No 34 aniversario da morte de Moncho Reboiras, moitas son as organizacións de esquerda nacionalista que convocan actos para reivindicar ao Compañeiro Moncho, ao seu legado e o seu significado. A súa morte tráxica, tiña só 25 anos de idade, morrendo asasinado no nº 27 da Rúa da Terra logo dunha persecución de madrugada por varias rúas de Ferrol, tivo porén unha importante carga de entrega solidária e mesmo heroica, pois posibilitou, deste xeito, que poideran fuxir Elvira Souto Presedo e Lois Rios Paredes militantes da UPG que con el vivian. Mais a figura de Moncho Reboiras non pode ser afastada do seu tempo. Ese 12 de Agosto de 1975, a dictadura amosaba os seus últimos colectazos antes da morte do dictador, que se produciría o 20 de Novembro dese mesmo ano. O dictador, non ía dar o seu último alento sen antes asinar as últimas execución, as do 27 de Setembro 1975: tres membros do FRAP [Xosé Humberto Baena Alonso, José Luis Sánchez Bravo e Ramón García Sanz] e dous da ETA [Juan Paredes Manot e Antonio Otaegui Etxevarría].O 12 de Agosto do 1975, non aconteceu só a morte de Moncho Reboiras, senón que foi o inicio dunha forte represión sobre o nacionalismo de esquerdas, con detencións masivas, torturas e exilios forzados. Agosto do 75 foi clave porque o nacionalismo soubo resistir a esa represión. Así naceron novas fontes, novas forzas que construiron un tecido nacionalista de esquerdas, tanto político, como social, sindical, ecoloxista, cultural, ... Non se pode negar o papel historico de reorganización das forzas nacionalistas de esquerda que cumpriu a UPG nese momento. Persoas tan significativas como Camilo Nogueira, Xan Carballo, Ramón Muñiz, Mendez Ferrín, Ramón Muncharaz, Elvira Souto, Manuel Mera, Margarita Ledo, Etelvino Blanco, Fernando Acuña, Lidia Senra, ... e centos de persoas que deixaron e seguen a deixar un legado de significada importancia para o noso país, acolleron-se ao espazo de compromiso e militancia que significaba a UPG. Agosto do 75 sinala unha etapa decisiva onde un sector do pobo galego reinicia o camiño da autodeterminación, a vontade de ser pobo, de ser nación, de ser país, ...
"Que importa que nos matem si deixamos semente de vencer"
XOSÉ RAMÓN REBOIRAS NOIA,
Amigo, camarada, estrela
vermella-azul-branca no mencer
prometedor da nosa patria,
heroe en tempo de traizón,
corrupción/covardía,
martelo, proletario,remo
con saibo a sal e iodo;
fouce labrega/vingadora;
espiral que vén dendes do
fondo do tempo para abrirse
en claridade e futuro.
Ti eresa pedra mestra para
re-edificar a a nosa casa.
Puideron segarche a vida,
¡ouh, Moncho, meu irmao!,
a – se – si – nar – te.
O que eles non puideron,
nin poderán endexamais,
é arrincar/esmagar a
semente que deixache
esparexida no corazón
do pobo, na vixiante
concencia colectiva e que
xa está a agromar en
patria-ceibe/socialista.
Esta é, ¡ouh, camarada,
amigo e irmao
inesquencíbel!
a túa vin-gan-za,
a nosa vinganza i-ne-xo-rá-bel.
MANUEL MARÍA
(«Poemas para construír unha Patria», 1977)
Na nosa comarca dous actos van ter lugar en Ferrol o vindeiro 12 de Agosto, un organizado pola UPG, partido senlleiro do nacionalismo de esquerdas [1964-2009] que está integrado no BNG e outro dunha organización independentista nova, dos ultimos tempos, Nós-UP.
O da UPG terá lugar a partir das 7 da Tarde:
Moncho Reboiras: 34 aniversario do seu asasinato
Actos conmemorativos: Mércores 12 de Agosto de 2009. Ferrol
- 19:00 h. Concentración na Praza de Armas [diante da casa do Concello de Ferrol] Saída cara ao portal da rúa da Terra onde foi asasinado Moncho Reboiras e ofrenda floral. canto da Internacional e baixada até o cantón.
- 19:30 h. Intervencións políticas no Cantón:
- Nemesio Barxa, Avogado e defensor dos presos da UPG en 1975.
- Xesús Sixo Fernández. Secretario Xeral da CIG.
- Francisco Rodŕguez. Secretario Xeral da UPG e membro da executiva Nacional do BNG.
- Ao remate, canto do himno galego.
Neste ano 2009 Reboiras vai obter a declaración, agora xa de xeito formal e legal, de recoñecemento persoal e reparación por ser vítima do franquismo. este feito está presente no enfoque da homenaxe que a UPG lle tributa ao martir galego.
Unión do Povo Galego - UPG
Co gallo do cabodano do seu asasinato, o 12 de agosto de 1975
A UPG e a Fundación Bautista Álvarez preparan un libro sobre Moncho Reboiras
A Nosa Tera - Redacción . A UPG e mais a Fundación Bautista Álvarez de Estudos Nacionalistas traballan na edición dun libro de artigos ao redor da figura de Moncho Reboiras que sairá do prelo o 12 de agosto co gallo do cabodano do seu asasinato. [+info]
O acto de NÓS-UP terá lugar a partir das 8 e 1/2 da Tarde:
12 de Agosto: XXXIV aniversário do assassinato do Moncho Reboiras
No próximo 12 de Agosto, a Assembleia Comarcal de Trasancos de NÓS-Unidade Popular convoca actos em lembrança do militante comunista e independentista, José Ramom Reboiras Noia, Moncho Reboiras, no XXXIV Aniversário da sua queda em combate sob as balas fascistas da polícia espanhola naquele Verao de 1975 na Rua da Terra.
O jovem revolucionário foi um dos principais impulsionadores da luita pola libertaçom nacional, pioneiro da organizaçom sindical de classe em chave nacional, dirigente comunista e responsável da frente armada da UPG. Moncho Reboiras foi um exemplo de coerência revolucionária e atitude combativa até a sua morte. Em palavras de Bertolt Brecht, Reboiras é um “dos imprescindíveis”.
Trinta e quatro anos depois, a mesma polícia fascista que assassinou Moncho espanca operários do metal em Vigo e reprime a juventude independentista no nosso Dia nacional. Porque trinta e quatro anos depois, muitas cousas nom mudárom, falar de Moncho é falar de presente e o seu projecto revolucionário continua mais vigente do que nunca.
Por isso, a esquerda independentista organizada em NÓS-Unidade Popular convoca para a próxima quarta-feira, 12 de Agosto, às 20.30, umha concentraçom na Rua da Terra de Ferrol, em frente da porta onde caia o patriota galego. Além da tradicional oferta floral, intervirám o Porta-Voz Nacional de NÓS-UP Maurício Castro e Carlos Garcia, Responsável do Grupo de Base de Trasancos da organizaçom juvenil BRIGA.
Ferrol, 6 de Agosto de 2009
Assembleia Comarcal de NÓS-UP em Trasancos
Outras forzas políticas conmemoran o 34 aniversario da morte Moncho Reboiras con actos noutros lugares da Galiza:
________________
