013.- Alternativa Galega de Esquerda (AGE) volveu esixir hoxe, en rolda de prensa, a dimisión da conselleira de Mar e Medio Rural, Rosa Quintana. “Ante a incapacidade da conselleira para tomar decisións que soluciones as deficiencias en salvamento marítimo”, expuxo o deputado Juan Fajardo, “pedímoslle que se marche”. Fajardo lembrou a morte, o pasado mes de decembro, dunha percebeira en Oia (Pontevedra) á que os servizos de salvamento non puideron asistir a tempo. Tamén lembrou que a Xunta anunciara medidas ao respecto. “Máis dun mes despois, nada sabemos desas medidas”, engadiu, “que, para nós, significan que o salvamento marítimo volva ser completamente público”. “Non pode ser que unha persoa que antepón o beneficio dunha empresa privada [a adxudicataria dos servizos de salvamento] a salvar vidas continúe sen tomar medidas que, entre as xentes do mar, son un clamor”, sinalou.

Ademais, Alternativa rexistrou unha proposición non de lei, en que insta á Xunta a impedir que a apertura unilateral dos encoros por parte das eléctricas provoquen riadas que causan enormes danos nos bancos de marisco. O parlamentario Juan Fajardo puxo como exemplo os acontecementos do pasado decembro, cando o caudal desatado polas présas do Tambre e de Portodemouros produciron unha enorme mortalidade de moluscos nas rías de Muros e Noia. “Lonxe de se tratar dunha decisión técnica ou de seguridade, como aducen as compañías”, argúe Fajardo, “a decisión de abrir as comportas baséase no mellor prezo que pode acadar a enerxía nas datas de Nadal nos mercados europeos”. De feito, a apertura que prexudicou ás mariscadoras e mariscadores das rías de Muros e Noia ocorreu o 24 e o 25 de decembro. Onte mesmo, os dous encoros mencionados tiñan un 20% de auga ca daquela e non soltaron a auga.

Pero é que, a maiores, a Xunta e os produtores acordaron, por mor das riadas, o peche dos lombos do Ulla ao marisqueo deica o mes de outubro. Esta situación, que afecta aos mariscadores das confrarías de Carril e Rianxo, pode ocasionar perdas de 15 millóns de euros. Así, a Administración autónoma deberá pagar as prestacións dos traballadores que fiquen en paro, sen que as compañías eléctricas -causantes do peche pola apertura unilateral dos encoros- soporten ningunha carga económica por estes feitos. A proposición non de lei de Alternativa Galega de Esquerda denuncia tamén o desleixo da Xunta á hora de reclamar responsabilidades aos culpábeis desta situación.

Proposición non de Lei

Á MESA DO PARLAMENTO

O Grupo parlamentar de Alternativa Galega de Esquerda (AGE), a través do seu voceiro e a iniciativa dos seu deputado Juan M. Fajardo Recouso, ao abeiro do disposto no Regulamento da Cámara, presentan a seguinte Proposición non de lei para  o seu debate en Pleno,

Exposición de Motivos

O pasado mes de Decembro do 2012 nas rías de Arousa e Noia, unha serie de circunstancias determinaron o incremento da mortalidade dos moluscos que se extraen en ambas rías, feito que provocou un elevado prexuízo económico ás mariscadoras e mariscadores de ambas as dúas zonas, tanto de a pé como a flote.

Entre os elementos que é conveniente reseñar e que puideron influír na elevada mortalidade das especies explotadas nestas dúas rías, salientamos as riadas producidas pola apertura das comportas dos encoros do Tambre e Portedemouros respectivamente. Estes feitos non se poden considerar illados, senón que, lamentablemente, reprodúcense con asiduidade en ambas as dúas rías.

Dende Alternativa Galega de Esquerda consideramos necesario que os procesos de apertura de comportas non poidan realizarse por decisión unilateral das empresas que explotan as capacidades enerxéticas de ambos os dous encoros. Entendemos imprescindible introducir normativas que delimiten esta capacidade e obriguen ás empresas a consultar e acordar cos sectores produtivos os momentos e formas de aliviar as augas encoradas.

Lonxe de se tratar dunha decisión técnica ou de seguridade das empresas eléctricas, a decisión baseáse na demanda do mercado eléctrico e na posibilidade de acadar mellores prezos da enerxía precisamente nas datas de Nadal, debido o incremento da demanda e ao incremento dos prezos nos mercados europeos de enerxía.

Estas actuacións priorizan a rendibilidade económica dunha multinacional, que xa esquilma os galegos con abusivos prezos eléctricos e sen bonificacións malia ser Galicia produtora e exportadora da enerxía, deben ser controladas pola Administración para evitar que os intereses económicos da empresa arruínen a campaña dun sector fundamental para a economía galega, e máis concretamente das rías de Arousa e Noia.

Non podemos esquecer a repercusión que sobre a mortalidade do berberecho e a ameixa teñen ademais as obras de infraestruturas viarias e ferroviarias que se efectúan en ambas as dúas rías e que incrementan a contaminación e a turbidez da lámina de auga.

No que respecta aos lombos do Ulla, a Xunta e os produtores acordaron o peche desta zona, o que ocasionará perdas importantes para os mariscadores e mariscadoras pero tamén para a Administración. Esta terá que facer fronte os pagos das prestacións por desemprego, sen que as empresas eléctricas responsábeis desta situación –pola apertura indiscriminada dos encoros- soportasen ningunha carga económica ou responsabilidade sobre as perdas producidas á Administración ou aos produtores.

A arbitrariedade deste tipo de medidas por parte da Administración autonóma, e a deixadez de funcións a hora de esixir responsabilidades aos culpábeis ou indutores da situación, fan necesario establecer vías legais que permitan reclamar danos aos responsables. Ademais, é preciso habilitar liñas de axuda para aquelas mariscadoras e mariscadores que por esta circunstancia non poidan acollerse ás prestacións e que, sen embargo, deben continuar pagando os seguros socias correspondentes sen ningún ingreso. A maiores, a Administración debe estabelecer a posibilidade de cobro parcial das cotas cando os paros se produzan xa iniciado o mes, en igualdade de condicións cos traballadores por conta allea.

Polo exposto formulamos a seguinte proposición non de lei:
O Parlamento de Galiza insta a Xunta de Galicia a adoptar as medidas legais oportunas para evitar que se repitan riadas provocadas pola apertura de comportas de forma unilateral polas empresas que explotan os encoros galegos.

O Parlamento de Galiza insta á Xunta a arbitrar un mecanismo fluído, eficaz e obxectivable  para que os mariscadores e mariscadoras poidan utilizar os peches dos sectores produtivos cando se produzan situacións de forza maior que provoquen a baixada abusiva dos prezos ou a mortalidade das especies que se extraen.

O Parlamento de Galiza insta á Xunta a introducir unha liña de axudas para os afectados e afectadas das riadas do mes de decembro nas rías de Arousa e Noia, nomeadamente a aqueles que por condicións de tempo non poidan acceder as prestacións.
Santiago de Compostela a 23 de xaneiro de 2013


ALTERNATIVA GALEGA DE ESQUERDA
Gabinete de comunicación do grupo parlamentario 
Tania Porta e Daniel Salgado
tania.porta.bujan@parlamentodegalicia.es
daniel.salgado.garcia@parlamentodegalicia.es
prensa@alternativadeesquerda.net
606 675 524

Enviado por:
Ferrol Esquerda Unida
-eu-ferrolterra@esquerdaunida.org-
-23 de janeiro de 2013 13:58

____________

A Alternativa Galega de Esquerda, insta á Xunta a manifestar o seu apoio á iniciativa dos traballadores e traballadoras de Privilege, empresa localizada en Narón


AGE: insta á Xunta a manifestar o seu apoio á iniciativa dos traballadores e traballadoras de Privilege

Grupo parlamentario de Alternativa Galega de Esquerda

Alternativa Galega de Esquerda insta a Xunta a apoiar á plantilla de Privilege Advance Surface na súa iniciativa de crear unha sociedade anónima laboral para manter os postos de traballo.

A vicevoceira do Grupo Parlamentar, Yolanda Díaz, reuniuse esta tarde co Comité de Empresa para coñecer a situación que están a atravesar os traballadores e traballadoras.

Yolanda Díaz destacou que se trata dun exemplo máis da ineficacia da Xunta en materia laboral e a elocuente demostración do fracaso das actuáis políticas económicas neoliberais do goberno galego
.

Santiago de Compostela, 23 xaneiro de 2013.-  A vicevoceira do Grupo Parlamentar, Yolanda Díaz, denunciou a complicidade da Xunta de Galicia cos propietarios da empresa Privilege Advance Surface que deixaron afundir a empresa constituída no seu día con achegas públicas e instou a que apoie aos traballadores e traballadoras na súa idea de constituír unha sociedade anónima laboral para manter a empresa e con ela os postos de traballo.

A vicevoceira que reuniuse esta tarde co comité de empresa, amosou o apoio do Grupo Parlamentar aos traballadores e traballadoras na súa loita. Os traballadores informaron durante o encontro o compromiso do anterior conselleiro de Economía e Industria, Javier Guerra, que asegurará 2,5 millóns de euros aos traballadores para que puideran poñer en marcha a súa iniciativa e salvar a empresa.

Yolanda Díaz destacou que a secuencia de destrución de emprego e de aumento do paro no noso país configura unha situación dramática, toda vez que o goberno da Xunta de Galicia teima en aplicar políticas económicas que destrúen emprego e deprimen a demanda agregada ao punto de atoparnos perante un verdadeiro plan quinquenal de destrución de emprego e depresión económica por parte dos gobernos de Feijóo. “As 350.000 persoas que a día de hoxe se atopan no paro en Galicia son a elocuente demostración do fracaso das actuais políticas económicas neoliberais da Xunta” declarou a vicevoceira do Grupo Parlamentar o que, para Alternativa Galega de Esquerda, xustifica a a urxencia e importancia non só de remudar de xeito radical as devanditas políticas, canto de propiciar por parte da administración pública galega a asunción dun papel protagonista por parte das traballadoras e traballadores de proxectos industriais que permitan darlle viabilidade a empresas en crise, xerar postos de traballo e apostar polo pulo ao tecido industrial. 

A deputada parlamentar referiuse de xeito específico a Ferrol xa que se sitúa un dos epicentros da destrución de emprego e de falla de diversificación industrial do noso país, o que debe obrigar a unha reflexión e rectificación por parte da Xunta de Galicia e á adopción de medidas de estímulo ao fomento da actividade industrial.

Un dos exemplos que amosan a ineficacia da Xunta nesta materia o constitúe a súa deixación de responsabilidade na deriva da empresa Privilege Advance Surface, empresa adicada á fabricación de taboleiros de pedra para a construcción; empresa constituída no seu día con achegas públicas e que os propietarios italianos deixaron esmorecer, tal vez coa intención de levar o proceso produtivo a Italia. Unha empresa que destacou Yolanda Díazconstituída ao abeiro dos chamados plans de reindustrialización acordados como paliativos da brutal desindustrailziación dos estaleiros públicos da ría de Ferrol, e que os seus propietarios conduciron á creba coa cómplice inacción dunha Xunta de Galicia que aínda ostenta o 40 por cento do seu capital”.

A plantilla de traballadoras e traballadores acordou constituír unha sociedade anónima laboral e semella de xustiza que a Xunta deixe de amolar con complicidades cos herdeiros dos accionistas que a afundiron e apoie de xeito franco á plantilla na súa loita por manter a empresa, os postos de traballo e un anaco de porvir social para unha comarca particularmente deprimida. "A Xunta de Galicia pódeo facer toda vez que ostenta esa participación do 40 por cento o que precisa ter a vontade de facelo en beneficio do emprego e da comarca” afirmou a deputada de Alternativa Galega de Esquerda.

O Grupo Parlamentar de Alternativa Galega de Esquerda presentou unha interpelación no Parlamento na que se insta a Xunta a que explique se vai apoiar a iniciativa dos traballadores e traballadoras de Privilege, ademáis de que expliquen qué outras iniciativas públicas agarda desenvolver este ano para pular pola reindustrialización e diversificación do tecido industrial na nosa comunidade e nomeadamente na comarca de Ferrolterra.

ALTERNATIVA GALEGA DE ESQUERDA
Gabinete de comunicación do Grupo Parlamentario 
Tania Porta (606 675 524) e Daniel Salgado (619 007 734)
tania.porta.bujan@parlamentodegalicia.es
daniel.salgado.garcia@parlamentodegalicia.es
prensa@alternativadeesquerda.net


Enviada por:
Ferrol Esquerda Unida
-eu-ferrolterra@esquerdaunida.org-
-areainterna@esquerdaunida.org-
22 de janeiro de 2013 20:43

Envío nota relativa a iniciativa presentada por AGE en apoio aos traballadores e traballadoras da empresa Privilege na súa iniciativa de crear unha sociedade anónima laboral para manter a empresa e os postos de traballo. Grazas e un saúdo. Tania Porta. Gabinete de comunicación do Grupo Parlamentar

__________

sábado, decembro 08, 2012

Comunicado de Alternativa Galega de Esquerda denunciando extorsión e chantaxe por parte de Edgewater Exploration LTD en Cabana de Bergantiños


Os propietarios dos terreos onde se pretende realizar un proxecto de extracción de ouro están a recibir unha carta da empresa Mineira Corcoesto S.L (*) instándoos a vender os terreos por 1,2 euros/m2, e ameazándoos con que se non o fan así antes de fin de ano, comezaría o proceso expropiatorio e obterían prezos máis baixos.

AGE considera moi grave estas actitudes e critica que dende a Xunta de Galicia se avale este tipo de proxectos, tolerando pasivamente que unha sociedade de capital estranxeiro practique a extorsión e a chantaxe a través de cartas intimidatorias intolerables.

1.- AGE manifesta que a misiva é un cúmulo de falsidades, dende a valoración do terreo, até o feito de que xa sexa inminente o proceso expropiatorio, que non o é, e que en caso de expropiarse os prezos sexan os que di a empresa.

En primeiro lugar, a valoración que oferta a empresa é mesmo inferior aos valores de mercado que a propia Xunta ten aprobado (Orde do 28/12/2011, de valores de prezos medios de mercado; DOG do 29/12/2011).

En segundo lugar, o que silencia a empresa é que pretende aplicar en Galiza a mesma táctica que empregou en Asturias, ao querer mercar agora a prezo baixo para que dispois, no proceso expropiatorio, se tomen como referencia comparativa de prezos de mercado os valores fixados nos contratos de compra-venta asinados antes de comezar as expropiacións, co cal non só se pagaría un prezo ridículo agora senón que iso perxudicaria aos que non vendan agora e sexan expropiados dispois.
En terceiro lugar, a mina tramítase como proxecto industrial estratéxico (DOG 02/05/2012) pero aínda non está aprobado como tal polo Consello da Xunta, polo cal mentres a Xunta non aprobe definitivamente o proxecto, a empresa non pode expropiar. ¿Ou é que a empresa xa sabe que a Xunta vaille aprobar o proxecto desestimando as alegacións presentadas ?.

2.- AGE considera que as prácticas da empresa e a pasividade da Xunta son especialmente graves cando se trata dun proxecto cun enorme impacto medio-ambiental (**) que, de aprobarse, teria consecuencias moi negativas de cara ao futuro. Manifestamos que o proxecto mineiro de Corcoesto é máis propio de antigos modelos de desenvolvemento do terceiro mundo, da época colonial, polo seu impacto ambiental, polo saqueo dos nosos recursos naturais e pola súa insostibilidade.

Resulta evidente que este tipo de empresas busca países cunha lexislación ambiental moi laxa e onde atopen a complicidade das autoridades políticas, coma é o caso do goberno de Feijoo e do alcalde do PP de Cabana de Bergantiños.

AGE lembra ao respecto que un proxecto de idénticas características foi rexeitado polo Principado de Asturias, decisión que foi confirmada polos tribunais de xustiza, desestimando as reclamacións da empresa. Adxuntase a sentenza do Tribunal Supremo ao respecto.

(*) 1.- A anterior sociedade, Rio Narcea Gold Mines S.L cambia o nome polo actual de Mineira Corcoesto S.L o 11/04/2012. O 100 % do capital pertece a Edgewater Exploration LTD (compañía canadiana constituida en xuño de 2007 en Vancouver).

(**) As características do proxecto:

-Excavación de un diámetro de 1,5 km
-Construción dunha balsa de decantación de 10.000.000 m3, semellante á de Aznalcollar que provocou o desastre natural no Parque Nacional de Doñana.
-Utilización de cianuro no proceso de obtención de ouro.

---
ASEMBLEA DE SENTINELAS DO MANDATO POPULAR


Asemblea do Movemento Social de Ferrolterra en apoio á coalición
Alternativa Galega de Esquerda

Correo-e:
asemblea.apoio.alternativa@gmail.com

Blogue:
http://asembleadeferrolterra.blogspot.com

Enviado por:
Asemblea Popular Alternativa
-asemblea.apoio.alternativa@gmail.com
8 de dezembro de 2012 22:30
_____________

luns, decembro 03, 2012

Unha Crónica aproximada da IIIª Asemblea do Movemento Social de Ferrol Terra en apoio a Alternativa Galega de Esquerda

Clicar acima do collage para ampliar a imaxe

Un centenar de persoas asistiron en Ferrol á IIIª Asemblea do Movemento Social de apoio de AGE. Activistas do movemento veciñal, ecoloxista, feminista, sindical, cultural, de distintas plataformas cidadás... estaban convocadas a debater guiándose por unha orde do día que, aínda que densa, foi desenvolvéndose paso a paso grazas á capacidade política que emana do colectivo e da experiencia de anos de loita común.

Só se puido contar nesta ocasión coa asistencia da deputada Yolanda Díaz. O deputado Antón Sánchez desculpou a súa ausencia por motivos de saúde.

En relación da folga xeral do dia 14 de novembro, debateuse sobre as expectativas e distintos tipos de resposta que xerou, e a participación na mesma dos movementos socias, con distintas iniciativas na nosa comarca. Valorou-se como moi positiva a iniciativa da "Culebra Social". Houbo dúas propostas para que a asemblea as vaia madurando, concretando e reflexionando sobre elas. Un “Plan de Emerxencia de Contestación Social”, en relación á necesidade de resposta inmediata e organizada a respecto dos sucesivos decretos do goberno do PP, e outra para apoiar novas convocatorias de folga, con iniciativas “sustentadoras da vida”.

Resaltou-se a importancia das vindeiras mobilizacións unitarias como a convocada para o Martes 4 de Decembro en Defensa da Sanidade Pública; ou a prevista para o, tamén Martes 11 do mesmo mes contra as taxas xudiciais.

En relación ao proceso de creación da Alianza Social Galega, expresouse a vontade de que esta se constitúa a nivel comarcal. Así vai-se solicitar o próximo día 10 de decembro na reunión que esta plataforma vai manter en Compostela. Activistas da Marcha Mundial das Mulleres presentes na asemblea, informaron da mobilización europea polo Día Mundial dos Dereitos Humanos, invitando a todas as organizacións a convocar un acto conxunto diante do centro de saúde Fontenla Maristani, o propio día 10 ás 18hs, con micrófono e actividades abertas. Esta proposta estaba acompañada do apoio do Foro Galego de Inmigración e Lazos.

En relación á proposta de concretar o xeito de relacionarse esta asemblea co Grupo Parlamentar, apareceron distintas propostas (por comisións ou na propia asemblea) para un debate que fica aberto, achegando as seguintes reflexións comúns:

De todas as iniciativas do Grupo Parlamentar de AGE, das que deu lectura  e explicación Yolanda Díaz (IBI Igrexa Católica, IBI vivendas baleiras, Medididas Tributarias xustas, minas de Corcoeso, Pacto contra a pobreza, Pesticidas, Paz e cambio climático, Fadesa, Decreto do Galego, nova banca pública galega, desafiuzamentos, ...) , a maioría eran descoñecidas para as persoas participantes na asemblea. Deste xeito confirmase a falta de canles comunicacionais entre a cidadanía e o Grupo Parlamentar. Apuntouse como medida paliativa mais inmediata a axilización da creación dunha web informativa e colaborativa, do grupo parlamentar da coalición.

Alertou-se sobre a importancia de dar a coñecer publicamente as iniciativas  presentadas e nas que se están traballando, aumentando o énfase sobre o traballo parlamentario encetado, pois co que queda a maioría da xente só é co que os media pregoan e ao PP lle interesa: que estamos "pelexando por uns metros cadrados de espazo no parlamento".

As iniciativas valoráronse moi positivamente, incluíndo unha reflexión sobre a necesidade de realizar algunha actuación xa sobre a loita de Reganosa. Manifestou-se de forma explícita que se solicitase no Parlamento a petición dunha Auditoría que nos levase ao non pagamento da Débeda Ilexítima e propor a través do mesmo unha actuación directa para pedir responsabilidades xudiciais aos banqueiros culpábeis da estafa á cidadanía. Considerou-se moi importante loitar contra o saqueo do que noutrora foran as caixas de aforros galegas e propor a creación dunha banca pública galega, sobre todo neste momento que xa anuncian a inminente venda de novagaliciabanco, despois de despedir a miles de traballadoras e traballadores, e ser salvado con diñeiro público.

Considerou-se como moi importante o compromiso das e dos activistas dos movementos sociais na divulgación, apoio e colaboración en todas as iniciativas do Grupo Parlamentar, incluída a súa defensa como no caso, neste momento, dos intentos de marxinalización dentro das propias dependencias do Parlamento. Neste sentido, reflexionouse sobre a necesidade de compaxinar a mobilización e concienciación social, co traballo parlamentar, único xeito de conseguir o efecto transformador e rupturista que anceiamos.

Cumpre sinalar a participación nesta asemblea do compañeiro Rafael Pillado, que aínda convalecente dunha recente operación, quixo estar uns minutos con nós, para contribuír na análise e nas propostas.

Por último acordouse que as persoas que convocaron esta terceira asemblea, xunto ás que se sumaron na propia asemblea, organicen a próxima convocatoria.

Narón, a 30 de novembro de 2012

A Comisión para convocar a seguinte Asemblea quedou constituída por:

Rafael Pillado, Lupe Ces, Suso Díaz, Elena Casal, César Pena, Lucia Vizoso, Miguel López, Carlos Varela, Suso Pazos, Lalán, Alexandre Carrodeguas, André M. Ces, Daniel A. Martínez, Marcelo R. Serantes, Pablo Portero, Paula Meizoso, Inácio Martínez, Mel Sanxoan e Bernardo Cuétara.

Nota.- Esta Comisión tería só por obxecto: acordar día, hora e lugar da vindeira Asemblea, fixar os seus obxectivos  e elaborar a proposta de orde do día.

Aviso:  Esta é unha crónica aproximada, polo que se prega quen quixer completar a crónica, envie as aportacións ao correo-e asemblea.apoio.alternativa@gmail.com.

ASEMBLEA DE SENTINELAS DO MANDATO POPULAR
Asemblea do Movemento Social de Ferrolterra en apoio á coalición
Alternativa Galega de Esquerda

Correo-e:
asemblea.apoio.alternativa@gmail.com

Blogue:
http://asembleadeferrolterra.blogspot.com
Enviado por:
Asemblea Popular Alternativa
-asemblea.apoio.alternativa@gmail.com
 2 de dezembro de 2012 22:29

_____________

xoves, novembro 29, 2012

O Venres, 30 de Novembro, en Ferrol nos locais da Sociedade Deportiva e Recreativa de Canido, celebrara-se a III Asemblea do Movemento Social de Ferrolterra en apoio de Alternativa Galega de Esquerda

Unha nova Asemblea Popular en apoio á Alternativa Galega de Esquerda, que desta vez se celebrará en Canido.

Esta é unha Asemblea Aberta a todas as persoas que consideren que a Alternativa Galega de Esquerda é unha expresión política válida, onde o movemento social de Ferrol Terra poda confiar as súas reivindicacións e demandas; para que estas cheguen ao Parlamento Galego.

A cita é o Venres, 30 de Novembro, ás 19hs en Ferrol, nos locais da Sociedade Deportiva e Recreativa de Canido
.

III Asemblea do Movemento Social de Ferrol Terra en apoio de Alternativa Galega de Esquerda

O pasado Venres 2 de Novembro, celebrabamos no Auditorio da Praza de Galicia do Concello de Narón, a II Asemblea do Movemento Social de Ferrol Terra en apoio de Alternativa Galega de Esquerda. Con anterioridade, antes das Eleccións Lexislativas Galegas do 21 de Outubro, celebramos unha Asemblea en Ferrol, no Centro Cívico Carvalho Calero do Inferniño, o 28 de Setembro, de activistas do movemento social de Ferrol Terra, en apoio da coalición electoral. Como resultado desa asemblea, asinábase un manifesto onde, ademais de amosar as razóns deste apoio, a propia asemblea convertíase en sentinela do mandato popular.

Criába-se así un espazo de reflexión e activismo político, fora das estruturas das organizacións políticas, de participación directa da cidadanía e confluencia das distintas opcións e visións que apoian a Alternativa Galega de Esquerda.

Na citada segunda asemblea, reflexionamos e acordamos diferentes asuntos recollidos na crónica aproximada xa publicada e outros acordos para a Folga Xeral do 14N.

Por último acordouse que as persoas que convocaron esa segunda asemblea, xunto ás que se sumaron na mesma, fixeran, despois do 14N unha nova convocatoria. Estas persoas terían só por obxecto: acordar día, hora e lugar da vindeira Asemblea, fixar os seus obxectivos e elaborar a proposta de orde do día.

Estas persoas abaixo relacionadas, tomamos a iniciativa de convocar unha terceira Asemblea en Ferrol, nos locais da Sociedade Recreativa e Deportiva de Canido, situada na Rúa Insua, para o venres 30 de novembro ás 19hs, coa seguinte orde do día:
  1. Elección de dúas persoas que moderen a asemblea (unha muller e un home).
  2. Análise da folga do 14N. E despois que?
  3. Alianza Social Galega. Propostas para conformala na nosa comarca.
  4. Propostas para o deseño das relacións da Asemblea co Grupo Parlamentar de AGE.
  5. Rogos e preguntas.
Por outra banda acordou-se convidar á Yolanda Díaz e Antón Sánchez, membros do Grupo Parlamentar da Alternativa Galega de Esquerda, para participar nesta Asemblea, para que nos expliquen os obxectivos inmediatos do citado Grupo e someter-se ás preguntas que houber (Yolanda e Antón xa confirmaron a súa presencia).

En Ferrol, a 23 de Novembro de 2012

Asinan esta convocatoria: Rafael Pillado, Lupe Ces, Suso Díaz, Elena Casal, César Pena, Lucia Vizoso, Miguel López, Carlos Varela, Suso Pazos, Lalán, Alexandre Carrodeguas, André M. Ces, Daniel A. Martínez, Marcelo R. Serantes, Pablo Portero, Paula Meizoso, Inácio Martínez e Mel Sanxoan.

ESPALLA E DIFUNDE !!

Nota.- Achegamos documentos, da Alianza Social Galega e a Circular Nº1 sobre reparto do Grupo Parlamentario nas comisións do Parlamento Galego, en ficheiros anexos formato -pdf.

DECLARACIÓN DE APOIO Á FOLGA XERAL DO 14 DE NOVEMBRO.
https://docs.google.com/open?id=0BzsqFzZzVAmJa3NKM1hHTHliZms

MANIFESTO DA ALIANZA SOCIAL GALEGA.
https://docs.google.com/open?id=0BzsqFzZzVAmJTzhsYVk5X2I4OTQ

Circular Nº1 sobre reparto do Grupo Parlamentario nas comisións do Parlamento Galego.
https://docs.google.com/open?id=0BzsqFzZzVAmJaTFCUFhLV05JT1k

***

ASEMBLEA DE SENTINELAS DO MANDATO POPULAR
Asemblea do Movemento Social de Ferrolterra en apoio á candidatura da Alternativa Galega de Esquerda

Correo-e:
asemblea.apoio.alternativa@gmail.com

Blogue:
http://asembleadeferrolterra.blogspot.com
_____________

O Grupo Parlamentario de Alternativa Galega de Esquerda presentou esta mañá unha Proposición Non de Lei para evitar que continúe a vaga de desafiuzamenos e as súas dramáticas e mortais consecuencias no noso país


O grupo parlamentario asegura que a dramática situación actual impón a esixencia de desenvolver as oportunas actuacións públicas.

O Grupo Parlamentario de Alternativa Galega de Esquerda presentou esta mañá unha Proposición Non de Lei para evitar que continúe a vaga de desafiuzamenos e as súas dramáticas e mortais consecuencias no noso país.

Os membros do Grupo Parlamentar consideran intolerábel a situación social que se vive no noso País, resultado da vaga de desafiuzamentos que enchen a cotidianeidade dramática das familias traballadoras. Esta situación imponnos a esixencia de desenvolver as oportunas actuacións públicas para evitar unha problemática inxusta que está a causar alarma social, pobreza e marxinalidade, e mesmo mortes. Os datos semellan un berro elocuente encol dunha realidade que antepón o lucro privado aos dereitos recollidos na Constitución e no Estatuto.

Alternativa Galega de Esquerda acredita a urxencia de modificar a legalidade de maneira que resolva tanto a situación das familias que están a piques de sufrir a perda da súa vivenda canto permita atender a situación das familias que xa a perderon.

No noso País a media de desafiuzamentos diarios é de 16, segundo os datos proporcionados polo arquivo estadístico do Consello Xeral do Poder Xudicial, que recolle a perda da vivenda ou local comercial por parte de 3.037 propietarias e propietarios no primeiro semestre do ano. Os datos son moi superiores aos dos anos pasados a causa tanto da dureza da crise canto da veracidade e completitude dos mesmos, en canto recollen tamén os lanzamentos acordados nos xulgados de primeira instancia. Nos primeiros seis meses deste ano formalizáronse 1.320 casos de execucións hipotecarias. As cifras oficiais, nada sospeitosas de tentar provocar alarma social, son estarrecedoras: dende 2008 ordenáronse 7.367 execucións que remataron en desafiuzamentos en 5.994 dos casos. Estas cifras impóñennos actuar a favor das persoas e familias afectadas por esta problemática.

Os últimos pronunciamentos públicos de diferentes entidades oficiais apuntan á urxencia para reformar unha lexislación que ampara hoxendía múltiples abusos do poder financiero. As propostas presentadas polo Consello Xeral do Poder Xudicial ou a iniciativa da Avogacía Xeral da Unión Europea dan razón aos grupos políticos e ás entidades de loita social que vimos denunciando e contrapropoñendo diversas iniciativas neste senso dende hai varios anos.

Por iso, o Grupo Parlamentario de Alternativa Galega de Esquerda acredita na necesidade de modificar en profundidade a lexislación para evitar inxustizas flagrantes e escandalosos procedementos sumarios para botar as persoas das súas casas, para protexer aos debedores fronte os abusos das entidades financieiras que socorremos de cote con milleiros de millóns de cartos públicos, de xeito que sexa efectivo o dereito constitucional a unha vivenda digna en todos os supostos de desafiuzamentos por insolvencia das persoas residentes.

O Grupo Parlamentario considera que cómpre tramitar con urxencia e participadamente as medidas suficientes que eviten que ningunha persoa máis fique na rúa, sen un teito, e para que ningunha persoa afogada polo drama da perda da súa vivenda se suicide. “Se non modifican políticas que levan á xente a suicidarse, estamos santificando políticas criminais” concluíron.

Por iso, o Grupo Parlamentario de Alternativa Galega de Esquerda presentou unha Proposición non de Lei na que se establecen os seguintes puntos:

1.- Que a Xunta de Galiza suspenda por un período de cinco anos todas as actuacións xudiciais do IGVS que se realicen para desafiuzar a calquera persoa residente nunha vivenda deste Instituto en atención á situación de depresión económica na que nos atopamos e ás súas secuelas en termos sociais e económicos.

2.- Que se consitúa unha Comisión Galega contra os Desafiuzamentos coa participación dos grupo políticos e entidades sociais que traballan nestra problemática para mediar nos casos en que o procedemento ameace coa perda da vivienda a persoas afectadas e achegue solución en todos os casos para evitar o desafiuzamento.

3.- Que se inste ao Goberno do Estado a modificar a Lei de Enxuizamento Civil, cunha disposición transitoria para que nos procedementos de execución hipotecaria que afecten á vivenda habitual do debedor ou dos seus familiares directos, que tiveran rematado coa resolución que comporte o desafiuzamento, o xuíz ou xuíza, a petición das persoa afectada ou das administración públicas competentes na materia dos servizos sociais ou de oficio, deberá decretar a suspensión da dilixencia de desafiuzamento, ate que as partes intervintes ou as administración públicas competentes non presenten un acordo ou proposta que garanta o dereito da persoa afectada a seguir a dispor da mesma ou distinta vivenda nas debidas condicións de habitabilidade e vecindade, mediante título que asegure estabilidade residencial por un período mínimo de cinco anos e nas condicións económicas axustadas ás posibilidades da persoa afectada.

4.- Que esta suspensión se acordará tamén nos procedementos nos que xa se tentara unha ou máis veces o lanzamento e queden pendentes de practicalo.

5.- Que se introduza un procedemento incidental, polo que as persoas titulares de vivendas nas que teñan a súa residencia habitual ou a dos seus familiares directos, e que se atopen hipotecadas, poidan instar á suspensión temporal do pagamento das cotas, sen acreditación de novos intereses, por xusta causa consistente en situación de paro, accidente laboral, larga enfermidade, desgraza familiar ou infortunio semellante, sen ingresos mínimos suficientes para atender ás necesidades alimenticias e as cotas hipotecarias, e namentres se manteña a situación de emerxencia ou as autoridades competentes en materia de servizos sociais e de vivienda, presenten unha solución que garanta o dereito a dispor dunha vivenda digna.

6.- Que se introduzan as medidas legais e regulamentarias necesarias para que NOVAGALICIA BANCO, en tanto que entidade financeira intervida polo Estado e que inclúe activos inmobiliarios residenciais, poña de xeito inmediato a disposición das autoridades galegas e locais o dereito de uso- por un tempo máximo de cinco anos- das vivendas baleiras e que reúnan as condicións de habitabilidade cando así sexan requeridas por resolución que xustifique a necesidade de dispor das mesmas para atender as necesidades de aloxamento de persoas e familiares que perderan o uso dunha vivenda ou se atopen en risco inmediato de perdela por causa dos procedementos de desafiuzamentos xa executado ou por desafiuzamentos arrendaticios.

7.- Que tanto para a elaboración da normativa que se propón nesta Proposición non de Lei canto para a reforma lexislativa instada se faga partícipe ás Plataformas de Afectados pola Hipoteca (PAH) que polo seu traballo social desenvolto nestes anos nos procesos de solidariedade coas familias afectadas coñecen en profundidade a súa realidade e as necesidades derivadas da mesma.

Compostela, 28 de Novembro de 2012

Grupo Parlamentario de Alternativa Galega de Esquerda

Publicado por:

ASEMBLEA DE SENTINELAS DO MANDATO POPULAR
Asemblea do Movemento Social de Ferrol Terra en apoio á coalición Alternativa Galega de Esquerda

Correo-e:
asemblea.apoio.alternativa@gmail.com

Blogue:
http://asembleadeferrolterra.blogspot.com

Enviado por:
Lupe Ces
-lupeces@gmail.com-
28 de novembro de 2012 23:40
http://lupeces.blogspot.com
__________________________________